Ka Pai Sam Meh

Ka rualpi tamsawn cu Hong kong tleirawlpawl bangin sam hnuailam tawi, a tlunlam sau, leu tikih khir thei ding in an met. Thawkkhat laicu Hongkong sammeh timi a rak laar ngaingai. Samzuah theicu mi’h uar le ngaisan vek a rak  si. Asinan, ka pa cun Hong kong sammeh a duh hrimhrim lo. Mipa samzuah timi a pomrem thei zawng a si ngelcel lo. Ka rualpipawl vekih samzuah ka dil tikah “mipa cu sam tawi melmiten” an um ding ih nunau cu sam an zuah ding’ tin olsamzet in i sang lohli theu.

“Malten’ kun awla na hna kai phah aw, na cang tamtuk pang le na hna ka lo cep ngah ding” in ti. Betbet ah blaze hmang loin a kaihci bil tak, a zik canawlo thawn ka beksam sen helhelin I vel rero. Ka pai kaihci hmanmi hi hlanlai tapawl a si. A tum si, a dum zet bet fawn.

“Ka pa, bul tuk cun i met hlah aw, a mawi lo” ka ti. Ka pa cun “samtawite na kaih, samsau cu hrik neihnak, cun a than tla na thang theilo pang ding” in ti. Keimah theh ih a meh ding mi ka naupa cu ka kiang ah ralpi veihnihnak ih lut ding bangin a rak ralring cia. Sammeh tinten’ kan sungzaten kan buai.

A cancan ah ka pa ziaza a theibiktu ka nu cu kan kiang ah ra in, “Nuam tete in met aw uhla, nan bang tuk pang ding” in ra ti. Ka pa hi mi fek tak, thinsau tuklo, mizamrangzet le fim tak a si. Ka pa a thinheng caan ah ka nu cu daiten a um. Ka pa hi a thintawi zet ko nan a lungawi lohli theu. Ka pa a thinheng taktak caan ahcun thawthaw lo, mit theplo le cangloin kan dai khepkhep. A lungawi caan ahcun sal luat bangin zalen takin kan aukio.

Ka bopsam lamtu cu har tuk loin i met theu. Asinan ka beksam kan meh tinten ka mithli malte tal cu a for a tul theu. In kun tir tuk nakah ka el naa, ka hna kaih phah atul fawn, ka kut a zawng. Ka hnavun i celh ngah zawng ah ‘A naa’ tiih ka ausuah lo ahcun dikzet in a met ah a ruataw ding tiah ka au zukzi theu. Ka sammeh sung hi suimilam hrekkhat hrawng a si ding nan meisa ih em bang tukin ka ruat aw.

Ti ka kholh, thlalang ka zoh. Aw! Ka pa hin sammeh daan style pakhat vial a thiam. Cucu “khaute lumeh” a si. Kan unau hnihten’ rualpipawl cun khaute lumeh tiah in auh theuh. Ka nulepa cun nan kaih tuk in ti. Tuni ah ka ruatsal cuvek thu pawl. Acaan le ka pa hi Abraham Lincoln vekin lungput a rak nei ti ka fiang. Miin an tuah tivek men ah thil in rak tuahter ve dah lo. Ka paifa si ding rori ah in rak ser ringring ti nuam tete in ka fiang.

Mipa lo bangih samzuah hnakcun khaute sammeh a thasawn ih Hong Kong sammeh hnakin ka pai sammeh design a mawi deuh. Ka pa cu tuni tiang mipa samzuah a remti thei hrih lo. Tu hi ka sammeh a cu sal ih i met sal ding ah a hnen ka feh ding. Ka pai sammeh design hi ka ngaisang emem ih ka sam lawng i met nawnlo ding, ka thinlungput pawl tiang ka met ter theh ding. Asi, mi thencun khaute lumeh an ti ding a sinan a rei vivo ding ih kaute lumeh hi leitlun ih sammeh mawibik best design ah a cang ngeingei ding a si ti zumnak ka nei a si.

Comments

comments

2 Comments

  1. > Delhi Commonwealth Games 2010 – Mi 446 in siar.

    > US Parliament Ah Democrats Party Tla Niam:- 243 in siar

    > Kawl Ralkap In Nehnak Co; Mi 25000 Tlan!- 346

    > Barak Obama Par Ah Bush Thinheng Sosang:- 347

    > Burma Ram HrilawkNak ah Ralkap An Cak- 313

    > Guest258 (guest): Ka Pai Sam Meh – 55

    > Tui zarh sung ih siar duhbikmi

    Tuizarh sungih siar tambik hlah cu:
    Kum 15 Ih Sex Hman Ruangah Siraw

    http://chinlandtoday.info/index.php?s=Kum+15+Ih+Sex+Hman+Ruangah+Siraw

  2. Mipa sam sau hi ningzakza a si tiah Baibol in in sim. Cun aatthlakza a si in ka hmu ih khawmnak ih tin in kan sim awk seh la cu kan neh thei ko ding tiah ka zum. Khristian lo cu kan um lemlo ih pulpit tlun ih samsau pi thawn tumring tum hi kham thei cio seh la cu olten kan neh mai lo ding maw.

    Ka lung awi.
    Salai Ku Ku.
    Dukkhahte Malaysia.

Comments

%d bloggers like this: