Ka Pai Fapa – Part (III)

KA PAI FAPA- Part (III)

Tui zingpit ka hawng tho cu ka taksa ruangpumhlum in an na seksek thluh. Mizan ka mang ah muma (muthla) in in rak nam. Zing ka thag cu ka ruat ih ziang ruangah sipei khavek mang lamlam ka man? Thlacam loih ka ih ruangah a sipei maw? Maw, kan dung zarhnih sung kha Bible siar lo, thla khal cam mumal lo, biakinn khal pan cuca lo ih ka um ruangah teh a si pei maw? Khavek mang tihnung le rapthlak mang ka mannak ding san tiah puhmawhding ka hawl.

Mizan ih ka manmi ka mang ka lo sim ding. Aih! Tih le a nung, har le a har. Tu ka ruahmen hmanah ka hmulsia an hawng tho suarso thluh hngal. Zan ka mang ah cu thil dumpi, minung vek cu a si ko. Cumi cun in nen ih ka cang thei lo. Ka thaw khal ka thaw thei lo. Ka nu le pa lole ka unu kawh ko tum rero nan ka “aw” khal a suak thei lo. Uico thattupan ui a thah ding tikah’a thaw thaw thei loin thi lohli seh’ ti a duh ruangih buri dip sungih a san vek rori khi ka si ko. Hui…..ha! a har tuk! khavek mangsia kha tu a hmaisabik ka mannak a si. Netbik khal si hramseh.

Ziangruang ah khavek mang ngelcel ka rak man sipei? Zing ka hawng tho cu ka takpum zaten a na, khawi tawkbik a na hleice ti khal ka thei lo. Hmaiphiah ding cuncoka lam ka pam. Ka ke kar khal a dik thei nawn lo. Ka kaikua, ka cawn, ka ke zaphak lam tiang khal an na thluh. “Hah….thiau” ka pai’ hah-thiau awn ka theih ve te’n “Aw…mi zan ka mangsiatnak san le ka taksa ruangpumhlum ih a nat seksek thluhnak san cu, mi zan kha ka Pa a thin ka ti heng ih fungfek thawi’ ramsa that ding men bang ih a rak thawi ruangah si maw” ti’n ka vawn mang dukdi. Ka pa cu mi tampin “fate kilkhawidan le a thiam, khawtlang lam khalih hman zetmi a si fawn, mi farah le mi nauta tete zawn ruah hna le a thiam ih mi tha ngaingai a si” an ti ih an upat nasa.

Si ko, ka pa vek mifel, mitha cu upat tlak ko ti ah ka upat ve tuk. “Mitha thinheng cu tih a nung” an ti vekin mi zan ka pai’ thin ka ti heng kha cu! Ka pai mithmai lip siasia, uico mi keu zik men bang le a mit sen remrem khawisia mitmen men bang cu ko tih tuk. Kiosa rual lek ih sukneng fate men bangin ka pai’ mithmai ka zohmen ah ka thia. Khami fang ah cun ka pa cu ka pa tla a bang ka ti nawn lo. Ziangahtile ka pa in kha vek mithmai a rak nei timi ka rak thei dahlo. ‘Ka Pa’ ti ih ka kawh mi cu ral pakhat vek ih zohnak mithmai thawn i zoh ding ih, ramsa that ding ve tluk lawman in in rak thawi ding timi cu ka rak ruat ban dahlo.

Ka pa cu a cozah hnatuannak lam in zarhhnih sung khual a tlawng ih inn a ra tlun vete’n a phur hman thum ta lo rorin hokhaw in thawinak ding funghreu a hawl cih. Zingruangah ka pai’ thin cutluk lawman in ka hengter ti na thei duh maw? Na thei hiar zet ko ding ka zum. Siko, kei khal ka thil tuahmipawl hi ka pai’ duhlo zawng hlir an si ti thei cingin si ka tuah totho. Ka pa hi mifeltuk a si ih ka upat. Mikhal in an upat. Asina’n ka pai fel tuknak in ka phur i ti rit tuk. “Fel luan tuk” ti hi a um thei na zum maw? Hui…. ha ka pai’ mizia ka lo sim ding maw. “Mai’ pa rori tla relse rero” ti’n in rak hmu thiamlo deuhtu tla nan um men thei. Ka irawmsung ih thuhla pawl hi ka lo ruah duh ve hrimhrim. Ka hnipuan a tet, kan kedamvek a siat tikah bi-zu sungah thate’n kan kilkhawi hlenhli dah sawm? Hnawmpung ah kan hlawn theu si ko lo maw? Cuvek thotho in ka thinlung sung ih ka phurritpawl cu nanmah rualpipawl kha hnawmpung ah hmang in ka rawn lo tlawn duh ve male.

Asinan ma ka pa hi cu a ti kherkher tuk. Zing can her 9:00 ah tlawng kan kai thawk ih zanlam canher 3:00 ah kan bang theu. Kan inn le tlawng inn cu a hla awk tuk vak lo. Minute 20 tluk feh a tul. Cutikah, ka pan tlawng kha zing tuk ih feh a tul lo. Inn in 8:30 hrawng ih nan pawk le a tawk in ti ih thaithawh ka ei zo, tlawng feh kan man zo, rualpi khal in tlawng feh in sawm cece zohnu  khalah ca her 8:30 a kim lo cun inn in ka suak thei lo. Ka pa in in singlo. Vei tampi cu rualpi dang vekin tlawgn tla zingte’n feh, tlawng inn ah rualipawl thawn lek ih nuam phah ve sehla ka duh tuk ve theu nan. Sa suami rim hmuite hmuah hnim ngah ta belbel ih ei ngah cunglo vek khi ka si mai.

Cun, zanlam khal le canher 3:00 ah tlawng ka bang ih 3:20 ah inn ka thlen tengteng a tul theu. A simbik 3:30 tal ih inn kan thlen lo cun thuthenak zungah thuthentu ih thubuai neitupawl hnenah thu pakhat hnu pakhat a suh bang khan ka pa cun zing ruangah kan tlungsim? Lamzin ah ziang kan tuah phah? Zo thawn kan tlung tlang? Ka thil tuahmipawl teh zo thawn kan tuah tlang? Tipawl cu pakhat hnu pakhat in rak sut vivo.

A dang a um bet lai. Ka pa in “ mi pakhat hi a kawmmi a rualpi zohin zovek minung a si? Ti mi cu sim a theih mai” in ti ih ka tlawngkaipi lak ihsin kawm ding le kawm lo ding rualpi tiang in thensak. Ka pan “kawm lo ding” in timi rualpipawl thawn tlawng ka feh tlang, tlun tlang can veihnihnak ah ka pa cun “khavek rualpi na kawm le cu ……..” in ti. A har ka ti tuk. Ka tlawng kaipipawl khal duh vekin ka kawm ngam hailo. Ka pai’ kawm in sian lo mi rualpipawl thawi lamzin kan feh tlang canah rukru in mi thil a ruk tikah mi in in hmu pang ding ti phang in a thin a phaw keke bang khan keikhal ka pa in in hmu pang ding ti ka phang. An mai’ hnenah le “nang lo kawm cu ka pan in sing lo” ti’n ka sim ngam vukvi fawn lo.

Sim cengmangah ka lo sim lawlaw ding. Ka pa hi biakinn ih kan khawm can khalah nauhnak dang hmuah khawmlai ah an zun a suak ih an va thawh duak khal le an nu le pa in ka kawk dah lo. Ka pa cu “Biak inn sung na luh hlanah na zun thawh ta aw. Biak inn sung luh hnuhnu ah suahvak hnuahi ka duh lo. Na zun a suahtuk taktak khal le biakinn sungah thlau men aw. Khawm theh le kei mah in ka thianfai thluh sal mai ding” in ti. Si ko ee, ka pa cu kawhhran ih hman zetmi mi pakhat a si tikah khavek in a fa le kilkhawi cu a tha ve ko.

Na ning men thei na’n ka lo sim peh lawlaw mai ding. Ka supawknak a rei tuk thlang ih tucun ka celh nawn lo rori. Ka puak kuai thluh zik thlang. Kanmai inn ah TV tla kan nei ko. Asinan tlawngkai can ah cun ah cun ka pan TV zoh in siang dah lo. Kan TV cu zoh thei lo dingin thlalang thawi tuahmi bi-zu mawi emem sung ah cun jtawh a kalh hlenhli. TV zoh ka duh can ah cun innhnin rualpipawl ih inn ah ka va zoh thup theu. ‘Mai’ inn ih TV um rori tla zoh paihlo” tivek ih in ti le ka hnihsan cengci hai men theu. Ka inn ih TV cu tlawng kanpit can lawng ah kan zoh thei ruangah thal tlawng a rawgn pih ding cu ka hngakhlap thei ngaingai.

Culemaw  a tanglai. Kan hmuan sung ah kawlthei, mekei, sapthei, zamer sahawk….tvp thingtheirah tampi kan nei. Cuvekpawl khal kan mai’ duhduh in ka hiar canah kan lo in ka ei thei lo. kan sungkua ka kim can fekfek lawngah ka lo ih kan ei thei. Ka pa cu sungkua kim te ih thil tuah tlang, ei tlang hlerhlo khi a ngaina pan teh maw? Nan theithiam ko ding ka zum.

Ka pa kha a cozah hnatuannak lamih traning an nei dingih zarhhnih sung khual tlawn a tul thu ka theih cun ka riah a se ding nan sum maw? Suitum sar  ngah tla ka bang pang maw? ka ti aw lamlam! Ka pai’ khual tlawn sungah ka unu kha a pum a na hruak ih rin lopi’n zato innpi a thleng. Ka nu le ka unu kil tulah zato inn lamah a can a cemter. Zan ah keimahte inn ih riah ka ngam lo ruangah ka nu in kan innhnen ka rualpi pahnih kha in riahpi ding in a sawm hai. Thal tlawngpit a si lo na’n ka pai’ tawh kha ka rak lo thup ih TV kha duhtawk kin ka rak zoh. Ka hnipuanpawl le ka duhduh ah ka thendarh thluh ih, ka tlawng cabupawl khal kan tohkham parah kn khat zelzel thluh. Kan hmuan sungih thingtheirah ei ka cak tuk nan kan sung kim lo ih keimah le ka rak ei le ka pan in kawk ding fawn. Cunah, ka hmuancar tei’ta ka va ruk lawlaw.

Ka pa’ um lo cu naum ka ti tuk! “thangkam tui’ thang sung in vate a suat bangin. A tu kei khal ka luat ka pai’ kuat sung ihsin….” tivek kha a si mai! Ka pa a um lo cu ka duhduh in ka ei, ka in, ka duhduh  in rualpi ka kawm thei a nuam tuk ee.

Ka pa a ra tlung thlang! Inn a thlen hlan ih sin kan hmuancar nun an thil ka ruk thu a rak sim. Inn sung a rawng lut cun kan inn le ka hnawkter thluh fawn. TV le ka rak zoh lai. Ka pa cu a phurhman thum ta lo in funghreu a hawl hngalnak san a si.

Pacang pakhal si ve si mai fa rori in a duhmi a dil ngam lo, a tulmi a sim ngam lo ti mi hi ‘pacang tha, patling’ an ti maw? A uar teh nan uar maw? Ka pai’ thu ka lo sim thluhzo. A khualtlawn sung ih ka umdan teh ka mawh tuk tin nan ruat maw? Ka pavek pafel, patling nei ve awla na duh maw? Kan in sung ah ka pa thawi um tlang hi ‘ a nuam ka ti tuk, ka ngaina tuk’, ti sehla teh na zum kem? Si ka pai dinhmun nan ruah rual ah kemai dinhmun khal in ruahtel ve ka duh. Ka pa maw dik lo deuh, kemah. Maw kan pahnih?

Mai (Zilthli) Lal Nei Thluai

(Visited 83 times, 1 visits today)

Comments

comments

Comments

%d bloggers like this: