Ka Pai’ Fapa (part 4)

6404186255_6e973caac5_oFarah hi ka khawptuk thlang! Ka nauhakte lai ihsin lai ihsin ka nulepa in ka duhmi thilri, hnipuan khal in rak leisak thei dahlo. Tlawng ka kai lai khalah cabu, cafung von lei duak ka t’ul caanah sumpai vun lak duak ding an nei dah lo. Ka nin rualrual in ka thin khal a hengtuk t’heu. Tlawngkhuan pek  a t’ul caan khalah netabik ih tangtu ka si ringring. A cang ahcun ka ning khal a zak zet.

Ka nulepa hi an va santlai lo lawman ve!  A hleice in ka Pa hi a santlai lo zual ka  ti tuk. Ka Nu cu thiam a tah t’heu. Cucu a hnat’uan bik  a si mai. Ka Pa cu lo a tuah. Lo a thlo.A lo sung ahcun thingthei kung tampi a cing. An rah tikah, a rah pawl a zuar ih kan innsang in cawm.

Cuvek innsang dinhmun men kan si tikah kan mahte inn khal kan nei theilo. Mi innhnuai, innkhan fate sang in kan khawsa. Kan umnak inn cu a kaulo zet. Ka Nu in veikhat hmun a phiah le ihnak khan, mileng khan, le kan coka lam tiang khal a fai cih thluh.

Ka rualpi pawl ih ‘Pa’ vek Pa nei ve sehla ka va cak ve! Ka rualpi pawl ih Pa le pawl hmuah, an fa le tlawng an kai ding le t’ukt’ak leinak dingah ti’n paisa an t’henta t’heu.. kei ka Pa cu cuvek t’hen ding lamlam cu rello, ka cabu leinak ding rori hman in pek theilo can a um phah t’heu.

Ka rualpi pawl cu an Pa le pawl in tlawnginn ih ca kan zir hlei ah tuition an kaiter bet. ”Ka Pa, kei tla tition ka kai ve ding maw” ka ti. le ”Sumte, nang cu Pathian in cathiam theinak a lo pe si, sun ih nan zirmi zaanah zoh(thiam) thluh thei tum ringring awla tuition kai lo khalin ca na thiam thotho ding” in ti. Ka thinlung te’n ”tuition man pek ding na neih lo tukah, cuti’n i lem rero hlah!” ka ti thup.

Ka rualpi pawl ih Pa le pawl cu lamzin feh phah ih tawn khalle hmaizah an um emem. An hnipuan hrukdan le a thiangfai verver fawn. An mah le nisa, ruahsur tuar loin innsung hnem ah to ih pumcawmnak hawl an si. Culaiah ka Pa le t’awp hniaphniap. Ruahsur khalle tipuan sin phah, tawngphu dip pai phah ih lo feh thotho. Bek thliothlio in. Arte tidai sung ih tlami men bangin. Kedil le kak herher bet. Ka Pa hi midang Pa pawl thawi taht’himcun a hmuh le tawn a hahdamlo nasa.

Ka Pai’ hnenah ”Pa, ziangah saw midang (U Sui Lian) vek pawl khi, zung ahkhin an bawi emem? Anmah le hna an t’uan lai ka thei dah silo. An lian emem fawn. ‘zung ka kai’ an ti ih an tuah t’ulmi pohpoh le midan an fial hluahhlo men. An mah ngai cun, zianghman an tuah dah fawnlo. An bawi ngah si! kei tla kha vek si thei ve sehla…..” ka ti.

“U Sui Lian, khai Nu Neupa vek kha maw? Khavek in nang khal na bawi thei ved hokhaw. An ni tla ca an thiam ruangah khavek hnat’uan t’ha an ngah thei. Nangkhal, ca na zuam ahcun  khahnak ih bawi sawnah na cang leh ding. Curuangah hokhaw theilo cingih tlawng ka lo kaiter rero hi!” in ti. Ka Pa cun tlawngkai ih a t’hatzia, mi bangin sumpai’ kan neih ruangih tlawng kai ka si lo nei lo le thei lo cingih tlawngkai ka si ruangah ca ka zuam a t’ul zia pawl in sim ciamco. Ka Pai’ t’ongmi pawl cu kamkhat hman sawnlo in ka ngai khiaukhi.

Ka thinlung sung taktak ih si cun, ka Pai’ t’ongmi pawl hi ka lung a kim thei hrimhrim lo. Ka tlawngkai le ka cathiam ding ta rori a thupi bik ah a ret taktak a si ahcun ziangah, a mah teh tlawng t’hate’n a
rak kai ve lo? Ka Pa cu phunhra sungpa asi. Ziangah, phunhra atla ”ka on lai hlanlo” ti’n a rak kai bet ve lo? Ka Pa amah teh ca rak thiam ve sehla, midang bangin, hnat’uan kutkaih t’ha, sumluhnak t’ha a nei
ve pei ih, mi bangin kan lian ve pei cu! Mi kan bang ve deuh pei cu!

Ka rualpi pawl vek si sehla cu tlawngkai tla cu a phur um tuk ding si. An ni cu an duhmi pohpoh an lei thei. Hnipuan khal a thar pakhat a suah cun an nei ve hngal vuahvo. An rilrawn caanah an pumpuar lohli
thei dingin, pakhatkhat leinak ding hmancawp sumpai an nei ringring. Culaiah, kei cu ka tlawngfawm siarlo ka neihmi hnipuan cu khawmnak, tlawngkainak, puai fehnak, lennak, inn umnak ti ih t’hen ding khal a um hran lo. A zate’n an bangaw thluh. Ka angki hlum neihmi tla cu “ka phaw” tluk a si ko. Ziangtik lai caan khalah cumi ringring a si mai.

Mi in hlavang ih in rak hmuh khalle ka angki in in hminsin ih “Sumte a si” ti in thei thei mai. Ka ke-dam khalle la-bar kedam a t’angbik pawl a si. Kumkhat ka hru zo na’n siat khal a tum hrihl riai lo. Kedam hruk bang hruk ringring khalhi ka ningtuk thlang. A thar lei ka duh ruangah ka kedam cu k nulepai hmuhlo sungah namte thawn a hri ka at cat. “Kapa, ka kedamhri a cat.A thar lei a t’ul” ka ti.  Ka pa in a thar in leisak ding hmang ka ti laiah  a  zialo khop mai , T’him le pat  lakih i t’hit sak. T’hit copin i hrukter thotho. A hri ka ahcat hlan ka ngai sawn riangri.

Veikhat cu mikhul kan nei. Mikhual tiah ka Pai’ rualpithabik a si. “Ka rual” an ti aw veve. Amah cu fate pathum a nei zo. Sumdawng a siih a lian ngaingai, amahte inn a sak. A innsang pawl khal mai’ duhduh ei thei , in thei an si. Amah cu ‘IangIang Pa’ tin an ko theu. A hmin cu ‘Sum Luai’ a si ih kei cun Pu Luai tin ka ko.

Pu Luai cu ka nel ve tuk. Sumdawng ti cu kan inn a then phot cun hnipuan tivek hi in sum deuh ringring.Ka nu le pa in hnipuan in leih remcang theulo ruangah Pu Luai ih in summi thawn X’Mas kan hmang theu. Ka pa teh hi ziangah si pei Pu Luai vekin sum a dawng ve men lo. Ka pa hi ‘aa’ ka ti ee Pu Luai hnen ihsin sumdawn tivek tla zir ve awmtak. Pu Luai thawn tla sumdawng tlang men sehla. Pu Luai cu a rual rori a si ko ual. Rual aw ciocio ih pakhat le zingtin lakphak dawrih to, pakhat le buhfai suan ding a cem cuhco khalih lei betnak nei cuang lo.

Zanriah kan ei khawm, cule ca ka zoh. Ka pa cun ka cazoh i kil, cazoh ka theh in sungkhawm kan tuah.  kan theh in ka Nu thawn kan rat it sung. Ka pa le Pu Luai cu thunuam an rel rero.Thlatang a si vekin
meipung an ai phah ah kuak an pak vohvoh. An tong a thaw ngaingai.

Ka nu cu a itthat a thaw nasa. A thi thlepthlep. Kei cu ka Pa leih tongmi ka rat ngai thup. Itthat thaw zet bangin ka it ziarziar. Ka pa in Pu Luai hnenih a simmi pawl ka theih cu ka lung a zur, ka mitthli kham theihlo in ka biang parah a rung luang zurzo. Cucun kan farah tuk khalhi ka pa ka mawhthluk nawnlo.Ka pa a ummen ka hmuh khalle ka zang a fak ngiongi tuk.Kapa hi ‘PA’ ti ih kawh dingah tling ka ti tuk.Ka Pa vek Pa ka rat neihngah hi vantha ka ti aw tuk thlang.

Pu Luai cun ka Pa cu sumdawng tlang dingin  a sawm. Ka pa cun ” Rual, in duhsak,ka zawn i ruahnak parah ka lung a awi. Kai khalin tui na hnatuanmi hi na bansan thei ding ka lo beisei ngaingai.Cozah pawl hmanin an duhlo ahcun Pathian cun a duh ve lem ziklo Hmi hnatuan na bansan ruangah pathian cun rilrawng khalin a lo um ter emem lo ding. Cun fate tla pathian in a lo pe. Na fa le tla na tawlawm phah a tul hokhaw. Bible khalah maw Nu le Pai thatnak ruangah an tu le an fa tiang thlawsuah an co thu, an nu le pa, pi le pu pawl thatlonak ruangah an tu le pawl sualnak nei riailo ih camsiatnak, vanduainak an ton thu pawltla kan hmu thei.Curuangah bansan hrimhrim aw. Hivek mi siatsuah theinak sii thalo na zuar ruangah na fa le tla mawh neilo in cawhkuan an tong leh pangding ti hi ka lo phansak ngaingai hokhaw, mah le mah kan siih hmaisong aw lo mai sehla.

Kan pahnih in phunhra onglo veve kan si.  Kei cu phunhra ka on lo tlahi a tuar naa ka ti tuk. A naa na ti ve ka ring. Cathiam lo ih poi zia cu kan tep veve ko.Curuangah kan fale tal cu cathiammi kan siter ngenge a tul hokhaw.Culole an hng upat tikah kanmah vek cekci ah an cang ding.Milak an tlang ban lo dingih mi dungah an tang vivo dng. Cun kanmah in cathiam dingin kan rat somso lo ruangah kanmah NulePai hnen riangri ah an ning a hangleh ding, in hun hua tla a si mai thei. Pakhat ah kei ka pom dan cu  Nu le pa hi kan farah, kan aa, kan santlailo a si hmanah  nun thianghlim ten nungin pathian tihzah phot
sehla , cucun kan fale cu nu le pai’  zar rori ah pathianin thlua a suah ding ti a si.

Kai cu ka fa le pawl hnen khalih ka sim ringirng mi cu  ‘Kei cu ka thih le mi vekin  cumi, khami ti ih lo rohta ding ka neilo, asinan ka lo rohta mi cu tlawng nan kai ih phunhra nan ong, phunsang tlawng ihsin degree lukhuh nan khum, pumcawmnak hnatuan kutkaih nan nei, cucu ka lo rohmi umsun a si. Cun nan hrangah nitin thla ka cam. Ka dam ahcun zantin sungkua khwmnak, thlacam ka lo neihpi ringring.Ka thih hnu khalah ka thlacammi ruangah Bawipai thlawsuah nan dong tengteng ding ka tingam, Cucu ka lo tanmi ro a si.’ ka ti heu hai” a ti.

Ka Pai tongmi pawl cun ka thinlung cu Fei bangin i sun. Asi ngai ! Ka Pa hi thi bang sehla sumsaw, inn le lo, thil le ri Ro tan ding in neilo. Asinan cuhnakih sunglawi le ropi sawn ro in tanta.  A nuncan, a ziaza, a lungput pawl hrimhrim hi mangbangza ngaingai a si.

Kum le caan a herliam vivo. ,,,,,,,,,,,,,,,,,,,,,,,,,,,,,,,

Kei cu phunsang tlawnih degree lukhuh ka khuh ni a si. Sung le khat pawlin in lompi. Rawl ei khawmnak kan tuah. Lungawithusimnak ih ka relmi cu…………………….

“Tuini ah ka Nu le Pa vek  nu le pa rat neilo ningla cu tuvek dinhmun ka thleng thei lamlam lo ding.  Ka nauhak laiah ca hi ka rat thiamlo tuk. A,B,C ……….1,2,3……….. ngan le siar khal ka thiamlo. Ka pa in ka kut kai rori in cangan i zirh, casiar i zirh.Ca byheart tulmi khal ka pa rori in in byheart pi theu. Ca ka zoh le ka ihhmu pang ding ti phangah ka nu in Kawhra in rat rawhsak, vainiim in kan sak, ei ding pakhat khat in ngaihtuah sak ringring.

Tlawnginn ih exam kan tuahding tla ahcun ka nu le pa hi zingthlapit, caanher 5:00 hrawnah an rat tho. Meipung in muah sakih ai a theih in in ra t’hang theu.  Cuti rori in ka nulepa in in rat cawmdawl. Curuangah si hivek dinhmun ka thlen thei.  Ka Nu le Pa, Bawipa in damsaunak, nun hnangam daihnak thawn thlaw lo suah hram seh” ti a si.

Ka Pai Pathian duhtuk ruangah Pathian in thlaw in suah cuangin ka thei aw. Ka pa vek ziaza , lungput nei tu ih Fapa ka at si hi cu Vantha ka ti aw tuk.

Ka Pa nang cu ka neihsun na si, Kei cu nangmai Fapa ka si. Na Fapa ka si, Kei cu nangmai Fapa…………………
Date: 18,10.2012 (Thu) 11:54pm
By: Mai Zilthli Lal Nei Thluai

 

(Visited 105 times, 1 visits today)

Comments

comments

2 Comments

  1. hi thu hi thu ngai maw na phuah mi saw, siar nuam ka ti na sa, ka lung awi zet, Pathian in lo thlaw suah hrih bet seh.
    Ka lo sut nak san cu, Sumte len na ti aw, a net nak na ca ngan dan ah len, Mai Zilthli Lal Nei Thluai na ti aw fawn.

    Lung awi nak tam pi thawn
    lal ruang

  2. Siangte Senhri says:

    Thluaite,

    Na thuanthu te cu thinlung ah a cam.Midang nun zirh tu Thuanthu ťha zet a si.Siar a nuam in a man hla nasa.

Comments

%d bloggers like this: