Ka Pa Ka Hua

KA PA KA HUA

(Part 2)

 

Mai Sokhlei Par

 (1)

“Bawi Van Thang!”

“Awih, ka ra.”

184004_4482671306580_311561284_n

Ka Pa Ka Hua, ngantu Mai Sokhlei Par

Kum 5 mi Van Van cu an hmuan sungih tengtere kung hnuaiah a rualpipawl thawi nuam zetih an lehawk rero laifang, a pai’ aw a vun theih cun coplecilhin a tha hung khur cih. A pa in a hminngai thawi a kawh thlangthlang cun a parah thinhengnak a nei ti a theithiam mai. Curuangah Van Van cun a rualpipawl cu tansan in a pai’ hnenah a va tlan vurvo. A thin cu a phu dukdo. A thinlung cu lungphannak in a khat. Ziang tuahsual mi a rak nei si pei tiah nasa zetin a ruat ciamco. Asinan a thei si lo.

Van Van ih thlarau in a nu a vun hlam! Tu fangah a nu rak um sehla ziangtlukin a hna a ngam ding!

Van Van nu cu sumdawng a si ih inn a hlum man dah lo. Van Van pa cu mifel zet le strick zet a si ih Kawhhran khalah hruaitu a si. Sumpai hawl lamah thahnem lo hman sehla a hmannak lamah cun mififikzet pakhat a si. Van Van nu cu a sumdawnnak a tluan vivo hrih ruangah a pa sawn cu inn hlumin innsang tuanvo a rak la. Cutin Van Van cu pa lawngih fingkhawnak hnuaiah a rung um.

Van Van in a pa a vun hmu cu a lungtur hmuah cawl theh zik deuhthawin a ttih. A pai’ ken mi nuang funghreu cu zoh khal a zoh tha ngam lo. Van Van cun a pai’ kut kehlam cu a vun zoh;__ motor lem pakhat! Kan dung zarh ih a pai’ rak leihsak mi motor sente. Van Van cun a pa in ziangruangah hi motor hi a keng a si pei tiah a ruat ciamco. Asinan zianghman a ruatsuak thei lo.

“Hinah hin na kut bom in ra ding hnik,” tin a pa cun a ti ih Van Van cu a pai’ hmaiah a kut bom in a va ding. A pa cun Van Van cu thip zetih zoh phahin a ken mi motor lem cu Van Van ih hmaiah a vun hmuh. Cule,

“Hi motor lem hi ka lo  leihnak hman a rei hrih lo; ziangruangah a ke na ti thlong thluh man? Hmmm?” tin a sut.

Cu cun Van Van cu a mitthli a rung hal ttuamtto. A si ngai, a rualpipawl thawn an rak lek laiah a ke an rak ti thlong ngai. Tu cun a mawhnak a theiaw thlang. Curuangah tong ngaihnak thei loih leisinbih in, mitthli hal kiangkiangin, a ngui ringring. A pa cun,

“Na thil tisual mi na thei thlang si lo maw? Khatlam hoi awla na taw song hnik,” tin rum zetin a ti. Cuveten Van Van ih mitthlipawl cu a biang parah tiva men bangin an rung luangthla zurzo. A pai’ kutthlak ziangvek a si ti a thei tuk; ttihnak ruangah a lungtur cu a rung rang sinsinih a awm cu butlak men bangin a phu hluphlo.

A pa cun Van Van cu a mitsen remrem thawn ti hrelhrelih zoh phahin,

“Thil na ngen mi hmuah in ka lo leih thluh. Ziangruangah tha ten na fingkhawi lo? Paisa hi a lakih ngah theih ah maw na ruat? Hmmm? Khui, na taw song,” tin a ti. Cule Van Van ih banphur ah a kaihsak ih vuak rem dingin Van Van cu khatlam a herter vukvi .

“Papa, in vaw hlah.. in vaw hlah.. ka ttih tuk.. Papa, thil ka tise nawn lo ding. Papa, in vaw hlah.. in vaw hlah maw..”

Van Van ih ttap le raak ih zangfah a dilnak cu a pa cun hnasettun in a funghreu cu a vun hawi.  Van Van cun a ttih tuk ruangah a taw cu a kut khatlam thawn a rak kham. Curuangah a pa cun Van Van ih taw vaw ngah loin a kut a vaw ngah!

“Papa, a na.. a na tuk.. in vaw nawn hlah.. in vaw nawn hlah.. a na.. ka tise nawn lo ding.. ka tise nawn lo ding… maw, Papa…”

Van Van cun thir thlohthloin a va cu ngaidam a vun dil. A pai’ vuak ngah  mi a kut cu a nat tuk ruangah  a thing phahphah.

A pa cun Van Van ih ttap aw a theih cun a thinhengnak a hung sosang deuhdeuh a bang; a funghreu cu napin a vun hawi sinsin.

“Fik…….. Fik…… Fik…”

“A naaa! A naa… Papa.. a na tuk! In vaw nawn hlah.. in vaw nawn hlah..”

Van Van ih ttap le rak awn le a pai’ vuak awn cu an innsung ah a khat thluh.

“Na ttap ngam sapbai mawsi… na ttap hrih kem.. na ttap hrih kem?”

“Fik……. Fik…… Fik….. Fik….. Fik…..”

“Aiiii… Papa.. ka ttap nawn lo ding.. in vaw nawn hlah… Papa.. a na tuk… a na tuk… Papa..”

Van Van cun a pai’ vuak cu na a ti tuk ruangah a tur, a tal, a khir. Sihmansehla ttah cu rel lo, ai khatte khal a aisuak ngam nawn lo.

“Tuihnu na rim kem? Rel..”

Van Van cun a pai’ tong mi cu son ngaihnak a thei lo. Ziangruangah ti le ‘RIM’ ti mi tongfang ih sullam a theiban ve lo. A pai’ tong mi ‘Tuihnu na rim kem?’ ti mi ih sullam cu amah ten a zumhmangih a vun ruah tikah ‘Tuihnu na seter lai kem?’ tinak a si ding tiah a ruat. Curuangah ‘Seter lo ding’ tinak ah,

“Rim lo ding,” tin a pa cu a vun ti!

Cu cun a pai’ mithmai cu hmuh copcopin a hung danglam zutzo. Pawpi in zukneng fano deh dingih a zoh men bangin a fapa cu meisa bangih hliau vutvo thinheng mitmeng thawn ti ngerngerin a vun zoh. A pai’ mithmai le mitmeng umdan a vun hmuh cun Van Van cu a ttih tuknakah a tiral thluh tum. A pai’ zohnak mitmeng sungah vung ziamral thluh zik vekin a um.

Ziangruangah hitlukin a pa a thin a heng ciamco ti hi Van Van cun a ruahngaihnak a thei lo. Tuihnu cun a thilri a tise nawn lo ding tiah a rak sim nan ziangruangah a pa a thin a heng deuhdeuh si pei? A ruat ban lo!

“Ziang.. tin.. ee? Siat.. suah… hrih… ding.. ee? Hitluk milungruh fa cu.. khuiha, hun lo vawthat lawlaw hnik keng!”

A pa cun Van Van cu nuam teten a ra naih. Van Van cun a pai’ thinheng tharnak san a theithiam lo. A ttih tuknakah a pa cu mitmeng phaw kekite thawn ti hiohi ten a rak zoh. Ttihphannak in a tha a kaibet thluh ih a kaa ihsin ziang ‘aw’ hman a suak thei nawn lo; cang khal a cang thei nawn fawn lo. A pa in a parih a ra tuah ding mi cu cang lo khai loih ding ziarziarin ti ciauciten a rak hngak.

A pa cun Van Van cu a sam in a thimsak. Cule a hnuk vivo ih thing phar ah Van Van ih cal cu a va khawng… vei khat.. vei hnih.. vei thum.. vei li.. vei nga…

Van Van ttah ngaihnak a thei nawn lo.  Ai ngaihnak khal a thei nawn lo. A mit a thim thluh ih arsirual an ttek surso lawng a hmu; a lu khal a hit thluh.  Ttihnak le lungphannak ruangah thinlung mu le mal khal a nei nawn lo.

Van Van ih cal thihnai thawi a khah thluh hnu lawngah a pa cun a fapa a hremnak cu a tawpter.

Van Van cun a pa’n thinhengih thu a suh tin ten zianghman rak let nawn lo dingin a thinlung ten a hminsin. Ziangah ti le a thulehnak in a pai’ thin a hengter sinsin ti a zirngah zo. Curuangah zianghman tong loih ngui ringring hi a hrangah a himbik, a thabik tiah a zum.

 

(2)

lonely“Bawi Van Thang, ziangah homework na rak tuah lo?”

Tlawngsayamah cun a hmaiih kut bomih ding ngerngi Van Van cu a sut.

Van Van zianghman a tong duh lo. Thusuhnak leh cu mi thin a hengter deuhdeuh sawn tin a rak hminsin hnget tuk zo. Curuangah ngui ringringin a hmai cabuai parih sayamahnui’ funghreu lawnglawng a zoh ringring. Van Van in zianghman a son lo ruangah sayamahnu cu a thin a rung heng tum.

“Bawi Van Thang, ka lo suh mi na thei lo maw? Ziangruangah homework na run tuah lo ka lo ti cu?” tin sayamah cun vin nawnin Van Van cu a vun hro.

Van Van cun sayamah cu ttih cingin ti hliauhhlo ten a vun zoh. An sayamahnui’ thusuh mi cu a dik vek tei sim a cak tuk. Mizan a pai’ rak vuaknak ruangah a kut a na ih cafung a keng thei lo tiah sim a duh. A kut a nat tuk ruangah ca a ngan thei lo tiah theihter a duh. A pa in thing phar ih a lu a rak khawn ruangah a lu tla a na tiah a dinhmun dik tak rel a duh.

Aw, sayamahnu hin a dinhmun theihthiampi sehla ziangtlukin a duh!

Sihmansehla sayamah duhlozawng a si pangah cun vuak a tuar lala pang ding ti a phang fawn. Curuangah zianghman tongsuak ngam loin a mitkhumsukin a kunsal.

Cumi a hmuh cun sayamahnu cu a thin a rung heng thlang. Cabuai parih a ret mi funghreu cu a la ih cabuai cu napin a vun vaw fukfi. Cucun Van Van a thir dukdi. Lungphang zetin sayamah cu phaw kekein a vun zoh. Sayamah cun thinheng mithmai se zet thawn Van  Van cu a zoh ih,

“Aiii.. hitluk lungruhfa cu! Mai sayamah upat nak cang khal thiam lo.. nun lo sim na tul si hi! Na kut pharh,” tin a ti.

Van Van a lung a phang; a thin a rung thir dutdi. Vuak a tuar lala thlang ding!  Cumi a theihfiang veten a mitthli a rung hal cih. A ttih. A phang. A cal ah thlanfimpawl an rung pawt ttiamttiam. A kut le a ke pawl khal ttihphannak ruangah an rung vut cupco.

“Na kut pharh aw ka lo ti cu na thei lo maw? Hitluk lungruh thei teh!”

Sayamah cun huatnak le ningsinnak thawi khat mitmengpawl thawn Van Van zohin a vun hro bet.

Cucun Van Van cu sayamah hmaiah a kut cu a vun pharh ziarzo; asinan a mit cu sayamahnui’ ken mi funghreu par lawnglawngah a fu ringring lai thotho.

Sayamah cun a funghreu cu a vun hawi; cui funghreu cu ziangtikah a kut parah a rung tla ding ti ttihphannak thawn Van Van cun cui funghreu thlennak nak cu ralringzetin a rak zohthlun ve vivo.

“Phak.. phak.. phak”

“Aih.. a na.. a na..”

Van Van a hung raak thutthi. Cule thir thlohthloin a ttap ciamco. Sayamahnui’ vuaknak a kut cu mizan ih a pai’ rak vuak zonak kha a rak si!

Sayamah a mang a bang! A vaw na lo ti a thei tuk. Dim tei vaw na cingih cuti raak ih a raak cu a thin a heng deuhdeuh.

“Khazat te lo vuak ruangah khatlukih raak a tul mawsi? Na mi mualphoh duhdan hi!” tin a kawk ciamco.

Van Van cun sayamahnui’ thinhengnak san a thei lo. ‘Mualphoh’ ti mi tongfang khal a sullam a thei lo. A theih mi cu, a rak na cia mi a kut kha sayamah in a vuak bet ruangah na a ti tukih a raak. Cuvial lawng a si.

A run theihfiang mi pakhat cu a pa in siseh, sayamah khalin siseh, an vuak laiih a ttah le a raak hi an hua tuk, cuti a um le an thin a heng sinsin, ti mi hi a si.

Curuangah tuihnu hrimhrimah cun zoi’ an vuak khalah ttap nawn lo dingin Van Van cun a thinlung ten hnget zetin a hminsin.

Sihmansehla a theihthiam thei lo mi pakhat a um: cumi cu, a vawtupawl ih thusuhnak a leh khalah siseh, leh lo khalah siseh, ziangti’ a um khalah an thin a rung heng deuhdeuh theu mi hi a si.

A pai’ thusuh mi a rak leh ruangah a pa’n a rak hrem bet phah.

Sayamahnui’ thusuh mi a leh lo ruangah vuak a tuar phah.

Cumi cu a san a ruat rero nan a theithiam thei cuang lo. Upapawl hin an thusuhnak a leh hi an duh maw duh lo ti mi hi theifiang thei sehla a duh tuk. Culawngah vuak dem deuh dingih umdan a thiam phah thei ding!

(3)

“Van Van.”

“Awih.”

Van Van cun inn hmailam ihsin a pai’ aw a theih ve ten a rak sawn. A pa cu a vahnak ihsin a ra tlung thlang. Van Van cun a pai’ kawhdan zohin a pa in ziang thil simaw a run sum ti a rak theithiam mai. Curuangah Van  Van cu aipuang zetin inn lengah a va tlansuak turto.

A rak zum cia vek ngaingaiin a pa cun hni siamsiamin thil pakhat cu Van Van hnenah a vun pe.

“Heh, meithal ka lo sum. Na duh maw? Vun zoh hnik he..” tin hni phahin a pa cun a ti.

Van Van a lungawi tuk.

A pai’ thil pek mi cu a vun phorh. Meithal lem, battery thun pawl, vun kah ih eng zohzo, a phunphunih awn tthohttho thei, a vun hmuh cun a lungawi tukah hni hiamhiamin a pa a vun zoh.

A pa cun a fapa ih lungawi hmel cu zohnuam ti zetin a rak zoh ringring.

Van Van cun a meithal cu a vun kap ciamco. Meithal awn le mei eng zohzo in a tha a thoter tuk. Ding phahin a kap thul, to phahin a kap thul, hman ngaihnak khal thei lo khopin a hlim.

Van Van cun mah tei hlim cu famkim a ti thei lo.  A thil thar neih mi hi midang khalin rak hmu ve hai sehla a duh. A rualpipawl in a meithal tharte cu rak lawm vualvo hai sehla, rak tham sin ve hai sehla, cule.. rak daw kuahko hai sehla!!

Curuangah Van Van cu a meithal kengin lengah a vung tlansuak.

Hla khal a feh man hlanah Van Van cu thil pakhat a vun ruatsuak ih a tlan lai cu a cawl dukdi sal.

A rualpipawl a va hmuh cun rak tham ve an dil dingih, a siang lo a si le an hua thluh ding. A siang a si le an thamse thluh lala men thei fawn. A meithal a siatter pang a si ahcun……..!

Van Van ih mitthlam ah cun a thilri a siatter can ih a pai’ rak hremdanpawl cu pakhat teten fiang zetin an rung lang cupco.  Cuveten Van Van ih thin cu a rung phu dutdo cih! A ttih. A lung a phang. A meithal humnak kut khal thlan thawn a rung ciar thluh. A kutzung zim pawl an rung hit zuaizo thluh vekin a theiaw. A lung a phang tuk. A takpum cu thlanhrifim in a rung leihkhat thluh.

Van Van ih rak hlimnak hmuahhmuah cu thli ih a semhlo mi vutcam bangin a hlo thluh verver. A rualpipawl hnenih a meithal tharte va hmuh a caknak le phurnak pawl khal an ziamral thluh. A rak duhzet mi meithal tharte a ngah ruangih a lungawinak thinlung ninu khal tu cun a lungphannak mero dum in pit mepmepih tuamin a zelthim thluh zo.

A ken mi meithal cu Van Van cun a vun zoh. A thar pa-ka te a si. Duhnung haheuhza khal a si. Sihmansehla tu ah cun Van Van cun cui meithal cu ttihnung hmuh in a hmu thlang. A tham ngam nawn lo. Amah hremtu le vuaktuartertu ding vekah a ruat.

Van Van cun meithal cu mivelhhmang misual pakhat zoh in a zoh ringring. A hua tuk. Amah siatsuah tumtu a ralpa a si.

Meithal a zoh laiah Van Van ih  lungtur cu a rung rang deuhdeuh. A motor lem a tisiat ruangih a pai’ rak hremdanpawl cu a mitthlam ah fiang sinsinin an rung lang bet ciamco.

A pai’ funghreu hlap awn…

Midehhmang ramsa men bangih zangfah lainatnak tel riai lo huatnak thawi khat tuksumza a pai’ mitmeng sen riairiai pawl…

Thing phar ih a cal a khawnsak laiih mit hmuah thim thluh ko le thluak khal hit bembem thluh koih a na mi le ttihnak  thawi rawiaw mi tuarnak pawl…

A ttih tuk!!!

Van Van a mit napin a vun sing. A kut ih meithal cu napin a vun hum. A pai’ rak vuaknak na hman tu tiangin an damtha thei hrih lo. Khavek tuarsal ding cu a ngam nawn hrimhrim lo.  Amah siatsuahtu ding a ral cu a siatsuah lohli a tul. Culocun ………

Van  Van cun a meithal cu hnget zetih hum fetfetin a feh tohto. Lungto tum nawn a hmuh in cumi parah a meithal cu a ret. Cule lungtum pakhat a va sar ih a a ra kirsal.

“Nangmai ruangah ka pa’n in vaw ding. Se thluh aw.. se thluh aw… ka lo duh lo.. ”

Van  Van cun diriam zetin a meithal cu lungtum thawn a su ciamco. A tha neih hmuah suah in a su rero.. a su rero…

Atawpatawpah cun Van Van ih ke phurah cun meithal cu darh zelzelin… parhkuai theh in..  kekruai thehin…

Van  Van cu a tha a bang ngah tiangin meithal cu a phom rero ko. Dip niarniar thluh koih phom thluh hman a duh.

Van Van cu a ding; cule meithal kuaipawl cu a ke in a vun pal, a ttumh, lei ah a nuai, a sitdarh ciamco. A lungkim ngah in Van Van cu a kut a vun beng pherhpho. Cule a kehram ih meithal them darh zelzel cu diriam fahranin a zoh ringring. Cuisin lungkim zetin a vun hni.. nehnak cotu ralbawi pakhat ih hnihdan vek a si. Si ee, amah hremtu ding a ralpa cu a that ngah zo. A ralpa cu a thi zo. Tu cun tihphan ding zianghman a um nawn lo.

Van Van cu thawsuak zetin  le thinlung diriam zetin amahten a hni hmukhmo.

(4)

Van Van cun a hmaiih zapathalih let riairiai a ralpa cu a zohkhop thei lo. Meithal tharte a rak ngah lai hnakin a ralpa a thah ruangih a hlimnak cu a famkim sawn. Diremnak le lungkimnak thawi khat hlimnak mero parah toin.. cui mero ih hruainak nakah thlunin.. Van  Van cu tlun vansangah a zam ziaizo rero.

Van Van ih hmel cu a hahdam hiahhiah. A thinlung cu patpar men bangin a zang hiarhhiarh. Donharnak, ttihnak le lungphannak tel lo cui a hmelte cu phentu nei lo thlapa men bangin a thiang ih a mawi.

Van Van cu mero parah toin a zam rero. A mit a sing. Nuam a ti tuk. A ttum siang nawn lo. Tawpnak um lonak hmunah zam vivo a duh.

“Bawi Van Thang!”

Van Van a mitsing lai cu a vun meng dukdi. Cule aw a ratnak a dunglamah cun a vun hoi vukvi.

“Ka pa!”

Van Van pa cu meiling bangih vam vutvo thinheng mithmai thawn Van Van dungah a rak ding ziarziar. A pai’ thinhengzia cu a mithmai zoh men hmanin tuksumza a si.

Van  Van cun a pa a vun hmu cu mero par ihsi’ rung tla tupti vekin a theiaw. A kiang le kap cu a vun zohfiang. Aw.. cung vansangah si hmang a rak zuan rero a ti laiah..

Van  Van cun a pa cu tha ten a vun zoh. A pai’ thinheng mitmeng sen remrem le a kut ih a ken mi funghreu pawl cun Van Van ih lung cu an rung fimter ruahro.

Van Van cun a ke phurih darh zelzel meithal them pawl cu a ralpa ih ruak a rak si  lo ti tu cun a fiangsal zo. A ralpa hmang tiih a rak siatsuah mi cu a meithal lemte sawn a rak sizia khal a theingah thlang.

Curuangah Van Van cun a pai’ thinhengnak a rak tuahngah zo a si ti a vun theisuak rumro. A pai’ thinhengzia ding le a hremdan ding pawl khal …

“Bawi Van Thang, ra. Ka hmaiah ra ding hnik.”

Ttihnak ruangih tha tthia thlohthlo Van Van cu a pai’ hmaiah kut bom  ngerngi’n..

 

(5)

 

Van Van sizungah a um.

A pai’ thinheng kutthlaknak a rak tuar mi pawl cu rapthlakza a si. Van Van cu a taksa a nat tuk ruangah zianghman tla a cangkhai thei lo. A mitmeng cu ttihphannak in a khat ringring. Zan ah khal hnukciap zetin a itthat thei dah lo; a thinlung cu ttihphannak ruangah a phudup ringringih malte a vung ihthah ziarzo khalle thlattem zetin a rung thangharh hlukhlisal cingcing. Thawmvang tehrep a theih khalah mitmeng phaw kekein khua a tang vutvo theu.

Cule Van Van cu biak a theih lo. A tong lo lawlaw.

Van Van pa cu a fapa umdan a hmuh tikah a siraw tuk. Kut a rak thlak na luar tuk ti  khal a theiaw keukeu. Kum 5 mi lawng a si mi a fapate parih a kutthlakdan hi pacangpa pakhat hrang hmanah tuar tham a si ti a theiaw ko. A fapa a rak tidan a vun ruahsal tikah a thin a  na tuk. A thinlung cu sirawknak in a khat. Van Van cu a fa neihsun a si; a hrangah a sunglawi tuk. Ziang hmuahhmuah hnak khalin a man a khung sawn. Asinan cui a duhdawt duahdo mi a fapa rori cu a thinsiat tuar loah na tukin hliamhma a rak baihngah zo!

Van Van pa cu a siraw duahdo. A fapa tlawngkai thei nawn lo ko rak veltu cu amah a si. A ngaidamaw thei lo. Van Van cu a kut a kiak, a lu a kuai, a hmai a thling thluh.. a taksa pum cu hliamhma thawn a khat thluh! Zosi hivekih tuahtu? A pa, amah a si.

Van Van pa cun tuihnu hrimhrimah hivekih a fapa ti nawn lo dingin thu a ruatcat. Van Van tong thei lo le cangkhai thei loin, na tuar in, sizung ah hrum le ai ih a um hnu lawngah a pa cun a fapate a duhdawtzia le a lainatzia a run theifiang sinsin.

Culawng a si lo; a fapa hrangah a rak tlinlozia khal a run hmufiangaw.

Tuihnu cun a fapa hrangah ‘Patling le patha’ si a zuam thlang ding. Fate hrangah neih man a manhla mi ‘pa’ si a zuam thlang ding.

Van Van in a rualpi nauhak pakhat hnenih a rak tong dah mi kha a pa cun a vun mangsuak ruangro. Cumi laiah cun Van Van cu a rualpate thawn hmuancar ah an rak lekaw rero. Van Van in a rualpatei’ hnenah,

“Bik Bik, na pa vek pa neih ka duhve ee. Kei cu ka  pa’n in hua tuk,” tin a ti!

Cui tongkam a rak theih pekte laiah Van Van pa cu a thin a rak heng hlukhli dah. Sihmansehla tui’ a vun ruahsal tikah cun a fapa ih sim mi cu a rak dik nasa tiah thin na zet cingin a pom thei thlang. Si ko, a fapa in mi pa hi a pa si dingah a rak daw kuahko theu ko ding! Amah hi a  pa rak si lo sehla tiah a fapa cun duhthu a rak sam rero dah ko ding. Cule, a fapa a rak tuamhlawmdan ruangah a fapa hin ‘Kei cu ka pa’n in hua tuk’ tin a rak zum theu ko ding. Van Van a mawh lo; a pa amai’ mawh a si.

Van Van pa cun a fapa lungawitersal a duh. A parih a fapa ih thinnatnak le ttihnak pawl khal dawihloh thluhsal a duh. Ziangtlukin a fapa a duhdawt ti hi a fapa theihfiangter a duh.  A fapa a rak huat lamlam lozia langter a duh. Curuangah dawr pakhat ah a va tlan ih a fapa hrangah thil mankhung zet pakhat a va leisak.

Van Van pa cun kan dungih a rak lei mi meithal lem hnakih tha le mankhung sawn a lei mi cu kengin Van Van ih ihkhun parah a va to. Cule phur zetin a thil lei mi cu a vun phorh ziarzo.

“Van Van, hi, zoh hman.. meithal tharte ka lo leih lala. Tha na ti maw? Na duhzawng maw vun zoh hnik. Kan dung ta hnakin a man tla a khungsawn hokhaw..”

Van Van cun a pai’ ken mi meithal lem cu a vun zoh. Van Van ih mitmengpawl cu meithal lem a vun hmuh veten a rung danglam ciamco. A mitmeng cu ttihphannak le huatnak in a rung khat thluh lohli.

“Ka duh lo. In pe hlah. Zianghman ka duh lo. Tlan aw… tlan aw.. zianghman ka duh lo.. tlan aw..”

Van Van a au ciamco. Sizung a um hnu kam khatte hman rak tong dah lo Van Van hivekih a run au ciamco cu nurse pawl an thla a phang thluh. Van Van cun a pa cu a kutzung thawi khih in a auh rero ko. A mitthlipawl cu ruah bangin an surthla zuizo.

Cumi hnu hrimhrimah Van  Van in a pa cu a hmu duh nawn lo. A pa a hmuh tinten a mitmeng le mithmai umdan cu coplecilhin a rung danglam thluh theu. Cule mi-a men bangin a talpawlok, a au, a tap, a sawltal.

Sibawipa cun Van Van cu a cipciar theibikin a ngaihven. Ahleicein Van Van ih lenglam natnak si loin a thinlung lam natnak cu hmuhsuak rori a tum. Lamzin phunkim le tidan phunphun hmangih a test rero hnuah…

 

(6)

 

Sibawipa in Van Van pa cu a khan ah a ko.

“Van Van pa, na fapa hin thinlung lam hliam tuar mi nasazet a nei. Cumi cu nangmah a lo hmuh canah hin a hung luar theu. Curuangah na fapa na duhdawt ih a damthatsal na duh a si ahcun a hmuh dingih na lang nawn lo a tul. Culo cun na fapa hi mibanglo ah a suak lanta thei. Curuangah a nu sawn kha hei cah awla a nu in ra umpi sehla a tha ding.”

Cui tong a theih cun Van Van pa a lung a kuai. A fapa in a cohlang duh nawn lo! A fapa in a hmuh duh nawn lo! A fapa in a hai nawn lo! A fapa in anih cu a ttul nawn lo! A fapa hnenah a duhdawtnak a langter thei nawn lo ding. A fapa hnenih pek a tum mipawl khal a pe thei nawn lo ding. A fapa ih thinlung a thukbiknak hmunah hliamhma a rak semter zo!

A sirawknak in a lungsungmuril a hei zun.

A fapa a vun  lainatnak le a poi tinak cun a thinlaimu cu a pem.

Van Van pa cu Van Van ih khan lengah dingin, sangka ong ihsin ihkhun parih it a fapa cu a bih ringring. Cule Van Van zoh phahin dim ten a vun phun sepso:

“Van Bawi Thang, ka fapa, na pa hi in rak ngaithiam  hram aw”!!!

March 23, 2011
On Wednesday
11:40 AM

(Visited 165 times, 1 visits today)

Comments

comments

One Comment

Comments

%d bloggers like this: