Ka Online Fala kha!

Ka Online Fala kha!

 By: Hniangsinpa

online-romanceSanti luangin a ken mi pakhat cu Internet a si. Computer duhtawk ih tham thiam lo, kannih vek putar hrang khalah, Internet ahcun kan buai tuk ce lem lo. Tar hrat ih fa nei thei nawn lo ding tiang ih tlangval in ti tu um khal hmansehla, ka dem lo, an mawh love. Suahpi le rualtha pawlin, an tu hmuh an hiar laiah, kannih cun fa le hmuh hman kan zumaw hrih lo cu a si . Ai, rak tlawk/tong tam man lala zik. Um, ka thupi ngan mi vek khin, zarhpi ni a siih, ka umnak ihsin, ka ngai duahdo mi tong hmang pawl ih khawmnak cu a hla tukih, Pathian thu haal zet hrang ah lo cun, khawmawk hi thil har zet a si. Kan zung len a pit fawn siih, um har mangbang vansang la lam a si bik ko!

Ka cul nel zet mi ka Computer hmai ahcun ka to sal ih, Internet Connection, a man ka pek tlai deuh ruangih network cak tuk lemlo cu ka vun ong. Ka ruahnak ah, kan dungih ka rualpi tei inn ih ka va len tum ahkhan, an fapa in, “Ka pa, online ka rualpi pawliin an ram tlawng dingin in sawm” tiih a rak tong dah mi cu ka vun mangih, rualpi vun hawl ve kung tiin, Yahoo Messenger ahcun lutin, Chat Room ah ka lut. Hawl dan ding ka thiam lemlo ih, a ram in maw ka hawl dingih, an mah le mah an thunawk dan in aw? tiin ka ruat rero.

 A pawi cuang ding sawm? tiin, Romance chat room ahcun ka vun lut ve. Ka vei khat luhnak a siih, (tong mawi lo deuh a silen, siartu pawl nan ngai thiam ka dil hmai sa), ka suk na zoh duh maw, online in ka ziang maw lo ka lo hmuh ding tin a, cun zan khat ah cu zat, tui zan na man kem tin a… Zarh khat sung na hnen ah ka um dingih, cu zat kha zat in pe kem? Ti na in an khat. Thungai ah ka ruat lawk ih, ka umnak ram tangka 20 rori ka kuan man cu teh!

Ka ruahnak ahcun, ka rualpa ih fapa teh khan ziangtin ha maw a ti ce ke? Tiih ka ruah laiah, “Hello” tiin ka chat box ahcun a run ngan aw! Kei khal cun, thuphan men a si phangah, “Ka buai tuk” tiin ka hei sawn. In rak chat nawn lo ih, kei khal thil dang zoh phah in, ka pen san sung. Tuah ding ngai ka theih lo ruangah, mitu in rak be tum tu kha, mi ngai a si ka zum deuh thlang. A san cu, ka uai ka ti ve ten, in chat nawn lo ti ka ruah cun, “Ka chat box ihsin, “hello, ka buai nawn lo, nang teh na buai maw?” tiin ka hei chat. Reply nak cu ka zumnak hnak a ra lohli lo ih, ka mang bang cun, “Na buai tuk maw, ka lo ti buai ruangah in ngai thiam aw” tiin ka hei tharthawh sal. Rei a rial nawn lo, “ka buai lo, mitu kha chu ka rualnu thawn ka biak awk lai a si ruangah a si” tiin in rak sawn.’

Vun hnangam hlunhlo nak ding um lo hmansehla, biak ding ka nei in ka theiaw ve thlang ih, mallai cun ka umhar cu a reh deuh hmang ha? ti ding cun a um. Ka chat box ahcun, “Ka hmin cu, “Hniangsinpa ka siih, cumi ramih um ka si, mipa ka siih, ka kum cu cuzat a si” tiin ka kum cu ka vun ti nauhak aw ter deuh ta. Anih khal cun, “Ka hmin cu, Lynda ka siih, nunau kum 23 mi ka si, Florida ih um ka si” tiih I rak sawn.  

 A kei vek putar zik thlang, nupi neih cut tuk ruangih ngam lo sawn le nunau biak hnakih, ekin sung sunvu um hril sawn hrang ahcun, cutivek fala in I rak chat ve tluk ih sunglawi cu a um thei ding sawm! Ka phur ve vivo ih, kan hnatuan mi pawl khal kan simaw rero. Cun, zuk khal kan kuat aw rero zo ih, hmelsia cu in ti ve tuk lemlo a si ding, hmailam canih a can neih tik cu le kan tawnawk sal nak ding can kan simawk hnu cun, kei khal ka sign out ve cih.

Nitin in kan chat awk theu ih, kan karlak ah buainak a um lo. Hna pawimawh ka neih khalah, kan chatawk can a hung cut cun, phuahhlam ka tuah ih, ka online fala thawn thunuam relnak kan nei theu. A ngaingai in hmu aw lo hman khalsehla, kan thinlung le ruannak ahcun kan hmu aw ringring. Anih khalin, I ngai thup ve ko ding tiah ka zu.  Duhnak thu cu kan simaw lemlo nan, huatawknak thu khal ka rel cuang lo. An ram ih tlawng dingin in sawm theu nan, kei khalin, amah kha ka umnak ram ih tlawng dingin ka sawm sawn theu. A thla ih thla kan chatawk hnu cun, a phone number ka dilih, anih khal cun I ring a si cek kei cu, siang zetin I sim ve mai.

Zankhat it that thei lo ih ka um zan ahcun, tuah ding ka thei lo ih, ka kuak zual ziang maw zat ka zuk theh hnu ah, ka number neih ka vun mang suak ih, ngam le ngam loin ka hei call. Tho hmu aw, aw thaam mawi le no, ka hna hrangih si thabik dingih ka ruah cun, “Hello, zo si…Lynda ka si” tiin I rak sawn. Tong ding theilo ih, second 30 lai ka cawlh hnu cun, ka cahnak hmuahhmuah sawm khawn in, “in thei maw? Hniangsinpa ka si” tiin ka hei sawn.

A thir dukdi a si bik ding, a tho hmu aw cu veilekhat ah a reh ih, fiang zet, Airport lam ih thuphuangtu vek khi a si ka tahthim, aw si ngai….na it hrih lo maw? I tiih, kei khal cun, tar hmansehla, tlangvala si nak a reh lo a si ding,  “Ka lo ruatnak ah ka it that thei lo a si hi” tiiin ka hei sawn. Ani khal a duai ce lo, “Mitu ciah kha ka mangah ka lo hmu ve” I rak ti cu, ‘e heu, ka purh lo ding mi rul kua ka pur hmang ha?’ ka ti aw zuakzo man. “Ka zum lo” cu ka hei ti ve ih, “Thu ngai si ka lo sim” I run ti cu, ka awm khi, rawl hak vek khin ka um, a hung khal ut o in ka thei.  Tong ding ka haihsam ih, “a sile aw” ka vunti the ihram. “Na duhtawk men ding maw?” I run ti lala, “Na ih thah na khawp lo pang ding, ni dang len aw” ti phahin, “Bye” ka ti cih, miring cun, Bye kan ti hnu cu an tawng duh lem dah nawn lo.

Cu ti cun, a chat box ahcun, Offline message ka ret ta ih, nehhnu ih kan tawnawk leh ding can ngan ta in le cui can cu ngai pawimawh ih, pelh lo ding ih ka ngan hnu cun, ka ihnak ihkhun puap tuk lemlo lam pan in, ka lu kham sawpsak tu um lo ruangih fai tuk lemlo ahcun ka thluak siava te bawm cu nghatin, kka mit cu ka vun siing ve.

(Visited 65 times, 1 visits today)

Comments

comments

One Comment

  1. haha….tu chan nu pawl cu kha an si ko …chan ti luan kan ti lai ma..kan chan tha kan ti lai ma…zei nih dik a ngaih ve….ka rauh nak ah cun..???????????

Comments

%d bloggers like this: