Ka Nunnak Na Si

Ka Nunnak Na Si

“Mawite, tu tiangah veikhatte rori hman “ka lo duh” in ti ve dahlo. Keicun “ka lo duh” ka lo ti hi siarcawk khal a si nawnding ka zumlo. “ka lo duh” i ti duh lonak hi ziangruang bikah a si ding ti hi ka theifiang duh. Tlang zetin in sim lawlaw mai awla! Na duhzawng mipa ka si lo ruangah maw? Lole, duhmi dang na neihzo ruangah maw? Maw, ka lo duhdan hi na lungkim tawklo. Na hrangah ka tling tawklo ruangah si? I duhlo khalle “ka lo duhlo” in ti lawlaw mai awla. Asina’n kei cun ka lo duh tuk timi hi keimah le keimah ka theihawk vek in na theih ve ka ring” Mawite cu Thang Kuk ih mitmu ah a zoh keukeu ih a mitthli a hal t’iamt’iam. Netabik ah sup aw thei lo’n a mitthli cu a biang note parah an luang kuahko. Minute malte sung be awlo riai cun hmatawn in an ding ziarziar. Mawite cun a kut in a mitthli a hon hnuthul ih a hnap hnuk hnuphno phah cun…

“U Thang, ka lo hua lo lawlaw timi hi na zumlo maw? Keimah le keimah ka theih awk vekin ka lo huat lozia cu na theih ve ka zum”  “Mawite, “ka lo hua lo” in timi parah ka lungawi tuk. Asina’n na kaa ihsin “ka lo duh” in timi t’ongkam te  theih ding hi ka cak tuk. “Ka lo duh” in ti ding cu na hrangah a har tuk maw? Maw, “ka lo duh” in tinak dingah dawnkhamtu an um saw? Mawite, kei khrang ahcun, nang cu ka zing ni engmawi vek hokhaw na si. Nang na tel locun ka khawvel cu eng umlomi thimkhawzing thawn a bang aw. In duh thei velo rori maw? Kei cun, ka nunnak vek rori ah tla ka lo ruat.Ka lung i ti awiter theitu khal nangmah lawng na si vekin ka riah i seter theitu khal nangmah lawng na si. Nang cu maw ka neihsun le ka duh bikmi na si. Ziangah veikhatte rori hman “ka lo duh” in ti thei ve duhlo. In ti theilo?”

Mawite ih mitthli cu kham theihlo in an luang kuahko lala. “U Thang, a si lole tu Feb 14 a kim le ka lo sim leh ding a ngah maw?”   ” ummm…. ziangah maw Feb 14 na hngah kherkhernak? Tu cu April thla a si ih hmaikum Feb 14 a kimnak dingah thla 10 rori a duhlai. Ka hngak cawk ziklo cu tiangtiang cu! A si lole hmai thlacemni khi a suahcam si, cumi le in sim hmen! Lole tu ah tla in sim lawlaw mai awla” duatzet cun a mitthli a von hnulsak. Mawite khal cun a suahcamni ih sim dingcun a lung a kim ve.

Mawite cu Beauty Salon ih hnat’uanmi a si tikah ceiawkdan cu a thiam ngaingai. A ceiawkdan, a hnipuan hrukdan tete pawl hi a mah thawn a milaw thei ngaingai ih mi mit a la, mi ih zoh co zettu khal a si. Thang Kuk khal bible tlawngta a si vekin a hnipuan hrukdan, a nundan pawl khal t’ihzah a tlak ngaingai. Tu tlacun bible tlawng saya a t’uan thlang ding fawn biakinn ih a thusim caan tete khalah a thusimmi ngai duh aiin a mah zoh duh rori ih biakinn a ra pantu fala khal siar cawk a si lo.

Mawite cun a hnat’uannak dawrah mi  pakhat ih sam a tansak rero. Rinlo paralah a hnar ihsin thi a rong dawk zulzo. Tissue a la ih a hnul. A thi cu kham theihlo in a rong luang lala. A pinu ih a fial vekcun a hnat’uan a cawl ih phungphai (si-khan) ah a va hmuhaw.

Zarhpi sun biakinn khawmnak hmuhah

“Mawite, ziang na cang saw? Na damlo maw? Na t’awl deuhdeuh a bang. Ziang na cang?”   “Ka dam ko ee. Ziangkhal ka canglo. Ihhmuh ka khawhlo deuh ruangah a si ding.” Thang Kuk cun hni siamsi te’n “Ka suahcam a kim zikte thlang kha maw..” a von ti. Mawite cu nikhat hnu nikhat a t’awl deuhdeuh. A hnat’uanpi pawl le a hnat’uannak a pi le khal an mang a bang thluh. “Zaing na cang?” ti ih an suh le “ka dam ko” a ti san men t’heu.

Thang Kuk ih a hngahhlap zetmi ni a suahcam cu a rong kim ngaingai. Mawite thawn an pahnih in rawldawr man khungzetnak hmun pakhat ah hmatawn in an to.

“Mawite, na damlo maw? Zaingah na t’awl vivo? Ka suahcam a kim zo. Simdingte in nei kha! ka theicak tuk zo. In sim thlang aw” Mawite cu a mitthli a hal t’iamt’iam lala. “U Thang, in hua mawi aw. In hngilh mai aw ka lo ti sehla teh…” Mawite ih t’ong dingmi theihhiarzet le ha lang ko ih a hni siamsimi Thang Kuk ih mithmai cu ni eng rinlopi’n khawdur in a von khuh thluh bang a hlo, a thim dukdi! mangbangzet, zum ngamlozet le thinphangzet mithmai thawn “Mawite, ziangti’n ee? Na t’ongmi hi na thinlung takih in sim duhmi a si ahcun ka mitmu rori ah i zoh awla i sim sal aw veikhat te’n…”

Mawite cun Thang Kuk ih mitmu rori ah a zoh na’n zianghman a t’ong ngamlo.

“U Thang, a si ko. Thudik hi cu thuhcawk a si lo. Ka lo simsuak lawlaw mai ding. Kei cu thisen censa natnak neimi hokhaw ka si. In duh duhhlah aw” Mawite cu a tonak ihsin a ding ih tlan mai a tum. Thang Kuk khal a tonak ihsin a ding lohli ih Mawite ih kuk cu a va kaih lohli. “Mawite, ziangah maw cuvek tla in simlo? Cumi natnak na neih ruangah ka lo iai dingih ka lo hnawngding ti’n na ruat maw? Ziangvek dinhmun khalah ding awla kei cun ka lo duhtuk thotho ti hngilhhlah maw. Na natnak ruangah khal thinnau, beidawng in umhlah maw. Kei cu na lamah ka t’ang ringring hokhaw” duatzet cun a von pawm. Mawite cu Thang Kuk ih awkam a theih vete’n a lungawi tukah a ning lamlam a hang ih kiangkap le dawr kiltu pawl khal hmasawng thiam nawnlo in a t’al. A nguk in a nguk.

“U Thang, thungai maw? ziangvek thil khal ka hmaiah thleng sehla ka lamah na t’ang ngaingai ding maw? Thungai maw?” ik-ik phah rero le t’ah “aw” thawcun a von sut. “Mawite, na aa tuk aw. Ziangah saw na parih thil thlengmi hi in sim velo? Na hrang ahcun ka nunnak liam ding hman ka poisa lo na thei maw? Nang cu ka nunnak hrangih ka thawtmi ka thaw vek na si. Na thei thlang maw?”

“U Thang, kei cu nangmah in ka natnak na theih le in duhlo pang ding ti ka phan ruangah zaan khal ka itthat thei dahlo. Rawl khal thaw te’n ka ei thei dahlo. U Thang, kei khal ka duhtuk ve timi hi na thei ve maw? Ka damlo ti na thei na’n in hnawng cuanglo ti ka theih cu ka natnak tampi a damzo in ka thei. Nangmah ka kiangih na um cun ka natnak vekmen cun in ti buai thei dahlo ding. U Thang, kei khal maw nangmah lobak duhmi dang khal ka neilo. U U ka lo duh tuk. Ka hrangah ziangtluk in na thupi na thei maw? Dam kherkher khal sehla nang in i huat cun nunman ka nei cuang ziklo. Ka damlo na’n in hnawng cuanglo ti ka theih tluk ih thil sunglawi ka hrangah ziangdang hman a um nawn ziklo. A um khal a rak um dah hrihlo.

U U ka lo duh tuk. Nang cu ka nunnak rori na si. Thihnak lo cun in t’hen hlahseh maw kan pahnih duhnak” Mawite in Thang Kuk cu mi ih lawnding phang bangin fek zet in a kai. A pawm. Kiangkap ihsin mak tizet ih a rak zohtu pawlkhal an hmu thei nawnlo. An hmuban nawnlo. An leilungpi sung ahcun an pahnih lawng an um zo.

Mai Zilthli Lal Nei Thluai

(Visited 68 times, 1 visits today)

Comments

comments

3 Comments

  1. Thluaite na thiam tuk na thuanthu ngan mi te cu…
    Siar a nuam in thinlung sungah a cam nasa..
    Duh dawtnak tak2 si hi mi duhdawt nak te cu tha tuk…

  2. Na thiam tuk.pakhat te ka lo sut duh.” Mawite” &”Thangkuk”….na thei maw.

  3. E heu hi cu ka thuanthu in ngansak a si lo sawm.thiam thei tuk aw.

Comments

%d bloggers like this: