Ka Nui’ Mitthli

momtearsfeat-1360x906Kum 15 lai a rak liam man zo. Tual-leng nauhak te ka rak si ko nan khai laiih ka nui thlacam aw cu ka hnathlam ah ring zetin ka thei lai. Mitthli thawi fa le hrang ih thlaza in camsak theu kha ka hngilh thei zik lo. Suahpi unau lakah nautabik ka si ruang ah ka nu kiangah ka um tam. Lo lam hnatuan ih pumcawm aw kan si ih innsungsang harsat deuh ruangah thaisun hrang ding ruatin tuini ih tuan a tul theu si. Cui tlunah unau 6 rori tlawng hun kai cun sumlut le sumsuak a milaw thei lo. U le phun 9 phun 10 an hun kai phei cun a hautak sinsin ih lo ram suak thlai rah in a deih lo.

An tuition man le a dang tangka tulnak atam canah cun neih le siah zuar a tul theu. A awrh lai mi sui thi khal tu le tu kan pawng theu. Cuhnak ih poimawh sawn cu ka nui harhdamnak lam hi a si. A tawizawngih rel cun natnak phunkim in a tlak ti mei sehla ka rel uar lo lam ding. Ka cin ban tawk hmanah ihkhun ih a can hman a tam nasa. A rual le pi, sung khat veng hnen pawlin an ra veh theu ih an nih hrangah cun ka nu hi mi van duai le nun man nei lo a si ding.

Hmansehla ka nu cun cutin a ruat hrimhrim lo ih kan unau za hrangah nu sunglawi si a zuam ih mi pakhat si ve thei ding ih sersuah in tum ringring. Amai nun ah harsatnak tam hmansehla a fa le hrangih dam a duh hrih, a fa le hrangih thlacamsak a duh hrih. Caklozet cing cun kan unau za hrangih thlacam hi a pelh dah lo. Cucu a ti thei mi sang bik a si ih tlunah rawngbawl nak thupi zet a si tin a ruat fawn. Tuini tiang mitthlam ih cuang ringring lai mi cu- khawte ih um kan rak si vek in electric kan ngah tha lo ih zanah mei-inn vangin khua kan sa theu. Unauza kan ih hnu ah ka nu hin kan hrangah malsawm phunkim in dil sak. Aw ring lemlo, hmanseh kan theih thei tawk tein tangdawr le thinlung tak tein Pathian a be theu.

Khawthim lakah mei-inn eng cun a tlet ih ka nui biang ih luangmi a mitthli fawr cu ka hmu theu. Kei khal ka nui aw thei in ka lung a rak zur ih a thlacam rualin ka mitthli a rak luang ve theu. “Bawipa, in pekmi fahniang rual tla hi na kutah ka lo hlan, nang in an nun run hruai aw” ti ih a thlacamnak siar lo ziang dang in dil sak ti cu ka cing nawn lo. Cu ai in amah ka zoh ih tangdawrnak thawi a thlacamnak khan ka thinlung a neh zetih ka rak kekkuai ih a si bik. Amah ka zoh in ka zang a fak fawn. A harhdamnak that lo ruang ah rei in dampi thei lo ding ti a zumawk cia ruangah teh a si pei maw tin ka ruat sal theu.

Ka nui damnak ding hrang kan sungza in tan kan la ih theitawk kan tuamhlawm aw ko nan that lam a pan thei lo. Hmansehla innsungsang ih tuahtulmi le lo lam ih hnatuan dan ding in relbawl sak ringring theu.Tum khat cu ka hnen ah “Te Uk, kan lo ah in hruai aw, lo lam va vehvai ka cak tuk.; To hmun lawng in hnatuan dan ka sim theuih tu cu ka va zoh tento ding” in tiih cutin ka nu cu lo ah ka hruai. Kan inn le lo kar lak cu minute 20 sung ke feh tlukih hla a sin an lo thlen hlan ah voi 3 lai ka cawlhpi. A thitha in a tlin lo ruangah a cau ih a thaw thawt a har cingcing. Cutin lo cu kan thlengih, kan thlaicinmi cu ka zohkual vivo. Cui tlailam nitlak zawngih zilthli thiang hrang zerzo le lo lam boruakih a mawizia kha ka vun mitthlam thei lai. Culai ah ka nu cu khatlam hoi tahrat in a mitthli a hnul rero.

“Nu!… ziangah na tap?” tin ka sutih ziang arel thei lawk lo. Tibur hmawm thul hrawng cu kan nufa in awm-ai lo ten kan ngui khiokhi. Cui hnuah a mitthli hnul phah in “Pathian in in zangfah tuk lawm mam ih santlai lo ka thlacamnak in theih sak” a ti ih mitthli thawn lungawithu a rak sim a si. Kum tam a rak liam zo nan khai ni ih ka nui mihmai kha mizan ih thil cang vek in a fiang lai. Ziangtin ka hngilh thei ding..tuni ting ka thin ah a thar ringring. A tu ah cun ka nu’n in dampi nawn lo, mual in liamsannak kum 10 a ti zik thlang. A fa le khal mah le tawkte in kan pitling theh zo.

Hmansehla ka nui thlacamnak cu a riaral men lo. A rahsuah mi ei in a par kan tlan rero. Ka nui mitthli kha kan hrangah thlaici nung a rak si. Nu in fale hrangih an thlacamnak hi a va sunlai em rothil dang hnakin a man a khung. A bik takin ka nun ka zohsal tikah ka nui thlacamnak ruangih thutak lamzin ih hruailuh ka si hi ka lungawinak bik a si. Mi hnakih cungcuang em em lo hman nungla ka nui mitthli ruangih rundamnak co ngahtu ka si cu sunglawi ce ka ti. Sualnak le tih phannak thim khawzing in i cim buai caanah ka nui thlacamnak in lamzin dik i kawh hmuh sal theu. Billy Sunday khal in hi thu ah “Hremhmun ih mi tam sawn pawl khi an nui cawn parih an um lai ah an nu le in Pathian hnen ih an rak pekmi an si” tin a rak ngan dah.

Fanau kilkhawinak thu ah pa khal an thupi ko nan nui mawhphurhnak cu a sang cuang a si. Emerson khal in “Mitin mizia hi an nu le ih cituhmi a si” tin a phuang suak. Nui thlacamnak cu a lak dah lo, tu ah a rah suah hmuh ding um hngal lo hmanseh nu le tla fa le nau hrang thlacam sak cio uh si. Cucu fanau hrang kan pek thei mi rothil man khungbik a si. Kawh kir sal theih mi sisehla ka nui thlacamsaknak aw kha ngai sal ka va cak em. A biangih luangmi mitthli kha hmuh sal ka va nuam tak em. Aw… ka nui mitthli kha a tu ih harsat ka ton canah Pathian kawh hna in thiam tertu a si. Hlawhtlinnak le nehnak ka ton can khalah lungawi dan in thiam tertu a si fawn. “Nu ka lungawi…” Abraham Lincoln iangin ka nui hnenih ka leiba hi a va tam em. Lincoln cun “ka leiba hmuahhmuah hi rul sehla ka nui hnen ih ka leiba hi si ka rulh cawklo ding bik cu!” tin a rak ausuak ve a si. Aw … ka nui biang parih luang mi luaithli kha………

– by Salai Te Uk @ Ta Hniang Uk

(Visited 325 times, 1 visits today)

Comments

comments

Comments

%d bloggers like this: