Ka Nu, Kan Tlung Ke

Ka pi
HI CAA SIAR IN TTAP HLAH! THEIHTHIAM TUM SAWN AW!

Zaankhat cu ka hnattuannak ihsin inn ah ka tlung ih kan nu Cho in “na Nu kha pitar putar retnak hmun ah ret lohli aw” i rak ti! Kei khalin hnattuan baang ti pan cu “nang khalle ka Nu hmuh thei lo ruangih cu lawnglawng” tiin ka sawn vukvi. Cho cun a ttong cu a peh bet ih “aw ee, hmunkip ah mi a hnahnok tuk si.. tui zarh sungih na ret lo cun kan fapa te thawn ka Nu’i hnenah kan va um ding” tiah i auh! “Aw aw aw, tui zarh sungih ka ret ngah cun a tawk ko lo maw” tiin ka ttong ka netter ih kan nu khal a ttong a cawl ve.

Nasa zet ih ruahnak fimvar te thawi’ kan ihnak khaan saangka ih ka luh zawngah a saangka phuur ihsi kan ttong rak ngai ringring tu, ka Nu ih mit cu mitthli thawn a khat thluh ka hei hmu. A tlazikmi a mitthli cu a kut in a hon hnuul ih zianghman ttong lo te’n a khaan sungah a vong lut. Keikhal zianghman ttong loin kan ihnak khaan sungah ka vong lut ve. Kan nu Cho thawi’ innsang kan dinnak kum 5 a rei zo ih tuah fapa te duh-um tak kum(3) mi kan nei.

Kan nu Cho thawi’ kan neih-awk ngah hi ka hrangah ka nun ih laksawng tumpi pakhat asi. Ziangahtile milian, neinung le mithmai hngal ih ummi innsang ihsi semsuak, Cho cun a Nu le Pa’i lungkimpi asilomi keimah thawn umtlang dingah ka dung i rak thlun. Kannih sungkua cu mifarahte kan si. Ka senlai ihsin ka Pa in in rak thihsan tikah ka Nu in thil zuar phah in i rak cawm. Asina’n tu ahcun Cho in a hlan vekin ka Nu a hmu thei nawn lo. Kan neih-awk pek lai vek ih a biak daan vekin a bia thei nawn lo. Kum upat le damlonak ruangih ttawnttai vivo mi ka Nu cu a hrangah hnaihnoktu pakhat ah a cang. Pitar putar retnak hmun ih ka Nu ka ret lo asi ahcun kan fapa te thawn hi inn sung ihsin kan suak ding ti’n hrinhronak awkam in pe daih si!

Tuini cu pitar putar retnak hmun ih ka Nu ka hei kuat ding ni asi. Zingtinte’h a tupa te thawi’ a lek ringringmi ka Nu cu tuini ahcun a khaan sungin veikhatte hman a suak dah lo. Kan fehnak ding Taxi cu kan inn hmai ah a ra thleng zo. Ka Nu ko dingin a saangka ka von king. Saangka cu ka von ong. A hnipuan tom fate thawn Thlalaak zoh phah in ka Nu cu a khaan sungah a rak to ngiohngi. Saangka ka von on ruangah a zoh rero laimi Thlalka cu zamrang zetin a hnipuan tommi sungah a von than lohli ih “kan feh a cuu thlang sim..? ka fa” i hon ti. Ka Nu’i mithmai cu ttahhaal in a um. A Hmur tlunlam hnuailam in an tthia thluh. Cuih a ttahhaal mithmai cun ngaithiam i diil ih a tthiami a Hmur cun sim duhmi tampi i nei. Asina’n kamkhatte hman ttong suak loin a um.

“Ka tupa te i kawh sak aw” i ti ih a mithmai khal tthate’n zoh ngam loin ka fapa te cu ka kawhsak. A tupa te cu a ttaang sungah a cawi ih ka Nu cu a ttap! A ttaang sung ihsin a tupa a tthum ttheh hnuah “kan feh thlang kei cu ka fa” i tiih innhmai ih Taxi lam kan hei pan. Kei khalin simduh le reel duhmi tampi ka nei ve. Sihmanseh ka ttong suak thei ve lo. Mitthli thawn ka Nu cu Taxi saangka ihsin a lenglam hlir a zoh. Kamkhat hman bia-aw loin kan thlennak ding hmun cu kan va thleng. Ttuanvo neitu in ka Nu’i umnak ding khaan cu in rak hmuh. Cu ttheh in ka Nu cun “ka fa, tlung thlang aw he. Na reituk le na nupi in a lo ruahhar tuk ding. Cun, a leng na suah tikah angki hlum hruk hngilh hlah maw.. a dai na tuar thei lo kha” tiin i ti ih suupaw thei loin ka ttap ve.

Ka Nu’i kehram ah kuun in ka Nu’i kee cu ka zuut ih “ka Nu, i ngaithiam aw..” ti’n ka ttap rero. Ka Nu cun hiti’n i sim leh. “Ka fa, ka theithiam ee.. a poi lo ho khaw.. kan si duhnak hnakin kan ttulnak kan thlun sawn kei cu.. khale tlung thlang aw”.

Cuti’n inn lam pan in Bus thawn ka tlung. Bus sung ahcun ka senlai ihsi i rak zohtu ka Nu, milak tlang thei dingih nun i rak zirhtu ka Nu, Tlawnginn hmai nisalak ah dingin Tlawngttum i hmuak ttheutu ka Nu, mahte lawng khawsa ih i cawmdawltu ka Nu, ka Nu’i parih hiti’h ka tuah hi a ttha maw ttha lo? Ka sual tuk maw? ka Nu.. ka Nu…. ka Nu…. tiin.. Bus totu mipi an tam fawn. Ka Nu ka ruah tuk thawn ka thaw in pitter thluh. Inn cu ka rong thleng. Innhmai ihsin kan nu Cho cun kan fapa te itthat dingin nauhak hla te thawn a rak awi rero ka von hmu.

Cu tikah ka senlai ah ka Nu in hitiin i rak awih rero ve ding sikhawh! ti’n Cho le kan fapa te aiah keimah le ka Nu ka von mitthlam ciamco! Innsung khal lut man loin kan inn lenglam ah ka kiirsal. Thu bawhcatnak tthate’h ka neih hnuah Pitar putar retnak hmun feh dingin Taxi ka va kham.

Zamrang thei patawp ih va thlen lohli ka duh. Ka Nu ka hei thlah lai ah hmuah Taxi feh a ran daan a mak! Tu hmuah Taxi feh a fuung cuangin ka thei. Zamrangte’n ti rero phah in a hmun cu kan va thleng. Ttuanvo neitu pawl cun mangbang mithmaipu in in rak zoh cece. Cupawl cu ziangah reel loin ka Nu’i umnak khaan sungah ka vong feh lohli. Ka Nu cu kan Thlalaak a rak zoh rero. Ziangdang ttong man loin “ka Nu, kan tlung ke” ka ti hngalk.

*Siirawknak a thlen hlanah tthate’h zohkhen hna thiam sawn aw.

Credit to Aung Htun Oo
By/January Van

Comments

comments

Comments

%d bloggers like this: