Ka Nau Thazangpeknak Le Forhfialnak Ca

Ka Nau, Thlarau, Thinlung, Taksa ah dam in na um maw??

Ka nau, na hrangih zianghman tuah theimi nei lo ka si ti theiaw cing le phuhrungaw zet cing in na hnenah thazangpeknak cate ka lo kuat.  Tlawngkai lai ka si vekin hi Cahram ti lo adang kuat thei ka lo nei lo, I theihthiam saktu le I ruat thei zettu kan nau, na parah lungawinak thu ka lo hlan. Ka Nau, kan nauhak lai te ihsin na dangduh rawl hman ka lo leih thei lo ih na duhmi hnipuan hman ka lo leih thei lo. Asinan ka Uu tlawngkai lai na si ti ih I theihthiam sak ringringtu ka Nau. Harsatnak hrihnawng lakih a thanglianmi kan nih Unau hrangah hi Cahram, thazang in pe ringringtu tthian le rual, hi ca te thawn thazang la tlang cio uhsi.

Ka Nau, Farah nauta, zawnzaifa kan si ruangah le mivekih kan duhnak tlawngih kan kai thei lo ruangah van sia tukin na thei aw pang maw? Lehhnu ah Farah nauta pawl hmuhsuam nautattu si lo ding in le  khurawm, zohthiamtu le zangfah sawntu kan si theinak dingih Pathian lam hruai nak ti na thei lo pang kei.

Ka Nau, Farah retheih si hi na ningzak in na riah a sia tuk pang maw? Mai sinak zahpi lo ih ka Farah kan ti ngam hi thil sunglawi a si. Milian tampi ziangah ka lian ti hman relngam lo le ziangruahah ka farah ti hman relngam lo pawl khi zangfakin riahsiat pi sawnaw.

Ka Nau, harsat farah, reitheih zawnzaih ruangah na zirnak le na tuah na tuannakah thinnau beidawng in na um pang maw? Bible Cathiamhlim siar kha na dai thlang pang kei.

Ka Nau, na nun kha falat tlangval nawmnak men le leitlun nawmcennak men ah na hmang pang maw? Kan nauhak lai ih Pathian hnatuan dingih ka Nui kan lu parih kut suangih thla in cam kha na hngilh pang kei.

Ka Nau, mivek ih duhduh ih nung thei kan si lo ti ka lo sim theu kha na hngilh pang kei, ka Nu le Pa, kan Farnu le Ttapa pawl mi vekih zoh theitu an um lo, kan mah rori ih khawthim pahtlang a tul zia ka lo sim ttheu kha.

Ka Nau, “Len” hi “nunnawm” a si lo. “Nunnawm” hi “Len” sawn hokhaw a si ti ka lo sim theu tla khan na hngilh pang kei.

Ka Nau, na nau le kha rak duatin duhdawtnak thawn rak cawm hram. Peknakah duhdawtnak pek tlukih diriam a um kei maw ti ka lo sim theu kha.

Ka Nau, nupi pasal dingah kan Laimi rori a that thu ka Pai in sim le in duhsak thu pawl kha ziangsiar lo in na um san pang kei. A pawi tuk kan ti leh pang kei.

Ka Nau, na hlawhtlin canah na lung a awi luar tuk pang maw? Na tlaksiat can ah teh na riahsia in na bei a dawng luar tuk pang maw? “Leitlunah zianghman hmunhnget le hmun ringring thei mi thil a um lo” timi thufim kha na siar hngilh pang kei.

Ka Nau, mi’h thu an lo suh lo caan ah na va sim ciamco pang maw? An lo sut caan ah teh thei cingih sut maw? Thei lo ruangih sut ti tla kha thaten na ruat hngilh pang kei, thei cingih thu lo suttu kha va ralring awla thei lo ih lo suttu pawlkha ralring ten thuhman sim aw.

Ka Nau, na rualpi kha na kiang a um caan lawngah na porh ciamco pang kei, midang hnenih pawrh sawn hi thiltha a si ti tla kha na hngilh pang kei. “Rualpi tha cun mah rualvah te umah nun a simih mipi lakah a pawrh, a cawimawi theu” ti thufim tla kha na hngilh pang kei.

Ka Nau, thu elawknak ih nehtu si tum ringring le nehtu va cuh ciamco khalhi nehnak a si thluh cuang lo ho khaw.

Ka Nau, Mino kan si ruangah kan nundan, kan tawng le cangvaih danah mi’h zothimtlak kan si a tul ti Paul ih Timothy hnenih ca kuat tla kha na siar hngilh pang kei. Nunthiamhlimnak tla na ngaihsak lo pang kei.

Ka Nau, mi’h hmuhsuam nautat men ruangah na ninghangin na riah a sia tuk pang maw? Na tuah dingmi tuah lo in na um phah maw? Leitlun rundamtu Zesu rori hman hmuhsuam nautat phunkim tuarin beng le cilphui tianghman a tuar nan a tumtah a hlen suak kha na hngilh pang kei.

Ka Nau, Calai lamah na dai thlang pang maw? Mai Laica hman cozah tlawngih zir sian lomi a hlo zik cuahco mi Kan Calai kilkhawi a tul zia thla theithiam lo in na daithlang pang kei.

Ka Nau, O le Aw thu relkhawm hi thilsual tuah vekah ruatin a reltu pawl khal va hua ciamco hlah. An Calai duhzia le Upat tlak ansizia theithiam in lawm rero sawnaw. Asinan thinlung thiang lo ih Calai thu rel cu va ralringaw.

Ka Nau, Kan Calai Upa pawl Cangandan an danawk cu pawi lo Hua aw ciamco lo sehla na timi kha ka mang ringring lai. Ziangtik hmanah Calai hi Biaknak le Kawhhran zawngin feh pi hrimhrim hlah.

Ka Nau, mi vekin ka thluak a tha lo ca ka thiam lo ti’n Calai lam ngaihsak lole dai thlang in na um pang maw? “Zuamnak” a thupit zia mikipin an nun in hmusuak hramseh.

Ka Nau, Chin Calai a niam le hmuhsuam le nautat kan si vivo ding ti theiin kan Mino tampi ih thinlung ah Chin Calai na tuh hngilh pang kei.

Ka Nau, Calai ih Ram le Miphun a khaisan thei zia tla a theih hrih lo tu Mino tampi hnenah sim hngilh hlah.

Ka Nau, Ram le Miphun hrangah na dai thlang pang maw? A farah bik le a thangso lo bik ram neitu kan si kha! Kan mawhphurh a tum tuk.. kan tuahtul, kan tuantul a tam zia khan a hngilh pang kei, midang na ring pang kei.

Ka Nau, Lar le Hminthan duhmen ruangah Ram le Miphun duhdaw awter pawl kha va ralring aw. Lar le Hminthan, bulpak hlawknak duh men ruangih Ram Le Miphun duhdaw awter le pawlkawm din ka huat thu ka lo sim theu kha cing ringring hram.

Ka Nau, Na khua le ram na Unau sungkhat a tlaksiat a farah a harsat lai ih thlansantu na si pang kei. Rinumzetih khurawmtu le sawmdawl ih kaihruitu si vivo hram.

Ka Nau, Uktu bawi pawlkha ziangsiar lo in an thiltisual pahnih khat te ah na relsia ciamco pang kei.  Pathian hrilmi an si ti thei in Davih ih Saul Siangpahran a tihzah zia kha na hngilh pang kei.

Ka Nau, Kan ramin zianghman in tuahsak thei lo ih zianghman a suak fawn lo ti’n na thlansan pang kei. Ziangha Chin ram hrangah na tuah thei ding ruat sawn aw.

Ka Nau, Kan khua le kan ramih thiltha a tuah ding caan hngakin to cuahco hlah. Tho awla ziangha Chin ram hrangah na tuah thei dingmi khuaram zoh in cuan in tuah in ttuan aw.

Ka Nau, Ram le Miphun duhdawt a thiam lotu Chin Mino tampi hnenah Ram le Miphun duhdawtnak Cinung an thinlung ih tuh ding ttuanvo na neih khan a hngilh pang kei.

Ka Nau, Biaknak hi hminphaw ah hmangtahrat in dik lo zetin sum lakluh ih that lo zia kan ruahawk theu kha kha cing ringring hram.

Ka Nau, Kawhhran sungih lungrual lo tu si ringring hi Pathian thawi lungrual lo nak ti tla hi a theih lo hnenah simhram.

Ka Nau, kan kawhhranin ziangmi in tuahsak dingti hngakin to cuahco hlah. Kan kawhhran hrangih kan tuah theimi hnatuan te bik khal a tuan hmaisatu si zuamaw.

Ka Nau, Kan ramih kawhhran a tamtuk ruangah vawihnih khat na mang a bang pang maw? Pathian thu lo in zianghman thil a cang lo ti thei hram.

Ka Nau, Kan Pastor pan thlacam in veh dah lo ti’n phunciar hram hlah. Kan Pastor pa hrang vawiziat thla ka cam ti ah buai sawn aw.

Ka Nau, kawhhran na din pang a si khalle “Thuhneihnak” cu din tel hrimhrim hlah ti ah ka lo cah. Ziangah? Ttih a nung, Thuneihnak cu Lalpa Pathian pe thluh aw.

Ka Nau, kawhhran sungih zirhnak sual a ra lut tikah Bible thawn a khamtheitu si zuam hram.

Ka Nau, Ca thiam lo Fimnak, Thiamnak, Zirnak zianghman nei lo Pathian thusimtu pawl khi na duhduh in relsia in a cathiam lo ruangah na hmuhsuam pang kei. Pathian thusimtu nautat hi lehhnu ih Tu le Fa, Ci le Kuang tiang a siat thluh in a cimit thluh thei ti ka lo sim theu kha cing ringring hram.

Ka Nau, Na khua le ram, na miphun, na kawhrhan le na innsang hrang ttangten ko, na tha thlah hrimrhiam hlah. Na kaiza tha rin ter salin ding tento ko. Na bantha vun suah sal in na Li le thal pawl na kiangah tiar cia in hun ret sal. Na ring hun tungsal in a liamciami na ram pawlkha vun zohsal. Khua le Ram, kawhhran le innsangih rinsanmi ka nau harsatnak hmuahhmuah pahtlang tahratin Khua le Ram, Kawhhran le Innsang ih rinum zetmi na si bangin si vivo hram. Na harsatnak le na tuarnak pawl ka theih ruangah a hlan bangih “Cak le Raltha” ih na um kumkhua nak ding hrang ka lo kuat thei sun hi Cahram pakhat. Na Uu.

THT

(Visited 72 times, 1 visits today)

Comments

comments

Comments

%d bloggers like this: