Ka Morning Girl

Ka Morning Girl


By: Hniangsinpa

Khalai caan ahkhan, phun riat lawng ka siih, tlangval ka thiam thok fang, a neih cu ngam cun ka um vek nan, neih ngai ding ka hmu hrih lo a si bik ding. Zingtin ka ti theu dan vek in, zingah ka tho ih, ka zing hruh ding hnipuan ka ret cia mi ka hruh hnu ah, ka kedam Addidas Company (Original), a company in an neih cia mi cemter lohli an duh ruangih an discount (50%) ka lei mi cu ka hruh ih, zing piti (Exercise) la ding cun ka pok suak. Ka MP4 cu ngai phah in, ka hla duhmi ka ngai phah rero ih, ka rinloparal ah, ka headphone thlawng rori khawpin ka dung ihsin in run pah ih, ka thin a heng zet, a lam ka vun her cu… thlan sa bekbek laiih, zilthli thing hawp vek ka si… fala no te a siih, thiamaw lo zet in, “Sorry.. in ngaithiamaw… uico in in dawi ih..” ti in sim phahih a phuhrunawk hmel ka hmuh cun, ka thinheng siang lamlam lo… “A ngah ko…” ti bak lo tong ding dang ka nei lo.

A hmin ka thei lo ih, hmanseh ka mitthlam cun a hmel a hngilh dah nawn lo ding. An inn ka thei lo nan, a hrang ka thinlung sangka a ongaw cia ringring. Ziang a tuah, zovek a si ti ka thei lo nan, cucu ka theih duhbik mi a si fawn lo. Cui zing cu ka hrang ni thar thlengawknak ding can hramthok a si ti ka hngilh thei nawn lo. Can a hung her vivo ih, phun 8 kan theh in, ka tlawngkainak kan thawn ih, cumi hmun ahcun phun 9 kai dingin ka um. Cui kum cu a si hngilhni um lo sinsin cu!

Tlawngkai kan thok ih, ca thiam ka silo ruangah a dung lam to ka duh lo ih, tlar hmaisa lam cu ka ti dan kelin ka cuh lala ih, saya an ra luh hlanah, nunau tonak tlai hmaisabik ih to ve cu ka mi hmuh hnu siin ka theiih, ka zoh phah nan, fiangin ka zoh ngam lo. Saya a rung lut ih, a nikhatnak a sivekin, pakhat le pakhat theihterawknak kan vun nei. Mipa ihsin ka thok ih, kei cun, ” ……… Simpson ka si” ka tiih, ka to. Nunau lam an thok ih, theihterawknak can a si ruangah, ka zoh ve. A thup teih ka rak zoh mi cu a caan a hung thleng ih, “……. Jenny ka si”, a ti zawng ciah ah, ka bop ih in bengtu um vekkhin, ka thang dukdi ih, ka ‘Morning Girl’ kha a rak si!!!

A hmin ka thei zo. Duhnak thusim ka ngam lo, amah nel ih kawm thei dan ka ruah men hmanah keimah ten ka ning a rak zak lamlam. Games & Sport can a hung thleng ih, House khatah kan ciah! Ka be ngam ngaingai lo nan, biak lo theilo can a hung thleng theu ih, cucu ka hrang sunglawi hmansehla, ka ralthatnak in a tlin theu lo ruangah, inn lam ih ruahsal ti lo cu, ziang dang ka ti thei hrih lo. Kan tlawng mipa tam sawn cun an ngai thup theh, hmansehla ka Morning Girl cun, bang khat in mi a biak ih, zo a duh ti theitu le a parih hngal ngam khal zohman kan um lo.

Nikhat cu, nunau pawlin Valley Ball an lek ih, anih khal kan House aiawh in a tel ve. Ka zum hnak aiin a rak thiam lailai. Hmansehla, a hmun rem lo ruangah maw si ding, a ke a nonal deuh? A ke zungpi hnuailam cu a durh ter ih, zanlam ih rawl eikhawm kan neih hlan teah, “Simpson, ka ke hnuai hi in zoh sak hnik aw, in dawh kek sak ngam maw, a na tuk” tiah in sut a si cu!!! Sii le zu in ka nun an luah lo, a tham khal ka tham dah lo nan, thim ka vun hum cu, ka kut khi a khur durdo in ka thei. Ti saklo ka duh fawn lo, ka ti sual ka phang fawn. Dimten ka theitawk ka suah hnuah, kan theh ve fangfang. Cui ni ihsin in nel ih, kei khal in ka thinlung lalnu nelnak aanka cu ngai nuam ka ti bik mi a rak si fawn, tlawngkai nuam ka tiih, a kiangih um nuam ka ti sinsin.

Cutiih thurel tlan theinak can kan vun neih thei hnu cun, kan tluntlan can khal a tam ih, tlawng kai ding khalin kan sawmaw phahphah theu. Cutiih nitin deuhthaw kawmaw cu, mit le mit thusim ding nei awm zetih a tawnawk can khal a tam nan, duhthu cu kan sim ngamaw lo veve a bang. Kei khalin, ka sim ngam ce lo. Zaanah ka ihkhun par ihsin ka sim ih, ka vun thensal theu, ka nupi a siih, kan ittlang ih, kan tho tlang theu nan, khawvaang in in then cat sal cingcing. A hmaisan rori ih sim ding cun keimah le keimah ka nautataw ih, ka fala a si ka duh nan, ka ngam fawn lo.

Ka Morning Girl a si thu simnak can um sehla tiih, ka ruah rero laiah, tlaikhat tlawng kan tlungtlang ih, cui tumah, ‘Tuizan cu ka suahcam a siih, kan in ah zanah lakphak in khawmnak kan nei zikih, ra tel ve awla” tiah in sawm. Cui zanlam cu ka phur zet. Zanriah khal ei mumal loin, ka khawh veten ka tim ka tuah ih, ka sungkhat pawl in ka fehnak ding in suhmi khal sawn mumal loin, ka MORNING GIRL tei in lam cu pan in ka tlan a si bik ko. Lamzin ah, ‘tuizan cu ka sim thlang ding, ka morning girl a sinak ka sim ding, ka sim tengteng ding’ tiin ka ruat ih, ‘mipa ka si lo maw’ ka ti phah aw vivo.

An in ka thleng cu, ka hnak ih thleng hmaisa, kan classmate pawl an rak um celcel zo. Mipa hrekkhat in an capoh phah ih, hmansehla suupawk ka tum ce lo, a  hmin hman ka theihhlan ihsin ka rak duh zo… annih hnakin ka hmaisa ti thinlung pu-aw ter phahin, ka thiamtawk cun ka be ve rero. Simawk theinak can a um pangah tiin, can tha thlen tikcu hngak in ka um ih, lakphak kan in zo ih, tlun a nai cuahco. Hmansehla, ka sim ngah hlan cu ka tlung tum lo. “Len hrih a ngah ko maw?” tiin ka sut ih, “Na duh ih thu, ka lo eel ngam ding maw si?” tiih hni siamsi i vun sawn cu, ka lung hmui vurvo pam!!!

Zan a hung rei vivo ih, sim ngahawk ti a um thei fawn lo. A nu in an TV ah Drama a zoh ih, ka sim ahcun, ka tong a thei  ban ding fawn… a har a si… Cui zan cu hlawhsam in ka tlung in ka theiaw nan, ni dang ka biakdan ramri cu ka kaan ngah thotho in ka thei … “Ka Morning Girl na si… uico na tih lai maw?” ka vun ti thutthi ih, a thei suakaw a si ding, kan hni ciamco ta nan, cubak sim bet a theih nawn lo. Ka ihkhun ahcun ka kut cu bopah sih in, ka thei tawk in ka ruat ih, a hmaikum phunhra cu a pai hnatuannak ruangah khawdangah an um thlang ding fawn.

A thaizing ihsin, Morning Girl tiin ka ko ringring thlang nan, midang ih an kawh cu a duh dah lo. Veikhat cu, kan rualpa John in ‘Morning Girl’ a rak ti a si hmang ding, ‘Hmin ka nei’ a rak tiih, kan rualpa cu a thiamaw lo zet hmang. Can cu a hung her vivo ih, ramthar kan kaan thei lo, kum a cem ih, annih khal an umnak ding hmun pan in an liam. Cui hnuah kum ziat a rei ka thei nawn lo. Ka ca zir ding mi ka theh zo ih, hnatuan khal siava te cu ka kai ve zo. Hmansehla, ka morning girl cu ruat lo ih ka um can a mal zet.

Zingkhat cu, zingpit ah ka thawh kelah tho in, ka tlan lala ih, uico ka hmu thutthi… aw… ti phah in, ka morning girl cu ka ruat suak ih, ‘uico a tih lai kemmaw aw…’ ka ti aw ih, ka hni thup rero. Coffee ka in theunak hmunah ka cawl ih thuthang ca pakhat a lei, cumi hnuah inn lam pan in ka tin, sangka kiangih kan letter box cu ka vun zoh, zung ihsin ca thleng mi mallai a rak um ih, thuk deuh ka vun pur cu, card pakhat hi a rak um ih, zo ih ta so maw a si ding tiah ka zoh ih, ka hmin a rak nganaw.

Innsungah ka luh pi ih, thuthang ca pawl le ca dang cu cabuai parah ka ret ih, cui carf cu ka vun ong. A sung a tlun kehlam ahcun, Just 4 ti hi a rak nganaw ih, a hnuailam vorhlam ah… from Urs Morning Girl timi a rak um cuteh!!! Ka zuang lo fangfang in ka thei. Ka lungawi tuk lawlaw. A sungih ca ngan mi pawl cu mirang a si ruangah, ka thinlung a lut lemlo. Ca fang mal zetin, “nan khuaah ka ra tlawng… ka tlai zo maw?” tihi a rak um… ka thinlung cu a hung thar ih, “tlai lamlam lo… tu ka ra” ti phah in, hnipuan khal thleng lo in, ka zing hnipuan tlannak hnipuan thawn ka suak cih ih, ka bike tar lam zet thawn an rak um dahnak inn lam pan cun ka liam cih.

Thlen ka hngahhlap nak lailak ah, lamzin a ke a kuaiih, ka belh ter hnu ah, an inn lam pan cun ka tlan sal lala. Phur zetin an rak umdahnak, mi inn hnuai cu ka zoh ih, tawh tum zetin a hrenaw… a tawh cu ka zoh ih, ka tham phah rero. Cu lai fangah, ka dung ihsin zohtu nei khin ka theiaw ih, ka hawi cu, “Ziang na pawimaw?” tiah inn neitu pitar cun i rak ti. “Hinah hin Jenny le an rak um dah maw?” tiah ka rak sut ih, “rei zet an rak um dah ko, a pi ka siih, cu naiah Jenny kha a ra tlawng ih, hmansehla mitu ahkhan sizung lamin Emergency an run ko hmang, a feh a si kha” tiah in rak sawn.

Ka thinlung cun, ka bike ke kuai lo sehla maw… ka hmu zo ding nan… aw ka morning girl, sizung ihsin rak tlan nawn hram hlah ti phah in, pitar khal cu be reprai man lo in ka tlan sal cih.

(Visited 65 times, 1 visits today)

Comments

comments

3 Comments

  1. Hniangsinpa na cafung CT ah kan hmusal thei.
    Na nunthuleng nganmi pawl ka hrelh dah lemlo.

    A thok in a cem tiang ka siar, a thiam, mi nun a tham, a cafang hmanmi pawl in nunthuleng ram mi a fehpi thei.

  2. A va lak lawh ve. Ka siar thluh.

  3. Jeevan Park Bro says:

    Ka pu ka rak siar.
    Mak lawlaw.

    Ngam huai deuh a theih lo theu ti aw.

Comments

%d bloggers like this: