Ka Morning Girl IV

Ka Morning Girl IV

By: Hniangsinpa

Kan tuah ding pawl tuah thehih kan um hnu cun ka fehpi thawn Zurich ih an main Shopping Mall, Zurich ahcun kan neih sumsaw ih a daih mi pawl lei phah le khawlak leng phah in kan feh ih, a zanlam nazi 2:00 PM ah Japan pan ding kan si. Ka Morning Girl hmuhnak can ka naih vivo ti ka theiaw ih ka hna a ngam thup zet nan, a thupte cun ka tih phah ko!

Minung hi mai duh le tumdan in kan umlo ti ka thei nan, cu pawl khal cu khuanu ih khawkhan mi an si ti ka fiang sinsin. Ziangah tile, Japan Vanzam kerawn ihsin kan suakih, kanmah in rak hmuaktu ding an timi cun mawtaw a run keng nan, cumi cu a ti fiangtu an ah cang riangri! vanzam ke rawn ihsin hla kan tlan man lo, Hotel lam panih kan tlan lai fangah a si, thawm cu ka thei nan, vun ruat dingin cahnak ka nei nawn lo!!! Ka vun thang cu China-Japan Friendship Hospital, Beijing ah ka rak um a si cu!!! Ka lu cu a rit zet ih, ka mi kehlam cu ka meng thei fawn lo!!! Ka vorhlam khal ka kutih bawmnak lo cun khua a hmu fiang thei lo, cu cing cun ka kiang nai ih Nurse umsun cu ka vun ko ih, “Ziang ka cang? Ka mit a caw ding maw si? Ziangtin hinah ka thleng? ka mit nan ti vaw pang ding maw?” tiah hro phahphah in ka vun tiih, thinnel le biaknuam ti theih thei zet khin, “Sir, nan accident ih, na mit kehlam na sawh, nan a caw lo ding a bang, thla phang hlah, cawlhdam na tul lai” tiah in sawn.

Thildang ka ruat nawn lo, ka Morning Girl khan a rak thei pei maw? Mitcaw bang sehla ziangtin ka tuah ding? Ka mang a bang, um ngaihnak ka thei lo, vun cang ka tum ih, ka taksa pum hi a rak na theh, ka duh vek khalin ka heraw thei lo. Ka Vorhlam liang le ka zaangtluan khal an na thluh. Mang a va bang duh lawmmam so!!! Hmansehla an saya/ma pawl biak le kawm an nuam. Mirang an thiam theh ih, special training kai an si hleiah, International Nursing Care theh an si ih, hmansehla ramleng lam ih training kai tu cu an mal zer thung. Mirang tong vun saang sehla, ‘pleasant foreigners’ wing’ an timi an si tlangpi. Sii in vun thunsal ih rei hlanah ka itthat ih, ziang tlukih rei ka itthat ti cu ka theiaw lo nan, manglam vek, a ngaingai vek khin ka um..

Ka kiangah ka Morning Girl cu a rak to ih, zaangfahnak mithmai pan le no, duhnungza mitmeng thawn ka kut cu a rak zuut rero vekkhin ka thei theu. Ka thang fiang thei fawn lo. Manglam vekkhin ka um lala ih, an in lamah an tohkham par ah a kawngparah itin ka theiaw ih, ka cal cu a rak cul rero… Uh hrih… um hrih hnik aw… a rung kun niam… in hnam a tum… aw… ka duhthusam a si… ka vun thang dukdi cu… a zate cun ka manglam hlir an rak si theh ce lo, ka kiang ahcun a rak to ve ngaingai. Ka kut cu a kut nem le no, kut zung sau lam zikzik cun a rak cul rero.. ka meng a run hmuh cun, “Hi… ka thang ngah zo maw… na va tong aa nasa lawmmam ve… fala hmin ka theih dah lo mi na sal ciamco” tikhin um ze nei zetih mi zoh phah, ti elawknak lam silo mithmai panten i zoh phah cun a run tiih, kei khal ka theihnak hmuahhmuah sawmkhawm in ka ha cu ka rak hmu thei ve.

Tha teih biak ka theih hnu, ni 5 nak hrawng a si ding, Ka Morning Girl cu ka ihnak lam pan in a rak ih, ka duhbikmi ei le in ding i run hun phah in, “Tuini cu biak na tlak ngaingai thlang a bang, ka mitmeng khal a fiang, ka mit ziang a bang?” tiah awkam zaang felfai zetin i run sut ih, kei khal thei le theilo ih to tum phah in, “A si hokhaw, kilkhawitu ka nei tha ih, na umnak ah nat rei ngaingai a ngah lo e” tiah hei hnihsan phah in ka rak sawn ve. A rawn ken mi pawl kan ei phah in, “Ziangruangah ha Japan na rat, ziangtin ka accidentih, himi Hospitalah ka um ti na thei?” tiah ka sut. A hni ih, a kehlam ih ei ding vun lak phah in, “Nang khal lawmmam, na nat cu ka na ve si… thu ngaiin, tuhi Internatioanal Training on Orthological Treatment kan neiih, himi Hospital hi kannih ram ihsin ra pawl hrang Practical nak dingah in pek, cun ka lo phone ih a rak kai tu in na dinhmun in sim ihsin ka lo hmu thei” tiah in sawn.

ka thawpi ka suah hlunhlo ta ih, cumi theh cun, thu dangdang ka rel vivo ih, amah sawn in ka um har a phang a si ding, “Alfred Nobel hi na thei dah maw?” tiah in sut thutthi. “Ka sungkhat a va si hmello ve, ka thei lo” tiah capoh in ka rak sawn ih, a nih cun, “Thungai in maw, Nobel Peace Prize kan ti theumi hi amah ruangih um a si” in tiih, kei khal in, “Pi Suu Kyi ngah mi kha maw?” tiah ka rak sawn. “Aw, amah kha milian zet a siih, ka sim duhmi sawn cu maw, fala nei lo, ngaizawng neilo, falat tlangval duhdawtnak lam theilo tiah an rak ti theu mi a si. Hmansehla maw, a rak nei ve, hmansehla a thih hnu kum 50 lawng ah cumi hman an thei fang. A personal Secretary thawn an ngaiaw ah an neih ih, a sec. in pasal a neih hnu khalah ca an kuataw nasa zet nan, ngaiawknak thu lam a si lo. An rualpi thaaw a si bik ko. A nihih rak ngai thup mi cu midang … aaa… na ih hmu tum a bang…. ” a tiih a cawl thuthi.

Kei cun, “Ka thihhnu ih mi theihsal hnakin, ka dam sungah theiseh ti ka duh” ti phah in a kut cu ka kai ih, ka lamah ka kuai nai. Ka room sungah zo dang hman an um lo, ani khal in in eel sianglo ten ka taangah a ra bet ve ih, kei cun maw ka duhmi cu nangmah hi na si, ka damsung tlaitluan ih ka nupi ding le ka tefa in hrinsaktu ding na si ti phah in a khabe ka kuai so ih, a hmur vaam hemhi cu ka duh thusam bangin ka hmur cun ka vun dai ter ih, a ni khalin in rak sawn ve…. “Kei khal in cumi cu lo sim ka tum mi a si” tiin lungkim zetin ka taang ahcun a bet.

Zo dang kan ngai lo, Doctor/Nurse in tuamhlawm khal ka tul lo, ka dam sualso in ka thei. Caan a rak rei lo hmang ka ti lai ah, Nurse a rung lut ih, in theihthiampi zet khin khat lam zoh phahin sii in pek dingmi pawl cu a tuah rero a si cu….

?
(Visited 115 times, 1 visits today)

Comments

comments

3 Comments

  1. CT ih na colonist te kha fill up ringring theu aw.
    Lo hmuh lo cun, kan cavvai theu.

  2. hmmmm… lak lawh thei tuk…siar nuam tuk

  3. ….peh vivo aw…siar nuam lawlaw……

Comments

%d bloggers like this: