Ka Mitmu Rong I Thlengh Sak Aw

April 28

Tlawngkai Nithum

Ka Mitmu Rong I Thlengh Sak Aw

Siar:

Matthai 16:24-28

Ziangahtile zokhal amai’ nunnak hum a duhtu cun a nunnak a sung ding; asinan Keimah ruangah a nunnak a liamtu cun a nunnak a hum ngah ding.     -Matthai 16:25

Kumkhat Sung Baibal:

–   1 Siangpahrang 3-5

–    Luka 20:1-26

Amy Carmichael (1867-1951) cu minote a si vekin a mit-mu pawlmi (brown color) cu a mepian (blue color)  ih thlengh sak dingin thla a cam rero nain Pathian in a thlengh sak lo ih a riah a siazet. Kum 20 a kim tikah Pathian in missionary ttuan dingin a ko. Hmun dangdang ih a ttuan hnu ah India ram a feh. Cutawk ah Pathian in amah a sersiam daan a ruat saal ih Pathian ih tumtahnak a thei ngah saal. A mit-mu mepian bang sehla cutawk ih Kala miphun pawl in an cohlang lo ding ti a thei. Amah cu India ram ah kum 55 sung Pathian hna a ttuan.

Amy cu a mit pawl le mepian rong parah tthum aw in India rammi pawl in an rak cohlang a si maw si lo timi cu kan sim thei fukfi in kan thei baan lo. Asinan kan theih fiangmi cu, “in sersiamtu cu Pathian a si,” timi hi a si (Saam 100:3). Ziangkim ah Amah kan rinsan ahcun hlawhtlingzet in Amah kan rian thei ding.

Amy cu missionary hnattuannak ziangvek a si tiah thu an sut tikah, “Missionary hnattuan cu pumpek awknak a si,” tiah a ti. Jesuh in, “Zokhal amai’ nunnak hum a duhtu cu a nunnak a sung ding; asinan keimah ruangah a nunnak a liamtu cun a nunnak a hum ngah ding,” tiah a ti (Matt. 16:25).

Himi in pum a pemi Khristian taktak sinak a langfiangter. Kan hrangih Pathian lairel cu ziangkim lungkimzet ih cohlan thei hi a si. Tuni zumtu pawl, Bawipa Pathian cu cohlang in rian cio uhsi!  – Anne Cetas

Thei fiang thei lo hman ning,

Lamzin i hmuhsakmi;

Na duhnak thlun dingin,

Ka thlacamnak si hram seh. – Sherbert

Pathian hnen pum ap awk ih humhimnak hnakih

himnak hmun dang khui hmanah a um lo.

(Visited 25 times, 1 visits today)

Comments

comments

Comments

%d bloggers like this: