Ka Lungawi, PaPa

June 20

Zarhpi Ni

Ka Lungawi, PaPa

Siar:

1Thessalon 2: 1-12

Pa in a faale pawl a kilkhawi bangin nannih khal kan lo khilkhawi ti cu nan thei.    -1 Thess. 2: 11

Kumkhat Sung Baibal:

–   Esther 1-2

–   Tirhthlah 5:1-21

America ram ah lamhla telephone kawh hi ni dang hnakin Nui’ Ni (Mother’s Day) ahhin a tambik ti a si. Pai’ Ni (Father’s Day) cu telephone a kotulam ih paisa cem si loin kawhmilam ih paisa pek in kawh tambik ni a si an ti. Fanau pawl hi lamhla ih an um hmanah Pa (Father) ih somdawlnak an hngauhsan zia a lang.

Pa pawl hi fahniang pawl hrangah an sumpai bomnak hnakin ttulmi le haimi an si. 1Thessalon 2:10-12 hi Pa sinak thawn ttuanvo a bang awzetmi kawhhran hruaitu pawl a sim duhmi a si. Paul in, “Pa in a fahniang pawl a kilkhawi bangin nannih khal kan lo khilkhawi ti cu nan thei. A uknak le a sunlawinak hlawm dingah a lo kotu Pathian lungawiter dingin nung thei dingah cat loin kan lo forh, kan lo hnem ih tha kan lo pek a si,” a ti.

“Forh (Exhorted)” timi ttongfang hin kiangnai ih um timi a sawhkhih. A ttulmi cu inn ah paisa rak tlun a si tiah Pa le pawl in ruah sual a olte. Fanau pawl ih an ttulmi taktak cu an kiangnai ah um ih thapek hi a si sawn.

“Hnem (Comforted)” timi ttongfang cun ninghannak daiter timi a sawh. Pa in tikcu caan pekin faale pawl ih simmi thu tthazet ih ngai sak hnakin mankhung sawn zianghman a um lo. Cuti locun pehtlaih awknak a derdai ttheh.

“Thapek (Charged)” timi ttongfang in nemhngeh timi a sawh. Pa pawl in faale pawl hmai ah Pathian Thutak an nunpinak in an faale pawl an sawm-ngiar.

Pathian lungawiter dingin (c.12) faale a bawmtu Pa pawl parah ziangtluk lungawi ding kan si.   – Albert Lee

Pa le pawl parah kan lung a awi, Bawipa,

Na hnen ihsin kan ngahmi laksawng hleice an si;

Kan upatnak langter thei dingin in bawm aw,

Kan ttongkam le kan tuahmi in. – Sper

Pa ttha pawl in vancung ih kan Pa ih muithlam an cuangter.

(Visited 26 times, 1 visits today)

Comments

comments

Comments

%d bloggers like this: