Ka Lung Sungah A Suak Saal

April 13

Tlawngkai Nikhat

Ka Lung Sungah A Suak Saal

Siar: John 7:33-39

Puai ni netabik le ni sunglawibik ni ah Jesuh cu a dingih aw ringzet in, “Zokhal ti a haalmi cu ka hnenah ra sehla ra in seh. Ca Thianghlim in, ‘Zokhal keimah i zumtu cu a sung ihsin nunnak tiva a put ding,’ tiah a tivek in a si ding,” tiah a sim.      -John 7:37-38

Kumkhat Sung Baibal:   1Samuel 22-24    Luka 12:1-31

Kan dung kum 10 lenglo lai ah Africa ram Nitlaknaklam ih Pathian hnattuannak hmun pakhat ka tlawng tikah nauhak nute pakhat mawttaw pi parah kai in miseenpi hmai ah hla a sak ka hmu. Hni siamsi phah in microphone kai phah in hla a sak rero:

             Ka lung sungah ka lung sungah,

            Ka lung sungah a suak saal;

            Hla ka sak, ka lung a awi,

            Jesuh in i thianter zo ruangah,

            Jesuh ka sungah a um;

            Ka lung sung sualnak a thianter,

            A suak saal, a suak saal, a suak saal;

            A suak saal, ka lung sungah!

A sakmi hla vekin ti le thlarau ih kholhfainak Baibal ah a um. Puai ni ah Levi mi puithiam in thlaler ih Israel pawl Pathian in tidai a pek theihternak ah tidai a thle ding. Culaifangah Jesuh cu ringpi’n a au, “Zokhal ti a haal mi cu ka hnenah ra sehla ra in seh. Ca Thianghlim vekin a thinlung sung ihsin tiva a put ding” (John 7:37-38). Jesuh in Amah zumtu pawl hnenah Thlarau Thianghlim pek ding thu a simnak a si (c. 39). Hih tihaal a timi cu Amah lawngih pek theimi diriamnak a si.

Rundamnak na ngah lai ih na tonmi lungawinak na hloh a si thei men. Na theihmi na sualnak atu phuang aw (1John 1:9) Thlarau Thianghlim in khat aw (Efe 5:18), cule na thinlung ah suak saal ttheu dingin caangvaiter aw.

Khrih a feh zo ruangah Thlarau Thianghlim a lut thei.

Comments

comments

Comments

%d bloggers like this: