Ka Lo Hngak Ding (Pzart – 11)

Ka Lo Hngak Ding (Part – 11)
Mai Daidim
 nauhak
Awite cu thawsuak ih a ttah ngah hnuah Ko Aung liang par ihsin a hong tho ih a biang ih mitthli a hon hnuul. Cule a lu a hon herih Ko Aung ttangah a rak ttap ti a von theihawk veten a ningzak umngaihnak thei loah a kut za zam ciamco’n a tonak ihsin a ding hlukhli. A cal a kheuh, a lu parih tluang thliahthli a sam a cuul hnok thluh. A bop a kheuh thuul tiin a umdan zoh in Ko Aung le a rak hnihsuak lamlam. A hni ngam ngaingai fawn lo. Ko Aung cun, “Naunu, ziang na cang tiin ka lo sut lo ding. Kei cu ka lo sim ringring bangin na mitthli lo hnuul saktu si ka duh nan cutiih na biang par miithli hnuul theinak canvo ka neih lo hmanah na hngauhsannak si thei dingmi ka liang lo san ka duh ringring. Zianghman ningzak ding a um lo pi” tiin Awite ih liang kai phah in a sim. Ko Aung ih kut Awite liang par a vong thlen cun Awite ih thihri pawl an hnin thluh. A tak vek an zaa hluahhloih a lungtur an hong rang ciamco.

Awite cun a liang parih suanmi Ko Aung ih kut cu a ringh herin a von zoh. A thinlung ruahnak ah cun Sumte in a liang kai in tha a rak pek ringring lai pawl an vong cuang. Hmun pakhat khat feh ding a si caan, asilole thil pakhat khat tuah ding a si caanah Sumte cun Awite ih liang kai hnget phahin, “Tete, na lamah ka ding ringring. Hih hmun ihsin ka lo hngak ding.” a rak ti ttheumi ttongkam cu a von thei sal. “Naunu, na kiang teah ka um ringring thei lo nan na lamah ka ding ringring ding. Na dunglam thu na hngilh ih ka hnen na rat dingni ka lo hngak ding”. Ko Aung ih ttong a hon theih veten a taksa a hong ttim suarso vekin a thei aw. A cil veikhat a von dolh khutkhi hnu ah a liang parih Ko Aung kut cu a phial tla. Cule, mitmeng thiip takin Ko Aung cu a hon zoh ih awsuah rum nawn in, “Mipa hmuahhmuah nan bangaw thluh. Nang ih hngah ka ttul lo. Ka lo hngak ding mi ti tahratih hngah ttul nan si thluh! Na hnen khalah ka ra dah lo ding. Ka kiang ihsin tlansuak aw. Ka thuhla thei ding khal zuam aw hlah. Kan thinlung anaihawk hlanah tlan lohli aw. Atu rori ah feh aw!” tiin ttap phahin Ko Aung cu a tul. Cuzawng cekci ah, “How many hours and how many days……” ti hla a hong thang. Ko Aung cun hla aw a ratnak lam a von zoh ih tohkham parah Awite ih phone cu a rak heraw rero. Cuih tohkham lam cu a hei naih vivoih phone parih catluan cu a von siar. Awite cun a phone zamrang takin a von la ih, “Ka thuhla zawhhnit aw hlah ka lo ti kha” ti phahin a phone cu a von phit.

Caan malte sung thu a ruah hnuah rinlopiin Awite ih kut a hei kai hlukhli ih a tlanpi ciamco. Awite cun, “I thlah aw. Ziang na tuah? I thlah aw ka lo ti” tiin a kut cu a phial rero nan Ko Aung cun hnget takin a kai sinsin. Thlansa bekbek ih an tlan hnuah dawr pakhat hmaiah a cawlhpi cutci. Awite cu a thaw sam helhel in a bungbukun ih a thaw a hon la ciamco. Cule thinheng tuk pak hliahlia in Ko Aung cu a hon zoh. A hmuhmi thil cun Awite ih thinhengnak an ti dam thluh. Pangpar le thingfa dawr a rak si. Pangpar phunkim, rong tinkim mawi hlerhli in an rak khat. Pangpar rim hmui polhcawk in mi thinlung an ti nuam nasa. Dawrkil pawl cun mithmai pan takin an rak hmuakih, “Ziang kan lo bawm ding? Pangpar maw thingfa nan zoh duh” tiin an rak sut. Awite cu a lu Ko Aung lamah a hei her vukvi ih, “Ziang na tuah tum?” tiin aw rum takin a hei sut. Ko Aung cun Awite ih thusuhmi cu ngai thla lem loin pangpar pawl cu pakhat hnu pakhat a tham ih a hnim vivo. Cule lungkim tukih hni hmurhmo phahin a lu a sut hnu ah Awite cu a hei ko. A duhmi pangpar pawl a thurih dawr kiltu hnenah mawi takih tuamsak dingin a fial. Dawrin an suakih East Cost Park ah a fehpi. Tivapi kapah an dingih Awiteih kutah pangpar tom cu a pek hnu ah, “Na pa hnen ih na sim duhmi simsuak thluh aw. Kan dung vekin na thawsuak in au ciamco awla na tuar a nuam ding” tiin mithmai pan zetih zoh phahin a von ti. Awite cun mangbang ti tuk mithmai thawn Ko Aung cu a zoh. A kutih pangpar pawl a von zoh sal. A paih mual a liamsan hnu kumkhat le hrek tiang kawlram a umih a paih thih kumkhat kimnak ah an sungkim in pangpar tom thawn a paih thlan an rak feh lai a von mitthlam ciamco. Tuisun hi ‘Ka nu’ ziangtin a um pei tiin a ruat ciamco. “Naunu, ziangah na pa na thlah lo ding maw?”, Ko Aung ih thusuhnak cun a thuruahnak a von ti catih, “Aw…… Awaw…” aw hak ttutto phahin a hong hni. Cule tiva pi kiangah a vong feh ih, “Papa, na fale hi Nuhmei farah fa ah tuah tahratin nang cu hmunttha le ram nuam ah na thleng zo. Na thlennak ram in in ron zoh aw. Ka naule tla tlawngkai mi cathiam ih suak thluh dingin tumtahnak ka nei ih mi kut tangah sal bang hna ka ttuan. Papa, ka lo ngai thei tuk…… Nang cu na fehliam zik zawng hmanah ttap lo dingin in tiamta ti aw. Na fehnak ding hmun nuam a si thu na theihfiang ruangah a si.  Asinan kannih hrang cu na ruat ve lo. Papa, ka lo ttul tuk lai nan……..”. Awite ih biang parah cun mitthli vanrial ruah bang an rong suur thlurthlo. A pangpar kenmi cu tipi sungah a thlakih, “Na hnen ka thlen ve hlan sung mang ttha” a von ti ta.

kabia san tak
Ko Aung cu Awite in ziang a ttong ti a theifiang lo nan Awiteih tuarnak cu thinlung takin a rak tuarpi ve. Nuamteten a ke a hei karih Awite kiangah a va ding. Cule a kutih a kenmi thingfa cu a hon suahih, “Himi thingfa kan phun dingih a nungdam asile na pa in kan pahnih in lungkim tiin kan ruat ding. A nungdam lo asile rualpi lawngin kan komaw ding” a von ti. Awite cun, “Cuvek a um kel lo. Na duh le nangmahte phun aw. Kei ka tel lo ding. Na thukam mi khal ka thei lo.” tiin dunglet herin a feh tum zawngah a lung a rong mit cuaicoih a hawr duldo. A depdep kai in a tlu zik cuahco a hmuh veten thinphang tukin Ko Aung cun a va kai. “Naunu!!! Naunu!!! Ziang na cang?” thinphannak ih khat awsuah thawn a va kai ih hnemdai tangah a toter. Ziang tuah ding ti a thei fawn lo. A her duldo ciamco. Awite cun, “Ka ttha cih mai ding. Malte ka cawl dingih kan tlung cih mai pei” tiin a sawm. Ko Aung khal lungkim in a lu a sut hnu ah a thingfa cu a va lakih Awiteih tonak hmai rori ah a phun. Cule a kaa rori in, “Hong nungdam hram aw maw. Ka thinlung muril hmuahhmuah ka phunmi na si” tiin thingfa zoh phahin a ttong. Awite cu a tohmun in a rak hni thutthi. Ko Aung cun a thingfa cu duhthusam in ti a tawih hnu ah Awite hmai ah a kut a von sanih Awite khal cun a kut a hon san ve. Cule, Awite hmai to in, “Ka lo paw ding. Nangmahte na feh thei zik lo” a hon ti.
“Aih, hitluk mi tam lakah a ttul lo. Ka feh thei ko” tiin Awite cun a sawn ve.
“A ngah lo. Taxi stand kan thlen tiang ka lo paw ding” tiin Ko Aung cu Awite ih hmaiah a to cercer. Awite cun Ko Aung ih zaang a von bengih, “Ka feh” tiin a fehsan. Ko Aung cu a bop a kheuh ih, “Korea zuknung ah an paw aw ringring ih pawkawknak in kan pahnih karah duhdawtnak a hringsuak ding hmang ka ti nan….” tiin a phun hmurhhmo phah. Taxi sung an vong lutih Awite cun a feh duhnak hmun a sim. Awite ih ttong a theih in Ko Aung cu mangbsng tukin Aeite a hon zoh vukvi. Awite cu tohkham parah a kut phahnih bom in a zau ih, “Kan biakinn a si. Na duh le i thlun thei. I thlun duh lole na duhnak nakah na feh thei” a ti hnu ah a mitsing in a motor thlalang lamah a lu a hon ret. Ko Aung cun Awite ih umdan zoh phah rero in, “Christian pawl khawmnak ah ka rak tel ve dah ko. Ka lo thlun ko ding” tiin a sim. Mah le thuruahnak thawn mitsing in khatlam khatlam thlalang hngauhsan veve phahin Taxi driver pa cun East Cost tivapi hrawh in khawsung lam a panpi vivo….

Peh vivo lai ding……

(Visited 230 times, 1 visits today)

Comments

comments

Comments

%d bloggers like this: