Ka Lo Hngak Ding (Part – 46)

Mai Daidim
Ma nun

Falam:
“Aiha….. Falam thli ciocio ah vankau thli hi cu a vir tukaw lawmmam aw! Huuurrr…..” Pi Men cun khawsik ruangih khabe khawng derdo phahin a ttong. Parte cun Pi Men hnihsan phahin,
“Kawlrawn um tthang hrangah cun a har ngai ding. Kanmah falam um ringring hrang khalah na tivek in tuar a har zik ttheu ngai.”
“Ka fa, thaten thu I sim hnik. Na nu ih umdan a phundang ka tituk. Tlawng sayama hokhaw ka si. Nauhak pawl tla cu ziang an ruat ih ziang an cang ti an hmel zohin ka sim thei. Na nu hi ziangdang ih dam lo a si lo. Thinlung natnak rori a si. Cun, tuizing kha ziangah ha ka fapa in hnamdang fala a neih thu cu ngai poimawh takih thu I suh ciamco. Nannih hi ziang nan cang ha a si?”
“Ai… Zianghman a si lo hokhaw sayama. Kha, rawl ei kan man. Rawl kan la pei” tiin Parte cun rawl ei tim a tuah tum. Pi Men cun duh hleihlo lo’n Parte ih liangin a kaih ih mitmen cang zet thawn Tlawng sayama in tlawngta nauhak thilsual tuahtu a kawk laifangih hmel umtudan vekin a zoh. Parte khalin a nuih rualpi ttha a sinak lawng si lo’n mi upa rori a sinak hmaizah phahin a kun ih Pi Men cun Parte’h khabe ah von kai tahratin a hmel thawn hmaiton in a zohawkter. Cuzawng ah sangka hram ihsin “Ka nu!! Ziang na cang?” “U Parte, Sayama!!!” tiih awsuah bangaw thlurthli in mi pathum an rak ding. Puite, Esther le Pi Men ih fapa an si. Pi Men cun a kut a thlah ih,
“Tulai nauhak pawl lungruh dan lawmlam cu! Rawl ei tuah uh! Na nu ka va hruai ding” a ti ih ihkhun khan lamah a lut.

Pi Tlem khal a hong tho fiamfoih rawl cu an kiltlang thluh. An zaten dar hai tongaw surso’n dukcuh zetin rawl an ei a hmuhin Pi tlem cu hlimnak ih khat mithmai thawn a hong hni. Rei a mithmai a pan lo. Thu pakhat ruangih tuar zet ti theihtheih in a mithmai cu a vong dang lohli, a vong nau sualso sal. Cucun, a dar hai a ret ih a dang veikhat a von thian hnu ah thupi hlapi rel ding awm takin ttong a hon thok. An zaten rawl ei thei nawn loin Pi Tlem an zoh thluh.
“Uhum!! Mitu kha ziang ha theih na duh lawmmam ih ka fanu cu na hro?” Pi Men a thir dukdi. Mitmeng phawlek zet thawn Pi Tlem a zoh ih awsuah baibah zetin,
“Aw….. Ka hro ti na theih hnuhnu ka theih duhmi khal na thei kei cu. Nang cu veikhat kan ttongmi ih a duhsan na rak kaingah lohli ringring kha”
“Hmm!!!!! A si lo tiangtiang I porh tum lala. Khah, ka lo sim ding. Nang cu Tlawng sayama na ttuan ih nangmai’ sungsuak fale kil,khawi man lo khopin na hnattuannak ah pum na pe. Curuangah na fapa in hnam dangmi fala a nei tiin na thin a na” Pi Men cu a lu a rak sut hnmuthmo. Midang pawl cun thaw hman thaw man lo khop ih mitmen phaw keke in Pi Tlem an zoh cio. Pi Tlem cun a ttong a peh ih,
“Kei cu ka fanu hi ka kiangah ka umter ringring. A paih dam lai khalah a pa thawn kan thusimmi a bangaw. Kan thu khal in el dahlotu fanu tiin kan suang zet. Taisir zetin kan innsang a zoh ih a naule khal a cawm thluh. Asinan tu ah ziang a cang? Kawl milem be pa thawn hamawknak an tuah! Ka zum thei lo. Ka thisen thawih ka hrinmi fa a si ding ka zum thei lo. Asinan amai’ kaa rori in ‘Nunu, hipa ka neih lo cun pasal ka nei nawn lo ding’ I ti. Ziang ka tuah theimi um nawn? Thinheng tukin ka dawnkham. Khapa a tthen hlan sung I be lo dingin ka simih I be lo taktak. Tuisun ni tiang ka fanu in phone veikhat tal I ko in ‘Nunu, I lungkimpi ko aw’ tivek tla’n I ron dil kerhko sehla ti beisei zetin ka hngak nan…. I be lo hrimhrim” Pi Tlem ih mit sungin mitthli ti cu an luang kiahko rero. A fale pawl khal mitthli tla lo dingin an ttangih an hmur le hmur cu an cip rero nan an mit ihsin mitthli ti cun a ron forh kerhko cio.

Pi Men cu a tonak ihsin a hong ding cuaicoih Pi Tlem ih zaang zuutsak phahin “Fale hrangah a tthabik ding kan ruahsak cio ttheu nan fale in le an theithiam ttheu lo. Ziangkhalle tulai santiluan in a zir si. Tongpa kham in kham lo’n na fanu ih tlangval pa kha theih hmaisa tla tum sawn awla, a zuk vek maw, asilole tulai cu santhar thilthiam a sang tuk thlangih internet ihsin hmel zohaw ih biakawk khal a theih huahho zo si. Cuih amah nan hmuh hnuih nan pom rem thei lo ding rori a si lawngah thu tthaten relsal uhla a ttha ding. Kei kan mo ding cu phun 7 an kai lai ihsin ka rak theihciami an si. Rualpi ih komaw an si cu k arak thei ringring ko nan tlawng ca zir hmunkhat an si ruangah khatin ka rak daihthlan sual ruangah si. Cu tiih von ti cun misiakha sungkua cu an si lem lo nan hnam dang, biaknak dang an si ruangah ka duhlonak a si ve. Ziangkhalle Fale ih duhmi cu a zoh tal kan zohsak hmaisa a ttul hokhaw”
“Si, cucu si tuih ka ruahmi cu.” Tiin pi Tlem khalin a hon sawn ve. An zaten an thawpi an suah thluh. Pi Tlem cun,
“Khei…. Kan rawl khal a dai thluh zik thlang. Ei kung uh ee…” a ti ih pakhat hnu pakhat hnap hnuk hlukhlo phahin an mit an hnuul cio. Cule an dar hai cio kai in raw lei an thok sal. Pakhat le pakhat hmeh an suahaw ih lungawi aipuang in rawl an ei khawm hliarhlo.

###%%%&&****

“Nan um maw? U Parte, Pi Tlem” Inn hmai zinpi ihsi kawh aw an theihmi ruangah pakhat le pakhat an zohaw thluh. Parte cu a tonak ihsin a hong dingih “Kan um hokhaw. Rong leng aw” ti phahin sangka a va ong.
“Ai, Tharte!!! Ziangtin saw tulawng in hong len? Khua ah na va um ringring maw?” Tharte cun Parte ih mithmai zoh hmaisa loin inn sung tohkham sau parih ttawl emem, mina damttua a si hmel langcu fahran ih sangka lam rak hoihtu Pi Tlem cu phuhrunawknak ih khat mithmai thawih zoh phahin,
“Aw…. Si” tilawngin a sawn. Parte cun innsung lut dingin a khihhmuh hnu ah Tharte cun a hruaimi tlangval pa cu rak lut ve dingin a sawm. Aw tthia phah nawn in Tharte cun,
“Pi Tlem, na dam lo mawsi? Na va reh riahri ve” tiin a sutih Pi Tlem cun hni phahin,
“Ka ttha zo. In hong palkai ih ka lungawi.” A rak ti.
“Umm…… Ee….. Tipsun ka suk zikih U Awite thil kuat tla nan duh pangah tiah”
“Tipsun ee?! Ziangah cu lohli” Parte in a rak suthliah.
“Aw…. Thla khat lawng si khuan ka ngah. Feh lam cu zianghman phurh ding ka nei ciamco loih nan duhduh in kuat thei hokhaw. Tthiahvar kuat nan duh khalle a ngah thotho”
“Aw…… Na fel tuk aw. Thaizan ah kan kuat duhmi kan rak lo pe ding maw”
“Awle”
“Ziangah maw Uu hi mi tlung um rori thil zianghman in kuat lo? A va roh ve!” Esther in lungkim lo tak mithmai thawn a rak ttong. Puite khalin,
“Si ee ti. Uu hi ca tal in kuat lo. A lawmmam deuh si.” A rak ti ve. Tharte cun,
“Sile thaizan sim tuk lo ah in rak pe thei uhla ka duh. Phurh tuah a buaithlak deuh pangah”
“Ee…. Siseh law. Kan rak lo kuat ding maw. In phurhsak thei ding hniahno takah. Lungawi tuk aw” Pi Tlem cun tha nei lo tak awsuah thawn a hon ti. Tharte khal a hni ih,
“Sile, ka suk cih ding. Khawm ka tum ii…”
“Ee…. Kan lungawi”. Sangka leng tiang Parte in a hei thlah.

Pi Men cu a dingih, “Kannih khal kan suh a ttul. Thaizing suk ding rori kan si fawn. Khah, diriam in rawl kan ei tlang ngah rualri si” a tiih suh tim a tuah. A fapa cun Parte hi a zoh khop thei lo. A mit ihsi Parte hlohter a siang lo. Tuan an hong thlen ih rawl suanih buai vutvo Parte thawih a hmaisabik an mit a tonawk dukdi caan kha a lungtur pawl an khir an zuang ciamco vekin a thei aw. Caan maltakte sung a hmuhmi fala nu’n a thinlung a rak la thluh zik man. A nu cun,
“Ta-nge, kan suk pei” a ti cun huam lo takin a hong ding puangpo. A mitsirten Parte a zoh thup rero. Parte in le hni siamsiam mithmai panten a rak zoh ve. An suk taktak cu a thinlung a suk ve lo. Ke feh fung hnuphno’n a feh. Parte teih inn hmai zinkel an liam zawngah dunglet a hersal ih Parte cun a mithmai pan cu cawl cuang lole duhnung mithmai thawn a kut za a rak zap. Cuih mithmai ah a thinlung cu a tangta. Pi Men cun,
“Ta-nge, ka rualnu ih fale pawl khi an fel hai tuk ti. Ka rak lo sim dah lo. Ka rualpi tthazet hokhaw a si. A fa upabik suah tiang ka hmu ta ih a pasal thih hman ka thei nawn lo cu ai…… Ziangtin ha maw kan rualvah in kan fale cu hivek an si aw….. Nang cu kan lai fala rori lawng mo ah I sum ding maw. Na U vekih hnam dang mi na neih citcet cun!!”
“………….”
Ta-nge cu rawl an ei lai ih Parte in a kheng sung tiang hmeh a rak suah lai pawl, rawl an khawh hnuih khokheng zate a kholh rero lai khalih mithmai pan zetih ret thei ringringtu Parte ih umdan le cangvaihdan pawl cun a thinlung ruahnak ah bu an rak khuar thluh zo. A nuih thurelmi pakhat hman a thei nawn lo.
“Hey!! Ka lo biak rero hi na thei lo maw? Ziang na ruat?”
“Aw… Awaw…. Ziang na ti maw?”
“Ziang ka ti dingih? Na U Vekin hnam dang fala hrimhrim nei hlah ka lo ti”
“Sikchiah! I zum aw. Nupi fel tak, mawi tak ka lo sum ding”
“Hey…. Na ttongdan cu fala nei zo na bang. Khuilam fala ha na neih? Ziangtik in ha nan duhawk?”
“Aih, na theih a cu hrih lo”
“Ziangtin ee?! Na theih a cu hrih lo na ti maw?! A pum lang hnuih ka theih dingah maw na ret?!”
“Aa….. Ka nu! Cuvek a cang lo ding. Amah lam ihsi lehnak ka dong hrih lo men”
“Kanmah laimi si ti aw”
“Si tuk panteh. Hitawk Falam khawsung mi”
“Haa!!!! Mizan lawng Falam na thlengih ziangtin maw fala na neih man? Aww…… Hitawk falam ih um an siih Mandalay ih tlawng rak kai na tinak san maw?”
“Si lo. Aih, thu na duh. A caan kim le ka lo sim leh ding”
“Na nu hokhaw ka si. Ziangah ha thuduh I ti. Na U vek na si cun ka lei keu in hokhaw ka nun ding”
“na thinphang hlah. Khavek kan cang lo ding ka lo ti zo si”
“Si le ka lo rinsan in ka lo zum ding maw. I bum cun na ol lo ding thei aw!”
“Awle. Hee…”.

An nufa in thu elaw phah, rualpi ttha bangih thu ruahaw phahin Canbary cu an thleng. Ta-nge cun veikhat zohnak ih a duh cihmi Parte cu a nuih a lungkimpi lo ding cu a phang hrimhrim lo. A U nupi a neih thluh veteih Falam so sal dingin a tumtah. A dam sung a koppi hrang dingah kekar a thok ve tum thlang….

Peh hrih thotho ding….

Comments

comments

Comments

%d bloggers like this: