Ka Lo Hngak Ding (Part – 44)

Mai Daidim
735203_401206543300689_142311501_n
Falam::
Tthal khawhlum tikcu caan a thok thlang nan zingpit ahcun khua a daihzet lai ruangah zingpit ih khawlak sukso pawl cu hlumten an tuanaw hlenhli cio. Pi Tlem cu ihkhun tlun ihsi a ttumlonak khal a zarh teelin a si thlang. Pi Tlem ih thinlung sungah a fanu Awite cu a thi zo. A fanu in ziangtik hmanah a thu a el dah lo. Phone sungih a biakmi kha a fanu ngaingai a si ding tihi a zum thei thlurthlo lo nan a thinlung hmun hrekkhat in a si taktakzia an rak simfiang fawn. A fanu ih duhnak a thlun ding mawsi tiin a von ruat sinih a mitsing murmo’n a lu a thing. A khawsik sen an bol ttuamtto. Kawl milem bia rori a makpa dingah a cohlang thei lo rori. A fanu parih a ttongmi kha a luan tuk pang maw tiin a von ruat sal. “Khapa na tthen hlan sung I be hlah!” tiih a phone a thlak tata kha a si. A fanu in ngaithiam ron dil derhdo sehla a duh. Tutiang ah a fanu duh tak Awite hnen in “Veikhatten ka nu ka be ding” ti hrimhrim a dong hrih lo. A theih lo karah phone a ko nan Parte le Puite vekin phone an pe duh lo vek teh si pang pei maw titiang a ruat. A fanu hin a duh ngaingai ahcun anuih lungkimpi tiang lem ttentto in a nu’n phone a kaih duh lo hmanah tuletu “Ka nu ka be duh” tiin ron cah sehla Pi Tlem cu fate ih duh tukmi rori cu tiih ngairemdan khal a thiam men thei nan atu cu Awite in veikhatte rori hman a nu phone a kawh lomi hi Pi Tlem ih thin tibangbiktu a si.
“Nan tho ttha maw?” Inn lenglam, ihsi a theihmi aw ruangah Pi Tlem cu a ringh a hon tung vukvi. Parte cun khaizang takin,
“Kan tho ttha hokhaw. Rong lut aw, sangka ka kalh lo. Buh ti ka thle laklawh ee….”
“Ai…. Na nu teh?” Parte cu sangka hramih mi ding a hmuhmi ruangah a buh ti thlet lai leitang ah a toh hlukhli ih a tonak ihsin a hong ding. Cule awsuah baibah zetin,
“Nunu a tho hrih lo. A thawhlonak a zarhin a rei zo. Ziangti ruairiin saw in hong len Sayamah? Mangbang tituk fahran ih zoh phahin Parte cun a sut.
“Nang hi Upabik maw na si?”
“Si lo. Ka U ah pakhat a um”
“Ee…. Singai. Na nu cu a ziang na saw? Veikhat lawnglawng kan tongaw ih…”
“Ai….. Ziangtin saw in hong len thiam? Hmun so tla na kai thei” Inn sung ihsin Pi Tlem cun a rak biak. Parte le Pi Men cun an von zoh ih Pi tlem cu Hni tanglam kir leihleih fengin a sam tom phahin a ra suak. Parte cun,
“Nunu!!!!!! Nunu na tho thei zo. Na dam ngah maw?” tiin lungawi takin a va tlan ih a nu cu a va pom. Pi Tlem cun Parte ih liang cu dim teteih beng phekpho phahin,
“Ka fa, ka dam hokhaw. Thinhar in um hlah maw” a ti hnu ah a rualpi duh tak kiang ahcun a va to. Pi Men cun,
“Aize!!!! Kan dung kan inn ih I rong ton kha na ngil lelli ka lo ti ih ziangtin na ti fialfial saw? Na ziang na saw?”
“Ka ziang na ka lo ti ding saw…. Umm……. Sung lam ttiattai lo kan ti mai kei cu!”
“A singai. Sunglam tthat lo cu mi a zuuk tuk ngai. Na fale khal an upa thluh thlang si. Duataw thlang awla”
“In duat tuk lamah hi ka bawi hmerhmer hon siah”
“A hihi na fanu a si ti ka thei sawm! A hnen hmanah veihnih rori thil tthit ka fial si maw. a kut a mawi ka ti tukih ka duh hngen si”
“Nunu le Sayama, nan thureldan cu rak komneelaw tuk dah nan bang” Parte cun Koca ih Aalu zelh phahin a rak sut. Pi Tlem tei’ pahnih cu zohaw in an hni. Cule awsuah rualaw thlurthli’n,
“Neelawk tuk lo lamlam” an hon ti tlang.

******&&&&&&&**********

Pi Men cun tukverh sangkate ihsin hmuanthlang lam cu a von cuan ih Anttam par sengsi zo le le Motol ro sialsi pawl a von hmu. Vainim zakil can fang bial sungah an kho a hmu fawn. Mak ti zetin a zoh rero lai ah Pi Tlem cun,
“Ee….. Kan Vainim tla kha can an rak tthang man mawsi. Ti toihtu’h kutneh ka hmu ban” tiin lungkimzet awsuah thawn a hon ttong. Parte cu dawr a feh hlanah an hmuan thiangfaiten a tuahta ringring. Hanghnah hangrah khal a tikcu ih zirin a ciing. Culai fangah tlangkam ihsin Ninu a hong langih mawi sersi’n ni tleu cun a hon cerh. Hitiih zohnak ah Ni cu tlang ihsin dongkhat can a sang zo. Ni a suah veten lang thei lo’n mero in a rak tuam ruangah a si. Pi Men cu Ni a sang thlang a hmuh in a tlun a cut thu a thei lohli. Cucun Pi Tlem lamah herin,
“Ai…. Ka suh a cu thlang ih ka hong lo lennak san ka rel lohli ke”
“Ee….. San nei in maw na hon?” Pi Tlem cun capoh phahin a sut. An Pahnih in an hni.
“Si ka lo ti ke. Keimah cu Kawl titoih puai thluh lamih suk dingin ka tumtah sinan lo theih loih suh ka ttul zikih ka suh hlanah na fale rual si rawl ei khawm ka duh. Na fale hman ka hmu kim hrih lopi. Cun, Ka fapa khal mizan a hong thlengih tuizan hi kan innah rawl kan ei khawm pei tiah ka hong lo sawm”. Pi Tlem ttong lohli ding a thei lo. A tthuktthunawk lai ah Coka ihsin Parte cun,
“Nunu, Canbary cancan na suk thei ding sawm?” a rak ti lohli. Pi Tlem cu a hni. Cule hmaisong zet mithmai thawn a rualpi hlun cu zoh phahin,
“Kumpi kumziat meng ha tongaw loih kan um? Kum a rak liam vekin kan kum khal a rak upa ve si, hmun sukso hi ka dam hmanah har ka ti zet. Atu betbet cu hiti ka si fawn…… Keiteh na fapa cu ka hmu duh ve tuk sisi…”
“Ai…… Ngelcel ah ziangtin ha kan ti ke? Thaisun rori kan suk zik fawn”
“ziangah saw cutiih suh nan tlio ciamco?”
“A ziangha maw….. Mi hlothlau! Ka fapa upatu cu amai’ tlawngkaipi Shan fala nu thawn an rak cangsual ih tu kha lo theih loih hruaiawk ttul dinhmun an si ih. Ai!!! Ka thin tok nuakno lo ziang! Mai’ miphun le si lo betah biaknak le bangaw lo! A kiangah ka um tam lo tukih a poi tuk rori. Kan hruai lo cun thuhla van deng an thlengter tum ti a si bet! Mi hlothlau!!!”.

Pi Tlem ih thihri an hong sa vutvi! A thu theihmi cun a hna behrek hrawhin a thihri an ron zoi nguahngo. A lusung tiang an kai ih a thluak tirial thluh zik ko an herhkual. Pi Men cu Pi Tlem ih umdan a hmuhin a mang a bang tuk. Culai fangah Parte cun anuih khawruahmi rak kai cih lohli in,
“Sayama, Nanmah nufa kan innah rawl hong ei sawn uh. Nunu hi a dam cah lai hmanah Canbary can can suh khi a tai lo. Tuizan kan innah rawl kan ei khawm ding maw. Aw ti aw maw. Maw… Maw….” A rak ti ciamco. Pi Men khal a lu a sut ve. Zianghman ttong ngaihnak a thei nawn lo. Pi Tlem cu a kunih a lu cu a kut pahnih thawn a dom. Parte cun,
“Nunu, na dam hrih lo ngaingai hi. Vong it sal aw” tiin anuih kutin a hruai ih ihnak khan ah a luhpi. Pi Men cun ihnak khan sangka hram tiang a von thlunih seherh zet naih zianghman tuah ding thei lo cun a zoh cuahco. Parte cun puan a kau ih a nu cu duat takin a von itter, puan tthaten a sinter hnu ah leng a ra suaksal.
“Na nu cu ka ttongmi pakhat khat ngaihlomi a nei pang maw? Ziangtin saw? Kum khal a rak rei tho ih kan dinhmun kan theithiamaw nawn lo pi maw….”
“Sayama, thu pakhat ka lo sut ding”
“Aw, ziangha? I sut aw ka fa”
“Na fapa ih fala nu khi Shan miphun, cule biaknak khal a dang na ti sikhawh”
“Aw, si ee”
“Na mo dingah na cohlang thei taktak kem?”
“Cohlan thei lo cu ngah ding sawm. Kan hruai lo cun thuhla an tibuai tum fawn”
“Tu nan dinhmun cu na reldan vekin nunau tu nau a pai ti. Asile, nangmah hi fapa si loin fanu sawnih nu si awla ziangtin na tuah ding?”
“Ka fanu ih duhmi rori cu ka lungkimpi poh kei cu”
“Miphun dang, biaknak dang rori khal maw?”
“Ka fa, nunau fim cun an pasal hi an kuaineh thei tuk hokhaw. Thungai ngai in kan sim asile, miphun bangaw lo an neihawk cun an fale cun paih hnam an keng ko nan an thinlung cun nuih lam an ttan sawn ringring. A tam sawn ahcun paih lam ttong hnak hman in nuih lam ttong an thiam naal sawn. Biaknak khalah nuih biaknak an thlun sawn. Cutiih ka ti ruangah miphun dang kan kop ding tinak si lo hokhaw. Lo theih lo thilthu a si ahcun ti thu men….”
“Umm…… Ka lungawi maw Sayama. Tuizan cu nan nufa in hong uh maw. Ziangdang hman cu kan nei lo nan…. Ei khawm ti thuum ih ei khawm duh ah”
“Ee…. Si seh law. Na nu a dam si lo maw. Hmeh suan ding ka hon keng ding hokhaw. Buh lawng rak timtuah aw”
“Ai… Cutin maw? Si hen seh”
“Sile kei ka suk ding aw. Ka fapa tho hrih lo ka tan hokhaw”
“Atu teh zosaw rawl rak ruang ding”
“Buh ka suang ta ih, tihang le hmeh cem in ka vong tuah ding”
“Ee…. Sile ei thaw awla maw”
“Sisi… Kha ka feh taktak.” Tiin kotka lan in a liam tiang hni phahin Parte cun a hei cuan.

*****%%%%*******

Parte cu tappi lungthu kiangah a kut pahnih thawn a biang dom phahin Sayama nuih ttong cu a ruat.
“Nunau fim cun an pasal an kuaineh thei. Miphun bangaw lo an neihawk cun an fale cun paih hnam an keng ko nan an thinlung cun nuih lam an ttan sawn ringring. A tam sawn ahcun paih lam ttong hnak hman in nuih lam ttong an thiam naal sawn. Biaknak khalah nuih biaknak an thlun sawn”. Sayama nuih ttongfang pawl cu Parte ih hnathlam ah fangkhat hnu fangkhat an rong thang ciamco.
“Hmm!!!!!! Uu ih tlangval hi kan cohlanpi taktak maw ttul ding? Ka cakuat khateh a luan tuk pang maw?” tiin a von ruat. Cuveten a mit tthep fohfo phahin a lu a thing ciamco. A kutin a biang a bengaw, “A cang thei lo. Uu hi mifel tuk a si. Lo theih loih neihawk ttul dinhmun tiangtiang thleng ding cun a nungcang zik lo. Uu cun khavek ruahnak a nei lamlam lo ding” ttin amahte a elaw. Cule a lu a thin reromi cu cawlin thu a ruatsal. “Ca ka kuat hnu ca khal in let lo. Phone khal in ko lo. Ziangha Uu in a ruah ke? In lungkimpi lo cengceng tiin Lo theih loih hruaiawk ttul dinhmun ih tuahawk a tum pang sehla. Uuurrrr” a khawsik an puak surso. A lu thingin khawsik com ferfer ih a um lai ah Puite le Esther cu sangka in an rong lut. Cucun mansahlap in a tonak ihsin a dingih zianghman cang lo vekin a naule cu a va hmuak. Raw lei a man zo thu a simih zanlam mikhual an neih ding thu khal a sim cih fawn. Puite le Esther cun a nu an vong zoh ta ih a nu cun rawl a kilpi thei lo ding ti an theihfiang in mithmai nau emem cun an suaksal. Cule anmah uanu rual lawng phur lo emem in raw lei tim cu an hon tuah…..

Peh vivo lai ding……..

Comments

comments

Comments

%d bloggers like this: