Ka Lo Hngak Ding (Part – 38)

Mai Daidim

sad-girlSunlai-padir ti theih zuakzo, Nazi 11:30 a ti thlang nan kum thum sung khawdaihnak ram ih um lo ti cu Siamte cu khawdai tuar thei lotak, hlurh emem in ker tlunhruk hlum a thuah hlei ah a hngawng khal puante thawn a ngerh bet. An cahmi tisop cu a ra thlengih rawp tak ti theihtheih fahran in a von hnim. A khu lak ihsin a rim cu a hnar thawn a hon hnuuk hmurhmo. Thluaite cun Siamte ih umdan cu mak tituk in a zoh keukeu. Baya kyaw a von hmuaittok ih hnakphek le cite pawl thawih a von bawl hnuah a von hrawp hluaihlo. Thluaite cun,

“Singapore ah tisop um lo maw?”
“Um lamlam lo. Kan rualnu pakhat a nu le in tthiahvar an rak kuat ih a suang nan falam ta a bang lo. Nan thaw tak cun kan ei. Cubak ah khengkum fate tak khengkhat lawng ka co ih ziangtin ka khop dingah na ruat? Tahan ka um sung khal tisop hlir si ka ei”
“Ei nasa aw.”
“Phang hlah. Puaikhat ka khop lo ding hokhaw. Hihii…”
“Duhzat cah ding si. Tlawngkai lai ngai um dan ti”
“Si rori. Hmm!!!!” tiin Siamte cu a tisop ei lai cawlin tissue thawn a kam a hon hnuul. Thluaite cun,
“ziangah maw na colh?”
“Tlawngkai lai na von rel ih ka kaa thaw nawn lo”
“Ziangah?”
“Zoh hmen! Ka tlawngkaipi nang rori fa pathum na nei zo.”
“Hey! Kei thaw cun tahtthim ttul lo cuh. Kei cu kum 17 in f aka nei mi cu!”
“ Midang khal pasal ttangah an um thluh zo hih! Kan group lakah keimah pakhat lawng ka tang iau-iau”
“Nangmah na duh lo ruangah si ko khateh! Khami a lo cah laiah rak feh awla tla cu… Umm…. Na duh loih Singapore lamlam ah na kel ciamco”
“Aa!!! Kha lai tla cu!!.” Siamte cun hni dok hni lo dok in Thluaite cu a zoh. A singai. Siamte hi Percel in cahtu a rak nei dah nan an innsang harsatnak ruangah ah amah ih zoh a ttul ruangih a rak fehlonak a si. Percel in a feh sehla pasal ttang ihsin innsang a zoh thei lo ding a phang!
“Tuteh?” Thluaite ih thusuhnak ruangah a lu kunih a thuruah lai a lu a hon tung vukvi ih,
“Ziang tuteh maw?” tiin a hon sut.
“Tlangval na nei lo rori maw?”
“Tlangval ti menmen cun nei ee, hee….”
“Tlangval ti menmen?? Ziangsaw na sim duhsan?”
“Hee…… Na thei lo ding”
“Nang ttheu hi a!” tiin thinheng nawn in Thluaite cu tisa fim a von in.

Siamte cu a mit ngau phahin a liang khatlam le khatlam cu a hnahram dai zikin a hon khaiso hnuah a tisop ei cu a pehsal. Thluaite cun thil thu pakhat von mansuahmi nei si awm takin a mithmai hong eng pempem phah cun Siamte cu a von zoh. Siamte cun theithiam lo takin a rak zo ih,
“Ziang?” tiin a hon sut.
“Awi Nuam ih thu na thei keicu!”
“Haa! Ziang maw theih na duh hrih lai? A kheng sung sa na long ngah zo mi”
“Ziang a bang? A nu le a nau le pawl a ron cawm thei nawn fawn ih..”
“Keiteh ka sungkua pawl ka cawm ve ko ual”
“Ashii!!! Na mizia hi cu eee..”
“Tlangval a nei hrih lo maw? Singapore ah ziangtin ha a khawsat?”
“Ziangtin maw khawsa seh na ti? Hnen-um kan si thluh ko si”
“Aw…. Nan tongaw phahphah thei maw? Kan khawdang pawlin an lo relih Kan khaw lak khalah a um dah lo an lo ti fawn”
“A dik! Agent inn ih ka umpi rualpi pawl thawn kan um ringring ngai. Kan nuam huahho ko. Asian khualepi cu ka ngaihven ringring ko hokhaw.”
“Umm…… Zovek minung pawl na kom ding ti cu ka lo theithiam cih. Nang cu mi hot vutvo pawl lawng na kom paihmi cu. Beer na in ttheu maw?”
“Hihii….. Cu maimai. Na ruahdan kha si ko.”
“Tiger an timi hi ziangvek saw si? A hmin ka theihnak rei tak. An rel nasa tuk?”
“Tiger cu anmah Singapore local suak an neihsun Beer phunkhat si. A thawt hleicenak teh um sawm! Ka feh hlan ihsin an rel hiamhiam ve ih in ka rak caak ve tuk. Sinan thaw ciamco ka ti cuang lo. Ziah maw cucu I suh?”
“Umm…. Ka lo sut men”
“Um hrih, nang hi khavek na tuah lai sawm? Fa pathum ih nu na si zo hi maw!”
“Ka tuah ngam lamlam lo. An rel ka theih tam tuk ruangah ka lo sut menmi si”
“Umm….”
“Awi Nuam thu cu….. Siam….. Rualpi ttha pakhat dinhmun in ka tuarnak te hi I theihsak hram awla… U Sum thawn kum hizat kan um tlang ko nan…. U sum ih thinlung neitu ka si ngaingai thei lo ti cu midang hmuahhmuah hnakin a theibiktu na si ko”
“Hmm!!!!! Thluai, ka lo theithiam. Nangmah vekin ka ral hi a rak ttha ve loih nangmah tlukih tuar thei khal ka si lo. Ka lo rinsan tuk hokhaw. Atu cu U Sum khalin nupi zohin a lo zoh ngai thlang ko si lo maw?”
“Aw, Innsang dinhmun ngaingai ih kan umnak hi thlali hrawng a si thlang.”
“Nan si vivo ko ding na thinphang hlah. U Sum ih nupi cu nangmah pakhat lawng na si ih na si kumkhua ding” tiih Siamte in mitmen thiip tak le thungaithlak ih thurel ti theihtheih fahran ih a hmur tuahdan cun Thluaite ih thinlung a ti danglam thluh.
“Siamte! Ziangsaw na sim duhsan?”
“Kan tlawngkai lai kan saya kyi ih in sim ttheu khan a thei lai maw?”
“Ziangmi?”
“Fala kum 16, 17 hrawngmi in tan-na-kha a tat asile, ‘Mimawi lawng ka nei ding’ tiin a awn. Kum 20 tlun a kim cun, ‘I duhtu ka nei ding’ tiin a awn ih, kum 25 a luan 30 a naih cun, ‘Ka ton ton’ tiin a awn timi kha”
“Haa…. Mang tuk panteh! Ziangah maw?”
“Awi Nuam Sung ih dinhmun ding von ruat hen! Kan hnakin kumziat ha a upat?”
“Aa… Cutimen cun… Ee, Ramdang thlen cun mizia khal thlengdanglam an tam theizet ih Anih teh Beer tivek a in maw?”
“Beer a in ti cu ka thei dah lo. Nang khalle! Ram dang thlen ruangah Beer an in/kan in si lopi. A in duh le a tuah thei pawl lawng kan tuah si. Keiteh I zoh awla khalam ka feh hlan in ziangkim ka tuah theicia thluh ruangah sin na.”
“Aw, cuti ti ahcun si tho ngai. Cucu ziang saw mitunai na sim duhsan cu? Tlangval a nei maw?”
“Tonton neih a tum thlang si ko ding. Kawl paih zungbun a cohlang zo si”
“Ha!!! Ziangtin ee? Kawl pa ih zungbun ee?!”
“Umh! Kawl pa thawn an komawknak a tawkfang thlang. Singapore ih hmun nuam pangparhmuan tipawl ah anmah pahnih lawng an feh ttheu si. Kannih cu maw khavek ih kan feh khalle a buurin kan feh ttheu”
“Um hrih, Cucu Kawl tlangval a nei ih cuih tlangval pa in hamnak ah zungbun a bun na ti maw?”
“Aw ee…. Assh!! Zungbun tla cu man ol tuk. $ 150-$200 in duhtawk a ngah si. Cu ai hnak hman in iphone S$900 man hman simaw a leih. Neihawk an tum taktak hmang ee”
“Ha!!!!”
“Ha!!!” Thluaite in thinphang au-aw thawih ttong ngaihnak thei loih “Ha!!!” a ti zawngah an kiangih totu pakhat hnen ihsi thinphang awsuah “Ha!!” ti thawm a rualaw thlurthli!

**********

Thluaite le Siamte cu ‘aw’ a ratnak lam an hei zoh ih zial parah sangkio parh thluh ih ttek zelzel le lakphak ti luang dutdo an hmu. Cule, cuih thilcangmi kiangih ngalzel hruh ih miding zuarzi an hmubetmi ih taksa cu an hon zohthlun vivoih, ziangtin umngaihnak thei loih mit tartahak ih a kut zaphak thawih a kaa hup phah, tthia thlohthlo ih ding Awite nu cu an hon hmu. Siamte cun,
“Pi tlem!!” tiin awsuah baibah zetin a hon ko. Cuzawngah dawr khatlam panin mipa pakhat a suak Thluaite in a hei hmu bet.
“U Sum!!” tiin Thluaite cun a hon ko. Sumte cun mitmeng thiip takin veikhat a ron zoh ih dawrleng ah a suak cih. Thluaite cun a hei dawi zik nan Siamte in Thluaite ih ban in a rak dirhih a cawl cutci sal. Awite nu cu a ke feh hnuuk thlupthlo phahin Siamte lam cu a hei naih vivo. Siamte cu ciil dolh ding khal nei hrawt lo’n a dang a ro thluh. Mit tthep fohfo phahin,
“Hihi… Pi Tlem, Nan rak dam maw?” tiin a hon sut. Awite nu cu a tha neih hmuah suahin a kaa a hon ang ih,
“Siamte, mitu na thurelmi kha thu ngai a si lo ti aw! Ka hna hawi in ka theihsualmi si ti aw? Siamte..”
“Pi Tlem, to hrih awla……” tiin Siamte cun tonak a khihhmuh. Asinan Awite nu cu khatlam herin dawr lengah a suak cih. Awite nu a suah in Thluaite cun,
“I thlah aw. I thlah hnik aw” tiin mitmeng thiipzet cun Siamte zoh phahin thlah a dil. Siamte cun,
“Tufang ih U Sum kiangih na um cun, a thinheng diremnak ih a lo hman lole a thinseng sosangtertu na si ding. Amah thawn hlatnak ah um aw” tiih a sim thluh in a kut cu a thlah. Cule a thawpi suahin tohkham parah cun a vong to thutthi. Mawhnak nei lo a lu parih sam cu tuletu a hon cuul buai. A thawpi khal tuletu thaw in a to cuahco.

*********

Awite nuih hrangah Zing ih boruak thiangfai le mawi, hlimnak ih khat a mithmai pawl cu khawduur pi ah an cang thluh. Khuitawk a feh ti khal a thei lo. A ke ih a hruainak thlun in a feh vivo cu a si. A mithmai ah hlimnak fate hman a um lo tilawng si loin thinheng baksahlia mithmai thawn dawr thar zinih thiltthitnak dawr sangka a thlen veten,
“Nunu! Ziang na cang saw?” tiin parte cun thinphangzet awsuah thawih ti phahin a puanthan ah lai bang tahratin a nu cu a va pan.
“Parte, I rak thlun aw”
“Nunu, khuitawk ah maw kan feh ding?”
“Internet dawrah. Na Uu kan hei ko ding?”
“Nunu, Uu ziang a cang saw? Nunu, na umdan cu ziangtin si?”
“Thudang I sut hlah. Na Uu kan hei phone ding.”
“Nu! Puite hrang suncaw na leih zo maw?”, cuih thusuhnak a theih veten pi Tlem cu sangka leng suak dingih a tum lai a ke feh a cawl dukdi. A kaa in,
“Ee… Ka sangkio le lakphak ti kha!” tiin a hon sal. Thil umdan a von ruah salih Zial parih a rak hlon thluh thu a von mangsal. A ngel ih nazi a von zoh cu 12:15pm a si zo. Zingih Puite hnen a cah ta mi, “Suncaw k arak lo sum ding” a ti tami cu a von mang sal. Cucun ziangdang khal ttong lo’n Parte ih thiltthitnak dawr sungin a tlan suak lala. Parte cun,
“Nunu!!! I hngak aw ka ra ve ding” tiin a nuih dung cun a hei dawi ve. Tlawng an hong thlen in Pi Tlem cun a mithmai ttha theibik in a tuah ih a fanu cu tikcu caan khelih a rat ngah lo ngaithiam a dil ciamco. Puite cun 15mins caan an neih lai thu a sim. Rei be loin an kirsal. An kir phahin Parte cun,
“Nunu, ziang thu hman I sim lo cun Internet dawr ka lo fehpi thei lo. Uu ih thu cu ziangtin saw na thei? Zoih hnen in? Ziangmi thu? Ziangah tu rori ih phone na tum?”
“Parte, Ka lo sim thei hrih lo. Amah na Uu ih awkam ka don hnu lawngah ka lo sim ding. I be tam lo’n I hruai mai aw”
“Umm……” parte cu ti kherkhoteih a nuih mithmai zoh phahin Internet dawr lam pan in a nu cu a hruai vivo…

Peh vivo lai ding….

(Visited 123 times, 1 visits today)

Comments

comments

Comments

%d bloggers like this: