Ka Lo Hngak Ding (Part – 36)

Mai Daidim

Couple-Romance-1404671Zanlam khua a thim hmurhmi thlang. Lailam dinhmun ahcun Ar kai tikcu ti ttheu a si. Awite cu khawsik tikcu um lonak ram Singapore rori ah laitlang ih thlatang khawsik laifang ih umtudan vekin a kut pahnih bom ferfi cun Ko Aung thawih an tiamawknak an inn thawn a naihawk biknak Parh ih tohkham parah a rak to. A theihthiam lomi pakhat cu Ni dang Off day a suah caanah Ko Aung in hni siamsi in a rak hngak ringring ttheu nan tuvek ni thupi tak ah Ko Aung a thleng hmaisa lomi hi a si. Ko Aung in ziangah a rak hngak hmaisa lo? Nunau sawn ih hngah ttul mipa tivek! I ton ding hi a hngakhlap ve lo maw si a si ding? Asilole a tthulh teh a si pang pei maw? A thuruahnak cun a thin lamlam a phangter. Khua a thiam cuahco thlang fawn. A phone cu tuletu a zoh. A thawpi veikhat a hon thaw. Khawdang a tang nan Ko Aung ih thlamrau te khal a hmuh Cuang lo ruangah a lu a kun ngurngiin a to sal.
“Hi Miss, Are you alone? Do you mind to have fun with me? (Hi Fala nute, Nangmah lawng maw? Keimah thawih nuam tlang ding na poi ti maw?)” a hna phuur rori in thusuhnak a thei. Cuih ‘aw’ cu hi a theih dahmi ‘aw’ a si lo ti a fiang cih. A thin a phang tuk. Bangladesh lam minung an si thlang rori dingah a ruat. A thinlungten kan dung naite ih Bangladesh pa in Philipinno fala nu a that ih Tidai sungih a ruak a hlon mi thu cu a von ruat cih.

“Oh Pathian!!! Pathian!!! Ka cem ka cem!!!” ti lawngin a hon ttongsuak thei. Dunglet a herh ngam lohli lo. A bop ihsi ron vuaktu ding um vekin a zaang an ttim suarso! Ziang a tuah ah a tthabik ding ti a ruat. A ruahsuahmi cu Ko Aung ih phone number a si. Phone number cu a hmet. Cu zawngah cun a hmai ah mi pakhat a ra ding thutthi. All Star kedam pawl(blue), Jeans a kelam zui vivo hrukmi ke a hmu hmaisabik. Cucun thinphang nawn in a lu a hon tung. A lu a tun zawngah a taksa khal khaitu le cawitu nei vekin a hong ding cih ve. A hmuhmi cu America paper thawih tuammi, Rebon sendup ih ttemmi Roses tom sen hlerhli. Ziangdang ttong thei lohli lo’n kaa ang ciauci cun a ding curci. Pangpar petu hi Ko Aung a si ngaingai maw ti a theifiang lo. Pangpar cun a hmel a phen thluh. Amai’ tawka sikcop ningttih thuruahnak danglam tuk cun Ko Aung ih taksa umdan khal a hngilhter thluh. Culawng hman si loin Ko Aung ih hnipuan hruh ttheudan le a ceiawk ttheudan silo’n danglam takin thuamawtu mipa a si ruangah. A hmai ih a hmuhmi mipa cun Shirt Bansau si lo kiu can fang, cubet ah a bil hrih bet. A thuamawkdan zoh cun Tlangval pekte sidawh a si. Ko Aung cu amai’ kum mil ih ceiawk thiamtu khal a si fawn.

“Himi Eleven Roses hi na hrang a si”
“Eleven roses??!” thinphang nawn awsuah thawn Awite cun a hon suthliah. A awsuahdan ah lungawi aipuang awsuah a si lo hlei ah ttihphannak ih khat awsuah a si ti a theih veten Ko Aung cun pangpar thawih a phenawkmi a hmai cu a hon ong ih,
“Baby… Baby…” tiin a ko. Asinan Awite cun a sawn lohli thei lo. Amai’ thuruahnak ruangah Ko Aung in a mai’ aw kel hmang loih awsuah dangih a biak cu a thinheng. Cule a ttih tuknak thawn a lung a hno, a lung a zuur ciamco.
“Baby…. Ziangah na hmai cu a sen ttheh?” Khawthim hmurhmi asinan Electric meisa vangah Awite ih hmelfang cu ttha tukin Ko Aung cun a hmu thei thotho. Ko Aung cun thinphang zetin a von sutsal. Awite cu Tipung ong ihsi tidai zun bang a mit ihsin mitthli an rong dok thlohthlo. A kaa in “Koko na ttha lo tuk aw! Koko na ttha lo tuk aw” tiin a ttongsuak. A ttong phah ah a kut cun Ko Aung ih liang a cum phah. Ko Aung cun Ziangruangah Awite a ttap ti a thei lo nan Awite a ton hmaisabik ihsin mitthli vanrialruah thawih ttaptu a rak sicia ruangah pakhat khat a si lala ko ding ti cu a zum hnget.

Awite cu nauhak aa men bang a biang peng buihbo’n a ttap. Ko Aung cun A liang cum rerotu Awite ih kut cu a laksak ih Pangpar tom a pek. Cule, “Ka lo duh kumkhua ding ka naute” tiin a sim hnu ah a kut in Awite ih liang khatlam le khatlam cu a hon kai tthiahttho ih a lu von thlaniam vivo tahratin Awite ih mitthli cu a von zuuksak. Culeveten Awite ih zaang an rong zaa zuarzo. A lungphu an cawl khupkhi. A thinlung ruahnak le amah cu camkhat sung an rak tthenaw verver zo! A kut ih pangpar tom khal a kai ttha thei nawn loih zohman ih hai lomi men bangin lei tang ah a rak tla diaido. Ko Aung cun Awite ih biang parih luang mitthli cu a von hawp vivoih theih lo karah a hmur a rak thleng. Cucun Awite khalin rak cohlang vein a kut cu a hon pharhih Ko Aung ih phurhsam cun a hon pombet ve. An tlun thingkung pi parih Vate riak ding timtuah ciap hluahhlo pawl khalin theihthiamnak tumpi thawn an thawm dai khepkhep in an rak umpi…..

***************

“Koko….”
“Imm…..”
“Ziangah na ttap ti hi I va sut lo ve” Rawl einak lam panih kut kaiaw ih an feh phah ah Awite in a suhmi si.
“Ziangah na ttap ti theih ka tum lo. Na mitthli hnulhultu si lawng ka duh ka lo ti ringring kha”
“Ka ttahnak san theih na duh lo rori maw?”
“Duh ve tho ee. Nidang khalah ka lo sut dah lopi”
“Si ko” Lungawi hnai loih ttongsuak a si ti Ko Aung cun a theithiam cih lala.
“Aw, nidang ahcun ka lo sut lonan theihthiam dingin Sign pakhat khat a um nan tu cu zianghman a um lo ngai. I sim ngai aw”
“Misual pa!”
“Zo maw misual?”
“Nangmah”
“Ziangah maw ka sual?”
“Na mitthli ka lo tlater dah lo ding na tiih tui’zan rori ah ka mitthli I tlater hi!”
“Ha!!! Keimah nih maw na mitthli ka lo tlakter. Kei cu ka lo zuuksak sawn kha!”
“Na tlakter mi cu na hnulhul ttul si”
“Ziangah keimah nih na mitthli cu ka lo tlakter thiam? Ziang sualnak si ka tua? Baby…”
“Zianghman si lo. Rawl kan cah lohli pei”
“I sim ta lo cun rawl ka cah thei lo”
“Ka lo hngaknak le ka thinphangnak ah ka tha cem thluh. Curuangah ka ttahnak san lo sim ding cun rawl ka ei hmaisa a ttul”
“Ok! Sihenseh!” tiin Rawldawr sung cu an lut.

Rawldawr sung ahcun a khuahkhuah in mi an khat. Hleice takin ziangkim hi tuah a si. Pangpar tom keng phah ih kutkaiaw an si ruangah Awite le Ko Aung hmutu hmuahhmuah cun an theithiam cih. Tonak lawng an hawlih an to ngah veten Waiter pawl cu an ra thleng ih tui’sun hrang an neihmi rawlhmeh pawl cu pakhat hnu pakhat an hmuh. Cule cake khal Valentine’s day hrang special ih an neih thu khal an sim bet. An ei duhmi pawl cu an cah hnuah cake khal an cah ngaingai. Rawl a ra thlen in Ko Aung cun rawl a von tuah ih Awite ih kaa tiang a hei barh lala. Awite khalin Hai a lak ve ih Ko Aung cu a barh ve. An pahnih in duhnung mithmai thawn an hnihsan aw. Cutin pakhat le pakhat rawl an barhaw ciamco. Zuk khal an zukaw nasa. Cun, Ko Aung cun kan dungih a leimi iphone cu Awite a pek. A ttulmi ziangkim a tuahsak thluh zo thu khal a sim. Cuih iphone thar thawn an zukaw ciamco lala.
“Woa…. Tucun leng suah caanah internet hman na ttul nawn lo ding kha. Hitawkin ziangkim na hmang thei thlang hih!”
“Umm…. Ka lungawi maw KoKo”
“Nang le kei karlak ah ziangsi lungawi thusim ttul ii… I cohlanmi hi ka lungawi tuk sawn si. Na unau pawl thawn khal ol-aiten nan pehtlaiaw thei thlang ding.”
“Si ee. Ai, kei kahrang ah a sim tuk thlang Koko”
“Awaw….. khah, kan tlung pei.” Tiin an tonak ihsin an poksuak cih.

Awite cu a iphone thar zoh phah rero in a feh cuihco.
“Baby, A hmandan pawl ka lo sim thluh zo kha aw. Na theihlomi um pang le ziangtik laican khalah I rak sut thei”
“Ziangtik laican khalah na ti ih na hnattuan lai ah lo sut sehla mi kawk lo ding bangin..”
“Hnattuan lo canah I sut kei cu”
“Curuangah male ziangtik laican khalah na timi ka duh lo”
“Awaww… Ka tisual lala. Sorry ya…” Awite cu a hni ih khatlam a her. Ko Aung cun<
“Rawl kan ei thluh zo Ziangruangah na ttap, ziangmi si ka tuah palhmi ti I simnak ding thazang na nei zo kha”
“Huh…… Na rak hngilh lo maw?”
“Ziangah ka hngilh ding? I sim lohli”
“Ummm………”
“Ziangah na pum puar hrih lo maw?”
“A puar luan tukih ka tha zawng”
“Na ti vivo. Khui ka lo cawi ding” Tiin Ko Aung cun cawi a tum. Awite cu KoAung ih tong ban lo dingin a tlan ih an hualaw ciamco. Hni le khekin Awite tei umnak veng cu an rak thleng.
“Koko, hi hnakih hla cu ra nawn hlah maw. Kiangkap pawlih hmuh a mawi lo.”
“Aw, ka theithiam. Kha feh aw”
“Sile, kei ka lut cih ding maw. Hmaizarh ah kan tongaw ding”
“Awle. Second tin in ka lo ngai. Second tin in ka lo duhnak a thuuk sinsin hokhaw baby…”
“Ka feh aw.”
“Aw, na liam tiang ka lo zoh ding”
“Ee, Koko,”
“Uhm…”
“Facebook account I tuahsak ttul kha hngilh hlah maw”
“Awle, tuizan ka tuah cih ding maw”
“Aw. Kha ka feh taktak maw”
“Bye bye”
“See you”.

Awite cu inn a va thleng. A pangpar cu a room sangka kiangah a thlaih. A inntek tei zohman an rak tlung hrih loih tak kholh dingin tak kholhnak room a feh zik zawngah a phone a ra. Zo ha maw tuvek ih I ko ti phahin a va zoh. An inn kiang Philipino mi Renny a rak si.
“Ziang na poi maw Renny?”
“Tuizan kha na tlangval pa thawn maw nan tongawk?”
“Oh!! Ziangtin na thei?”
“Alaa…. Na tlangval pa cu a se lo nasa si. Nan milaw tuk. Pangpar a lo pek ti?”
“Renny!! Khui na feh ve? Ziang na tuah ih ziangtin ka thuhla ka umtudan na thei ttheh?”
“8pm tiang ‘…..’ rawldawr ah kan um ve si”
“Simaw? Ziangah I hmu mi rori I ko lo?”
“Ka tlangval pa nih a duh lo. Cule, Ka tlangval pa nih na tlangval pa a theih thu I sim”
“Si maw?”
“Aw. Pangpar a lo pekmi kha Ko(Stalk) ziat si?”
“Eleven Roses a ti. Khui ka von siar ta ding”
“ Eleven roses?Woa!!!”
“Aw, tu ka siarih Eleven cekci si. Ee, pangpar ih tican hi kei ka thei thei lo hokhaw. Eleven roses an pekawk titla cu ka thei dah lo hrimhrim. Ziang saw a san?”
“Tuisun ni tiangah Eleven roses hi ka ngah hrih lo. 99 roses khal ka ngah cuang lo. Pangpar tom menmen cu ka ngah rero ko nan…”
“Eleven roses cu ziang saw a duhsan?”
“Himi ka sankhat nun sung, nangmah pakhat lawng ka lo duh (In this ‘1’ life, the only ‘1’ I love) tinak si”
“Hiii……. Thungai maw?” Awite a lungawi tuk. “Himi Eleven Roses hi na hrangah a si” tiih Ko Aung ttongmi a von mangsuak sal.

A pangpar tom cu hlimnak ih khat mithmai thawn a pom ih a hnarin a hnim, a rim a hnuuk ciamco. Ko Aung hin duhsan nei zetih a pekmi pangpar a si. Cule a iphone tharte cu a von lakih a hni. Tucun a rualnu Suite in seherh zetih a rak fialmi Gtalk online duhtawk a hman thei ve thlang ding a lungawi lawng si loin Kan Chinmi ih hman hluahhlo tuk hrihlomi Social network Facebook account khal nei thlang ding a si ruangah tuizan ih a lungawinak hi cu a rel ning thei dah lo dingmi thuanthu ah a tangta ding…

Peh vivo lai ding……

(Visited 175 times, 1 visits today)

Comments

comments

Comments

%d bloggers like this: