Ka Lo Hngak Ding (Part – 33)

Mai Daidim

1236101_510076372413705_1633039466_n

Awite cu a ngai duahdomi Ko Aung ih aw a theihcun a lung lamlam a hno. A lungtur awn cu a tlir in a tlir. Ziangdang ttong thei nawn lo’n a dang an hnaang thluh. Ko Aung cu a ttong a peh ih,

“Baby…. Ka ra thlengsal zo. Caan hizat rei khalah i be paih hrih lo maw? Kei cu atu minute, atu second rori lo tong thei sehla ka duh. Naute, i ngai ve lo rori maw? I tong paih hrih cuang lo maw? Rinumnak kaihnget in ka ra kirsal ding ka lo ti kha. Atu ka ra kirsal zo. Kan tonawk tikah ziangtluk ka lo duh ti ka lo hmuh ding ka lo ti si. I tong paih lo maw? Naute, hitin maw i tanta ding? Naute…..”
“Ko Aung…. Ka lo hngahnak a rei tuk.” Ttah ‘aw’ a si ti theihtheih fahran in Awite in a hon sim. Cuih aw a theih veten Ko Aung a thawthawt a cawl dukdi! Awsuah baibah zetin,
“Baby….. I hngak ngaingai maw?”
“Umm! Hngak ee. Ka lo duh thu lo sim ve dingin ka lo hngak. Ko Aung….. I Love You”. Ko Aung a thihri pawl an rong hit cumco thluh vekin a thei aw. A hna hram khal an sa vetvet thluh. A lungtur cu an hruanaw tluttlo. A cil veikhat a von dolh khutkhi hnu ah,
“Baby….. Ziang…. Ziangmi ee na sim? Veikhatten simsal hnik.”
“Ka lo duh. Ka lo ngai tuk.”
“Haa!!!!!! Naute, i ngai ve ti? Ka lo ngai tuk! Ziangtik na suak thei ding?”
“Tui zarh ka suak ding”
“Ok. Kan tongaw ding maw. Baby, ka lo duh tuk!”
“Ka lo duh tuk ve”
“Baby…..”. Zan i var itthat thei lo’n an lungtur cu a tlir in a tlir. An duhawkdan le an ngaiawkdan hi atu an ‘aw’ an von theihawk lawngin an theifiang. Awite cu suah a rak tum cia lo nan Ko Aung ton ding a hngahhlap tuk ruangah baibah zetin “Tuizarh ka suak ding” a timi a si. Cun, Awite in suah a dil tinten a pi khalin a siang ringring ruangah tukhal a siang ding ti cu a zum hnget. Ko Aung in Awite a duhdawtnak ziangtluk a si timi cu tuih zarhpi sunah Awite in a thei thlang ding. Ko Aung in Awite parah ziangvek thinlung le ruahnak, beiseinak taktak a nei timi khal tuih zarhpi ah a fiang ding. Awite cu cupawl ruat le a lungtur awn ngai phah cun zan khua a var.

Ko Aung khalin a ngai duahdomi Awite cu a taktak in tuih zarhpi a tonngah ding cu a lung a hmui tuk lawmmam! Culawng hman si lo’n a hngahhlapzetmi Awite parih a beiseinak dik tak a hmuh ding ni a si fawn. Cutiin a lungtur awn ngai phahin a zan caan cu a hmang ve.

*******

16.1.2011 Colhni zing:

Zan var itthat thei loih a lung a turnak ah khawvang zawngah Awite cu a itthat ciamco.
“Baby…..baby….baby Awaw…..”, a phone a rong au ciamco cun a tthangaw dukdi. A mit a hon nuai ih a phone cu a hon kai.
“Good morning My Baby lay” ‘Ngapih taan’ thawih awsuah hlim tak a hon theih cun zoih fial lo’n a biang kek in a haa an hong lang siamsiam. Awsuah hnoh tak cun,
“Ummm……. Morning……..”
“Tho thlang aw maw kalay lay….”
“Ummmm…….. Na tho zo maw nang?”
“Tho tuk zo. Ka thinlung neitu thawih tongaw ding cu ka hngakhlap tuk si. Atu hi thin le lung loin hokhaw ka um”
“Hihi…… Ttong cu na nehsawh pam. Russia ram na feh ih na va zei thluh si lo sawm?”
“Zei lamlam lo. Hihi cu thinlung sung thu rori a si. Zei thu a si lo”
“Thin le lung loin ka um na ti fawn”
“Aww……. Ka thinlung neitu ka biakmi cu…”
“Aarrr……. Kha, ka tho. Ka von timtuah dingih ka ra suak cih ding aw. See you…”
“Ok. See you soon…”.

Awite cu ni dang hnakih mawi in a cei aw. A hnipuan hruh dingmi pakhat hnu pakhat a hril. A sam tuahdan khal a danglam. Ihhmuh khop lo ti theihtheih fahran in a mit le an rak sen ruairi. Thlalang hmai ah 1hour lai a her. A bihaw. A sam tuahdan a thleng. Hmursen sii a von hnih. A hnakhaih le a tthi pawl retnak bawm khal a cokcawlailet thluh. Lung tling nawn ih a hmuhawk hnu ah kedam sang cu a hon bun. A bag pai thawn a lungtur cu rang ngaingai in inn leng cu a von suak. A zum vek cekci in Ko Aung cun pan siamsiam mithmai thawn an veng Tlangleng ttumhmun ihsin a rak hngak. Awite ih lungtur awn cu ‘phawhlup! Phawhlup!’ ti rori a si. Amah le amah khal hi mak a tiaw tuk. Hivek ih a lungtur rang ciamco’n mipa a hon kom sal /duh sal ding ti cu a rak ruat dah hrimhrim lo. A feh phahin, “Hihi duhdawtnak taktak an timi a si ko ding. Ko Aung hi ka ‘True Love’ a si tengteng ko” ti cun a ruat phah kurhko. Nauhak aa bang, asilole, Korea zuknung sung lemcang pawl bang va tlan ciamco tahratin Ko Aung ttang sungah va lutbet sehla a duh. A thihri cu an zaa nohno. A ngaidan le ton a caakdan pawl hmuahhmuah diriamter a duh nan a thluak ih thutheihnak cun tuah lo dingin a rak kham. A va thleng taktak. Ko Aung khal a thihri an za nohno ko nan Awite ih taksa tongngah ding cu thla ttih in a ttih. Awite a ti thinheng ding tlukih a ttihmi thildang zianghman a um lo.
“Baby………”
“Ko………” an ko aw veve. An mitmu rori zohaw in “Ka lo ngai tuk” ti an von simaw. An dang a caar thluh. Zohman thudang rel lohli thei an um lo. Khopaw thei loin an kezim in an luzim tiang an zohaw.

Caan tawkfang sung an zohawk hnu ah Ko Aung cun Awite ih kut a hei kai ih Awite khalin nuar nei riai loin a rak san ve. Cule rinlopiin Ko Aung cun a ttang sungah Awite cu a pombet. Awite khal cang lo khai lo rori cun Ko Aung ih lungtur ngai phahin naute men bang Ko Aung ttang sungah a bek hlenhli. An lungtur awn ngaiawin caan an hman hnu ah Ko Aung cun “Baby, ka lo duh in ka lo ngai tuk” ti phah in Awite ih liang khatlam le khatlam a von kai. Cule an mitmu rori zohaw keuki in Ko Aung cun a lu a von thlaniam vivo. Awite khal ziang ka tuah ti theiaw lo’n nuamteten a mit a rak sing diahdo ve. Ko Aung ih lu cu a vong niam deuhdeuh. An pahnih in cil um lo thli lawng cu an dolh khutkhi phah. Culai takfang ah,
“Baby….baby…baby Awaw…..” Awite ih phone a rong awn cu an thir dukdi. Thilsual rapthlak tuahtu an kaihngahmi hluan in phuhrungaw dedi mithmai thawn an zohaw. Awite phone a von lak cun Ko Aung cu khatlam her in a lu parih sam cu a cuul ciamco. Thak ih thak hnai lo a lu a kheuh thul tiin umdan thiam lo tak cun a herkual. Awite le khatlam her ve in thawthawt sam hluahhlo’n phone cu a von bia.
“Uhum!!!! Hello… Suite”
“Hey….hey….. Awite, ziang na cang?”
“Ziang ka cang dingih?”
“Na awsuah a dik lo”
“Ziangtin maw ka awsuah cu? Humm!!!!”
“Heyyy….. Tuhi na kiangah zoha um?”
“Ko Aung”
“Ka zum tawk ciah. Nan hnamawk lai ngelcel cu a si lo hram kei cu! Hihiii……”
“Awhawh!!!”
“Ka lo ti men. Sile zan lam Cityhall ka ra dingih zanriah kan ei tlang pei cu. Sun le kei ka suak ngah fawn lo. Zan lam 5pm hnu ah ka suak ding. See you…”
“Aw. Si ee, kan tongaw ding maw zan lam ah”
“Ok. Enjoy your day…”
“Awle”.

Phone a thlak veten Awite cu a ttang dom in a thawpi a thaw ciamco. Ko Aung in a rak zoh. An mit le mit a tongaw dukdi lala. An pahnih zohaw in ningzah hnih in an hong hni. Cun, Ko Aung in “Kan feh pei cu” tiin a hon ti. Awite cun,
“Khuitawk ah?”
“Kan thlen le na thei ding”
“I sim hmaisa aw”
“Kan feh mai ding” tiin Ko Aung cun Taxi a hei kham.
“Ko Ko!”
“Ko Ko? Baby,…..” Taxi sangka a von on zikzawng ih a theihmi kawh aw cun Ko Aung ih thinlung a zupter thluh. A kut a sup salih nuamteten Awite lamah a hong her. A dung karkhat lawng hla ah Awite cu lungkim lo tak mithmai thawn a rak ding. Awsuah hak cuapco phahin,
“Baby…. Mitu i kawhdan vekin i ko sal hman”
“Khui kan feh ding?”
“Ko Ko in ti sal ta aw”
“Khui kan feh ding? Ziangah Taxi na sang?”
“I ko sal ta”
“Pit!!!!!!!!” an dung ihsin Taxi dang in hone an rak pe. An khammi Taxi driver pa cun, “In thlun ding maw thlun lo ding?” tiin thinheng nawn in a hon sut. Awite khal midang hmaisong phahin Taxi sung cu a lut. Ko Aung cun Taxi driver hnenah ‘East Cost Park’ feh dingin a sim.

*****

East Cost Park an va thleng ih Ko Aung cun Awitei’ kut cu kai in a tlanpi ciamco. Tikap ah an tlan vivo. A netabik ah hmun pakhat ah Ko Aung cun a cawlhpi thutthi. Awite cu ziang hman thei cuang lemlo’n a ding ve.
“Hiinn!!! A rak nung! A rak nung taktak hih. Thanks goodness!” tiih lungawi takih Ko Aung a au ciamco cun Awite khal Ko Aung ih zohnak lam a hei zoh ve. A thil hmuhmi ruangah Awite ih mit cu kau puppiin a hmel cu an hong eng pempem. Awite pa ih thihcam kumnga kimnak ni rori ih Ko Aung in thing fa a phunmi cu a rak nung terti a si. An pahnih an zohaw ih an mithmai cu hlimnak in a khat. Ko Aung cun,
“Baby, na kut in san ta”
“Ziangah?”
“In san mai awla” a ti thotho ruangah Awite khal cun a vorhlam kut cu a hei san. Cule Ko Aung cun a bawngbi zaal sungin thil pakhat a hon suah ih Awite’h mitmu rori zoh phahin,
“Baby…….. Kei cu thawhnak le cemnak nei lo a hluummi duhdawtnak thawn ka lo duh. Hi lei kan sankhat nun sung hmuahhmuah lawng si loin sanhnihnak ti a um ngai ahcun nangmah thotho ka lo duh ding. Ka Lo Duh Tuk” a ti hnu ah a mit zohnak cu a kut ah a tthawn. Cule, a kut thawn Awite ih kutzung cu a von lak ih zungbun a von bunsak.

Awite cu a zum ban lo tukmi thil a parih a thlen tikah a lungawi maw a lung zuur, a lung hno ti theithiam aw lo’n a mitthli an hal ttuamtto. “Ko Ko……” tilawng in a hon ko thei. Ko Aung cun Duat takin Awite ih liang a von kai. Cule a biangih mitthli cu dimdoih takin a hnuulsak hnu ah, “Na mitthli tlakter nawn hlah. Keimah ruangah na mitthli tlak ka siang lo. Midang ruangih na mitthli a tlak hman ah a lo hnuulsaktu si ka duh ringring.” tiin dim takin a von sim. Awite cu Ko Aung ih mitmu rori a zoh ih a thinlung ruahnak ahcun, “Hihi ka hrang Pathian samhrihsih a si taktak pei maw?” ti thusuhnak a um cih. Ko Aung cu a thing fa phunmi zoh phahin a ttong a peh.
“Na Pai’ thihcam kum nga kimnak ni ah hitawk ka rak lo ratpi. Na mitthli vanrialruah thawih pangpar tom kengih na ttong rero lai ah a thupten na pai’ hnen ah dilmi ka rak nei. Cumi cu ‘na fanu kiangah um ringring ka duh’ ti a si. Cun, himi thing fa ka phun lai ah mithmai nau sialsiten na rak to. Khami khalah ‘Na fanu thawn in lungkimpi asile himi thing fa hi nungter aw’ tiin na pai’ thlarau hnenah ka dil. Atu himi thing fa hi a nung ka hmuh cun na pa in in lungkimpi tiin ka pom”. Ko Aung a ttong rero lai ah Awite cu a lunghno in a mitthli an rak dil kelkel. Ko Aung cu Awite lamah a her sal ih,
“Baby, ka lo duh tiih na hnen ka lo sim hlan in ka innsang nu si dingah ka lo ruatcia. Na hnen ihsi duhdawtnak ruangih ka ruahsanmi le ka beiseimi cu innsang khat ih kan um tlang ding hi a si. Baby, zungbun ka lo bun zo. Nang teh ziangtin in let ve ding?”. Cuih thusuhnak a theih cun Awite cu tivapi lam a von zoh ih a thinlungten,
“Papa, ziangtin ka tuah ding? Ko Aung hi ka duh taktak hokhaw. Papa, ka thinlung duhnak ka rak thlun ngam lo ruangah kum sarih sung nung cingih thi vekin ka tuar zo. Atu cu ka thinlung duhnak ka thlun thlang ko ding. Na umnak in i ron zoh aw maw Papa….”
“Baby…… In let lo ding maw? A poi lo. Na duh tiktik ah in let leh aw”
“KoKo…..”
“Imm….”
“Ka thinlung ah nangmah pakhat lawngin hmun na la luah zo. Midang an tlem nawn lo ding”
“Baby!!!! Na thungai maw?”
“Umh! Thungai”. Ko Aung cu a dinnak ihsin a va tlanih Awite cu naute cawi in a va cawi ih a herpi ciamco. Awite cun,
“Koko!!!!!!! Ka tla ding hokhaw. I tthum aw! Koko!!!”
“Tla lo dingin ka lo kai si. Ka lungawinak hi leilungtlun minung hmuahhmuah ih theihpi ka duh. Huu!!”
“K0k0!!”. An au-aw cu East Cost tivapi hrawhin a khawk ruangro.

Tucun Awite cu Ko Aung hnen ih duhdawtnak ruangih a ruahsanmi cu a theifiang zo. Atu thokin Awite nu cu feizum tello’n a fanu in a thin-hna-ka a sun tlang tlukin a tuar thlang ding. Awite ih suahpi unau pawl hrangah a pa a thih hnuih pa can cangtu tiih an rinsanzetmi an U nu cu mithi ttah in an ttah thlang dingih a rualpi pawl hrangah cun Tthal nisa senheng, sun lai padir ih khawri ttek tla vekin an si ttheh ve ding…..

Peh vivo lai ding……

Comments

comments

Comments

%d bloggers like this: