Ka Lo Hngak Ding (Part – 22)

Ka Lo Hngak Ding (Part – 22)

Mai Daidim

1011870_477142822373727_502181215_n

Ruahpi han pekte a siih Falam Vankau tlang ah mero cu an hnawk cutci. Zato innpi hmai ah vate pawl cu a khuahkhuah in anmah le aw mawinak suahin nikhua an lawm. Zato innpi sung ihkhun parih it Sumte cu Siibawi pa cun natngainak thawn a von zing rero. Thluaite cu Siibawi pa in ziang i ron sim ding ti hngakin thinphang phah phaw kelkiten a um. Siibawi pa cun, “Umm……. Tui zanlam cun nan tlung thei thlang” a von ti cun nauhak aa bang a khir a zuang. A lungawi tukah a mitthli tiang a luang thei. Siibawi pa le sayamah pawl leng an suah veten Thluaite cu tim a tuah hlohhloh. Sumte khal cu ihkhun par ahcun buk luaili in a to fiamfi. A nulepa an hong thlen in inn lam pan cun an tlung.

Dawrhlun veng an inn an thlen in Sumte cu sangka hramih ding a fapa ih mithmai a hmuh cun a thihri hmuahhmuah an tthia thluh. A fapa cun mitmeng au ciaci te’n a rak zoh. Nidang thladang vek si sehla “Papa!!!!!” tiin ring ngaingai ih au tahratih a rak pomtu ding a fapa cun zianghman ttong loih a rak zoh a von hmuh cu a thinsung feipi sunmi bang a na. A fapa hmai ahcun a vong to ih, “Pate, na dam ko maw? Na pa ka ra tlung zo” tiin Pate ih kut cu a von kai. A fapa cun a zoh kelten a zoh ringring lai. Sumte cu a tuaraw thei nawn lo. A fapa cu a pom betih, “Ka fa, hican a lo thlentu hi keimah ka si. Ka fa, ka tisual tuk rori. I ngaithiam hram aw” tiin a ttap. Pate cu cang lo khai lo roriin a ding zuarzi hrih thotho. Sumte cun a fapa cu duat zetih von cawi a tum nan a cawi thei lo. Thluaite cun, “Dam hman na dam fel hrih lo kha. Cang tamtuk hrih hlah. Cawl huahhi hrih aw” tiin a rak ti. Sumte khal thiamawlozet mithmai thawn Thluaite a zoh hnu ah a fapa ih kut hruai in inn sungah a luhpi. A fapa ttong thei nawn loih a um hi cu a zoh ngam lo. Ziangtin a tuah ding a thei lo. Amah hman Zato inn ihsi ra tlung pek tha nei lo dawr hniaphni a si betah a fapa ih umdan cun a tha a zoi sinsin. Hitican a cangnak sanbik ziang a si? Ziangruangah khami zan kha accident an tong? A caldom in a von ruat sal. A ruahsaukmi cu Awite thuhla a ruah rero lai ih thilcang a si thu, khai zan cekci kha Awite ih thu a ruatih Awite a ngaidan pawl a von mang sal. Tukverh sangkate ihsin khua a cuanih, “Hmm……. Ka nun zalamtluan hi a va tluang thei lo tak em! Ka fapa duh tak hitican a cang fawn” tiin thin beidong zetin a thawpi cu a thaw nawn rero.

“Papa!!! Papa!!!” a fapa pahnihnak ih au-aw a theihin dunglet a her. A fapa cu hmaibal tlengtli, hnapdop ziarzi a kut khal lente an celhnak leibek khat liailiai in a pa cu a rong pom. Sumte cun a fapa a cu a rak pom ve. “Vid, papa na ngai maw?”
“Nai”
“Ngai ngai ngai maw?”
“Nai nai”, aw pai neino phahin a fa cun a sawn. Duat zetin a von hnam hnu ah, “Na hmai kha na nu in lo phiah seh. Na kut tla a bal tuk kha. Feh” tiin a fial. A fapa cu zamrang takin a suak furfo. Cutiih an biaksawnawk lai hmuahhmuah khal ihkhun parin a fapa upabik cun mit tthep feuhfo phahin a rak zoh. Sumte ih thinlung mitthli a tla. A fapa hrang ziangtin a tuah nawn ding ti a ruat thei lo. Ihkhun parah cun a hong kai ih a fapa pom in a hong it. “Awite hin ka thuhla a rak thei ttheh ding sikhawh. Tutak fangah Awite in ziangtin i ruat pei? Awite hin keimah i hngak lai a si pang kem maw? Keimah ruangah tutiang ttangdang a pom lo a si ding. I hngak nawn hlah tiin ka kaa rori in ka sim a ttha ding.” tiin Sumte cu khua a ruat kurhko. Cule, thu pakhat mansuahmi nei vekin a hong tho vukvi. A thingkuang tawh cu a von ong hrephroih thil pakhat a von hawl. A kut cun a thil hawlmi a von dapngah ti a theih cun a mit an hong eng pempem. A thil lakmi cu khaw eng ah a hon suah ih fiang takin a zoh hnu ah thuthluknak fumfe zet thawn, “Tuizan ihsin midang ta na si ding” tiin a kutih kenmi cu a von sim. Cuih thil cu ziangdang hman a si lo. Awite hrang lawngih tumsak a duhmi le a neitu cu Awite lawngih a ruah ringring, a kil tthat ih Awite thawih an tonawk tik lawngih phorh a tummi ‘Thlungte’ cu a si.

Culai fangah a pa a ra lutih, “Sum, na itthat maw?” a ron ti. Sumte cu a Thlungte kenmi lukham tangah a von duah ih, “Ka itthat lo ka pa. Thu i sim duh maw?”
“Sum, fa pathum ih pa na si thlang. Thluaite khal zangfak a um. Tuittum dinhmun hi zoh hnik. Accident nan tong ticu minung duh hril a si lo. Asinan accident nan ton hlan tiangih Thluaite thawih nan pehtlaihawkdan kha nupa dinhmun khal a si lo. Atu thok rori cun Thluaite hi tthaten zoh thlang aw. Awite na hngilh thei lo ti cu kan khawsen in kan lo theihpi. Asinan kumpi kum sarih rori khal a rei zo. Tutiang rori ihkhun pakhat ih na ihpitmi na nupi ngaihsak loin midang parah na thinlung na ret timi cu a si thei lo lawlaw mi thil a si. Atu ka tupa duhtak le hih dinhmun a thleng……hipp!!!!!” pacang ttha ti-aw ve Sumte pa a mitthli a tla. Sumte cun lungsirnak ih khat mithmai thawn, “Ka pa, na saduhthatnak vekin ka nung ding hokhaw. Ka fale hrang pa ttha le nupi hrangih pasal rinsantlak si dingin ka nung ding…” a hon ti cun a pa cun Sumte ih liang hmet phahin, “Ka fa, cuti ding rori. Innsang nuam cu leitlun vanram a si. Innsang nuam lo cu hellram te hokhaw a si. Kum sarih sung hellram te ah na nupi na thlak vekin nangmah le nangmah khal na thla aw. Awite khal pasal tthate a tong leh thotho ding” tiin an hnemaw rero.

“U Sum, Ka Rang, rawl ei kan man zo” Thluaite cun a ron ko. Ihkhun parih kual telti an fapa cu Thluaite in, “Pate, rawl kan ei ding maw” tiin aw neem zetih sim phahin a von kai tho. Rawl einak kinlan ahcun an sung kim in rawl an kiltlang thluh. Sumte cun a kut sih fekfek ih to tahratin, “Ka pa, Zingte ka biak duh” tiin a hon dil. An zaten mit phaw kelkel in Sumte an zoh thluh. A pa cun, “A cuti thutthi men tete. Amah ih in rak biak lo awkah ziangtin saw na biak thei ding?”
“Tuizan rori ah ka biak duh” tiin a dil thotho. Thluaite cu a nau rawl fah lai cawlin a thawpi a suah ih, “U Sum, nauhak aa le na si lo. Kawlram ihsin ramdang biak hi minute pakhat ziangzat a cem ti khal na thei thluh. Amah in in ron biak tik le nangmah rori kan lo kaiter ding. Phang hlah” a rak ti. Sumte cu a tonak ihsin a dingih, “Ka biak ding. Zingte biak ka hai” tiin sangka lam a pan. Cuveten Thluaite ih mitthlam ahcun Zato inn ih Sumte a hong theihawk hmaisabik ttum kha a vong cuang. Sumte kaa ih a suak hmaisabikmi “T…..Te…te…” ti ttongfang ih rualin Sumte biang parih mitthli…. A von mitthlam sal cun a tuaraw thei nawn loih, “Na nau Zingte maw na biak zik taktak?” tiin aw rum takih sut phahin a hong ding hlukhli. Sumte cun, “Si! Ka nau Zingte ka biak ding”
“Asile ka ra ve ding”
“Keimah lawng ka feh duh”
“Zingte rori biak ding na si ahcun ka tel ve ding”
“Zohman in thlun hlah uh. Keimahte ka feh ding” tiin a suak. Thluaite cun, “U Sum!! U Sum!!!” tiih ko phahin a suak tum ve zawngah a fapa pahnihnak cu, “Papa!!!! Papa!!!” tiin a ttap ve. A fa lem in a to sal.

Internet dawr ihsin Singapore ih a nau Zingte cu a hei ko thuaitho. Phone cu a lut purpo nan kaitu zohman an um lo. Veithum tiang an hmet nan a kai cuang loih mangbang in a cabu fate sungih phone number a hawlkual rero. Rinlopiin kan dung lai Zingte ih a rak pek dahmi phone number a von tongngah. “Tete” ti a von hmuh cun a tha a tthia. Ka ko ding maw ko lo ding a ruat. Si, a ngaingai ahcun Zingte biak a tumnak hi Awite hnenih thucah a duh ruangah a si. Awite hi a netabik tucah a duh ruangih Zingte biak tum a si hrimhrim. A kutih a ken cihmi Thlungte cu mitmeng thip zetin a von zoh. Pacang a haa a rial ttuahtto. A hmur tiang khal an hong tthia derdo thlang. Phone number cu a von hmet taktak. A dang caar thluh hnu cil si lo thli cu a von dolh khutkhi. A hmetmi phone lu cu a hna in a von ngai. Ka thei sual mawsi? tiin a phone cu a zoh duldo. A theihmi aw cu, “You took my heart away……” ti hla a si. A hna in a von ngai sal. Cuzawng cekci ah, “Hello…..” ti aw a von thei. Cuih aw cu a ngai duahdomi aw a si. A thei palh lo lawlaw. Cuih aw neitu cu Sumte ih “kumkhua ka ‘Tete’ na si ding” a rak ti dahmi, Thlungte tumsak a duh ringringmi ‘Awite’ ih aw rori a si ti cu ruah ta ttul lo rori in a theifiang.

Peh vivo lai ding…..

Comments

comments

Comments

%d bloggers like this: