Ka Lo Hngak Ding (Part – 21)

Ka Lo Hngak Ding (Part – 21)

Mai Daidim

998161_475845662503443_1329552719_n

“Aa-vui!!”, tiih awka neem lemloih a pi nuih kawh aw le meisa vang rualaw thlurthloih a theih veten Awite cu a thing dukdi. A thuruahnak ah zianghman a rak thei nawn lo. A kiangkap cu a thim hmephmep zo nan maisa pakhat hman a vang lo. Cutiih khawthim lakih amah lawng a um cu mangbang ti tukin a pi cun a rak ko. Awite cu ka biang parih a mitthli a pi ih hmuh phangin a hon hnuul lohli ih a room ihsin a hong suak. Mahlemah mawhnak thei-aw zet mithmai thawn, “Awih ka pi, nan rak lut lai ka rak thei ngah lo in ngaithiam aw” tiin a hon dil. A pi nu cun Awite ih mithmai cu ngunngaih takin a von zohhliah. Awite cu a pi in a theithiam ding phangah a hmai a thup ih, “Ka pi, rawl ei ka lo tuahsak ding maw” ti phahin coka lamah a lut furfo. A pi cun duh thotho lo’n, “Aa-vui, i zoh hnik” a von ti. Awite cun, “Ka pi, zianghman ka cang lo. Ti na kholh hmaisa ding maw rawl ka la hmaisa ding?” tiin a pi mithmai cu zoh cuang loin a hon sut. A pi cun a hei naih ih, “Ziangah na ttap? Ziang na cang saw? Ka lungkimnak tel loin na ttap thei lo ka lo ti kha!” a hon ti. Awite cu a pi in a neeldan a hmuh in a lungawi si a lung a hno fawn. Cule nauhak aa te vekih umawter a pi ih mithmai umdan zohin a hong hni hruthri. Cumi hnu lawngin a pi nu cun, “Tihang rak hlumh awla ti ka kholh hmaisa ding” tiin a let lai. Inn leng pangpar hmuanih tlang kurhko a pupa khal a rong lut ve ih ti kholh hmaisa dingin inn tlunah a kai ve.

Zan sml 10:00 a kim cun a phone a rong awn ciamco thlang. Awite ih thinlung te cun Sumte hngilh a duh tuk thlang. Ko Aung in phone a kawh tinten a thinlungten Sumte a hlam in a mangsal ringring. Singapore a feh zikzawng teih U Parte ih a sim le hnemnak “Caan in ziangkim a liampi vekin na tuarnak khal caan lawngin a lo hnem thei ding” a rak timi, acuih caan cu liam har a ti tuk lawmmam! Ziangtin um sehla a thinlung taktak in Sumte a hngilh thei ding ti a ruatsuak thei lo. Kan hlan pupa ttongih, “Sentecai hngilh ni um lo,
Tuatir hngilh ni um lo” an timi famkimtertu roriin a thei aw. Paih tuk lem loin phone cu a von la.
“Hello…… Baby!”, awsuah hlim takin Ko Aung cun a rak sawn nan Awite cun,
“Imm…..” ti lawngin a sawn.
“Na dam lo maw? Na ziang na cang saw? Mizan le phone na kai lo. Baby, ka ruah na har tuk ee”
“Ziangah maw na ruah ka har?”
“Baby, sii teh na ei maw?”
“Sii??? Sii???”
“Aw! Sii zianghman na ei lo maw? Penadol tivek tla ei awla”, Awite a ttah a suak tuk. Awsuak in hong nguk ciamco sehla a duh nan a ttah suup ttentto phahin, “Sii hi um sehla ka duh tak ngai. Ka natnak damter theitu sii hi leilungtlun ah a sem hrih lo”. Cuih ttongfang cun Ko Aung ih lungsung feipi sunmi vekin a tuarter. Thilumdan a von fiang thluh thlang.
“Baby. Na sim duhsan ka fiang. Mizan i biak loin Suite hmuah na biak cun a thlamte in ka zumcia. Ka zum vek na si ngaingai ko. Tthaten i ngai aw. Cuih na natnak dam verver ko ka lo tuah ding tiin thu ka lo kam ngam lo nan na hmasii lang lo dingin ka lo khuh duh. Na damnak ka si ding ka ti ngam lo nan na kiangih a lo tuamhlawmtu si ka duh kumkhua. Baby, ka aw na theih ruangih na nat a luar ding a si ai cun phone ka thlah ko ding. Na duh tiktik ih i kawh ka hngak ringring. Ka hnenah na thinlung zaten i pe thei lo a si hmanah na kiangnai ih i umter duh caan ka lo hngak ding. Ka lo duhdawtnak na theifiang ih i cohlan thei ding ni thinsau le mithmai panten ka lo hngak ding. Asile, tuizan cu hizat in kan bang mai ke aw. Zan na itthat thei lo pang le i rak ko aw. Ziangtik lai can khalah na hrang ka ready. Good night Baby”
“Ok. Good night”.

Awite a phone a thlah in a ihkhun parah a vong zau. A lung an rong zuur ciamco. Ko Aung hin a ngaihsakdan vekin ngaihsaktu a nei dah lo. A duh taktak khalah a ruat. Ziangtivek ih harnak a ton le lungngai ih a um caan ih kipah Ko Aung hi a kiangah a rak thleng ringring. Hitluk ih duhdawt le ngaihsaktu tlangval cu leilungtlun ah an har zet ti cu fiang tukin a thei. Asinan Sumte a hngilh thei lo mi hrimhrim hi cu amah le amah khal a huatawk tukmi a si. Duh takin Ko Aung von pom sehla ti a von ruat. Asinan miphun pakhat an si lo hlei ah Biaknak hmunkhat an si lo ti a theihnak in a naihniam ngam lo. Nuam men ih kom huahho, phone card ttul cancan ih leiter, leng suah tinteih MRT card a top-up sak dingin a ruatih mi fapa duatte a si ve ding si khawh ti a ruat lala. Atuih hlanih a thil tuahsakmi hman a tam tuk zo in a hmu. A paih thih cam kim ttumih pangpar a leihsak pawl a von mitthlam ciamco sal. Mi ttha tuk a si cu a fiang sinsin. Tuih a thinlung ih Ko Aung a zohdan, a cancan hin Ko Aung a ngaidan pawl a von ruatih duhdawtnak hi mi pahnih hnenah a neih theih mawsi? titiang a sutaw. Ko Aung hin a thinlung a rak la thluh zo ah a ruataw nan Sumte ih thuhla a theih ihsi a tuarnatdan a ruahsal ciamco ah amai’ thinlung umdan khal a theithiam nawn lo.

Awite cu a ihhmun in thu a ruat buai. A lu a cuul thul. A sawl a tal ciamco. Cule, a mithmai cu thuthluknak fumfe a tuah ti theihtheih zetin a hong eng pempem. A si, Awite cun, “U Sum tuih a damlonak ihsin a dam ti ka theih ngah veten Ko Aung ih duhdawtnak ka cohlang ding.” tiin a hon ttong suak. Cun, ” Asinan U Sum hiti dinhmun ih a fehliam a si ahcun ziangtin ka um ding?” tiin a tha a vong nau sualso lala. A phone cu a von la ih Suite hnenah a hei ko. Suite ih phone sungah cun minung pathum an rak biakaw. Awite thawn pali an si. An zaten hni le khekin thu an rel. Leng an suah ih an umdan an simaw cio. Awite cu an lakih nuam takih um ve a duh. Pakhat hnu pakhat ttong an cuhaw nohno. An ttong le kawl ttong hlir a si bet.
“Hello….. Awite, na um lai maw?” Suite cun a von sut. Awite cu tha nei lo tak awsuah thawn, “Imm…. Nan ttong ka lo ngai. Zo le zo saw nan si hluahhlo? Suite cu na lak thei tuk aw”
“Aw….. Hi. Hei…. Hei…… Hinah ka rualnu, ka rualpi tthabik ka lo ti ringringmi Awite a um. Awite, hitawk cu phone sung lawng a siih an aw cun na hminsin thei zik lo. Leng kan suah tikah ka lo tongawter leh ding aw. Twetwe le Anna le Hninhnin an si. Twetwe cu Mon miphun, Anna hi Karen miphun a si ih Hninhnin hi Shan a si. Kan dung inn ka tthawnawk Agent inn ka um lai ih ka rualpi an si hi”
“Aw. Rak be aw mai uh. Kei ka thlah sung ding”
“A ttul lo. Anmah pawl ka thlahter sawn ding.”
“Aih, an lo ko sun tete nan thu a thaw zet si”
“Anmah pawl biaknak ah ka rualpi hlun ka hnawl thei lo. Hey guys, nan phone rak thlah sung uh. Ka rualnu thawn thu poi rel ding kan nei” tiin a von fial. Suite ih rualpi minung pathum khal cun theithiam zetin phone an rak thlah.

“Awite, na ttha maw? Mitute kha Ko Aung in phone in rak biakih, “My Baby lay hrang damnak sii ka si thei ding na zum maw?” i rak ti. Ko Aung cun a lo ngaihsak taktak. A ttong awsuah hrimhrim in a thinlung tak thawn a ttong le ttong lo ti theih a theih tuk”
“Sui, thungai takten ka ti asile, Ko Aung hi ka duh ve zet hokhaw. Kan dung U Sum ih thu ka theih hlan hrawng tla hi cu Ko Aung ih aw hin ka hna tla in ti ngam. A ngai tla ka ngai ttheu. Asinan atu U Sum ih thu ka theih hnu hin ziangtin simaw ka um. Ko Aung ka biak hi a thiang lo tuk rori in ka thei”
“Khakha si ka lo sim ttheu mi. Na U Sumte hnenah a thianghlim zetmi duhdawtnak na rak neihmi balhter na duh lo ruangah a si. Na balter a si nawn lo hokhaw ka rual. Kumziat ha rei thlang? Na thuruahnak hi thlengh hrimhrim aw”
“Hmm…..”
“Khah, hmaizarh off kan la ding aw. Leng kan suak ding”
“Aw… Ka pi ka sim phot ding.”
“Awite, a har zet ding ka thei ko. Asinan kei cu Sumte thawn pehpar in thu na ruah ding hi ka duh nawn lo. Na hngilh verver thei lo ding ka thei ko. Asinan Ko Aung ih a lo ngaihsakdan tla khi ruat hnik awla.”
“A si ko. Ka ruat ve tuk. Curuangah tucu thuthluknak ka tuah zo si. A rei hlanah na thei leh ding”
“Si maw? Hihi….. Lungawinak lam thu a si ka beisei. Ka rak hngak aw”
“Ummm……. Lungawinak lam si ding ka zum tamsawn ko. …..”.

An thurel a thaw vivoih zinglam a rak kau zo. 2:00am lawngah phone an thlak. Ruahnak ttha zetzet petu rualpi ttha neih man hla ti zetin Awite cu zan ih ding a hreh nawn lo. Thaisun hrang khawruah harnak zianghman nei lo hnangam zetin puan sungah cun a kual thiaitho.

Peh vivo lai ding…..

Comments

comments

Comments

%d bloggers like this: