Ka Lo Hngak Ding (Part – 17)

 Ka Lo Hngak Ding (Part – 17)
 Mai Daidim
Caan malte sung a ngui cuahci hnu ah Thluaite cu a hong fimharh ih Siibawi pawl ko dingin lenglam ah a suak. Sumte cun a ihhmun in Thluaite cu a hei zohliam. Siibawi pawl an ra thlen in an zoh ih ruah har ding a um nawn lo thu an sim. Sumte cu a mit fiangten a hon mengih a hmuhmi Awite a si lo thu a theifiang. Thluaite cu ttenttoten a mithmai a hon panter ih Sumte ih kut cu a von kai. Cule Sumte ih mitmu rori ah zohin, “Itthat lan loih na tthangsal ruangah ka lungawi” a von ti. Sumte cu tha nei lo tak awsuah thawn, “Thluaite, i ngaithiam aw maw. Na thin nuam in ziangtik hmanah ka lo ret dah lo. I ngaithiam hram aw”
“U Sum, na taksa dam in ka kiang na um cun a tawk ka lo ti zo kha. Thildang ka ttul lo. Kha, na ttongtam le na tha cem tuk pang ding cawl hrih aw” tiin puan a von sinsak.
sad-girlVankau tlang pawngih Faizong kung tangah to in Thluaite cu a thinlungten a ttap. A tuar a naa tuk lawmmam! Ni nga sung ziangtik a thaw a zom ding tiih a hngahmi a pasal a hong tthangharh veteih a kawhmi hmin hi a tuamhlawm rerotu a nupi a rak si riai lo. Kum sarih sung nupa an si. Fate pathum an neih tiang a pommi a pasal thinlung ah a rak um hrih lo ti a theih tlukih a thinnat hi a um nawn lo. A haacang rial suahso in a mitthlam ah Awite lawnglawng a vong cuang. Awite Singapore a feh hlanih a ttong ta mi,
“Nunau fim in an pasal ding an kai. Nunau fim ah ka rak tel lo kan ti phot ding. Asinan Thang thawih an awhmi Vate khi talsuak dingin a zuam rero ttheu. Na hmawng a hnan tthatlo asile a lo zamsan sal thei. Na suur thang a ttang lo asi ahcun a pahtlang sal thei. Ziangahtile thang thawih awhmi ka si ti a theihfiang hnu ah a ngui men dah lo. Cule, tal suak thei loih a um khalah a hnuk cat dingih a mit a sin cuahco tiang a thinlung cu a duhdawtmi hnenah thutin thutian a cah rero lai”. Thluaite a lu a thing. A mitthli cun hmai an hruai. A supaw thei nawn loih awsuak in a ttap. A nguk roriin a nguk ciamco.NTS Tlawngta pawl an rawl ei tikcu fang a si ih an rawl einak an pan cupco lai ah Thluaite ih ttah aw an theih cu mak ti tukin an hong pan luailo. “Nau, ziang na cang? Ziangah cutin na ttap?” NTS final year pakhat in aw neem takin a von sut. Thluaite cu a van a hon tau. Mitthli lak ihsin hnisen le ker raang hruh in a kiangah mi tampi an ding thliangthliang a hon hmuh veten a ttah a cawl dukdi. A awloksong in ttong ding hman a thei lohli lo. A mitthli a hon hnuulih, “Zianghman ka cang lo” a hon ti. An lakih mi pakhat cun thu pakhat von mansuahmi nei bang thir dukdi in a kaa a hon hup. Cu nuih umdan an hmuhin midang khal theih hiarnak in an khat. “Ziangsaw?” tiih thusuhnak ih khat mitmeng thawn an zoh cio. A kiangih ding nuih hna phuurah thuthup a hei sim. Cunu khal thinlung lau zet ti theihtheih fahran in a mit an hong kau puppi. A kaa a hon hup ve. Pakhat hnu pakhat thuthup an simaw vivo. An simawkmi cu, “A pasal kha a thaw lawng an zohmi a si kha. Ni nga sung rori tuamhlawm a si. Cucun…”. Cuveten a hmai ih to pakhat in Thluaite ih kut cu fek zetin a von kai. Zangfah lainatnak ih khat mitmeng thawn a hon zoh ih awka neem zetin, “Na tuarnak ka lo theithiam sak tuk. Minung zo cio kan ton dingmi a si. Ka lo tuarpi tuk ko. Ziangkhalle na falepawl hrang ruatin thinlung pacang takin um maw. Nangmah hitiih na um cun na fale cu ziangtin an um nawn ding. Na thasuah in na fale mithmai zohin ttang ttentto ko aw.” tiih tha pe phahin a zaang a zuut sak rero. Cuih awkam cu Thluaite hrangah thazaang laknak ttha tak a si. A fale mithmai lawng a zoh ding. A fale hrang rori ah thinlung pacan a cuh duh. A pasal ih thinlung a nei thei lo nan a thisen ih a hrinmi fa pathum ih ‘Pa’ a si ih si kumkhua fawn ding. A thinlung ruahnak pawl an hong dang vukvi. A mitthli hul verver in a hon hnuul. Cule lungawinak ih khat mithmai thawn a zaang zuutsak rerotu Nurse nuih kut cu a hon kai ih, “Ka lungawi tuk maw. Thazang in rak pekih ka fale hrang lawng rori ah ka nung ding. Caan tampi ahcun ka fale hi mi pakhat ih thinlung ka ngah theinak ding hrangah ka hmang nan tucun cumi cu ka ttul nawn lo. Ka ttulmi cu amah ka fale an si sawn” tiin a dingih a kiang ih um Nurse hmuahmuah hnenih lungawi thu an sim hnu in Zato innpi sung a lut. NTS tlawngta pawl cu theithiam lo tak mithmai thawn pakhat le pakhat an zohaw vivo. An kaa cun, “Nunau tampi cu an pasal ruak tlunah an ttap an raak nan anih cu hitawk lamlam ah a ra ttap. Culawng hman si hrih loin kan hnen ihsi hnemnak awkam a theih hnuih a ttongkam le a mithmai khi theihthiam a va har ve!” tiin an phun hmurhmo. An rawl ei phah khalah Thluaite ih thu lawnglawng an rel.

“Baby baby baby aww……” Justine Bieber ih hla a phone ringtone ih a retmi cu a rong awn ciamco. Awite cu phone biak paihnak thinlung khal a neih thei lo ruangah a phone awn cu a zoh cuahco men. Tu tikcu zan 10:30pm ihsin 2:00am tiang Ko Aung thawn an biakawk caan a si. Ziangthu an rel ih ziangtin caan a fehliam ti hman thei man lo khopin an thurel a thaw thei ringring. Awite phone a kaih lo ruangah sms a rong thleng. “Baby….. I miss you and your voice so much.” Awite cun a zoh men thotho. A thinlungten Sumte damnak ding thla a cam. Sumte in ttangdang a pom san ko nan pakhat khat a cang ding a phansak hlehle. A dam lo ti a theih cun rawl hman a rak ei thei ttheu lo. Ko Aung in a thinlung a rak lak zo hmang tiin a ruat nan a taktak ahcun a thinhar caanih rak hnemtu a si ringring ruangih a rak ngainat men fang a rak si. A phone cu a rong awn sal lala nan a kai paih cuang lo. Cakuat vei tampi a thleng. “Baby, ziang na cang? Pakhat khat na cang ti aw? Ziangah phone na kai lo. Ca le i let cuang fawn lo….” sms siar cawk loin a ron kuat. Sumte zianghman thei loin a it ziarziar ti lai lakih mipa dang von biak ding cu sual rapthlak tak tuah tlukah a ruataw. A biak thei hrimhrim lo. Khatlam in a ruat salih, “U Sum hi ka hrangah zo saw a si? Ziangah saw hivek thinlung ka neih?” tiin a sutaw. A phone kai dingin a kut zungpi cu answer hmet dingin a tum nan a lu thing in a kut a suup sal. A netnak ah a phone lehlam a ihkhun parah a hlon. Cule amah cu bokkhup in a lukham thawn a lu a nen ih Ihkhun parah a hrualaw ciamco. A phone tuletu a rong awn. A hna a phit. Culai ah, “Kring…..ring….ring…..” an inn phone a ra. A hnattuan thupi pakhat vekih a can ruangah paih lo cingten a hong tho. Tuvek zaan lai ih an inn phone a rat cu a mangbang deuh nawn in, “Hello… Speaking. Who are you looking for?” a von ti. Khatlam ihsin, “Ka theicia si. Ziang na cang Awite?”
“Ha!!! Suite! Ziangah tuvek ih inn phone….”
“Ziangah na phone vei tampi ka lo ko ih na kai lo. Ka thinheng tukih can tawk can tiin nan inn phone ah ka lo ko. Pakhat khat na cang ti aw. Ziangbik ha na tuar? Ko Aung khal a mangbang tuk hokhaw. Tu khal ka phone line ah Ko Aung a um ko.”
“Aa…… Sui, cuti asile Ko Aung kha phone thlater awla kan pahnih lawng thu kan rel ding. Si, ka thuhla ziangkim ka sim thluh ringringmi cu nangmah lawng na si kha. Ka tuar naa zet. Ka thinlung hi a kuaitu ding khal a um nawn lo. A parh seksek zo ka rak ti ih tu ahcun cuih a parh seksek ciami ka peh ih a hlomten ka ret zik zawngah khawngngahtu a rak nei velvo. A phelin a phel sal”
“Awite! Ziangsaw na sim duhsan?”
“Ka phone ah rak ko aw. Ko Aung kha a dam lo tiin in simsak men aw”
“Awawaww……. A rei hlanah ka ron lo ko ding aw”. A ttong ttheh veten Suite cun phone a thlak.

Peh vivo lai ding……

(Visited 305 times, 1 visits today)

Comments

comments

Comments

%d bloggers like this: