Ka Lo Hngak Ding (Part – 13)

Ka Lo Hngak Ding (Part – 13)
  Mai Daidim
image-1375782524875-V
“Awite! Awite! Ka ttong na thei maw?”, zianghman ttong loih a daih khepkhep ruangah Hrete cun thinphang nawn in Awite a von ko. Awite cu a lungawi ruang maw a lungzuur ti theihtheih loih luang a biang parih mitthli cu a hon hnuulih, “Ka um. Ka lungawi tuk maw Hre. Na rak thei nawn lo dingah ka ruat nan…….. Keimah hman in ka hngilh. Hihi….”
“Ka hngilh ee?! A va cang thei lo ve!”
“Thungai. Tuizing leng ka suah zikzawng cekci ah si ka von mangngaih sal”
“Cucu na hngilh a si hrih lo pi. Tu ziangsaw na ti lai?”
“Aw…. Leng ka suakih ka tlung zik. Tlangleng sungah ka um.”
“Aw….. Nangmah lawng maw?”. Cuih thusuhnak a theih veten, Awite cu a lu a hei her vukvi ih Ko Aung cu a hei zoh. Hrete cun, “Ziangah in let lo? Rualpi na nei maw nangnah lawng saw?”
“A…..aw…. Kawlpa thawn”
“Ha!! Zo thawn ee simsal hnik?!”, a ‘aw’ khi a sang ciamco thlang. Awite cu awsuah nuamte takin, “Hre, ziangah cutluk lawmmam in na au? Aisshh….. Zianghman thinheng ding um lo cuh. Ziangah cutluk na thinheng?”
“Aw si! Kei ih thinheng ttulnak a um lo ti? Singai, ka mawh. Awite, senrual kan si. Iangte tei nupa khi zoh hnik. Ziangah Kawl cu na kom hrih lai?”
“Aa……. Kawlpa thawn kan um ka lo ti ruangah ka tlangval cu ka lo ti cuang maw? Iangte tei umdan khal ka thei in ka hmu ko. Kawlpa ka nei ding cu ka lo ti dah sawm?”
“Kan ttong a sau tuk pang ding. Neta le ka lo be leh sawn ding. Khah mang ttha aw”
“Hre, thu thuuk tukin ruat ttheu hlah maw. Ka umtudan cu na thei thluh ko si. ‘Thlia Sung’ thawih nan pelhsolhnak thu hman i sim hrih lo”
“Neta ah. Neta ah aw,” tiin a phone a thlak.Awite cu a phone zoh keukeu in, “Van Hre ih thinlung hlukhlo ttheuttheu hi cuh!” tiin a phun hmukhmo. “Naunu, kan ttum ding” Ko Aung ih ttong a theih lawngin an veng Tlangleng colhnak an thleng ti a von fiang. Tlangleng ihsin an ttumih Ko Aung cun, “Naunu, nangmahte ttap nawn hlah maw. Ziangvek harsatnak na ton khalle i rak sim aw. Na thinhar caanah i rak ko ringring aw. Na lamah ka ding ringring hokhaw. Na mitthli tlak hmuh ka duh nawn lo. Ttap nawn hlah maw” tiin Awite ih sam phialsak phah rero cun aw neem takin a von sim. Awite khal a lu a sutih, “Ka ttap nawn lo ding maw. Na thinphang hlah. Khah, ka feh cih ding” tiin dunglet a her san. Ko Aung cun Awite zinkel a liam tiang hni siamsi phahin a hei cuan. Awite cu lamzin a feh phahah Hrete ih ttong awkam pawl a von ruat sal. Ziang ruangah ‘Thlia Sung’ thawih nei aw ding timi an nei aw lo ti a ruat. Zianghman thu theihmi dang a nei fawn loih, amahte a lu a thing ciamco.
Inn a thlen hnu reilote ah a phone a rong awn. A hei zoh ih Ko Aung a rak si.
“Um….. Ko Aung”
“Naunu, inn na thleng zo maw?”
“Aw. Thleng zo ee. Nangteh tu khuiah na um lai?”
“Aw… Kei cu Tlangleng sungah ka um lai”
“Aw…. Ziangah in ko? Hi, hnipuan pawl ka von luh ta ttul ii….”
“Aw…… Himdamten inn na thleng maw ti ka rak lo sut ta men. Inn na thleng ti ka thei ih ka hnangam. Asile zanah ka lo ko leh ding maw. Byebye”
“Hey! Zanah i ko hlah. Ka bang tuk ka it duh”
“Aw…. Hehee….. Singai, na bang tuk ngai ding. It huahhi aw maw. Thaisun le kan be aw leh ding”
“Awkhe. Byebye…”
“Byebye….”. Phone an thlak veten, Awite cun, “Hmm….. Himdamten inn na thleng maw thleng lo? Huh!! A mi ngaihsak hlunhlo khi” tiin a kaa cun a hon sal nan a thinlung taktak cun a lungawi in a hlim nasa ti cu a mithmai ah fiang tukin a lang.Zaan hnattuan a ttheh thluhin ti a kholh ciamciam hnu a kut le ke pawl ‘Body Lotion’ a von culhaw ciamco. It dingin ihkhun par a kai zawngah a phone sms a rong thleng tleutlo. A hei zoh ih, “Naunu, na it zo maw? Na bang tuk maw? Na bang tuk ding phangah ka zaang parin ka lo paw tumih le na duh fawn lo. Hee…… Ihhmuh thaw takin itthat aw maw. Mang ttha”. Awite cu a phone a von la ih letca a von ngan. “Ka bang tuk lo nan ka it duh” tiin a nganih ‘send’ a von hmet zik. A lu a thingih a canganmi a malhsal thluh. “Aw, tu ka it ding. Mang ttha ve” tiin a ngansal. A kuat zik zawngah a lu a thingih a malhsal thluh lala. “Tuisun ih thil in tuahsakmi hmuahhmuah parah ka lungawi. Mang ttha” tiin a ngan. A lu veikhat a sutih cutin a von kuat. Cule puan lukhuh in a vong it. Itthat tum in a zuam rero nan a itthat thei hrimhrim lo. A thinlung in hlammi pakhat nei ringring vekin a thei aw. A mit a sing rero ko nan a mitthlam ah fiang tukin mithnai pan siamsi teih hni ringringtu mi pakhat a hmu. Cuih mi pakhat cu zo dang an si lo. Ko Aung lawng rori a si. Pangpar dawrih pangpar a hril lai a mithmai, mipa pakhat ih mi thinlung la ding zawng tukih hni siamsiam ringring, pangpar tom lawng si loih Thingfa tiang lei tahratih Tivapi kapih thingfa phun huam, zanriah an ei zawngih mipa taksawh thiangfai emem ih in ding duur tiang hnawtfai thluhtuih hmel cu a mithlam in a hlohin a hlo thei lo. A awkam cun a hnathlam a rak zel hrih. Phone thawih an biakawknak cu thlakhat a luan rero zo nan a lengah veihnih lawng a tonmi mipa cu “Ka duh” tiin a cohlang thei fawn lo. A puan lukhuhmi a hon ongih, “Aasshhh!!!!! Awi Nuam Sung! Ziang na cang? Na thuruah hi bang thlang hnik aw!” tiin a biang khatlam khatlam a hon beng ciamco.Aircon dai riahriah tangah thaisun hrang hnattuandan ding tuahih Computer hmai to kerki phahin ziangtik Awite in ca i let ding ti hngak rerotu Ko Aung cu “Tit..tit” Nokia phone message ring takih a rong awn cun zamrang takin a phone a hei la. Cakuat a von siar veten a lungawi tukah a tonak ihsin a dingih a ttang sungah a phone pom tahratin a khir ciamco. Ziangtin ca ka let sal ding ti a ruat. Ca letdan ding tiang a pol harsa. A thinlung thup cun veikhat a rak hmuhnak ihsin a rak duh zomi a si. A kaa taktak ih sim ding a ngam lo. Awite in le zianghman ah siar tuk lo vekin a um ringring fawn. Tucun mipa pakhat ka si ve si, ka duhnak thu cu ka sim tengteng thlang ding tiin a ruat. Cakuat a von ngan, “Na kiangih um ringring duhtu ka si. Na thinhar caanih ka liang lo san ding ka tiaraw cia ringring ka lo ti kha. Lungawi thusim ka ttul lo hokhaw Baby”, tiin a von kuat. Cakuat a ngan lai khalah a lungtur hi an hruanaw tluttlo rero. A von kuat ngah taktak cun, a kut zaphak pahnih kopaw in, “Himi nu thawih co aw thei dingin in bawm hram aw pathian” tiin a dil.

“Biak bai rok! Biak bai rok!”. Awite cu a puan a hon hlitih a phone cu a hon la lohli. Cakuat a von siar, “Baby?!” a mit an hong kau puppi! A lungtur an rong rang ciamco. A thihri an sa vutvo. Cakuat cu ngunngaih takin tuletu a von siar. A hong hni thutthi. Thinheng tak vekin, “Na ziangih Baby?” tiin a phunhrang ko nan, a thinlung thupte cun a rak hlim nasa. A theih lo thupten a thinlung sungah bu tuahtu Va a rak um ziar zo. Kum 7 kim tiang tlangval dang nei lo roriih Sumte pakhat hrang lawngih a neih ringringmi a thinlung cu mi pakhatin luah tum in bu a rak sak rero. Cuih bu saktu pa cu zodang an si hrimhrim lo. A ttah laifang ih a mitthli rak hnuul saktu, “Na mitthli tlak ka siang nawn lo. Dunglam ih na thuanthu hngilh in ka hnen na rat ding ka lo hngak” tiih thlakhat sung phone thawih a biak ringringtu Ko Aung cu a si…

Peh vivo lai ding…..

(Visited 241 times, 1 visits today)

Comments

comments

One Comment

  1. A tha tuk.ka siar ring ring .Zuam sin sin aw.

Comments

%d bloggers like this: