Ka Lo Hngak Ding (Part – 12)

Ka Lo Hngak Ding (Part – 12)

  Mai Daidim

sad
“Miss, na simnak address cu ziangtin ka feh ding. Ka thei lo ka lo ti kha. Nangmah in lamzin in khihhmuh thei pei maw?”, Taxi driver paih aw a theih veten Awite cu a hong tthang dukdi. Lam hla zet an feh zo a rak si. A mit a hon culih, “Asshiii!!!! You call yourself a Taxi driver?!” tiih aw rum nawn ih a hon ttong tthualttho cun Ko Aung cu phaw keke in a lungphu khal an cawl thluh. Mit tthep fohfo’n Awite cu a hon zoh. Sahraang lakih tlang bang thin phu duhdo’n a cil cu a von dolh khutkhi. Awite cu a sam a hon ttemih a hmai tohkham hei kuah phahin a thawpi veikhat a von thawt hnuah, “Hmm!!!!! Hitawk in feh awla hitin na kel ding. Cutawk zawn in cutin….” tiin tthaten a von sim. Taxi driver cun hmaisong zet mithmai thawih zoh phahin, “Aw…awaw..” tiin a rak sawn.

Biakinn hmai an vong thlengih Awite cu a paisa bawm phorh tumih a vong kun zik zawngah Ko Aung cun ttihnak ih khat mithmai thawn a rak zoh ringring ti a von fiang. A vantau in Ko Aung cu a hon zoh ih ningzak le umngaihnak thei lo’n Ko Aung cu a kut za a zam ciamco. Cule, “Aw! Kan thleng maw?” tiin zamrang takin a kutih a kencia mi paisa cu driver pa a hei pekih a suak lohli. Awite khal a bag tthaten a von pai ih a suak ve. Khawm an rak thok hrih loih biakinn lengah minung an rak khat ttheptthep. Awite cu zing ihsin zianghman a ei lo tikah a rilrawng tu lawngah a thei aw. Pakhat khat va ei ding tiin khawm a tlai laklawh ding a phang fawn. Rawl ei loin biakinn sung a lut cih.

“Khikhi Awi Nuam Sung si lo maw?”. Mi pakhat in a rualpi pawl a sut. Nunau rual umkhawmnak a si vekin a buur buurin an um ih thuthup an rel ruri. Pakhat le pakhat an mitsin aw. Hni sursiin an zoh aw. Mitngau nawn khalin an zohaw. “Awi Nuam Sung rori in kawl tlangval a kom maw? Cubet ah biakinn sung tiangtiang a luhpi? A va mak ve! Khawvel hi a linglet thlang mawsi ding? Khikhi kawl a si rori ti aw. Kawl tlangval a si ti aw”, Tharte cun zum thei lo tuk mithmai thawn a rualpipawl a sut. Ngunte in, “Ziang maw aniih kawl tlangval kom ruangih cu tluk lawmmam ih na buai? A duh le a kom pei cu” tiin mawhthluk duh loin a rak el ve. Tharte cun, “A dik. Kan duh le kan kom ding. Kanmah kan thu a si. Asinan anih cu a dang si. Kawl tlangval kan kom rero mi hmu thei lo tak vekin a um fawn. Zoh uh! A raltthatdan lawmmam cu. Biakinn sung tiangtiang ah tlangval a hruai” tiin lungkim thei lo tukin a hon sawn thotho. Cutiih anmahte thu an rel rero laiah an kiangte ihsin Suite cun, “Ziangtin ee? Awite a rak khawm maw? Khui ah?” tiin leh cawk loin thu a hon sut. Tharte cun, “Inn sung a lut zo. Kannih khal lut kung uh” a von tiih an zaten biakinn sungah an vong lut thluh.

“Ha!!! Ziang lawmmam ah saw hivek ih na um? Na phone le kawh a ngah lo?”, a kiangih Suite thinheng tuk awkam thawih thusuhnak a theih veten a casiar lai cawlin Awite cu a lu a hon tung. A bag sungih phone a von la ih sunvu a phone a off thu a von theifiang. Hmaisong zetin Suite cu a hon zoh ih ngaithiam khal a dil. Suite cu me hnerhner in nauhak aa men bang khatlam a her. Cu zawngah a mitsir in danglam zetin mi pakhat a hmu. “Hee!!!! Ko Aung!” tiih a hong au zawngah biakinn sung minung hmuahhmuah ih mit cu a parah an ra fu thluh. A kaa a hup ih a lu a kun. A ningzak nawn in Awite lehlam a hei sikhmawr ciamco.

Khawm an ban in thuhla ziangkim simfiangawknak an nei. Cutiin mithmai pante thawn rawldawr sungah an lut. Rawl einak kinlan an co ngahin an to ih Ko Aung cun, “Naulepawl, ziang nan ei ding? Khah, nan duhduh cah uh” tiin an hmai ah menu cu a pek. Awite cu a rilrawng tuk tuar loin, “menu ttul lo. Buh le sea food ka ei ding” a hon ti. Suite khalin, “Kei khal si ve seh” tiin an lungkim tlang. Ko Aung cun, “in ding teh?” a hon ti lala. Awite cu Ung(coconut) duh tuk a si ruangah cold drink ungti a cah. Rawldawr hnattuan pawl cun kinlan parah cun Tissues le Still hai(spoon & fork), in dingmi thawn an rak ret. Ko Aung cun Tissue a lakih in dingmi ‘can(duur)’ cu a hnawt fai thluh hnu ah a phauh ih Awite le Suite cu a pek. Cule, Tissue dang a lak lala ih Still hai pawl cu nuamteten a hnawt netno. Awite cun Ko Aung ih thil tuahdan cu mit tthep loin a rak zoh keukeu. A thinlung ten, “Hivek mipa thiangfai ka hmu dah lo. Kanmah nunau lak rori hmanah hivek kan tam lo si khawh” tiin a ruat kurhko. An rawl cahmi a hong thlen in a hnawtfai cia still hai cu a pek hnuah a kut a pharh ih hmai pan siamsi teih hni phahin, “Ei uh. (tung-sawng-ba)” a von ti.

Rawl an von ei ih nunau ih leng loin tissue a heh. A rawl eidan ziangtinkim ah thiangfai tukin a tuah aw. Awite cun a mitsirten a zoh thup ringring. Hivek mipa thiangfai a veikhat hmuhnak a si ruangah mak a ti tuk. Korea zuknung a zohmi pawl lamlam thawn tla a von tahtthim. Tu lawngah ziang tluk mi piang a si ti khal a hmu fiang sinsin. Rawl an ei thluh in rawlman khal a pekcia thluh thu a von sim. Zan tlaipi tiang um a ngah ttheu lo ruangah Awite cu tlun cih a tum. Ko Aung cun an veng Tlangleng colhnak tiang hei thlah dingin a thlun. Tlangleng sung luh in Awite ih phone cu a rong awn ciamco. “Naunu, na phone a ring rero kha” tiin Ko Aung cun a hon sim. A phone a von zoh cuh!!! A mit an hong kau puppi! A ruah ban lo in Hrete hnen in a rak si.

A aw cu “Ehem!!!! Umm!!!” tiih a rem hnu ah phone cu a von la.
“Hello….”
“Hello….. Awite, ziangah sunvu na phone kawh a ngah lo? In thei maw?”
“Aww…… Ka phone zianghman a cang lo nan si”
“Awite, in thei lo maw? Cakuat teh na ngah lo maw?”
“Van Hre! Aa aw hlah maw. Na cakuat khal ka ngah ko. Asinan na cangan kha ka lungkim lo ruangah ka lo ko duh lomi si. Na cakuat nganmi vekih na ttong ding a si ahcun i be lo mai aw”
“Hahaa…… Ka zum tho. Awite, tthaten ruat awla. Na thinlung i pe aw tiin cun ka lo dil lo. Na thinlung neitu cu mi pakhat a si ti ka thei ko. Asinan, na ruangpum tal lo kilkhawi ka duh. Na ra thei lo rori maw?”
“Aa aw hlah ka lo ti maw Van Hre! Ziangah Thlia Sung thawn an si si hmang ka lo ti. Nan remcang sal lo maw?”
“Awaw….. Cuih thu cu um ko seh. Tuisun na paih thihni kum 5 kimnak a si ko lo maw? Cumi ruangah hokhaw ka ron lo biak”, cuih ttongfang cun Awiteih hna behrek hrawh thluhin a thihri tiang a fang thluh. “Rualpi ttha timi hi a va rak sunglawi tak em!” tiin a von ruat. A lungawi maw a lungzur ti khal theihthiam awk loin a mitthli cu an rong dok ttuamtto…..

Peh vivo lai ding……

(Visited 200 times, 1 visits today)

Comments

comments

Comments

%d bloggers like this: