Ka Lo Duhdawt

1994 kum, January thla ih ka pasal Bob in i thihsan thutthi ttum ahkhan kum tampi sung ka rak theih nawn lo mi minung pawl hnen ihsin tuarpinak tampi ka ngah. Cakuat, card, pangpar, phone call, vehvainak tivek pawl tampi ka ngah. Riahsiatnak in i tuam thluh ko nan ka innsang, rualpi le hmeltheih menmen tiang ih in pek mi duhdawtnak ruangah ka tha a tlung.

Cumi lakah cakuat pakhat cun i neh cuang. Phun ruk ihsin phun hra tiang ka rak kaipi mi ka rualpi hnen ihsi ka ngah mi cakuat a si. 1949 kum ih tlawng kan ttheh ihsin hmun khat ah kan um tlang nawn lo. Ziangahtile anih cu kan khua ah a um ih, kei cu hmun dang ah ka tthawn. Asinan kum 5 maw kum 10 hmu aw lo khal sehla, a thar sal lohli thei mi rualpiawknak thinlung kan nei veve.

Ka rualnu cu a pasal Pete in kan dunglam kum 20 hrawng ahkhan no lai zet in a rak thih san. Ka rualnu cu riahsiatnak nasa zet hlei ah, hnattuan hawl le fanau pathum cawm ttul mi phur rit zet thawn a rung tang. Ka rualnu le Pete cu, keimah le Bob vek thotho in, hngih-theih-lo-nun-pumhlum-duhdawtnak thawn a pehzom aw mi an si.

A cakuat ahcun (mual in liamsannak a rei zet zo mi) ka nu ih ttongkam tawite pakhat a tarlang. “Pete a thih lai ah, na duhdawt mi na nu in i pom ih,’Trudy, ttong ding ka thei lo …. curuangah Ka Lo Duhdawt thu ka lo sim mei ding,’ i ti,” tiah a ngan.

Can reipi liam zo ih ka nui’ ttongkam thawn a cakuat cu a net a khar: “Bonnie, ttong ding ka thei lo ….curuangah Ka Lo Duhdawt thu ka lo sim mei ding.”

Cumi cu ka nu in tu rori ah ka hnenih a ttong mi vek deuhthaw in ka vun thei. Tuarpinak thucah huham nei zet a si! Kum tampi a rak lungawipi hnu ah, keimai’ hnenih a thlenter saltu ka rualnu ih duhnunzia hi! Ka Lo Duhdawt. Ttongkam tlamtling an si. Laksawng a si. Ro ttha a si.

Hram: Bonnie J. Thomas ih “The Legacy” – A Cup of Chicken Soup for the Soul by Jack Canfield, Mark Victor Hansen & Barry Spilchuk.

Sianglianuk Kianghrol

Comments

comments

Comments

%d bloggers like this: