Ka Kum Thar Thlacam

Ka Kum Thar Thlacam

[1 Sansiar 4:9-10]
By Rev. Run Cung Mang

Jabez cun Israel ih Pathian hnenah thla a cam ih, “Bawipa, i thluasuah hram awla, ram kaupi i pe aw. Ka hnenah um awla tuahmawh le harsat ka ton lonak dingah i humhim aw,” a ti. Curuangah Pathian cun a ngenmi vekin a pek.” – (1 Sansiar. 4:10)

Thuhmaihruai:

Pathian zaangfahnak le umpit lamhruainak in 2011 kumtluan lungawi thathozet in Bawipa thangthat le rian in kan um thei ih lungawiza ngaingai a si. 2011 sungah leitlun huap thil umtu daan kan thlir saal asile thih-hlohnak, buainak nasa taktak hmun tampi ah a um. Cuvek in thil thar khal tampi a suak. Uktu ttha lo tampi an hloral ih uktu thar a suak. Sanman lo khuaruah daan le cangvaihnak an cem ih sanmanmi khuaruah le tidaan tampi sersuak in an um. Pathian remruah hlir an si, ih Pathian ka thangtthat.

Duhdawtmi unau, na bulpak, na innsang le na sungkhar nunnak vun zohfel saal aw. Na Diary, Notebook, Journal le computer file pawl zohfel saal hnik aw. Pathian thluasuah ziangtluk na dong. Na khuaruah le na nun daan le na tuahsuakmi parah ziangtluk in na diriam? San le tikcu caan a thlengh aw vingvo ih kan Pathian le kan zumnak thuhrampi cu a thlengh aw lo na’n, kan zumnak kan langter daan le kan fehpi daan, Pathian kan thangthat le biak daan, Pathian hna kan ttuan daan tivek pawl hi santiluan ih zirin a thlengh awk a ttul caan a um. San thar, kum thar ah lungput thar, ruah daan thar, vision thar le tumtahnak thar, khuakhan lairelnak thar thawn hmainor cio uhsi!

1. Bawipa, Na lungawitertu i siter hram aw [Isaiah 62:4-5]

Zumtu pawl hi Christmas caan ah, “Merry Christmas” ti’n kan cibai aw ih, Kum thar caan le “Happy New Year” ti’n kan cibai aw ttheu. “Merry” timi le “Happy” timi hi Laittong cun, “Lungawinak Khrismas, Kum Thar Lungawinak” ti’n kan let cio a bang. Lungawinak timi hi minung kan nunnak ah a thupizetmi le a mankhungzetmi a si ve. Profet Isaiah in, “Hmin thar in kawh na si ding; Bawipa amah rori ih a lo pekmi hmin in. Na hmin thar cu ‘Pathian a parah a lung a awi’ ti a si ding. Ziangahtile Bawipa cu na parah a lung a awi.” Tlangval cu a fala parih a lung a awi vekin, Pathian cu na parah a lung a awi ve ding,” a ti (Isa. 62:4-5). Zumtu kannih teh Pathian ih “taansanmi asilole Pathian ih maakmi” maw kan si culole Pathian ih tthitmi le lungawitertu kan si? Bawipa ih pekmi thinlung thar thawn Amah kan pan asile Bawipa cu kan parah a lung a awi dingih kan hmin cu “A parah Pathian a lung a awi” ti a si ding. Paul in, “Bawipai’ lungawinak kha hawl uh” (Efesa 5:10) a ti bangin 2012 kum thar sung hmuahhmuah cu Bawipa ih lungawinak kan hawl kum si hram seh!

2. Bawipa, Lungawithu sim thiamtu i siter aw [Habakkuk 3:17-18]

Kum Thar 2012 sungah zumtu nang le kei hi Pathian parah siseh, hruaitu pawl hnenah siseh, nulepa pawl parah siseh, lungkim lotu, phunzaitu si loin lungawithu sim thiamtu kan si dingah ka sawmngiar aw duh taktak. Kan zohtthim dingah Habakkuk ih nun hi ka tarlang duh. “Theipi in rah a neih lo ih, Sabit hri in sabit a rah lo hmanah; Olif kung ih olif rah an siat theh ih Lo in rawl a suah lo hmanah; Tuu pawl an thih fai ttheh ih, Caw inn tla an lawng ttheh hmanah; ka lungwi in ka thin a nuam thotho ding; Ziangahtile Bawipa Pathian cu i Runtu a si. Cungnungbik Bawipa in thazaang I pe; Zukneng bangin ka ke a fekter, tlang saang parah himte in i ret,” (Hab. 3:17-19). A va mak lawmmam ve. Ka uar theituk. Zumtu kannih the kan nunram vun thlir saal hnik uhsi! A liamcia kum sungah kan thinhen le phunciar maw tamsawn lungawithusim? Bawipa hnenah thlacam cio uhsi! Pathian hnen le nulepa hruaitu le midang hnenih lungawithu sim theitu si dingin. Paul in, “Nan lungawi ringring uh. Catbaang loin thlacam uh. Ziangvek thuhla khalah lungawithu sim uh. Ziangahtile Khrih thawn nan pehzom awknak ah cumi cu Pathian ih duhbikmi a si” a ti (1 Thess. 5:16-18).

3. Bawipa, Na Biakinn ngainatu i siter aw [Saam 27:4, 122:1]

Zumtu nun pitlinnak le lungawinak thuhrampi pakhat cu Pathian thawn pawlkom awk ringring le Amah thangthat le biak hi a si. David in, “Bawipa hnenah thil pakhat ka dil; cuih thil pakhat lawng cu ka duhmi a si: Bawipai’ inn sungah ka nun sung hmuahhmuah um ka duh, A mawinak zoh dingah le Amai’ hruainak dil dingah,” a ti (Saam 27:4). “Bawipa ih inn ah feh uhsi! In ti tikah ka lung a awi” (122:1). “Hmun thianghlim ah Nangmah ka lo tongih Na cah zia le na sunlawi zia ka hmu zo” (63:2). Biakinn ah fehin Pathian thangthat le biak cu Pathian fahniang hrangah lung diriamnak saangbik a si. Khawm taima pawl an sir aw dah lo vekin Khawm zuam lo pawl Pathian mihman an um dah kel lo. Thlangam daihnak cotu le khawvel nehtu kan si theinak dingah Biakinn ngaina cio uhsi! Hebru cangantu in, “Hmunkhat ih kan pumkhawm ttheumi kha baansan hlah uhsi!” a ti (Heb. 10:25). Biakinn khawm siseh, Home cell khawm siseh daithlang hlah uhsi! Biakinn ngainatu si dingin thlacam uhsi!

4. Bawipa, Na Daan Thu sungah i umter aw [Ezra 7:10]

Ezra in a tikcu hmuahhmuah cu Pathian ih Daan thu zirzoinak ah le a zirmi thlunnak ah le cuih a a thlunmi cu Israel mipi zirhnak ah a hmang ti kan hmu. Duh a va nung ve, cawn a va tlak ve. Pathian lungawitertu kan si theinak dingah A duhmi kan theih a ttul. A lung kan ton theinak dingah A Daan kan thlun a ttul. Curuangah Bawipa ih Daan cu kan zir ih kan thlun hrimhrim a ttul. Culawng si loin kan fale tla kan simzirh a ttul. Saam ngantu in, “Bawipa ih Daan thlun cu a lungawinak a si, cuih Daan cu a sun a zaan in a ruat” a ti (Saam 1:3). Joshua in, “Thukham Cabu cu hngilh hrimhrim hlah. A sungih nganmi bangtuk ih nan nun theinak dingah a sun a zaan in siar ringring aw. Cuti ih na tuah asile na tthangso dingih na tuahmi hmuahhmuah ah na hlawhtling ding a si” a ti (Joshua 1:8). Kum Thar 2012 sungah Bible hi a thok in a cem tiang siar thei zuam uhsi! Ezra vekin Bawipa ih Daan zir le zirh in kan tikcu caan manneizet in kan hmang cio pei. Pathian hnenah A Thunung sungih nuam awtu si dingin thlacam cio uhsi!

5. Bawipa, ka hnenah I umpi ringring hram aw [1 Sansiar 4:10]

Kum Hlun 2011 kumtluan Bawipa ih umpinak in nundamnak le thluasuah kan dong. Kum Thar 2012 sungah thlarau-thinlung-taksa daan ah lungawinak le hlawhtlinnak ih a khatmi kan si theinak dingah thinlung tak te’n rinnak nasazet thawn thlaca cam uhsi! Zabez in Pathian hnenah, thlaza a cammi hi kan thlacamnak si ve seh, ti’n saduh ka that. Zabez in thluasuah neitu cu Bawiipa a si ti ka theifiang. Maw Bawipa i thluasuah hram aw a ti. Culawng si loin hnattuan theinak ram kaupi i pe aw a ti. Kannih tla Pathian hna kau sinsin ih kan ttuan theinak dingah ram kaupi kan dil a ttul. LCF ih thuken cu: “Na Puan Inn kauter aw” (Isaiah 54:2) a si kha. Zabez in Bawipa ih kilvennak lo cun hih khawvel ahhin himnak taktak a um lo ti a thei. Curuangah, tuahmawh le siatsuah ka ton lonak dingah “Bawipa, Nang ka hnenah um awla i humhim aw” a ti. A va ti dik ve. Zumtu unau, kannih tla a siatral cuahcomi hih khawvel ih kan tlanleen lai ahhin kanmah te humhim aw thei kan si lo. “Bawipa in umpi aw” ti’n thlacam cio uhsi! Moses bangin, “Bawipa, Nang kan hnenah na feh lo ding a si ahcun hih hmun ihsin in fehter nawn hlah aw,” (Suah. 33:15) a ti bangin “Bawipa nang locun” ti lungput nei cio uhsi!

Thunetnak:

Duhdawtmi zumtu nu le pa u le nau pawl, a liamciami tikcu caan [2011] kum sungih Pathian ih in umpinak le in kaihhruai zonak parah lungawithu sim cio uhsi! Tuni tucaan ih kan nunnak ah humhimnak le hlawhtlinnak kan ngah theinak dingah Pathian rinsan in thlacam uhsi! Thaisun ihsin hmailam kan nunnak lamzintluan ah Bawipa ih kilvennak a um vingvonak dingah le ziangkim ah sultluannak a um ih hlawhtlinnak kan ngah thei dingah ruahsannak nung nei in zumnak taktak thawn thlaza cam cio uhsi! Bulpak nunnak, innsungsang, kawhhran/fellowship, le khuatlang nun ah hmuingilnak le khua ong kan ton theinak dingah Bawipa hnenah thlaza cam fingfing uhsi! Cuti’n 2012 hrangih “Kan Kum Thar Thlalcam” cu: Bawipa, Na lungawitertu i siter hram aw, Lungawithu sim thiamtu i siter aw, Biakinn ngainatu i siter aw, Na Daan Thu (Bible) duhbiktu i siter awla, Bawipa i umpi ringring hram aw” ti’n thlaza cam uhsi…….

*rcmang@gmail.com.01012012.sun.newyear.sermon

(Visited 33 times, 1 visits today)

Comments

comments

Comments

%d bloggers like this: