Ka Hrang Ah Nupi Neih Cu A Ol Lo Ding

himi
– Uk Lian

Ka suakthuan pek ahcun kum 20 ka kim tikah nupi ka nei ko ding ti’n ka rak ruat aw. Kum 20, ka kim ngaingai tikah lamlam tuihnu kum 3 hnu ah siseh ti’n ka nupi neih ding kum le caan ka thawn sal. Ka suakthuan lai ahcun nupi zamrangte’n ka nei sawn dingah ka rak ruat aw. Ningzak lo ten sim mensehla, nupi neih cu ka rak daw ih ka cak ve em! Nupi neih hi ka nulepa, ulenau pawlih fial tul ding khalin ka ruat dah lo. Nupi neih ih a nuam daan ding vek tla keimah tawk cun ka ruat thiam ve ko.

Tu ahhin kum 28 ka kim zo nan nupi nei loin ka um. Kan dung zarh hnih sungah ka rualpi mi 7 in nupi le pasal an neihnak zuk pawl Facebook ah an tar mi ka hmu. Ai Ai Ai, ka ningzak maw, ziangtin ka um ti tla ka thei aw nawn lo.

“Keimah te ka um ahcun keimah te rori ka si ringring ding, Ka lungawinak le riahsiatnak cu keimahte hrang ding a si lo”

Mibanglo, tonglo, leng-u tivekin, ka thinlungah amah te a tlok ciamco. Tui kum ah ka naupa in nupi a nei ih tu ahcun kan unau 10 lakah keimah te lawng nupi neilo in ka taang. Ningzak thlang ding cu ka si, tluangkhawnak tlak thil cu a si lemlo. Ka nulepa khalin nupi neih in siang tukih tak ah, emergency hman in ka nei sehla pawi an ti ding ka zum lo.

Capoh khalin, thungai thu khalin nupi neih a har lo zia le innsang din a har lo zia an simmi a phunphun in ka thei ko nan, kei ka hrang ahcun nupi neih hi thil olsam zetin ka ruat thei hrimhrim lo. Ka hrangah nupi neih hi thil kowktlawng zawng ih ruah theihmi thil a si lo. Nupi ka neih lohli lonak hi thil tumpi ruangah asilo. Thil fa tete men ruangah a si. Asinan, cui thil fa tete pawl cu tum pipi vekin ka ruah ruangah a si ko ding ka zum.

Mid adult woman toying with gold wedding ring on finger

Nupi neih I dawnkhamtu pawl le tuini tiang nupi nei lo dingih I kaihremtu cu a hnuai lam pawl thu ruangah a si tiin ka hmu…. 

  1. Ka hmuh bantawk, nupa tuak ka zoh tikah an nuamawk zet lai hnakin, buai zet, thukam-el-aw, mithmai nuam lo ih an caan hmang lai ka hmuh tam zet ruangah nupi neih ka zuam lo….
  2. Lai daan in maw nupi ka neih ding, asilole ramleng pawl daan in nupi ka nei ding, mopuai ding thu le hla tawlrel, thil lei ding pawl ka ruat cawk thei lo…
  3. Cun, mi tampi cu timkamnak Pathian le minung siarcawklo hmai ah an tuah nan reilo te ah an then aw sal lala. Cuvek duhdawtnak kha ziangtin ka theithiam ve ding…
  4. Lei tlun ahcun sumpai, thiamnak le dinhmun a thupi tuk, kei hi ka neihmi sinak le lennak in ka nupi ka cawm thei ding maw, fa nei sehla ziangtlukin ka zoh thei ding, sawngtuah men hman ah a har zo…..
  5. Nupi le fanau pawl ih duhdawt zetmi innsangpa ka si thei ngaingai pei maw… curuangah kei cu hitin training ka tul hrih lai…
  6. Freedom uar zet mi pakhat ka siih, nupi ih kaihawk tuk, fanau ih kaihawk tuk tivek ka tuar lo ding, neihawk hnu ahcun zum vek asi lo ding, kan sim kan rel hman ah kan tuah suak thei lo mi a tam ding…
  7. Thenawk leh ding ih neihawk men tla kan rak si thei lala fawn, ziangtin kan thenaw lo ding timi ka thei thei ding, kei khavek ding cu ka duh lo…
  8. Duh vekin rualpi ka kawm thei nawn lo ding timi hrimhrim ka ruah ah, cubet ah, ai-te le ai-pi ka nei bet ih cuvek a suah caan le tongkam sia tla ka tong ngah men ding….
  9. Ka nupi fanau pawl thawn rorelnak court ah tla kan innsang nun kan cem ter thei, innsang din dingin kei ka ralring ngaingai zo maw…
  10. A netnak ahcun (single) mahte um hi sersiamtu ih duhzawng cu a si lo zet nan, tuini tiang kemah te ka um nak ah tohawknak a mal zet… 

no-fault-divorce-georgia

Dawnkhamtu tamzet hmansehla, nupi ka neih duh thotho nak le ka neih tengteng nak ding cu: – 

  1. Sersiamtu in mahte um ding ah in siang lo…
  2. Nupi neih hnu ah thuruah tla a dik thei, pitlinnak ti a si…
  3. Minung tampi siloin pakhat te lawng hrang ih rinum ka duh ve…
  4. Mahte hnakin pahnih ih thil tuah mi cu a hlawhtling ol ding…
  5. Nungcang le um dan a tha duh…
  6. Mahte um hnakin nupi pasal nei pawlih lungawinak a tamsawn….
  7. Lei thlawhsuah le van thlawsuah, sumpai khal a pung duh…
  8. Taksa le ruahnak tla a mawi in a pitling ngaingai thei…
  9. Keimah te ka thi men lo ding…
  10. Hnatuan cahnak le thiltheinak ka nei tam ding…
  11. Damsaunak khal a si phah rori ding… 

Keimah ka zawn lawnglawng ruat in, ka nuamnak ding lawnglawng ruatin tuini tiang caan ka hmang zo. Keimah te ka um ahcun keimah te rori ka si ringring ding. Ka lungawinak le riahsiatnak cu keimahte hrang ding a si lo. Nupi cu ka neih a tul. Asinan ka hrang ahcun thil olsam cu a si thei hrimhrim lo. Asinan, neih cu a tul rori. Mi khalin an nei.

Asilo, ka palh, nupi ka neih duh ngaingai asile, keimah khalin duhmi ka neih a tul, asi, ka duh men lawng a tawk lo ding, I duh ve ding tla a tul. I duh ve ding ko in ka tuah ding tla ka hna a si. Cuvekin thotho in, ka milai nu ding khalin a tuah ve thei thotho. Zobul ti a um lo. Kan umnak hmun in kan pan aw thlang ke!

Cangantu: “Ka Hrang Ah Nupi Neih Cu A Ol Lo Ding” timi ngantu hi tufang Melbourne ah a um ih, an hmuan ih duum ti toih a zuam zet.

(Visited 775 times, 1 visits today)

Comments

comments

Comments

%d bloggers like this: