Ka hngilh theilomi Christmas

AD 325 ihsi an rak tuahmi Christmas ni December 25 hi kei ka hrang ahcun kumkhat sung ih thil thleng lak ah a sunglawibik caan a si. Hngakhlap zetin thianrual thawn December thla a thlen hlan ihsin Chrismas pocket money ding hawl in thlawhlai lohma ah fanglep le sarawpe lep pawl sam in le hnatuan hlawh in sukso kan vak theu.

Zan ih khal nuam theilo in Christmas ni zaan ziangtin ka meng ding a sun ah ziangtin ka um ding ti ruat ah ka sir ka her rero. Farah harsate rak sihman ningla Christmas ni ih hrukding angki tharte le bawngbi ka nei timi ka ruah ah rualpi lakih tlanlen ding ka hngakhlap.

Cutin Christmas lunglennak cun tlangkip I cuanter, hring dildel ten hmun kip ah parmawi pawl cu khuai le phihlip pawl cun tlan murmo in lunglennak thawn fingtlang  a zel ciciai. Rannung le innvulh le vang zuang va pawl khal in Christmas ni sunglawi hngahhlap si awm takin hla an sakih an ai a puangve. A sannak van lam kan thlir tikah ni suahnak lam mifim pawl hruaitu arsi bangin arsi phunkip an eng sersi hai. Deihrel arsi cun Chrismas caan a ti lang hleice ti khawp in a tleu mawi.

Aw! Kemah lawng ka siko ding, hi bang ih lungleng in khawsa ka ti lai ah nauhak pawl khal cu an mai caan ih a sunglawi zetmi an phutawk te balloon an phaw puar cuhaw in sumtual ah an her celci hai. Khat lam ah Tukhal pawl ih naute Jesuh a suak ti an theihzaan ih lungawinak thawi an khah bang in pitar le putar pawl khal cu lenkhawmnak inn ah lungawi aipuang in zaihla sakin an kut an beng ve.

Naute a suak Siangpahranga Herod a lung a phang, reithei vakvai ruahsannak neilo pawl an lungawi. Hi Christmas caan ni sunglawi hi zo in an hngilh thei ding, zo in an hngakhlap lo ding! Zo an um men thei ding? Zo thiam le hmu thiam ningla hramhring parih a tlami daifim le dai zerzo te ih a hrangmi thlir pawl khal aipuang in an khat ding. Vancungmi pawl in hla an rem ih bet ah leitlun ram kilkip in “Bawipa a tum nan lungawi uh” timi thawmvang a khat theh. A cui Christmas huham cun mikip thinlung a zangter ih lungleng le aipuang in mi sungril ah hna a tuan.

Neilo cingten nu le pa in thianrual pawl nak ah tin paisa malte ciar mi an zem. A va sunglawi em! Christmas caan, mi lungthin na thlengsak ih daihnak thawn mi na khat ter. Ran nung le thingkung hrampi pawl khalin hi caan simfiang an duhve tuk ding nan…Sihte bangin Christmas ni thlen hlanih kan thlawhlai lo hma ih rawl kan seng…thin daite Chritmas kan hmang ngahlo phang ih he-le-heh ti’h thlanhri for ih tan kan lak lai caan kha!

Zo in a hngilh thei ding, zo in manglo bangin a um san thei ding; thianrual pawl thawi Christmas sa suannak dingah tiih zanthing la ih thlanghnuai ih cawleng thawi feh…zo in a hngilh thei ding biakinn cermawinak ding ah ti’n pangpar, hnahcangkung le fangkung le thinghnah a phunphun khiak ih rualpi pawl thawi tlangkip vel ih kan um! kei ka hrang ahcun zaanvar carol ih kan vah caan pawl kha hngilh a theihlo. December 24 ih zanmeng ih hlasak khawm le a zingpit ruai theh khawm caan pawl hngih ding rual a si lo.

Harsat leh ti um nawnlo ding le rehsiat ti um nawnlo ding bangih Christmas ni sunglawi ih thian le rual pawl thawi zalampi ih kan vah thliangthlo lai caan pawl kha a tui caan ahcun ka biazia ah an cang. Raltlan sinak co in fingtlang dang ah ka um ko, ka khawsatnak khua le pi pawl khal cun Christmas ni sunglawi ka timi hi in theipi velo nan, kei ka thinlung ahcun hngihl theilo dingin a caam.  Zantin maw! Lileng in le Christma zunngai in caldawm phah in ka ihkhun kel ih ka ih ding tin keimah ten thu ka suat aw.

Tuvek caan kan khua ih Christmas ka hman ahcun biak in kan cei ih mipi pawl an ra khawm tikah biak inn cei a va mawive an tiih ka thinlungten kan mai cei si khawh tin uar aw emem in ka um si khawh tvp lolam tete pawl kha  atu ahcun ka lunglentertu ah an cang theh.

An hngih theh hman ah keicun ka hngilh thei lo ding, an ruahlo hman ah kei cun ka ruatlo theilo; Christmas ka ngainak le ka lunglennak thinlung hi zohman in an zawl theilo ding. A rim a nam, hlasak awn thawm ka thei, puakpheng puak awn ka thei, darkhing awn mawi ka thei, khual tlawngveivak pawl an mai khua ciar ah an tlung theh, an neihmi an zem, mikip ih thinlung adangter! Khawdaih caante a si. A sunglawi a si, kan hrangah thuthangtha tak tak a si. Tlanghra dang ah lileng in Christmas ni ruah in um ko ning. ­Maw! Ka hngilh theilo Christmas ni!.

 

Comments

comments

Comments

%d bloggers like this: