Ka Fapa Ih Pa

pafa
June thla a kim cun fuurpi rim nam in ruah a sur hnuaphno phah rero thlang. Mero cumci an zaam fawn. Zingpit daidaw a tam, Tahan bazar ah hanghnah hangrah rim cawhrawi, a hmui maw a thu ti khal thleidan theih lo lakah bazar ra kaitu an tongaw supso. Kedam dawr sungah lamhla fehnak hrang kedam zoh rero lai pacang note kum 40 vuakvel si awm pakhat cu khatlam ralin nunau pakhatin,
“Hey…. Khaw Vel Thang! Khaw Vel Thang na si ngaingai ti aw”
“Aw, si ee. Zo khata saw na si?”
“Aish!! Mi na va hngilh ol ve! In tihrim maw in hngilh ngai?”
“Ai, thungai ka lo theih hngilh hokhaw. In ngaithiam aw. Mi ka cingmang thei lo tuk ii”
“Umm….. Kum 20 a rei thlang ngai si. Nangmah vek partin zuan cun ziangtin ha maw in cinman ngai ding! Huh!”, tiin a bike a von tinung ih thinheng in a fehlan. Khaw Vel Thang cun mangbang mithmai thawn a kaa in “Partin zuan” ti sal phahin zinkel a liam tiang a hei cuan.

Tuitum hi kum 15 a rei hnu Khaw Vel Thang Laitlang a tlun hmaisabik a si. A suahsemnak khua humhalh le a pi le a pu pawlih khanlung thatei’ phunsak duh ih tlung a si fawn. Tuihlan kum 15 le tuih Laitlang dinhmun cu a tan-aw verver. Motor pipi feh thei lo hman sehla ziangvek lai khawte hmun khalah motorbike a thleng thei thluh zo. Tahan ihsin motorbike thawn laitlang an so. A rualpa Cung Thang in a thlun. An khua an thlen hlan pengnga hrawngah an bike a siat ih an cawl sung. Cung Thang cun, “Hih hlan ah teh ke thawn sisi kan rak feh theu. Ke thawn feh men kunguh” a tiih cutin ke thawn mal tak an hei feh ih an khua thlen hlan khua pakhat khaw fate tak cu an von tong. Khawsuah hauhnar ah nauhak le tlangval tleirawl pawl an rak ding vialvial an von hmu.

Cuih miburpi pawlin mi pakhat cu hmuhsuam zetin an rak nehsawh laifang a si. Khaw Vel Thang tei’ rualvah cun khavek ih mi hmuhsuam lo dingin an von sim. Asinan mibur pawl cun an duh cuang lo. “Na pa in a lo duh lomi fa na si. Tu ah na pa khui a umih zo a si tihman na thei lo. Kum 14 kimih mai’ pa thei lo ningzakza! “ . Tongkam sia taktak in an ti suahso. Khaw Vel Thang cun Cung Thang hnenah an thuhla a sut. Cung Thang cun, “khai’ nauhak pate ih nu cu a U le pawlin sumdawng ding an hruai ih trip khatnak an feh tum rori in nau a pai ih naute pa zo ti thei loih a um ruangah an sungkua hminsiattertu an ti ih an dawi. Curuangah nau a neih hnu ah hitawk khua ah an rak umnak a si. Neta ih thuthup zaam an theihdan vek asile naute pa a rak kaingah ko nan mipatu in lamlak ih ka ihpit theimi nunau cu ka nupi ah ka thi dah lamlam lo ding. Na pumsung naute khal ka fa ka ti thei lo. Ka fa a si taktak asile a mit khatlam pual cia in suak seh! A rak ti tivek a um” a von ti zawngah nauhak pate cun a rak zoh ih a mit khatlam a pual ngaingai.

************

Khaw Vel Thang a dinnak ihsin dunglam ah a ke karkhat a sip. A mithmai an dal thluh. Cung Thang cun mangbang zetin “Khaw Vel Thang, ziang na cang?”? a ti ih cufang ah, midang pawl cun “Kei na nu sisehla ka lo hringsuak lo ding” an rak ti in nauhak pate a um thei nawn loih a kiangih a hmuhsuambiktu ih mit a hon thongh! Culeveten midang in an rak kai cih ih, “A nang, pai’ duh lo fa in ziah ha kutko I thlak ve ngam sapbai!” tiih thong bet dingin a kut a khai zawngah Khaw Vel Thang in, “A pa cu keimah ka si!” a rak ti. An zaten’aw’ a ratnak lam an zoh thluh. Nauhak thong dingih kutko a hawi zomi khal nuamteten a thlahsal. Cule Khaw Vel Thang cu mit phaw kelkel in an zoh thluh. Khaw Vel Thang cun nuamteten a hei naih ih, “Ka fapa hi ka duh lo ruangah ka tanmi a si lo. Cun, tuihnu veikhat a pa thawn pehparin nan hmuhsuam cun thawnginn nan thleng thei hokhaw” tiin a ti. Nauhak pawl cu tih le phangin an tlanhlo thluh.

Nauhak pate cun mitthep feuhfo phahin Khaw Vel Thang a zoh ih, “Ka pa na si ngaingai maw?” tiin a sut. Khaw Vel Thang cun, “Na nu khui ah” tilawng a sutsal. Nauhak pate cun a nuih umnak an di-inn siate ahcun a hruai. Kotka an thlen in inn sung ihsin khuhkhuh hrumhro thawm an thei. Sangka an vong luhin, “Ziang le ziang saw na tuah ih tulawng inn na tlun? Tirhfial ka lo hai can khalih um dah lo” tiin nupinu cun a fapa a rak kawk lohli. An vong lut vivoih coka an thlen in a ruh parah a vun in a khuh ih a cawlcang thei fangfangmi nupinu cu an vong hmu. Nupinu cun a fapa a rak herh zawngih a mihmuhmi ruangah A kuthnih in a kaa a hup. A mit an tartahak thluh. A thawthawt an sam hulho. Cuveten Khaw Vel Thang a thia durdo ve! Khaw Vel Thang in atuih a tonmi hi a nun sung tong dingah a rak ruat dah lo lawlaw. Nunau nu a a thawthaw tha thei loih a um a hmuh veten a fapa cun zamrangin a va pan ih ihkhun lu ih sii duur pakhat a von pek lohli. Cumi a hon bar thluhin malte a hong thasal.

A si, cuih nunau nu lungnat a neihnak kum 10 a si zo. A fapa tualleng tlawng a kai thokih mikip ih an dekcokdan a hmuhin a thin na tuk, khui ih kipah mithmai tha a hmu dah lo. Cucing in a fapa hrangah teimak suahin nunnak hrang hna a tuan. A fapa cun, “Ka nu, hih ka hruaimi pa hi ka pa a si ngaingai maw? Ka pa a si ti aw” tiin a sut rero. Nupi nu cun, a thawpi veikhat a hon suah hnu ah a fapa ih mitfang ah a thinlung zatei’ thumaw thluh ti theihtheih rori in a zoh ih, a kutin a fapa ih biang a zuut phah. A mit sungah mitthli ti an dil thluh. Cule, a khabe thia derdo phahin, “Ka fa, mitinkim in an lo hmuhsuamnakbik, na mit khatlam hiti a sinak hi na pa in ka pumsung thlali na si laifang ih a lo phutmi ruangah a si. Curuangah nang cu na pa ih fa rori na si”. A tong a cem zawngah a kut khal an tla hnuaphno. Cule a taksa khal a vorhlam sirah a ril. “Ka nu!!! Ka nu!!!” a fapa ih tah aw cu an khawsung a khawk ban thluh.

Khaw Vel Thang a dunglam thu a von ruat. Nunau hi umharphen menah a rak hmang. A tlangval that lai ahcun nunau a hahiomi poh a ngah hluahhlo theitu, lengtin duhmi val a rak si. A rualpi pawl thawih an umkhawm ah nunau an ihpi theimi thu an rel hi an nuam tibikmi a si. Asinan lak fa neih a rak duh lo lawlaw. Hih hlan kum 15 rei ih Maishu feh ding a timtuah laifang ah nunau pakhatin, “Na fa ka pai” a rak ti lai ah, “Ni malte lawng kan theihawk ih na hmin khal ka mang lo. I ton hlanah ziangvek na si ti khal ka lo thei lo. Na paimi hi ka fa ka ti ngam ding maw?” a rak ti. Nunau nu in, “Na fa rori a si” tiin a rak tahhnawh. Culai ah Khaw Vel Thang cun, “Milian fanu thatha in in helh hmanah ka nei paih lo. Nangin ka fa pai tiin I ra nawr cu aa… Si ee, ka fa rori na pai asile a mit khatlam pual cia in suak seh. Culawng ah ka fa ti ka zum ding”.

Khaw Vel Thang a lu a thing. A awm a cum ciamco! Khawruahnak dik nei loih, nomcennak lawng a ruah lai ih a tongsuakmi cun a fapa nun a tuahmawh ta! Tuahthatsal theihlomi ruangah sirawknak thawn atu thokin Ka fapa ih pa ka si ding tiin…..

Mai Daidim

(Visited 241 times, 1 visits today)

Comments

comments

Comments

%d bloggers like this: