Ka Fanu Ih Nu

Ka Fanu Ih Nu
By/ Mai Daidim

NufaTuisun hi cu ka san sungih ka lungawibik ni a si ding ka zum! Ka mithmai khal an eng ih hlimnak in ka khat. Ziangdang ruangah hman a si lo. Kum 6 sung ka hmuh lomi ka fanu ka hmu in ka tongngah thlang ding ruangah a si. Ka kiangih feh ka pasal tla cun thiiknak ih khat mithmai thawn I zoh phahphah. Ka fapa kum 3 ih upa khal cun, “Nunu, na lungawi tuk maw?” tiin I rak sut ve. Ka lungawi ti cu ka sim le ka rel ttul lo’n in theihpi cio ko. Kan sungza cun ka fanu tong dingah hngakttah farah cawmnak lam pan cun kan feh vivo.

Nauhak cawmnak innpi cu a tum zet, an tual kau diahdiah ahcun nauhak tampi an rak lek rero kan von hmu. Ka pasal le ka fapa thawn kotka ahcun kan dingih bazar kainak ttawng thawn kum upa hmel nawn thlang fala pakhat le nauhak pali nga lai kan kiangnai ah an ra. Cuih nauhak lakih pakhat ka hmuh cun ka thir dukdi. Kum 3 a kim tiang ka ttangih ka pommi ka fanu ih mitmen rori a si ti cu zohman ih sim ttul lo’n ka thei cih. Ngainak ih khat mithmai thawn ka zohih ‘Nu’ pakhat dinhmun in a parih ttuanvo ka lak ngah lo thinlung sung murilih tuarnak thawn ka mit ahcun mitthli ti an rak dil thluh zo. Cuih ka zoh reromi nauhak nute cun, “Aw, Nu Kim, mileng an ra ka nu le ka va sim ta ding maw.” a hon ti. Cuih fala nu khal cun,
“Ee, Mawmawi hi cu na fel theibik ko ee.” Ti phahin nauhak nu teih lu a zutsak hnuah kan lam a ra herih,
“Hih nauhak thlun in innsung ah rak lutuh. Kannih Bazar kan feh zikih. Innsungah Saya tei’ nupa an um” tiin hni phahin a kut thawn in khihhmuh. Fala nu in Mawmawi a ti cun a si hrimhrim. Ka fanu kha Mawmawi tiin keimah ih hmin ka pekmi a sisi. Ka thinlung tur cu a tlir ih tlir phahin ka fapa ih kut ka hei kai ih ka pasal khal ka mit ka hei piah hnuah kan sungten ka fanu ih dung cu thlun in innsung kan lut.

********

“Ka Nu!!!!! Ka Nu!!! Mi leng an ra” Ka fanu te cu sangka hram ihsin inn sunglam zoh phah cun aw ring zetin a vong au. Nupi nu pakhat a ra suak ih,
“Aw, mawmawi, mi leng an ra ee?” a rak ti. Ka thinlung sung mitthli a tla! Ka fanu ih hrangah kei cu mi leng lawng ka si. Ka fanu ih ‘Nu’ cu atuih ka tonmi a si zo! Nupi nu cun awka neem zetin, “Innsung ah rak lenguh. Kan nauhak lakah ton duhmi nan nei pang maw? Kanmah in ra leng ha?” tiin in sut. Ka ttong thei lohli lo. Ka pasal cun,
“Aw, Mawmawi timi kan tong duh” a hon ti. Ka fanute ka kiangah a um rero lai sihmang tiin ka ruat. Ka mitthli hnuul phahin ka kiang ka zoh ahcun nauhak zohman an um nawn lo. Nupi nu cun, “Mawmawi cu mitu ih a rak lo hruaitu a sisi. Ziangtin ha nan pehparawkdan?”, Ka kaa in ka simdan ding a har tuk! Ka pasal le ka fapa hruai in hngakttah farah cawmnak ah ka fanu vehin ka ra timi hin ka lung sung I sun tlang thluh. ‘A Nu ka si’ ka hon ti dingah ka dang a hnaang, ka aw ka suah lohli thei lo. Culaifang ah ka fanu cun tisa fim le kurtai phel fatete limban thawn a ron keng.

Kan hmai ah khuat rem zetih a ret hnu ah sangka lam pan in a ke a hei kar. Nupi nu cun,
“Mawmawi, nangmah leng dingih ra hokhaw an si. Na theihthiam-mi an si maw?” tiin a sut. Ka fanute cu a kefeh cawlin kan lam a rak her. Zo ka si ti theihfiang duhnak ih khat mithmai thawn ka hmelfang cu mit tthep lo’n I zoh. A lu a thing, ka pasal ih hmel a zoh sal. Netabik ah ka fapa ih hmel a zoh lala. Cule a lu thing phahin,
“Ka nu,”  tiin a hon sal. Keimah I ko pang maw tiin mitthli lak ihsin ka fanu ih hmai ka hei zoh. A  ttong dingmi theih hiar zet lea hmurphun khal zoh phahin ka hna tthaten ka hon thon zawngah,
“Ka hmuh dahmi an si lo ka nu” a hon ti. Cule kan lam a rak herih,
“Zangfahten, Ziangruangah in tong duh ti in sim thei pei maw? Thuhla ka cinban thok ihsin hitawk hmunah ka thleng zo. Hitawk hmun ih I thlahtu hi I hringtu ka nu ih pa (Ka pu) a si titiang lawng ka thei. Hitawk ka thlen hnu ah vehtu ka nei dah lo. Atu lengtu/vehtu ka neih hmaisabiknak a si. Zo nan si?”
“Ka fa! Ka fanu!” tilawng ka ttong thei. Ka mitthli cu van rialruah bang an dok thlurthlo! Hivek dinhmun ah ka fanu ka thlengter ding tihi ka rak ruat dah lo lawlaw. Nauhak cawmtu  nupi nu hnen ahcun,
“Ka fanu in kilkhawisaknak parah ka lungawi tuk. Mawmawi hringtu nu hokhaw ka si” tiin ka sim. Cuhnu ah ka pasal cu ka fapa hruai in inn lengah a suak.  Nupi nu khal inn sungah a lut ve. Keimah le ka fanu lawng kan tang.

Kum 9 ih upa ka fanu cun mitmeng thiip takin I zoh ih,
“I hringtu nu maw na si? Ka pa teh? Khimi khi ka pa a si lo maw?  Kum 4 ka si lai, thu ka cinmang thei pekte, Ka pu in hitawk I thlah ding zawngih a ttong tami  ‘Na nu in pasal dang a lo neihsan. Na nu’h hnenih na um khalle pa-ei na tuar thotho ding ruangah cuhnakih hmun ttha ah ka lo ret ding. Na nu cu ngai duh aw hlah. Nangmah hnakih duh sawnmi a tong zo’ tihi tutiang zanmang sia vekin ka man ringring lai. I hringtu ka nu in I ra veh ding teh a mang lai mawsi?” I hon ti. Ka mitthli dok thluahthlo phah cun,
“Ka fa, nangmah hnakih duh sawnmi ka tong a si lo”
“Asile, na hnenah I hruai kir thei pei maw?”, Cuih thusuhnak cun ka sungmuril I fang. Ka pasal ka hei zohih khatlam ah a lu a her.
“Ka fa, na nu si dingah ka tling lo I ngaithiam aw”
“Ka theicia si. Ziangtik hmanah I hringtu ka nu in a pasal le a fapa ih kut kai in I ra tong ding ti cu ka ruat dah lo lawlaw. Hitawk ih ka umpi ka unau pawl cu nu le pa ih thihsan ruangih ra um an si cio. Asinan kei cu nu le pa nei cingin hitawk ka thlengmi hi mi’h hmuhsuam le nautat ka tuarmi, nui’ duhdawtnak timi an rel rero lai ah kei cu ka nui’ duh lomi ka si ruangih hitawk ka thlen hi a pomdan ka thiam zo. I hngilh loih ka lungawi. Tuisun hi ka hngilh dah lo dingmi ni nikhat a si ko ding” tiin a mitthli hnuul phahin ka fanu cun a ttong hnu ah a tlansuak.

********

Ka dinnak zial pawl an cim thluh vekin ka thei. Ka tha hmuahhmuah zoi thluhin tohkham parah ka vong to sutsi. Ka fanu in cutlukin ruahnak thuuk a nei zo. Kum 9 lawng a si lai nan a ruahnak a pitling tuk zo. Ka fanu ziangvek in a tthanglian ti ka zoh ngah lo. Thin na zetih ka um lai ah ka kiangah nupi nu a ra ih,
“Pasal le fapa pakhat hruaiin Mawmawi ton kan duh nan ti veten ka lo zum cih. Thungai ngai te cun hitawk ahcun nu le pa ih thihsanmi, Hngakttah farah  taktak lawng kan rak cohlang ringring. Na fanu a ra thlenah kan daan le duun in na fanu a cohlang thei lo. Asinan na pa in zangfah in dil tukih, Khii….. Hlan rei deuh lai ah na pa in ka inntek pa a rak bawm dahmi a um ruangah cumi mithmai zohin na fanu kan rak cohlannak a si. Na thinhar awhlah. Mawmawi cu ka fa hokhaw a si. Nu in fate hnenih a pekmi duhdawtnak tlamtling ka peksuah thei lo hmanah nui’ ttuanvo cu ka neh ding hokhaw” I hon ti. Ziangdang hman ttong ding ka nei lo. Ka fanu hnen khalah thiamthu rel ding ka neih lo ruangah,
“Ka lungawi. Kan feh cih ding maw” ka ti ih kan sungten hngakttah cawmnak inn lan in kan suak.

Ka thinlungten ka pa ka mawhthluk phah. Ziangah si ka fanu cu thusia a fah? Ka fanu ih ttongmi pawl ka von ruahsal ah ka thin a na. Cun, ka pasal hnenah ka lungawi lo zet. Ka fanu hi a fanu dinhmun ih a zoh ding cu ka beisei ngam lo. Asinan a kutza san in, “Ai, Mawmawi cu nangmah maw? Nangmah tong dingin hokhaw kan rat” ti talin awka neemten be sehla ka fanu khal hitlukin a thin na lo ding tiin ka ruah rero lai ah kan pa cun, “Na fanu cu nangmai’ hmel lo zon sehla ka duhdawt thei ko ding. Asinan a hmel sungah  na hmel ka  hmu lo” I hon ti. A dik, ka fanu cun a pa ih mit, a pai’ hnar, a pai’ kaa, a pai’ hmaifang rori a zon si. Aww!!!!! Ka fanu, Khawvel nun paih lo khopih tuarnak ka neih lai ah ka pum sungih naute ruangah ttenttoten ka rak nung. Hihlan kum 9 rei, keimah hi kum 18 hman ka kim hrih lo, ka pum sung naute thlathum a si zo ti thei na cingcingin ka pasal hin fala dang I kopsan. A si ee, duhdawtnak pakhat lawng rinsan in, nu le pa khalih lungkimpi lo cing cun, mizia theiaw famkim lo’n khawtluangmi pasal ka rak nei si. Kan hmuhawk hlan ih a fala hlun, a sencai thawn an tonawk sal hnu, a kut thak riamternak ah I hman men. A duhduh in a ttong. “Zarhkhat lawngih ka ngah theimi nunau na si! Man nei lo nunau!” ti ta rori in I hro, I dekcok tukmi hi ka pumsungih naute ruahah thla thum tiang ka tuar cuahco nan tuar thei nawn loin ka tlan luailo. Khawtluang um ka si vekin ka nu le ka pa hnen pan cun kan khua ah ka tlung. Nu le pa cun ziangtluk an thinhengnak tuahtu va si khal sehla duhdawtnak thawn  an kut hlum in rak san. Ka pasal cu a tlan hnu rei loah a fala hlun thawn an hruaiaw ti thawm kan thei.

Ka leitlun hi thimkhawzing a tlung! Nun timi hi ka paih nawn lo rori. Asinan ka fanu ih mithmai ka zohin ka hnisal. Khawtleu I hmuhtertu le ka nunsan hi ka fanu hrangah tilawng a si. Nunhar rethei tuk sungkua kan si vekin ka fanu duh zet cingcun sumsaw hawl ka ttul ta. Ka  fanu tlawngkainak khal keimai’ hawl ka ttul ruangah le ka nu le pa an tar phah thlang thawn, ka nau le dang pawl tlawngkainak khal daihaw lo zelzel kan si ruangah ka fanu cu thinlung hnangamten a pi le pu hnen tan tahratin tipi ral cu ka kai ta! Ka hnattuannak ah mipa duhnung zet pakhat cun I rak zoh thup ringring. Ziangkim ah I ngaihsak, ka ttulmi piang I tuahsak. Asinan ka fanu hrang lawng ruatin caan ka hmang ringring. Duhdawtnak awkam I hlan tinten fate nu ka si thu ka sim ringring ko nan poi a ti lo thu I letsal ve ringring fawn. Kum a hong liamih I naih dingin a zuam deuhdeuh. A hlan kum 3 rei in ka paseu ih fa ka U thawn rak theiaw an si ruangah ka U hnenah a tlon ciamco ttheu. Ka U khalin mittha a si thu, fate nei zo ka si ko naih I pom duh thotho-mi parih a upat thu tu le tu I sim. Ka fanu hrang lawng ka ruah ruangah ka tlangval tan in inn tlun ka tum.

******

Tlun tim ka tuah rero lai ah telephone ko tu ka nei. “Thanga bike accident in zato innpi a thleng. A lu a kuai, a kawng khal a siatsuah”ti thu ka dong. Ziang ka tuah lai ti ruat nawn loin zato innpi lam pan cun ka tlan ciamco. A hmun ka va thleng cu khuilam ih accident lamlam! Ka rualpi dang khal kim ttheptthep in zato innpi luhnak ding gate ah in rak hmuak. Manhlap tukih ka tlannak ah ka kedam khal a tawngaw lo ka hruk an hmuhin “Nangmah le nangmah bumaw nawn aw hlah. A hlan na pasal vekah khal mipa tinkim ruat awhlah” in ti. Ka thinheng tukin ka kir. Asinan ka thinlung sung ten U Thang hi ka rak duh taktak ti cu ka theifiang. Kan neihawk khalah ka fanu ih ttulmi tinkim ttuanvo ka lak ding thu ka sim. Anih khal a lungkim ve ih ka U le kan  pastor, hruaitu upa pawlih thlacamsaknak thawn kut kan sih. Thlakhat le hrek a rei ah Inn lam ihsin in rak phone. Ka pa cun,
“Na fanu pa-ei a tuar ding hnakin tiah hngakttah cawmnak ah kan ret” I rak ti. Khai zan kha ka khawvel a cim thluh! Ka fanu ih hrangah ziangvek nu ka si thlang ding? Ka fanu ih hrang nung dingin thu ka kamaw. Ka fanu ih ruangah tui’ hlan kumli liamah khawvel ka pah ngam. Atu ka fanu ih nu si ding teh ka tlak nawn maw??? Ka lukham ciar thlekthlek thluh ko zanvar ka ttap. A thaizing kan pa thawn tlun kan tum zawngah ka lungci mitin ka tlu. Ka hong harhsal cun ka pum sungah naute a um khualtlawng thei dinhmun ka si lo thu ka hon thei.

Cutin remcanlonak dangdang ruangah atu lawng ka fanu kan ra veh theinak a si. Ka fanu cu nauhak fimvar tak pakhat a si. Ka  ruahban lo tiangin thu a ruat thei. Ka fanu in ziang tikah “Ka nu” tiin I ko pei? Kum 3 a si tiangih “Nunu… Nunu” tiih bah zik ciapco phahih I pan ttheutu ka fanu khan tu ahcun “Ka nu” a timi a dang zo si……..

Comments

comments

Comments

%d bloggers like this: