Ka Biazai Pathum

Ka Lo Thlah Ko Ding

Ka kutnem kaiih duhbia in hlan laiah
Na hmurthlum teih dawtthu in fah laiah
Na ankaa nemteih rinumnak thuin tiam laiah

Vannei bik cung Lasi bang ruat aw in
Ka nunnakah parmawi ka sarsuak tiin
Lungawinak in ka rakkhat

Duhmi ka rak lo zumzet,rinumnak khal ka pom
Duhdawtnak hri kaihnget in
Na duhdawtnak tangnem ah nuam in ka leng

Thlisia hrang leh caan herliam in
Kan ruuninn mawi an siatsuah thei ding ti cu
Ka rak zumhrim lo,ka ruatdah hrim lo

Thlisia a hrang lo,huatthu a leng lo
Buainak a thleng lo,danglamnak ka neilo
Dawttu na thinlung lengdang hnen pial in

Kei thenzai na rel,a naa ka ti;
Ziang pawi ka khawih ih kianzai in relsan?
Ka lungthin hmuah buaiter theh in

Arbang ka vai riahruun ngai in
Ka theithiam lo duhdawtnak an ti mi
Ka dawnve mi duhdawtnak cun kei i tap ter men

Ka theithiam lo rinumnak an ti mi
Ka dawnve mi rinumnak cu phatsanawk nak men
Ka thlah miarmo siang lo cing ten

Ka tangnem sungih ngam thei lo tu ka duhdawtmi tekha
Ka lo thlah ko ding,duhmi ka lo thlah ko ding!!

Ka Thinlung Neitu

“Ka Nau” ti in duatten in ko
‘Ka Duat’ ti in duhten in pom
Hlimin ka khat na tangnem belin
Ka hmuh mi tinin lungawi hmel an pu

Ka lungawinak nang maw na rak si!
Ka tulcaanah ka kiang na um
Leitlun daan in in cimbuai tikah
Lungngai ih ka tah ding i sianglawn maw

Ka kut kaihnget in nang in in tuarpi
Riahruun innmawi nang maw na rak si!
Tahnak thlisia hung hrang hmanseh

Ka kiang naiah nang na um cun
Tihphan neilawn ka pahtlang ding
Riahsiatnak tipi in in kham hmanseh
Lungngai hleilawn ka leuhsuak ding

Cung khua nu’i pekmi ka ro sunglawi
Ka thinlung neitu nangmah na si ee!!!

Rinum Ten

Ka duhdawt mite
Tulhainak in nang leh kei cu
Hmundang ramdangah in then aw ter hmanseh

Kan hlaaw cuang lo lungthin sungah
Kan nungtlang cungvan hnuaiah
Kan hawltlang lei parah

Hlatawknak cu nang leh kei hrang
Ngaiawknak ah cang hramseh
Ngaiawknak khal nang leh kei hrang

Duhdawtnak ti fektu ah cang hramseh
Khat leh khat parih kan rinumnak cun

In hruai thleng leh ding hmunkhat teah
Kan thlir mi cungvan
Kan palmi leirem

Kan duhnak thinlung a rinumih
Kan pawmmi lungkhat duhnak a hmunah cun
Ka thinlung sung nang lawng na um!

Thinlung pakhat duhmi pakhat ti mi lungput ka nei
Rinumnak thawn nithla siarin
Nang tawnsal caan ka hngakhlap ee

Rinum ten in rak hngak aw
Rinum ten ka duhdawtnak na hrang a hmun ding
Ngaiawk caan,thenawk caan a cemtik ah
Nangthawn nuam in kan lengtlang ding
Rinumnak thawn hmailamcaan thlir in…!!

Hausum Fanu

(Visited 85 times, 1 visits today)

Comments

comments

2 Comments

  1. Crazylove mawite says:

    Rinumnak thawn nithla siarin
    Nang tonsal caan ka hngakhlap ee..
    Ka duh tuk ..
    Nau na ca ngam mi pawl hi duh an nung tuk..
    zuam sin2 aw maw…

  2. ka thlah miarmo siang lo cing ten
    ka duh tuk rori thiam law law

Comments

%d bloggers like this: