Ka Aunak Sangtu Bawipa

B.Th degree kum thum sung ih zirsuk dingah Pathian hnenah ka dil ringring. Baibal tlawngkai hi thil lolamte a rak si hrimhrim lo. Nitin Pathian thu zirin Pathian thangthatnak hla kan sak ko nan thlarau thawn cun kan khat theh cuang lo nasa. Zapi thlacamnak kan neih bakah keimah te thlacamnak a falten ka nei ringring. Baibal tlawng hi ziang thawn ka tekhin tile, Jesuh ih farahsipawl thuthawn pehparaw ih a rak sim mi thlan cu a lenglam lawng a mawi ih a sung cu fihnungza lung thawn a khat ….a timi thawn ka tehkhin theu. Baibal tlawngkai tiah ngaisan le upat kan si theu nan kan tlawnginn sung ahcun nauhak zawtepuah kan bangcaan a tampi.

Baibal tlawng buailo le Baibal tlawngkai hartilo an tam emem ding khal ka zum lo. Kan Emanueul Bible institute khal zirhtu le tlawngta theithiamawklonak ruangah kan tlawng hotubikin tlawngta a tlung duh pawl zaten tlung tengteng ding ah a hnawh in in hnawh. Tlawngta zate lungrual tilannak ah zate tlung ding in kan sign theh bet. Lungkim lemlo khalin sign ih tlun theh ding tiah tlawngta lam in thuthluknak kohkhah zet kan tuah. Cutin, Zirhtu le tlawngta thubuai cu a songsang vivo. Kian lam hnak cun tlawngta zate tlung theh dingah in nawt rero sawn.

Kan buainak hi ziangpipa cu asilo nan zirhtupawl in thleidaan an nei; tlawngta an hmuhsuam tivek ruangah hotu sayapawl ih thinhengnak a suak ih leitlun ralpi veithumnak a tho. Tlawngta tamsawn cun an timtuah in tlung dingah Bus par an kai theh zo. New Delhi tiang Bus ih thlah ding kan si.  Bus pahnih khat cu an pok zo.

Hi’h caan ah kei teh khuiah ka rak um ve? Buainak sungah sukso ka tawivak ve. A pawituk mi pakhat cu degree kan laknak ding thla rei hman a tang nawnlo. Kum thum sung mithli thawi ka zirnaknak cu hi buainak ah a cem ding cu ka ruat theilo. Ka mitthli a tla lo nan ka sunglam cu zoh thei sisehla a sen theh ding ah ka ruat. Ka rualpipawl cu Bus parah an kai theh zo ih mi thenkhat cu a feh hman an feh zo. Asinan kei cu Pathian buan ding ah kan room lam pan in ka feh.

Zirhtu sayapawl ka room ah an ra. Keimah vial ka taan thu le zamrangte ih Bus par ka kai lohli a tul thu in sim. In ruahpi thiam maw..? Kumthum sung ih B.Th zirsuak ding ah nitinten thlacamnak ka nei ringring. Ka tangdor theinak thazang zaten harsatnak le nautatnak tinkim tuarin kum thum ka tuarsuak thlang ding. Zankhat thil thu ah ka tumtahnak a hlo theh ding. Van ka zoh ih a sang lei ka zoh ih a pit timi tong hi a nep tuk…van cu a sang hrimhrim lei khal a kua lo ahcun a pit a si mei. Asile, kumthum ih ka tuarnak ka caan, ka thisen ka ruahnak pawl kha zo in I hlu thei sal ding…?

Ka thilri pawl thawn kan room ah ka tap. Ka thin naa tuk. Ka bokkhup. Zirhtu sayapawl cun Bus lam pan ding ah in nawt rero. Ka kiang ah in buk vialvial. Tlawngta zate lakah keimah vial hostel sung ah ka tang. In hnawh rero. Ka duh hrimhrimlo. Kum thum sung ih B.Th degree ngah ding ah ka hlan theh zo. Ziangah hivek men in ka tlung ding?

Ka sunglam a kuai thok. Leidai lo le vandai lo in ka ruahnak pumrua a um theh. Ka sen theh in ka thei aw. Ka thlanhri thawn. Ka hrang ahcun thihnak le nunnak zaan a si. Ka sayapawl an mangbang. Ka Pathian ka ko. Himi thu ahcun an Pathian asilo ding ka Pathian rori ka ko ve. Ka aw a suak thei nawnlo. Ka taksa cu vur bangin a tiral rero in ka thei aw.

Maw, Bawipa ka thlacamnak pawl hmuahhmuah kha na hnen a thlenglo maw si, ziangah hitin inn lam pan in ka tlung sal ding…in zangfah aw kumthum ka theh ding tiah na hnen ah zingtinten ka lo dil ringring. Ka dilnak in ngaisaklo maw si. Na khawkhan daan ka theithiamlo. Ka mang a bang. Ka tlung duh hrimhrimlo tin ka tap ka raak. Hivek ih ka thinhar vansanglam ih ka talbuai a um hrihlo tisehla a sual tam lo ding. Vok si khal nungla ka nguuk theinawlo ding. Caw khal sinung la ka baw thei nawnlo ding. Ar rak si sinsin sehla ka khuang thei hrimhrim lo ding.

Mangbang ih ka buai taktak ahhin ka taksa le thinlung an thenaw ih ka Ruahnak in hmai i hruai ih ka thlarau cu um ngaihnak theiloin meikhu bang in ka kiang nai ah a ding. Ka vansang tuk ruangah ka thinlung in a tuarlo ih a kuai. Kan Bawipa Jesuh khal Gemani hmuan ngei ahkhan kan hrang ih a tuar ding a tihtuk ruangah le a thlabar tuk ruangah a thlan cu thinsen vek rorin a rak for. Hihi ka siar hmaisabik ahcun cuvek a um thei ding maw tiah ka ruat nan a tu ahcun a cang theizia keimah ah a langzo. Kan Bawipa Jesuh in harsatnak in rak tuar khelh theh zo. Kan ni cu maw, a sialcia lamzin ah kan feh men.

Kei khal himi zaan ah ka thinlung a kuaiih ka thlanhri cu thisen vekin a luanglo nan ka zungzam zaten mangbangnak le anhainak in a khat ve theh. Ka nunnak zaten kan inn ih kirsal men lo ding ah Bawipa ka ko…in theihlo ka phan ruangah aw suak thei nawnlo tiang ka au.

Himi zan ahcun leitlun ah ka hnakih thinkuai mangbang an um ding ka zumlo. Himi zan thotho ah Pathian ih ngaihsakbikmi ka rak si khal ka zum. Ka hnen ah ka thinharnak hnem ding ah le lamzin in hruaitu ding ah vancungmi thianghlim pawl paziat a run kuat ti ka sim theilo. Ka aunak aw cu Van khawpi a thang.  A thianghlim suitohkham kiang ih a totupawl khalin in ruat zet ding ka zum.  Cuti, tap le mangbang thimkhawzing ih ka um ruangah ka cahnak a cem  theh. Rang diangdiang in ka taksa a cang theh. Ka taksa pum khal vanram ih thlengvek in ka um.

Sangkapi kiang ah kan zirhtu pawl cun in rak hngak. Duhthlan neiloin kan inn lam ih tlung ding ah Bus lam pan ih ka feh a tul. A makzetmi pakhatcu cu tiih ka tah hnu cun ka phurrit a zang vuarvi. Ka porh deuh dingih pangpat bang tuk ah ka cang.  Cutin thindai le lungthinnuam in Bus kiangte ka thleng.

Bus sangka te ihsin na va rei ve hung kai zang aw tiah in auh celcel. Um, ka tlung taktak ding asi hi ka ti. Cutin Bus par ka kai zawng ciah ah Vanmi ka ti mai; Zo asi ti ka theilo. A angki a rang ih mi sang zet vek hi a si. Mipa sam malte kir deuh vek a si. Kan rualpi khal a si lo. Cupa cun “Na tleng nawnlo, neita Bus ah na feh leh ding, tum aw” in ti. Bus a feh. Cutin van lam ihsi thu rung thlengmi pawl ka kai thiam.

A thaizing ah kan tlawng neitu hotubik cun remnak darkhing a tum ih tlung nawnlo dingah in kai tang theh. Kum thum lukhum ka lu ah ka toh…buaih lukum kan timi cu a si.

(Visited 68 times, 1 visits today)

Comments

comments

Comments

%d bloggers like this: