K-Pop Hlasaktu Jonghyun Lungkuai In An Vui Liam 

Asia ram men silo leiltun mino, suakthuan, tleirawl pawl ih atcilh mi K-Pop, SHINee ih hlasaktu Jonghyun ih ruang cu tuini ah lungkuai le sianglo cingin an vui liam.

Kim Johng-hyun kum 27, Jonghyun tiih theihlar mi cun thinpitnak ruangah amah le mah a that aw tiin an nemhnget. A rualpi pawl hnenih a netnak cakuat mi pawl ah hminthanak le thinpitnak a neih thu a rel tiah theih a si.

A cakuat mi ahcun hitin a ngan, ‘sunglam ihsin a kekkuai’ timi le ‘nunnak ih hminthannak hi keimah hrangah a rak silo’ tiin a um. ‘Ziang dang ha ka rel bet ding. Ka tuahṭha tiin in tive cio ko uh. Hi mi zat cu a tawk. Ka theitawk in teima zetin ka ṭuan. Ka parah lungawiin in hnihsan thei lo khalle ka lamzin ahcun sual in phurh hlah uh’ tiin a kuat.

A ruang vui nak hi a hlasakpi pawl le a farnu ih hmai an ṭhi. A ruang an phumnak ngaingai cu a mai sungkhat malte lawng ih lut siannak hmun ah an phum.

Korea mip thawng lenglo in an suun ih, SHINee pawl in hitin thlahnak ah an ngan; ‘Hngilhni na um ding maw, mi hmuahmuah hnakih cuangmuar ih Awnmawi ngaina pa’… tiin an thlahnak catlang an tar.

SHINee hi 2008 ah mi panga pawl komkhawm in SM Entertianment hnuai ih rak ding mi an si. Tu ahcun Korea ih le Asia ram ih hlasak larbik le sumpai hlawh tambik pakhat an si.#

(Visited 188 times, 2 visits today)

Comments

comments

Comments

%d bloggers like this: