Justin Sanghrinthang (Thangkuk) Le CT Palai Kawm Aw

Chin Nonawn lak ih langsar zet

Chin Star News, Chief Editor tuan rero lai, FCCI Youth secretary tuan rero lai, US Chin New Year Festival (2009-10) ih Biazai ngan zuamawknak ih pakhatnak latu le Hlasak zuamawknak ih pakhatnak latu  US nonawn star pakhat a si mi Justin cu kan CT palai thawn an kawm aw.

Ka thuhla tawi

Justin   : Ka hmin Justin Sanghrinthang (Thangkuk) a si. Ka Pa cu Pen Thang a si ih ka nu cu Sayamah Lian Sung a si.

Naupa pakhat ka nei ih Tha Lian Thang (Thangte) tiah kan ko. March 08, 1990 ah Falam ah ka suak. Tukum hi Perry Meridian High School in high school ka theh pek te.

A tu fang cu Indy Chin Pawlpi, USA ah Public info; Culture and Literature tuanvo ka kai ih Chin Star News ah Chief Editor ka tuan. Cun, Falam Christian Church of Indianapolis ah Mino Secretary ka si.

CT      : Lai Kum Thar Puai, 2010 (Chin New Year Festival ) ih hla zuam-awknak ah pakhatnak ngah ding in ziangtluk na timtuah (prepare) ?

Justin   : Lai Kum Thar Puai ah hlasak zuam-awknak a um ding ti ka thei vete’n “Chin Community” timi Biazai cu thlacamnak thawn ka ngan cih. Cumi Biazai ka ngan mi cu ka u pa Chigaco ih Salai Ngun Nawl thawn aw thluk kan bun. Cutheh in Indy Chin Band pawl ih zuampinak in kan zir (practice) ringring puai thlen hlan tiang. (Indy Chin Band : Lead guitar : Salai Lai Lung Lian, Bass : Salai Ko Aung, Drum: Salai Siang Lian (Siangte), Guitar : Kunrirak (Ukte).

CT      : Himi hla na sak laifang ah ziangmi na feeling?

Justin   : Ka hla ih a ti duh san mi pawl ka feeling phah. Kan suulphumnak ram a si lo mi ram ah kan um na’n sikhawh Chin Community,USA ruangah Chin thangthar nonawn le Chin mipi hizat nuam le hlunghlai zet in Lai Kum Thar kan tuah thei ti’n ka hla uar zet in ka sak.

CT      : Mai hla phuahcop asiih pakhatnak na ngah ding na rak zum cia maw?

Justin   : Ka nu le ka pa, ka sungkhat pawl, ka rualpi tha pawl le saya pawl thawn Pakhatnak ngah ding in Pathian hnen ah thlacamnak kan neih hnu ih zuam-awknak ah tel mi ka si ruangah hnangamnak kim thawn zuam-awknak ah ka tel.

Biazai ka ngan mi a zate in cu 70 a luan zo.

CT      : Tui kum 2010 fang-er puai nan hmannak ih na duhbikmi le na duhlobikmi pakhat veve in sim aw..?

Justin   : Ka duhbikmi cu Laimi tamzet hmun khat ih mai Laitong te thawn vun biak-awk, Laihla sak le mai Lailaam vunlaam tluk ih ka duhmi a um lo. Asinan Laimi hrekkhat Laitong silo a dang tong in an mah le an mah an biak-awk ka theih mi hi ka duhlobikmi a si.

CT      : Nikum Fanger puai Biazai ngan zuamawknak ah pakhatnak na la zo ih Biazai ah ziangtluk na thinlung na rak pe?

Justin   : Singai ! 2009 Lai Kum Thar (Indianapolis) ah Biazai pakhatnak ka rak ngah dah ngai. Hmaisa sawn ah Biazai in thok sehla. Biazai hi ka nauhak laite ihsin ka siar ringring. Burma kan um lai ka phun sarih lai-ah Kawl ka sayapa hnen ah Biazai ngan daan ka rak zir. Cule Biazai bu pawl tampi ka siar. Cun, Falam ih Biaknak lam ih suah mi thuthang ca le cazual pawl ih Biazai khal ka siar ringring. Tong khuun le Lai thuanthu khal tampi ka siar ih cumi pawl nih khal Biazai ngan in bawm zet.

CT      : Hla hi ziangtik in na sak thok ih ziang tluk in na rak paih?

Justin   : Hla lam cu sim ding ka phur zet. Sunday school ka kai thok ihsin hla ka sak thok. Sinan mipi hmai ih keimah te’n pakzai (solo) ka sak hmaisabik cu ka kum 10 lai-ah a si ih Bethlehem Baptist Church, Falam ah a si. Hlasak hi ziangtluk tiang ka thinlung ka peek tile cu hlasak thiam hmin thang pawl ih an kaa caang daan, an kut hawi daan le an mit men daan tiang  in ka rak cawng ih an aw suah daan vek rori in ka aw ka rak suah ciamco. Tu khal-ah hlasak daan le music lam  ka zir rero  lai a si.

CT      : Biazai paziat na ngan zo?

Justin   : Biazai ka ngan mi a zate in cu 70 a luan zo. Hmaisabik ka ngan mi Biazai cu ka kum 15 ramleng kan thlen ni ih ka ngan mi “ Ka Kir Saal Ding” timi a si.

CT      : Hla fingziat na phuah?

Justin   : Hla hicu ka phuah tuk lo. “Ninu Bang Suum Saal Aw” le “Chin Community” hi an si ko. Kei cu a sak lam ka si. Hmailam ah cu Pathian nih rem a ti le a sak tu lawng si lo ih hla phuah vivo khal ka tum.

CT      : Album teh suah leh na tum maw?

Justin   : Pathian nih rem a ti ah cu 2011 sungah Album pakhat suak thei ding in thla kan cam rero lai.

CT      : Mi note na si lai ih na upat tikah ziangmi si na tum?

Justin   : Pathian ih i peek mi ka nunnak hi Khrish le Miphun hrangah ka hmang ding. Ka duhtuk mi hlasak,cangan le lemcang hi ka sunzom vivo ding. Cun , ka hrang ih Pathian nih a tumtah cia mi thil ah lungawi zet ih a cohlang thiam tu si ding ka tum.

CT      : Kawlram (Lairam) ah kirsal na tum maw?

Justin   : Ka kir saal ding ni le thla siar in i hngak rero laitu ka nu Lairam hnenah thansohnak, hlawhtlinnak le nunnomnak thawn a fapa kei in ka pan saal teengteeng ding.

CT      : Kan Chin hlasakthiam lakah zo na uar bik?

Justin   : Pathian hla ah Sangpi le Mai Lal Biak Hnem cun love song ahcun Solomon Menrihai hi ka uar.

CT       : Chinmi hruaitu ah zo na ngaisang?

Justin   : Pu Con Bik ka ngaisang in ka uar a si.

CT      : Na buai thei tuk fawn Chinlandtoday ah na rak leng man ve  maw?

Justin   : Chinlandtoday a um thok ni ihsin tui’ nitiang nikhat veikhat tal a malbik pelh lo ih a zohtu lakah ka tel ve. Ka lo lawmhai zet nan zuamnak parah.

CT      : Chin mino le hlasak, cangan lam a huam mi hnenah cah duh mi na nei maw?

Justin   : Miphun pakhat a thangso theinak dingah thil tampi a tul. Cu mi tampi a tul mi lak sung ihsin awnmawi lam le Calai lam khal hi thansonak kalbak pakhat an si ve. Kan ni mino san ah kan Chin (Lai) awnmawi saang sinsin seh. Kan Calai khal miphun dang hluan in a thum hleicenak lang sin ter uh si.

Atnak sumziing pawl cu cakzet in pah bal ding ah kan zuam ding. Kan tong, kan Calai le Nunphung kilhim vivo uh si ti hi ka cah duh hleiah khui hmun kan um  khal le Chin (Lai) miphun ka si tiah baan phar ngam tu si cio uh si tikhal ka sawm duh fawn a si.

CT : Kan lo naihsin theinak ding ah…

My Website : www.justinthangworld.webs.com
Youtube:  www.youtube.com/justinshthang
CHIN WORLD:  www.chinworld.info
FCCI :  www.falamchristianchurch.net
Chin Bible : www.www.myanmarbible.com/bible/Falam/html/index.html

ID: salaijustin@gmail.com

(Visited 77 times, 1 visits today)

Comments

comments

19 Comments

  1. Saithantluanga Tuallawt says:

    Hi tluk Biazai ngan tam thei cu a ropi hrim hrim ka ti. A thinlungah a khat lawng si lovin a liam suak a si bik hi, Falam tawng ih Ca kan zir thei can a um tik ah pakhat tal cu Tlawng zirnak(School lession) ah senglut mi a um ko ding tin ka duhsak zet. Calai maw Biazai hi a interest ti lawngte ka fiang lo.

    William Shakespeare le John Milton kha Calai maw Biazai (Poem) kha an lar pi? Laimi cu Cafang kan rak neih loh ruangah Biazai le Hla hi kan Literature hrampi an si bik. Kan Hla le Biazai ihsin kan nun phung, din hmun le Pipu nun um tu dan a zingzawih theih ih cu cu Cafang nei lo Tlangmi pawl (Tribal) in History an zingzawi tikah Biazai hi an hman bik mi khal a si. Asinan….tun san ah cun…….

    Ka comment topic thawn mi aw lo a si nan Calai thu mal lai hun bet ka duh. Laimi pawl in tui hlan kan Pipu san ah Ca kan nei ih cui Ca cu saphaw ih ngan mi a si ih uico nih a rak thiar hlo ruangah kan Ca cu a hlo lan taaaaa…tin…an rel theu. Kan Pupa pawl Ca saphaw ih ngan mi kha hmuh a cak um zet, ziang vek ca (alphabet) maw a si ding. ” kei cu kan pupa pawl ih Ca an rak neih mi saphaw par ih ngan mi kha thil dang ciamco a si ka zum lem lo, saki zuk, feipi, dar,meithal le sia zuk pawl men an si ka zum. Ziangah ti len, khuan hlan thlan lung (mithi thlan) le mi uk inn kan zauh tikah cu vek lawng lawng a um. Ca ih ngan mi a um dah lo, ka Pupa pawl Ca an nei kan ti khal kha Sa lu lem ai bak a si ka zum lo” tin ngan tu pakhat cun a ti. Nang na zum ve maw????

    CT pawl hi interview ding nan thei nawn lem lo a bang. Chinworld tawlrel tu tla hi interview uh la a tha lo ding maw? Bible lam mithiam kan neih mi se seh, Politician si seh, Singer siseh mi phun phun nan interview zo ih a lungawi um zet. Media lam ih hruai tu kan lo neih mi pawl hi interview nak a mal tuk deuh ka ti. Pakhat le pakhat hi sem alh aw tawn kan tul lai fang a si.

    Cu ti cun, ka comment mi topic ah kir sal se la. Hi tluk ih kum nau hak mi in kan Calai thansohnak dingih a hna tuan mi hi a ropi ka ti ih hmai lamah a duh thu sam ziam ral mai lovi Falam Laimi Calai hmanso thei vivo nak dingah Pathian in malsawm hram seh law….

  2. Woww ! Chinland Today pawl ka lo uar hai tuk lawmlam hokhaw. A tu hrawng USA ah cu Justin Thang, Justin, Justin ti lawnglawng fala le mino upa ti lo in an rel celcel. Cumi cu nan hailang ih Interview nan tuah cu ka lungawi zual.

    Amah hi tukum Lai Kum Thar puai ah ka tong ngah. A aw kam khal a neem ih upa nauhak ti lo mibiak daan khal a thiam. Laica zirhtu khal a si ti thu ka thei.

    Kum 20 lawng a si hrih mi Mino te nih hitluk in kan Miphun a duhdawtnak a lanter hi cu nang le kei ih cawn tlak rori hokhaw a si. Cui ruang ah kan ni khal Justin thang hnen ihsin zir ciau uh si.

  3. Dear Saithantluanga,

    Na comment nasa thei khop mai.
    Ca na siar tam bawk.

    CT regular reader ka si ve.
    Mino tete an cawisan hi a tha na ti lemlo maw si?

  4. Saithantluanga Tuallawt says:

    Dear, Mai Nu Nu

    Ti tuk e, ti lo ka bang maw?

    Comment in ei hawl ka tum !
    Khek khek khek ….

    Mino an si maw si lo, cawisan
    tlak cu cawisan ding a si ko tin
    ka ruat. Hmaisa bik ah Pa Pa-
    thian hi cawisan tum ring ring
    se la.

  5. Justin,

    Na ti ttha tuk. Mino lakah nangmah vek tampi Laimi/Lairam in kan ttul. Zuam sinsin aw….

    Na U Piangte

  6. Dear Tluanga,

    CT in cawisantlak tampi an um ti an thei ko ding ka zum, mipi ih theih ciamco lo
    mi, mi thahnemngai tampi an um na zum ve maw?

    Ahmaisabik ah Pa Pathian cawisan ding na timi cu ka uar.
    Kei tla comment ngan hi a nuam tawk ka ti, ca thupi ttuitto ngan cu
    thluak a sa thei. Bawhlung sittu hnakin a zohtu ih ttan, el malte rak mer fang ttul hi
    a nuam tawk ka ti. Comment pek khal hi thapek pakhat a si ve, rak ngan zel aw.

    Pathuam
    =======

  7. Hruaitu lakih Pu Con Bik uar bik timi ca a tha ka ti ve.
    Asinan a rei tuk deuh lo maw, tulai ah hruaitu tampi kan nei sisi.
    Thimnak ah biaknak lam in.. Dr. Hre Kio, Dr. Sui Liang Mang,
    Leitlun lam ah Dr. No Than Kap, Dr. Than Bil Luai etc ..

    Kei cun hrilningla Pathian thu ah kan Laimi ( Falam ) miphun lak ihsin
    Bible in letsaktu Dr. Sui Lian Mang
    leitlun lam ah Dr. No Than kap ka hril ding.

    Thawm

  8. Justin hi mino ahcun uar a um ka ti ve zet.
    Ziangah tile kan miphun a duhdawt riai.

    Pathian in a zirnak ah fimthiamnak pe in kan miphun
    hmailam ah hruaitu tha si hramseh.

    Pathuam
    =======

  9. Dear Ka rual Justin,

    Fala (darling kan ti deuh maw?) na neih le neihlo tla an va lo sut lo ve aw!

    Asi, Na tlawmngaizia cu pheh ding ruangloin ka rak thei ve.
    Na biazia nganmi le na hla phuahmi pawl le group mail ih forhfialnak na nganmi pawl tla ka rak siar ve theu.

    Pathian theilo mi cun hruaitu pitling le tlamtling a si thei hrimhrim lo ding ti cu ka zumve…Pathian hrang na tuannak le miphun na riannak ah Cung Pathian in lo bawm vivo hramseh!

    Cun, ka rual Thawma ih comment mi kha…a dik ka ti zet ve.
    Ziangah simaw tui kan dinhmun ah hruaitu tiih kawktlak kan nei lo maw si? timi ka ruat theu…CT interview pahnih ka siarnak ah tuni Chin Today ih in hruaitu bik sim ding an aihaal deuh in ka hmu…

    Pu Con Bik cu ka uar ve.

    Vahvaihnak
    New Delhi
    ==========

  10. A si.

    Chinmi in hruaitu fumfe kan nei lo maw si..?
    Mual in liamsanzotu siloin tui in hruai rerotu ti ding kan nei lo maw si aw!

    As for me….

    Gospel hlasak thiam ah Mai Far Men Par
    Love song ahcun Solomon Menrihai

  11. Dear Justin,

    Na thuhla ka rak siar ve.
    Tang sinsin aw.

  12. Dear Justin,

    CT pawlin na darling thu tla an lo sut lo a bang..?
    Pathian hrang na hnatuan le miphun na riandaan pawl ka rak thei ve.
    Hna tam zet na kai ih a ropi nasa.

    Na biazai tla ka rak siar theu.
    Cun, na cangan dang tla.

  13. Duhdawtmi Justin le fakseltu,

    Justin,

    Na ti t’ha… zuam vivo aw… Pathian in hlawhtlinnak thawn lam lo hruai vivo hramseh.. Na sunmang pawl tla kan Chin miphun ih t’ulmi lawnglawng an si.

    Comment pek awk a si vekin…
    Pakhat ka ruat daan “Lai” tihi a t’ha ko na’n “Chin” tihi uar sawn sehla teh ziangtin na ruat… ziangah tile…?

    Fakseltupawl,

    A uarmi Pu Con Bik cu kan Chin thuanthu ih hngilh theihlo dingmi miropi bik cu a si hrimhrim. Taht’himnak ah US pawl in Obama hnakin a thi zomi Abraham Lincoln uar sawntu an tampi ding tiah ka ruat. Tu ih Uktu Taansui hnakin Uktu Aungsan uartu an tam sawn lai men thei.

    Asina’n a dam rero lai mipawl hril sehla cu a hriltu in mithmai t’ha lole a hrilmi Pacang t’ha lole nucang t’ha in thazang rak laaknak ah tla a rak hman phah men thei ko.

    Ziangkhal a sile interview an lo tuah tik ah Chin mi lak ih hruaitu na duh bik le uar bikmi na sim ve leh ding thinsau te’n…. 🙂 :-/ (Capo-thungai)

    Dam le tluang te’n,

    DL Senling
    &&&&&&&&

  14. a tha tuk u justin….mino le kan za te ih cawn tlak rori mi sia neta thu na cah mi te kha 🙂

  15. Wowww ti’n a hmaisabik ah ka thok ding.

    Interview in tuah tu CT, cun fakselnak phunphun in pe tu ?Saithantluanga?Jeo Kawlpa?Mai NuNu? U Piangte? Pathuam?Pa Thang Lian?Liam Pum?Ukte (Delhi)? DL Senling? Malawmle interview siartu nan zate parah sim cawk lo lungawinak ka nei a si. Ruahnak thar khal tampi ka ngah.

    Nan thusuh mi pawl a cang thei tawk in leh ka zuam ding.
    1. Fala nei le nei lo ti cu interview ah a tel lo ih a san daan ding a har deuh. In suh tik le ka lo sim leh ding ti’n fala pawl kha in rak sim sak aw U UKte 🙂

    2. Pu Con Bik ka hrilnak san cu kan Chin thuanthu sungah mai miphun hrangah raalthazet le thih hman tih lo in hmairaang pawl a do ih a miphun a humnak hi ka uar hleice cuang ruangah ka hril mi a si. Tu kan san ih kan Upa pawl ka ngaisaang lo tinak a si hrimhrim lo. In thei sual hram hlah uh. Tusan ih a phunphun in kan miphun hrang ih a tuan tu zate’n upatnak ka lo peek hai.

    3. Chin le Lai timi thu ah cu Kei cun CHIN (LAI) tiah ka hmang ringring. Himi thu cu sim fiang awk le a sau deuh ding ruangah a thei duh tu cun personal mail ah reel tlang a ngah ko. A pahnih kom in kei cun CHIN (LAI) tiah ka hmang ringring.

    Lungawinak tuumpi thawn,

    JUSTIN THANG.

  16. Duhdawtmi Justin Thang,

    Na kum no tluk ruah ahcun na thawmvang a thang daan le ka lo theinak a rei phah zo. Ka lo lawm in ka lo upat a si. Harsatnak, mangbangnak le soiselnak phunphun lak ihsin dungsiip lote’n kan ram le miphun hrangah rak zuam sinsin aw tiah thazang ka lo pe duh a si.

    Pakhat te……Falam Baptist Church ih senior Pastor Rev. J Tial Dum thusutnak an rak nei dah. CHIN or Falam (Ka fiang nawn lo).. sungin zo so Pathian riantu ah na ngaisang in na uar bik??? tin…. Rev. Tawk Lian Thio a rak ti ( A thizomi a si). Sim duhmi cu a fiang ka zum.

    A tu damlaimi pawl hnakin mual in liamsan zomi pawl hi mi tamsawn in an hril ve ko lo maw si ka ti.

  17. Mah uar mi cu sim ding a si ko ve.
    Asinan , in thihsan zotu va uar rero hnak cun a nungdammi hi
    upat le uar tlak an um ko ahcun a thahnem deuh lo maw?
    Mi va cawisang cengmang ih ti ah men si ko.

  18. steve vanbawi says:

    Dear Justin…
    Na thu hla tampi ka rak siar ih.. Youtube ih na channel tla ka rak zoh ih na hla sak uploaded tete tla ka ngai ih tha ka ti na sa… hla sak tla na thiam zet…. Kei tla nang mah thi rual te… hla sak leh music ngai na zet tu ka si ve.. na zuam nak par leh na hlawh tlin nak parah kalo daw in ka lo ngaisang na sa… zuam sinsin aw….

    sawisel nak phunkim na parah a thleng ding.. cutikah dungsip loin ading mi lam leh na tumtah nak lam hawi in feh vivo aw…Pathian in lo thlawsuah hram seh……….. !

    Steve VanBawi

  19. Zolian,
    Na ruahnak in run ruah ih tampi ka lungawi. A si ! Na simmi a dik ih ka lo pom pi ve. A thizo mi le a um nawn lo mi pawl uar ciamco cu san nei leemlo a bang ding. Asinan President George Washington tivek, Aung Sang tivek pawl hi an thihhnu khal ah zozo khal in an upat ih an uar cio thotho ding ti’n ka zum.

    Steve Van Bawi,
    Thazaang tampi in peek ih ka lungawi nasa. Cuhleiah keimah kum thi, hlasak paih ve thawn kan ton-awk ngah cu a sunglawi cuang ti’n ka thei. Kan zuam sin ding kan Miphun hrangah. Si ! Soiseelnak hi cu kei cun a tuar thiam daan hi ka zir vivo ih fimzirh tu ah ka hmang vivo. A cang thei le na email tla in peek leh aw la kan biak awk vivo pei cu.

    Lungawi nak tumpi thawn,
    JUSTIN THANG.

Comments

%d bloggers like this: