Josiah Mang Lian Tlung Thawn Hmaitonnak

Interview with Josiah Mang Lian Tlung

 

Profile:

Hmin: Mang Lian Tlung ( Josiah)
Suah ni: 20/9/1943
Suahnak khua: Khawlung
Nulepa: No Hlei Ling le Tial Hlei kai ( tleicia veve)
Ulenau: Paruk lakah nautabik
Qualifications: B.Th, BD, M Th.
Hnatuan: Director of GCEC
Innsungsang: Phoebe Nei Zing ( Fa pathum)
Address: 209/1 Taungzalat, Kalaymyo.
Goal in life: Midang hrangih mi tangkai si

  1. Ahmaisabikah G.C.E.C ti mi ih longform le a rung suahkehdan in sim thei pei maw?

-Grace Children Education Centre ti a si. Bible tlawng ka kailai ah kan nu ( khalaiah cun a fala lai)in Mucu ( nursery ) a rak thawk ciaih Kum 2003 kumah kan neiaw ih cuikum in tlawng ngaiin  kan din thawk. A hmin hi thlaraulam ih ka pa a si mi Dr. Sui Lian Mang  thawn kan pawlkhawm mi a si

  1. G.C.E.C na dinnak san le hmuitin mi teh ziang a si?

Sim zo bangin kum 2003 in nulepa le rualpipawl ih thapeknak ruangah kan din thawk a si bik. Acozah tlawngih fale rettu nulepa tamzetin an fale hrangah private tlawngih ret an duhzia pawl in ruah ringring. Citin nauhakpawlih an hmailam ruahtuk ruangah hi tlawng hi huphurh zet cing kan din a si bik. Kan hmuitin bik cu nauhakpawlin Jesu an neih ih leitlun fimthiamnak lam khalah an kum le an dinhmun ih zirih an thiam theinak dingah a si. Kan ram tuahtha dingcun nauhak laiih kan thawk a tul tihi kan zum hnget mi a si ( Thufim 6:22).

  1. Hi tlawng a rung din theinak hrang le tuini tiang a hlawhtlin theinak hrangah ziangvek  harsatnak le challenge pawl na rak pahtlang?

Kan mai hrangah cun harsatnak kan tawng pamah kan ruataw. Sumpai lamah neihcia kan neih lo tikah kan buai zet theu. Kan din kumah tlawng ta  43 le  zirhtu  5 an siih kan heraw thei fangfang. Kan nupa in hi kum cu  thingpi dawr le Bazar zin kan feh lo ti theih a si. Nauhakpawl khal zialparah ca an zir. Cun, umnak inn remcanlonak ruangah kum tin deuhthaw kan inn kan thawn aw. Kum 2003 ihsin 2008 sungah inn 5 kan thawn aw. Hmun hrekkhat ahcun thla tam simcianak umloih thawnawk a tul tikah, inn tumpi kan tul fawn siih kan buai zet theu. Kum 2005 ah tlawngta 250 lenglo kan nei. Asinan cuikum ah umnak remcanlo le acozah lam ih buainak ruangah tlawngta  100 hrawng lawng an tang. Acozah lam khal in tuletu harnak in pe.  Tlawng khal tuah theinawnlo ding vekin kan ruataw ih cawlh kan tum. Asinan cuvek kumpawlah Pathian a phuangawih  hivek dinhmunih kan rung din theisalnak a si. Ka hmuhsuah mi cu nulepai thapeknak hi ral in thatertu a si.

  1. Tahan kiangkapih  English Medium tlawng a din hmaisabiktu pakhat dinhmun in, na rak thok pekah tlawngta nulepa in ziangtlukin an rak lo theihthiampi?

-Tahan lamih rak umdah tuklo a si tikah nulepai hrangah cun thil thar vekah a cang. Mi pakhat hnih cun an fale kumkhat sungih danglam verver dingah an beiseiih ziang an silo tikah an bei a dawng. Mi hrek in le kan hnenih an ret hnuhnu inlamah an hna a ngam hlenhlen ih inlamah ngaihsaknak a tum nawn lo tikah mal ai a buai thlak zik theu. Asinan kan zumhnakin nulepapawlin in theithiam pi zet. Inn remcanlo ruangih leilung par le pherin tet ngaingai ih an zir lai khalah an tlawkciar lem lo.

  1. Nan class thendanpawl teh in sim thei pei maw?

Nursery ( mucu) ihsin phun 10 tiang kan nei. Tlawngta tamdeuhnak khan ah cun A le B tiah kan then ber.

 

  1. Nan zir mi subject-pawl tla theih kan duh zet.

Kan zir mipawl hi a tlangpi thuin India private tlawngta kan zir. Asinan kawlram mi dinhmun ih theitul mi subject-pawl cu kawlram ta kan zir. Acazah tlawngih an kaisal khal le ziang buainak hman an neihlonak dingah kawlram subject pawimawh deuh kan zirhnak a si. English cu English lamih thiamdeuhpawl tla rawn khan tinin an zir ding kan timlamsak. Cun, Bible le music khal kan zirh. Computer course hi tuikum ihsin neih thei kan zuam.

  1. G.C.E.C ih thazang (saya/ma) le cui zirhtupawl nan tahhriamdan pawl teh in hlawm siang pei maw?

Tlawngta 280 hrawng kan neiih zirhtu 25 thawn. Tlawng lamah cun kan nu Nei Nei hi principal in a um. Zirhtupawl hi phunsangtawng lole Bible tlawng theh thluh an si. Asinan nauhakzirh dan ( training) hi tuletu kan timlamsak. Rangon lam khal ah an vung kai ih hitawk kan  khal ah an nei. English ih kan mithiam saya J Khum khal in English zirhdan le teching skills pawl training can reipi sung in ra pe. Cun, Friday tlai tinten zirhtupawl zarhkhat sungih an zirhdan pawl zohsalnak kan nei ringring. Thlakhat veikhat zirhtupawl  zantim thlacamnak kan neiih cutawkah Pathian thuthawn thapekawknak khal kan nei ringring.

  1. Acozah thawn nan pehtlaihawkdan teh in ruah thei pei maw?

Tuah cun acozah thawn kan pehtlaihaw lo lawlaw a si bik. Acozah in private tlawngawn a siang thlang nan a awng duhtu ih thlun ding dan an tuah mipawl  kan thlunthei an um tuk hirh lo. Thimnakah acozah subject lawng zirding zirh ding, tlawngah ziang sakhuanak tawngfang hman hmanlo ding, zirhtu cun acozah theihpi mi fimthiamnak lam degree ngah mi a si ding, Acre 10 neih ding, Tileuhnak tileuhnak   tvk…Asinan tuihlan vekin acozah lamin in tibuai nawn lo.

  1. Hi tlawng kaitu nauhakpawl ih hmaikhua hrangah ziangvekin ruahsaknak nan nei?

Aw . Kan tlawngih phun 10 an theh tikah an hrangah khawkhansaknak kan neihsak ko.  Leitlun khuitawk khalih an kai khalle an thlun/zir theinak ding tan kan la rero. Kan lungawi zet mi cu kan tlawngta ramdangah an sinak dingah an va zawm thei lawng siloin a cungcuang lamah a va si ti kan theih tikah kan lung a awi zet.

  1. Tlawngta nulepa thawi nan ttantlangdan teh  in hlawm thei pei maw?

Nulepa thawn kum khatah veihnih burpi meeting kan nei theu. Cun nauhakpawlih tuldanih zirin nulepa cu kan ko cingcing. Nulepa thawi tantlang hi thilpawimawhtuk ah kan ruat. Nulepa hrekkhat cun tlawngih an ret cun a duhtawk meiih inlam ah an ngaihsak thei nawn lo. Cuveknauhakpawl cu an thansoding zetin an thangso thei lo.

  1. Sumpai lamah teh harsatnak nan tong phah theu maw?

Pathian zarah tlawng fee kan lak mi thawn kan heraw thei nerno theu. Tlawngta lakih harsa kan bawm mi le fee pe theilo an um phah tikah zirhtu hlawh pek dingah kan buai phah zik theu nan Pathian zarah kan kim thluh theu. Tlawng hrangih thi ri thatha neih ding khal kan sadhthat zetnan kan sumpai ina  tlin lo theu.

  1. Acozah tlawng le G.C.E.C a danglamawknak hi ziang bik a si pei?

A danglamnak rel ding fukfi ka theilo nan nulepa cun a danglam tuk cu an ti. Zingtin ten Pathian thu kan sim ringring hleiah tlawngah miring lawng kan hmang. Zirhtupawl khal duhsakbik neilo ding le farah milain thleidang lo ding cu kan tumtah bik mi a si. Ca thlun theilopawl hrang khalah a hleice in zirhnak kan neih sak.

  1. “Stand by Me” organization ah Manager pakhat na si tin kan rak thei. Hi na hnatuan mi thuhla tla famkim ten in hlawm awla kan lungawi zet ding. Stand by me hi tuihlan ah cun Kids Alive an tiih kei cu kawlrawm saklam ih manager ka si. A hleice in nauhaklam hnatuannak a si ih nulepa neilopawl hnenah a si deuh bik. Nulepa neilo zohnak in 20 lengloah nauhak 350 kiangkap kan kil khawi. Hilam ih hna ka tuan ruangah tlawng lamah kan nu hi principal in a um ih tlawnglam thuthawi pehparaw mi pohpoh a tuan.
  2. Pastor hna tuan phah in calai lam khalah nasaten  na telpi phah thei thotho hi kan lo fak zet.  Calai khawvel na luh hnuih na hmuhton mipawl teh in ruah thei pei maw?

Si , Bungdaw Revival Baptist Church ah pastor ka tuan phah. Calai lamah cun relthlak ding cu a si lo. Asinan cabu, magazine le pawlkawm auaw phunphun pawl ka zemsuak tikah cangandan pahnih khat bangawklo ruangih bulpak, kawhhranih in cohlan lo ( in khih kirsal mi) ka tawng tam zetih ka riah a sia zet. A hrek khat cu Bible le Pathian thu an si.

  1. Thil rak um dah lo titu (Pioneer) pakhat na si theinak san hi ziangruangah a si in na ruat?

Kei ka hrangah cun ralthatnak in petubik cu Pathian a si. Cun, hmundangah ( mikhalin) an tuah thei mi ziangah kan tuah thei velo ding ti khal hi tha in tho tertu a si. Hnatuan thar ( thleng) tuan hi thil harsa zet a sinan kan hlawhtlinlo khal le zirsuah mi cu a um thotho ding ti ka zum. Tui ka ruahsal le kan rak aat thilti lam a si lo maw ti hman in ka ruat.

  1. Na hrangah hin ‘NUPI’ ti mi ih sullam hi ziangtivekin na simfiang duh?

ka hrangah cun nupi hi a pawimawhbik lamah ka ruat. I cawimawitu thiamtu le inI  khaisang thiamtu nupi ka neih hi ka van a tha tuk. Nupi hi pasal hlawhtlinnak hrangih mi pawimawhbik an si pei maw ti hman ka ruat.

  1. Chin nauhakpawl thlengter na duh mi teh ziangpawl an si pei?

Kan chin mi nauhak lungput cu thlengsak kan tum bik mi a si. Cazirhnak khan, Biakin sung le tlawnglak suahnak hmunpawlah ningzak kan nei tuk. Thu in suh mi kan theih khal le kan sang ngam lo theu. Kan mawhlonak khal thusuh mi kan sawn tikah a dik lo a si le zirhtu in “ cu hman thiam lo…” tivek in kan kawkaw hleiah rualpi in le kan hnihsan aw. Cuisin kan lungput cu a niam vivo thei. Kan hmuhsuah mi cu tlawngkhan sungih virvat tha ( huatsuak) kan ti deuh mi pawl lamzin dik kan khihhmuh thei a siah cun an lam cuangmuar deuh a bang.

  1. Chin nulepapawl in thei hai sehla tiah na seherh mipawl tla in sim hrih aw.

A pakhatnakah nulepa in kan fale pawl Pathian thuih an um ding ruah a tul. An puitlin hnu cun kan kaihrem thei nawn lo. In lamah thazetin fingkhawi mi nauhak cu an danglam zet. Nule pa hrekkhat in fale kilkhawitu dingah Sunday school le tlawng kan ruat theu ih kan palhbiknak a si. Nun kan sim khal le an thinlung ah simlo in an taksa kan uar tuk theu.

  1. Kan khawtlang dinhmun a thansoh theilonak san si’h na hmuh mi pathum talin in sim thei pei maw?

Mikip in sikan ( dan) thazet kan neih a tul bik in ka thei. Ziangvekin a acozah tha khal sehla mikip nun a that lo cun khawtlang a tha thei taktak lo. Tucu kan hnawmhlawn dan, Kan in hmaiih kan lamzin tuah dan ( leiburh dan) ihsin kan zir thawk a tul in ka thei. Cun Casiar hi kan zangzel tuk. Calsiar ding lamah kan paisa kan ui tul. Cucun theihnak kan thlasam ih thansoding zatin kan thang so thei lo.

  1. Tulai santiluan (Postmodern san) ih fala/tlangval pawl umdan ah helhkam mi na nei pang maw?

-Internet le technology lamhi a diklo lam zawngih hmang kan tam tuk thlang. USA siatsuahtu bik hi internet (computer) ti a siih kan ralrin thiam a tha zet ding. Cun zankhat thilthu ih neiawklawk kan hmang khal hin kan khawtlang nun a siatsuah zet in ka thei. A hleice in hihi lai khawte lamah a tam deuh ih kum no tete an neiaw ih an then aw sal mei. Cucun fale pangvainak, nunau thlahdahawknak le neih mi sunralnak pawl a thlen.

  1. Nan tlawnginn hi pawlkom phunkim in tonawknak hmunpi bikah an hmang rero zo tin kan rak thei. Hihi hall san man tivek a um maw? Ziangvekin nan hmanawkter?

-Kan nih cu Biakin a silo tikah pawlkawm tinkim ih hman kan siang ko nan khawvel lam thil tuk ( concert le sumpai hawlnak phunphun) ah cun kan san tuklo. Pawlkawm tinkim deuhthaw in meetingnak le khawmawknak ah an hmang theu. Hnatuan tu a hran kan neihlo tikah hall sangduh tu cun hnatuan tu san man le a cem mi diesel cu an liam ve theu.

  1. Can tampi in peknak parah CT a lungawi tuk.

Keimah sawn ka lungawi.

(Visited 146 times, 1 visits today)

Comments

comments

8 Comments

  1. Pu Thang Tin Sum says:

    Betty pa,
    Na suah kum na ngan sual hmang kha. 1943 ah cun na nu hman a nauhak lai.

    Pathian in malza lo sawm vivo hram seh. Nan tittha.

    Na pu

  2. Siar nuam na sa. Kan Laimi ah zohthim tlak pakhat cu na si. Chinmi remtthatnak ding cu nauhakpawl an thupit zia na rak hmufiang na sa. Zuam vivo aw. Pathian in lo thlawsuah hramseh.

  3. josiahmangliantlung says:

    Ka Pu,

    Si ngai. 1973 ding sawn a si. Ka cuksual pang a si ko ding.

    Lungawi,

    Betty pa.

  4. josiahmangliantlung says:

    Ka Pu,
    Si ngai. 1973 ti ding sawn a si. Ka cuksual rori a si ko ding.

    Lungawi,
    Betty pa
    Tahan.

  5. rualpa Mangliantlung ka lo uar na sa, na thuhla ka siar cu aizawl kan um tlang lai ka ngai thluhaw.

  6. Bettry pa (U Mang),

    Na ti tha tuk. Pa Pathian in lam lo hruai in thlawsuahnak lo pe vivo hram seh.
    Nan lam tluan tluang hram uh.
    Pathian ram karhzai ter in kan miphun cawisangtu ah Pathian in lo hmang vivo hram seh.

  7. Ka rual (Betty Pa)
    Na hnatuan mi a ropi tuk.
    Pathian in lam lo hruai vivo hram seh. 2013 thal tlawng pit, Tahan kan hung tlawn le ka fa le pawl na tlawng ah ka rak ret ding.
    Na rual,
    Mg Hlan
    Mdy

  8. Dear Betty Pa
    Ropi tukaw. Hlawhtling vivo hramaw tiah thlaza kanlo camsak.

    Salai Chin

Comments

%d bloggers like this: