Johnny Ih Lukhuh Khui Ah Si?

December 14

Tlawngkai Nihnih

Johnny Ih Lukhuh Khui Ah Si?

Siar:

Saam 42

Ka beiseinak cu na hnenah ka ret ringring ding. Nangmah cu ka lo thangtthat sinsin ding.    – Saam 71:14

Kumkhat Sung Baibal:

–   Joel 1-3

–   Thuphuan 5

Thuanthu pakhat ah innsang pakhat cu nuam aw dingin picnic an feh ih tili kap ah an leeng. Kum (5) mi an fapa te cu tili sungah a ttum, ti thuknak lam ah a feh ih a pil. Nauhak pa cu ti sungah pil phah, phuan phah in bomnak dil ih a raak rerolai ah upa pawl cu zohman tileuh thiam an um lo ruangah thinphang in suk le so tikap ah an tlan rero. Mi pakhat in cuih thilcangmi a hmuh tikah tili sungah zamrangzet in a dawp ih nauhak pate cu a ruun. Ttihphangzet cingin zianghman a khawng aw lomi nauhak pate cu tikap ih a hun suahpi tikah a theihmi awkam cu, a nu in thinhengzet in, “Johnny ih lukhuh khui ah si?” ti a si.

Kan nunnak ah Pathian ih mangbangza thil thupizet a tuahmi pawl parah thinlung bun loin thil fate le ttukttak parah phunzai le vuihram kan hmang ttheu. Kan duhzawng ih a ra cang lomi thil fate parah atu le atu kan thinlung kan ret sawn pang ttheu. Thil fate parah lungkim loin kan vuihram tikah, “Johnny ih lukhuh khui ah si?” tiah a suttu nu vek kan si.

Paul in, “Nan parih ziangvek a thlen khal le nan lungawi uh,” (1 Thes. 5:18) a ti. Kan parih a ra cangmi thil ziangtinkim ah lungawi kan thiam lo thei men, asinan ziang tinkim ah lungawithu kan sim thei. Kan dam lo tikah le kan hnattuannak ah remcaang thei loin kan sungral tikah lungawi a harzet men ding. Asinan atuih kan nunnak hrangah thil ttha in pekmi parah le hmailam kan thlarau nunnak in pekmi parah lungawi ding kan si.    – David Roper

Pathian ih thluasuah cu cem ni a neih lo vekin,

Ka thangtthatnak khal cem a nei lo ding;

Nitinte ih kan parih a tthatnak,

Catbaang lo ih a luangliammi pawl ruangah!   – Adams

Kan buainak pawl lawng ruat saal ringring hnakin,

A thluasuah pawl hrangah Pathian thangtthat sawn uhsi!

Comments

comments

Comments

%d bloggers like this: