Joel Schott Osteen le Keimah

Joel Schott Osteen le Keimah

 by- Uk Lian

Joel Schott Osteen thuthangṭha simnak zarhtin deuh thaw in ka rak ngai ngah ve. Youtube ih ngai cu a si ko nan a hnen ih to ve, vekin ka nuam aw ṭheu. A thusimmi pawl cun ka thlaraunun in cawm. Thuthangṭha a sim hlan ah capoh pakhat mak dangdai zetzet a sim ta ṭheu ih mipi an aipuang ngah tiin an Baibal kenmi cio a phar tir hnu ah thukamnak an tuahpi ta ṭheu.

Joel ka Uarnak Pawl:

A thuthangṭha sim dingmi timlamnak (well preparation) felfai ngaingai in a tuah ringring ti a lang. Baibah hleng loin, a cem tiang a sim thei ringring. A thusim dingmi thupi ah a lut thei ringring. A thulu le atahṭhim pekmi pawl a kaih aw cetci ringring.

A thusimnak ah mihriinghrolam hnakin ziangtin kan do neh thei ding, ziangtin kan nei ve thei ding, ziangtin kan co ve thei ding timilam a simfiang thei. A theorylam hnakin tuahcih ding mi thuhla tampi a rel tam sawn.

Ṭongkam capo le ngai nuamlo a hrial thiam ih mipi hmaiah emotional tuk loin a thuthangṭha kenmi a sim thei. A thusimmi pawl ngai tikah thlarau beidawng ṭamsawl pawl hrang  hrimhrim ah cirhti bangin ruahsannak a thlen thei.

A thusim lai pakhat in…

A Thuhla Ṭhenkhat Pawl:

Joel hi (March 5, 1963) ah Houston, Texas ah a rak piang. Victoria L. Iloff thawn April 4, 1987 ah an nei aw ih fa pahnih Jonathan le Alexandra an nei. A pai rak dinmi kawhhran Lakewood Church ah senior pastor a ṭuan. Joel hi a pai kuthnui ah kum 17 lenglo an khawhran TV tawlreltu a rak si. 1999, October 3 ih a pai a tansan hlan zarh ih a thusim cu a thusim hmaisabiknak tla a si. A pai kehneh thlun in Pathian hnaṭuan ah a caan a hmang.  Pathian cun a hnaṭuan a thlawsuah ih tu ahcun leitlun ram 100 lenglo ah an hnaṭuannak a thleng zo.

Joel hi canganthiam asiih a hmaisabik a cabu nganmi Your Best Life Now: 7 Steps to Living at Your Full Potential, timi a siih 2004 October ah lei theih dingah a tlangzarh thei.  A cabu pahnihnak Become a Better You: 7 Keys to Improving Your Life Every Day timi October 2007 ih a suahmi tla kha cu New York Times Best Sellers list ah telh ve a si hngehnge.

Barbara Walters cun December 2006 ahkhan leitlun minehtheibik 10 a thlansuahmi lakah John McCain thawn an rak tel dah. 2006 thotho ah “Most Influential Christian in America” ABC News pawlin an hrilnak ah a tel lala. Amahbelte zirhnaklam ahcun zirsang ciamco a si lo. Oral Roberts University ah a rak zir nan degree ngahlo in a suahsan ih hleiah amah hi seminary zirnak hrimhrim a rak kai dah lo ti a si.

December 23, 2007, Fox News Sunday an suahmi ah Joel cun a sermon can ah Bible bungcang olsamte ih a hmuh theilo thu an tarlang. Cun, a thuthangṭha sim tikah sualnak thuhla hi a telh dahlo tiah sawisel a hlawh lala fawn. Thuthangṭha simtu tampi lakah same-sex marriage hi Bible kalh asi tiih sim fukfo ngam a si. Cun, 2008 ih Fox News ih thusuhnak an tuah lai ah Mormons biaknak hi Christians ah a pom thei thu tla a sim.

(Visited 122 times, 1 visits today)

Comments

comments

One Comment

  1. Joel Lalcungmang says:

    Ka hminpi (Joel)a si.
    A thu simmi hin midang a neh (inspirational) taktak a si.
    A thu simmi hi mipi tampi in kan theisual pang ṭheu. Annih hi ruundamnak lam hnakin, Khristian pitling cia hrangih thu simtu deuh a si. Pathian ih a kawhnak hi thlarau hlo kaihsuah lam hnakin, Khristian pitling dingih cawmtu dingah a si ti sehla a fiangbik ding.Na thuhla na run tar ih nan thiam tuk!!!

Comments

%d bloggers like this: