Jesuh Ttongkam ih Huham

February 24
Tlawngkai Ninga

Jesuh Ttongkam ih Huham

Ralbawi pa in, “Bawipa cuticun si hlah seh; Nang ka inn tiang ih ratter dingah kei ka tlak lo. Damnak thu pe awla ka hnen-um pa cu a dam ko ding,” a ti.
– Matthai 8:8

Bible Siar Ding: Matthai 8:5-13

Ralbawipa cu Jesuh hnenah a ra, a hnen-um pa, a ruang hrek a zengh ih retheizet mipa ai-awh ih zaangfah dil dingin. Hih Rom ralkap pa hi Jesuh hawl dingah a thinlung takin a phurzet. Jesuh in, “A hawltu hmuahhmuah in an hmu ding,” a ti (Matt. 7:8). Jesuh ih zaangfahnak awkam hi ngai hnik: “Ka ra pei ih ka damter pei” (Matt. 8:7).

Ka thlennak hmun zate zikzik ah, an hrangih thla ka cam sak thei lomi an um. Hmun hrekkhat ahcun mi zahnih zathum lai in an inn ah va leeng ding an duh nain ka tlin thei lomi tla a um. Sikhalsehla ka lungawizetmi cu Jesuh cun ra ih damter ding a duh ringring. Mi damlo damter ding a duh. An harsatnak sung ihsin ruunsuah a duh. Tuni ah Bawipa in minaa tampi pavua hmangin Paul sanlai vekin tla a damter (Tirh 19:11-12).

Jesuh cu minaa umnak hmun ah feh ih damter ding a duh. Asinan ralbawi pa sawn in, “Bawipa cuticun si hlah seh; Nang ka inn tiang ih ratter dingah kei ka tlak lo. Damnak thu pe awla ka hnen-um pa cu a dam ko ding,” a ti (Matt. 8:8). Jesuh in cuih tangdornak ttongkam te cu a lungkimzet ih, ralbawipa hnenah, “Inn ah va tlung awla na zumnak vekin tuahsak na si ding,” tiah a ti. Ralbawipa ih hnen-um cu cuih caan cekci ah a rak dam (Matt. 8:13).

Jesuh cu ziangvek tikcu caan le khuitawk hmun khal ah a danglam dah lo, A thlengh aw dah lo ih Amah kel ringring a si. Mi thluasuah pe dingin caan ttha remcaang a hngak ringring a si. Anih cun thlarau hlo ruundam dingin ziangvek caan khal ah a tim a tuah cia (ready) ringring.

Jesuh Khrih cu i Runtu le ka Bawipa tiih kan cosaan ahcun hih Bible caang hi kan hrangah a dik ding, “Kan sungih a nungtu cu hih khawvel ih umtu hnakin a maksak sawn,” (1John 4:4). Amah cu hih khawvel thimthuneihnak zate ih huham hnakin a maksak sawn. Mi zo khal in amai’ cahnak thawn Satan cu an tawng ngam lo ding, asinan Jesuh a theitu, Jesuh ih umpimi, Jesuh ih huham thawn a khattu cun khawsia ih huham hnakin a cak sawn ruangah a tawng ngam ding:“In duhdawttu thawngin hih thil hmuahhmuah tlun ah kannih cu nehtu hnakin kan uak deuh a si” (Rom 8:37).

A nungmi Pathian Ttongkam in satan ih thiltitheinak a siatsuah thei thluh. Jesuh ih Ttongkam ah nehnak huham a um.

@ Smith Wigglesworth

(Visited 18 times, 1 visits today)

Comments

comments

Comments

%d bloggers like this: