“Jesuh” Maw “Jesu” Ti Ih Ngan Ding?

Kawlram Acozah in Lairam Acozah Tlawng pawl ah Laica zir in rak siang dah ih, culai ih an tuahmi “LAICA SIAR” ah A ihsin Z tiang Mirang Cafang (alphabet) a tel thluh ih hlei ah “t.” a tel. Laica ahcun a ttul lo ti’n in rak hlon sak lo. Zir ding le thiam ding in duhsak tinak si ding.

“Jesuh” tiih Lai Bible tampi ih an hmanmi hi ka ruah daan ah Hebru le Greek ttong hram hnakin Mirang (English) ih “Jesus” hi an sirhsan cio ding ka zum. English version 10 lengkai ka hmuh dah sun pawl ah “Jesus” ti hlirin ka hmu [KJV khal in JesusTEV khal in Jesus].

Ziangruangah Mirang ttongin teh “Jesu” ti loin “Jesus” ti’n “_s” an telh si pei ti ruah ding a um. Cun Kawl ttongin Adoniram Judson in Hebru le Greek rori sirhsan in Bible a let (translate) ih “Jesuh” timi awsuak ttongfang a let/hmang (Kawl ttong awsuah ka theih daan ah). 

Tufang Laimi pawl ih kan LAICA kan tuah tthat duh daan cio ah, “Kan ttong ah” timi hi ka thei tamzet. Himi hi ruah tthat ttulzet in ka thei. Ziangahtile “kan ttong” kan ti tikah Falam peng sung hman ah khua le tlang ih zirin kan hmanmi awthluk (accent) bang awk lo phun tampi a um thei. Mi pakhat hmin, Laimi a si ve lomi miphun dang Kawl, Kala, Mirang, le Hebru hmin pawl tla kanmai’ ttong le awsuah fekfek ih kawh kan tum a si ahcun a si thei ngai pei maw? tiah a si.

Veikhat ah Insein ih Bible Tlawng pakhat ah ka leeng. Bible Tlawng saya Innsang pakhat ah kan to khawm ih thuhla phunkim kan titi. Calai thu lampang kan thleng. Calai Seminar tuah zikte a si ngelcel hmang. Lairam ihsin Rangoon rung tlawng duak pacang ttha, Calai helhkam emem a um si hmangih Seminar tel man ta loin a tlun a ttul. Thungai hramfaak in thu in cah ta sokhaw an ti. “Tuih ttum calai thu nan relnak ah “Jesuh” ti nawn loin “Zisu” ti rori thlang uh. Kan ttong ah “Jesuh” tivek cang thei lo, ti’n. Mi pakhat in, “Nang teh ziangti’n na ruat?” ti’n i sut. “Singai a, a rang thei tawkin hun sim fiang uh, Jesuh hi Laimi, an khua mi ah a ruat pang si pei. Jesuh hi Judah ram ih rung suak a si ruangah Judah hmin sakmi sokhaw a si,” ka ti hnge2.

Bible sungah, “J” um lo ngaingai in a cang thei ding ka zum lo. “Jerusalem” kha “Zerusalem” tiih thlengh hi thil remcaang in ka hmu lemlo. Cuvekin Job tla kha Zob va ti sak cu a dangpi si ding. Curuangah “J” awsuah hi zir le cawn, thlun thei kan tum le kan zuam a ttul sawn ding.

Veikhat ah Falam khua laili ah mi pakhat a zuk (photo) aw. A dunglam inn tumpi background ah a laak. A zuk cu a va tlen ih a lu dengah “SU KAN ZIANGKIM” ti’n a lang tariai. A duh lo nasa. Curuangah cuih inn parih cangan tla “ZISU” ti’n ngan nawn loin “JESUH” ti’n an thlengh an ti.

Laimi zumtu ulenau pawl, kum zabu 21 san ah kan um. Kan fanau pawl tla phunhrek (KG) ihsin English an zir zo. Tuni ah Leitlun ramtin ah kan thleng zo. Leitlun pumpi (International) zikzik ih an zir le an hmanmi cu Mirang (English) a si ko. Bible sungih hmin pawl hi originalHebru ttong le Greek le kan zir in kan thiam thluh thei lo ding ruangah, Bible version phun2 ih a laimuril (essence) kan pom daan a bangrep thei thluh lo hmanah, Minung Hmin pawl, ahleice in “Jesuh” timi te tal ahcun thu hmunkhat nei thei sehla duh a va um so! Pathian thu (theology) feh daan khal ah a palh ciamco lem ding ka zum lo ih himi ruangah kan thlarau nun tthanlen pitlinnak khal ah in cakter cuang ding le in derdaiter cuang ding ka ring lo.

Note: “Jesuh” maw “Jesu” ti ih ngan ding? timi ruahnak ngantu hi Rev. Run Cung Mang, Malaysia LCF ih Pastor tuan rero lai a si.

(Visited 65 times, 1 visits today)

Comments

comments

10 Comments

  1. Timothy Sui Lian Mang cun hitin a ngan ve:

    Laica ngandan dik tak ah cun Zisu or Zisuh ti hi a dik ding. Asinan Bible leh tikah minung hmin tivek, khaw hmin tivek, ram le mphun hmin tivek, tiva le tlang hmin tivek ah hi cun borrow word ( mirang maw, Greek maw, Hebrew maw) hi hman ve mai a si nak can a um. Thimnak ah “Timothy” ti hi kan Bible ah kan hmandan a si. Mihrek cun “Timothe” tin tla an hmang men ding.

    Laica ngandan tak ah cun “Timawte” or “Timawthe” in tla a aw a suak men ding nan. Hmin thuhla ah cun a ngantu le a hmin neitu duhdan ih ngan tla a tulnak lai a um ding a bang.

    “Jesuh” tile “Jesu” ti thu ah cun a dik dawn ti a um cuang lo ding. Committe in himi deuh hi hmang uhsi ti mimi hman a si ko ding. Kann ih in “Jesu” ti kan hmannak cu “Jesuh” tiih ngan asile a tawizawng ih “Jesu’n, Jesu’i” tivek ah “Jesuh” tiih ngan ah cun a buaithlak deuh ti thu men ih kan hmannak a si. Himi thu ah cun mai thuthu te sawh ih ngan deuh cio a si a zumum.

  2. ….Jesu, Zisu….///….Jesuh or Zisuh “H” cun kan awsuak thawn a hla aw deuh lo maw???? Jesuh, Zisuh ticu Hlasak ah tla cun Sal buaithlak nasa…kan awsuak vek cun Jesu asilole Zisu.

  3. stephenbawino says:

    kei ka ruahnak ah cun mirang tong ihsin leh mi si hman sehla kawhmi hmin hmuahhmuah let lo in mirang hmin thlun ve sehla duh a um ka ti.cu laimi pawlin Bible an let ih leh lo mi le leh mi a um.kan ruah that tul ngaingai ka ti.leh mi a um ruangah buainak a thok .mithenkhat in let ding an ti ding ih mithenkhat lala cun let lo ding an ti ve ding.leh zo mi cu Jesuh tin um ko theh.”Zisu” tin kan ti le cu capohnak ah na hmang lan ta ding tin ka hmu.lung awi

  4. stephenbawino says:

    kei ka ruahnak ah cun mirang tong ihsin leh mi si hman sehla kawhmi hmin hmuahhmuah let lo in mirang hmin thlun ve sehla duh a um ka ti.cu laimi pawlin Bible an let ih leh lo mi le leh mi a um.kan ruah that tul ngaingai.leh mi a um ruangah buainak a thok .mithenkhat in let ding an ti ding ih mithenkhat lala cun let lo ding an ti ve ding.leh zo mi cu Jesuh tin um ko seh.”Zisu” tin kan ti le cu(zi-wife,su-vulva) capohnak ah an hmang lan ta ding tin ka hmu.lung awi

  5. vanneizing says:

    ka ruah dan le hmuh dan te tar lang ve sehla…Jesuh le Jesu cu aw tluk tawi sau ti vek ih zir in kan hmang deu vek ko a bang. Jesu le Zisu ah cun Jesu tlun a duh um deu in ka hmu…an rel zo vek in tong let mi a si ih a mah vek te ih an hmin ngan hi a mawi deu in a duh um deu ding a bang …….
    .thimnak ah…UN ih ka hmin hi Thian Mawi a siih kan lai ca cun Thian tin kan ngan, asinan mirang tong in Thain tin A le I um hmun in thlen sak ih ka lung hmui lo nasa.sim duh mi cu hmin hi cu a mah vek ten tlun in ngan thei sehla duh um deu ding zum a um.
    Cun lai mi hin kan lai nun phung hi kan uar dan a luar deu hi a poi zet nak tam pi aum phah theu. Fim thiam san kan ti ih ram cangkang le thangso um tu dan tla kan hmu tam thlangih thleng ding leh con tlak um cun thleng leh cawng thei tum hi a tul phahphah hmang.

  6. Japan Thaihliak says:

    Nan hmuh daan rel caan, ruahnak phorhsuah caan kan nei laifang a si. Zirsang, thiamthei deuh pawl le Lairam acozahpi in high school level tiang zir dingin a rei hlan ah tawlrel a c ding. Cutik caan ah mepa tangih tangnak in san a tlai lem nawn lo thei. Cumicu tlawngta hmuah in an zir ding, ih cuvek an zirmi na duhlo a c ahcun na duhduh dan in na au suahpi thei thotho. Nan, mi ziangtluk in an lo thlun ding ti cu….hngak…..cuan……..zoh…..

    Chin state ih Chief Minister ka c sehla cu…….hivek ih Laica thansoh duhtu pawl laksawng tampi ka lo pe dingih,,,,,hlawh tampi pe in hnatuan fial cih ka lo duh hai z nan c maw……..

    Jp Th

  7. kei ka hmuhdan ahcun Jesuh timi a si lo khalle Zisuh timi tal hi hmang sehla a ttha pei maw tiah ka ruat.

    Jesuh timi kha Jesui’ ti’n (neitu sinak langternak ah) kan hman can khalah a original ttongfang ih ‘h’ a telcianak hin buainak a thlen tuk lem cuang lo.

    Mirang tla in ‘would not’ timi kha ‘won’t’ tivek in apostrophe retdan an nei thotho. kan thuhhlohmi ttongfang zawn kherkher ah apostrophe ret ding timi a um hran cuang lemlo.

    Jesuh timi tla cu Pathian hmin a si lailai ih, Grammar fehdan hnakin a zah-umnak kha kan thupiter a ttul sawn in ka hmu.
    Z le J hman thu ahcun rel duhmi ka nei hran lo nan…….’h’ telh le telh lo thu ahcun malte ka run rel ve a si hi………ka lungawi

    Kianghrol

  8. stephenbawino says:

    Ruahnak hi a tam vivo thlang tikah mang bangza le attlakza a si.A tlunih ka ngan zo vekin thleng tum rero lo in zuam sawn uh.tulai fimnak a karh vivo khal le tan rualnak a si lo in thei.cutin cutin sehla ti a tam ih pakhat le pakhat zuam awk ah a cang riangri.tahthimnak ah Dr Hre Koi le Sui Lian Mang le pawl in an Bible leh dan an el aw.fimnak sang veve an si ko nan( kei mah ka thiam deuh tiah an ti men maw ka ti)an hmu aw thiam lo tluk vek fang a si.kan ken mi Bible version hi thei thiam sehle a tha.Bible sung ih hmin nei hmuahhmuah hi let lo le leh zo mi cu um ko seh tiah zangfah ka dil.keimah hrimhrim in falam Bible cu kum riatlai ka kut ken in a um zo ih (TEV) tin ka thei ngal (Tedim,Hakha,Falam,Mizo le Bawm ) cupawlin an let ih an leh dan an bang cio lo tin ka thei.tu ah cun Version hmuahhmuah ka keng theh ih an bang aw thluh cuang nan ka thei thiam.khual tlawnnak ih ka hman mi cu NKJV a si ko.curuangah awsuak mi kan tlun cu a dik a bang nan laimi pawl hrangah a mawi lo mi a um phahphah.cuvek thotho in Greek tong khal ah lai mi pawl hrangah tong mawi lo a um phahphah ve.na thu rel mi ziang ha ka ti men.a thu lungding hman lung nan tum lo ih ziangti ngan ding ti nan buai.satan in pathian zum ih a khur.hmanseh kannih cun kan khur lo.

  9. Jesuh tiah tuni tiang kan ti lo. Kan aw khal a suak thei lo. Z aw in kan suah lai. Laimi in system kan thlun thei lo ti thei thlang uh.

    Janpan Thaihliak, minister cuh ve awla. Mi khaisan na thiam ding. Vote na ngah tam ding. Na pa ngai2 le.

    Kianghrol, na simfiang dan a mawi tuk nan ka lo pompi thei deuh lo a si. I ngai thiam. Kei cu Xisu tin ka ti ko ding. Asilole Sumte ka ti sawn ding.

  10. Kan tawng tak hi cu aw kan buai zik tan fang a bang a tha law law, Jesu or zesu cu kan hman tlangthei ding ka zum,Jesuh cu a sal dan ahar deu, Jesu ti in thukpi a rel ko lo maw?

    LALENG ZAU

Comments

%d bloggers like this: