Jesuh Huham in A Thlengh

February 22
Tlawngkai Nithum

Jesuh Huham in a Thlengh

Khawsia ih polhmi pawl kha Jesuh hnenah an ratpi. A ttong kamkhat in khuavang pawl cu a dawi ih minaa pawl cu a damter ttheh. Hiti ih a tuahnak cu profet Isaiah in, “Amah rori in kan natnak cu a laak ih kan damlonak pawl cu a phurhlo a si,” tiah a rak simmi kimternak dingah a si.
– Matthai 8:16-17

Bible Siar Ding: 2 Korin 3

Nikhat cu Jesuh ih hmin thu thuthangtha ka simlai ah mi pakhat cu electric tthuam hngauhsan in a ding mipa a um ih ka thusimmi a ngai ve. A ke parah ding thei dingah hngauhsan ding a ttul. A hnenah thu ka sut, “Na dam lo maw?” ti’n. A kut i hun hmuh ih a coat aangki sungih a kenmi ngun kutkaih thawn tuahmi thunkawng naamte a keng. A simmi cu a hnen ihsin tlaansuaktu rin-um lo a nupi that dingin a feh rero laifang a si. Jesuh hmin ih huham thu sermon ka ngai ngah tikah cumi lamzin ah ka feh peh thei nawn lo. Zohman bawmtu nei lo bom ttulzet vekin ka thei aw, a ti. Cutikah kei in, “Na khukbil aw,” ka ti ih kutsuang in thla ka camsak. Cutawk hmun ahcun mipi cu dung le hmai in an heel ciamco, cupa cun rundamnak a co tariai.

Kan inn ah ka hruai ih hnipuan sinfen thar ka hrukter. Cumi pa ih nunnak sungah Pathian ih hman theih dingmi thil ka hmu. A thaizing ah in simmi cu, “Pathian in ka hnenah Jesuh a phuanglang, i hmuhter. Jesuh parah ziang hmuahhmuah tthum in a um zo ti ka hmu,” ti’n a si. Paisa mallai ka coih ih a reihlan ah mangbangza inn mawite a nei thei saal. Rin-um lo a nupi cu mipa dang thawn an um nain a ngaidam. A va leem ih a hnenah a hruaikir saal. A hlanih huat awknak le raal awknak dinhmun cu duhdawtnak ih huham in a thlenghsak thluh zo. Pathian in cumi pa cu a thlennak hmunkip ah thuthangtha simtu ah a hmang. Hmuntin ah Jesuh hmin in huham cahnak a nei. Pathian cun a besiazet zomi khal a rundam thei a si. “Atu le kumkhua in Amah ih sungin Pathian a pantu pawl cu a rundam thei a si; ziangahtile kumkhua ih a nun ruangah Pathian hnenah a dilsak ringring” (Hebru 7:25).

A dang mangbangza tidamnak pakhat cu Stockholm ih thuthangtha ka simlai ah a cang. Minaa tuamhlawm thei lo pawl ret khawmnak inn pakhat a um ih cutawk sungih taa minaa pakhat cu pumkhawmnak hmun ah an ratpi. Amah cu thahri nat nei a si ih a taksa a thir a hnin aw ringring. Mi thawngthum hmai ah mi pahnih ih bomnak in an hun hruai. Jesuh hmin in hriak ka culh tikah Pathian ih huham cu a parah a rung thleng. Ka kut in ka vun tonghtham le vete’n a kianghrol a hlon ih Jesuh hmin in kekal ih feh a thok cih. Cuti’n inn tumpi sung heel in mipi mit-hmuh rori ah a feh rero.

Kan Pathian in ti thei lo a nei lo. Na zum ngam ahcun ziangkim a tuah thei.

@ Smith Wigglesworth

(Visited 26 times, 1 visits today)

Comments

comments

Comments

%d bloggers like this: