Jesuh hnenah Ra aw

February 23
Tlawngkai Nili

Jesuh hnenah Ra aw

Jesuh cun a hei dawh ih a tham hnu ah, “Ka lo damter ding, atu ihsin thiang thlang aw,” tiah a ti. Hmakhatte ah cupa cu a dam.
– Matthai 8:3

Bible Siar Ding: Mark 1:28-45

Tuni ah mi tampi cu ttulsamnak tampi, natfahnak le buainak tampi nei in an um, asinan mi zapi zikzik ih dinhmun cu Matthai 8 sungih kan hmuh mipai’ tuarnak ih hrek fang hman a si ding ka zum lo. Hi pa cu miphaar a si. Nang hi TB maw, khensaa maw, asilole pakhatkhat tuar mi na si thei, asinan Pathian in A famkimmi thianhlimnak, damternak a lo hmuh thei, Khrih sungih a nungmi zumnak na neih ahcun. Amah cu khuaruahhar le mangbangza Jesuh a si.

Hih miphaar pa hi pakhatkhat in Jesuh ih thu an rak sim dah a si hmang. Thil tampi cu kan tthelh, ziangahtile mipawl in kan san ahhin Jesuh ih ziang a tuah ding ti kan sim ringring lo ruangah. Mi pakhatkhat in a hnenah, “Jesuh in a lo damter thei” ti’n an sim si ding. Curuangah hih phaarnat neitu pa in Jesuh tlang par ihsin a rung ttum ding cu ruahsannak thawn khat in a rak hngakhlap nasa. Miphaar pawl cu mipi lakih um an sen lo, an thiang lo ruangah. Hi mipa in Jesuh hnen thlen ding cu thil harsazet a si, ziangahtile Jesuh kiangkap cu miburpi in an kulh thluh ruangah. Sikhalsehla Jesuh cu tlang par ihsin a rung ttum tikah miphaar pa hnenah a tong, a kiang ah a ra.

Himi pa cu zohman bawmtu nei lo a si, milai ttong in cun, asinan Jesuh hrangah ziang hman thil harsa a um lo. Cu pa cu Jesuh hmai ah a khukbil in a kun ih, “Bawipa, Na duh ahcun i damter thei a si,” tiah a ti (Matt. 8:2). Jesuh in a duh pei maw? Jesuh cu kanmah in a tuah dingah caan ttha kan pek zat hnakin a ttuan duh sawn tin a hmu ding. A poimi cu kanmah in A hnenih kan pan lomi hi a si; A hnenah zaangfah kan dil lo, Anih cun kan dilzat hnakih tamsawn ih pek ding a nei ringring na’n.

A hnen na pan ahcun ziangtik hmanah kut lawng le thinhar in na kir dah lo ding. Vanlam nunnak cu na sungah a luang dingih hmakhat te’n ruunsuah in na um ding. Jesuh cu “Ka lo damter ding, atu ihsin thiang thlang aw,” a ti dah vekin tuni khal ah in damter duh a si, mani, tuni, thaisun a danglam dah lo. Na hrangah a luangliammi nunnak a nei. Bawmtu nei lo na sinak ihsin na duhmi a lo famkimter ding. Na zum ahcun ziangvek khal a cang thei a si (Mark 9:23). Pathian in khuakhannak diktak a nei. Thil olte a si: Jesuh hnenah ra pan aw. Khuahlanlai ah Amah an ra pan ih an ton ngah vekin atu khal ah ton theih ringring a si (Hebru 13:8).

Jesuh in thil ttha tuah ding a tlolh ti ziangtik hmanah na thei dah lo ding.

@ Smith Wigglesworth

(Visited 21 times, 1 visits today)

Comments

comments

Comments

%d bloggers like this: