Jesuh hnen Fehnak Lamzin

May 25
Tlawngkai Ninga

Jesuh hnen Fehnak Lamzin

Thilrit a phur mi le zonzaih a tuartu pawl, Ka hnenah ra uh, colhdamnak ka lo pe ding.
– Matthai 11:28

Bible Siar Ding: Matt. 7:13-27; 11:25-30

Pathian Thu sungah luangliam sinsinnak ding le theikau sinsinnak ding a um ringring. Pathian ih thinlung kan laaknak ah nauhakte vek kan si ringring ahcun ziangvek mangbangza so a thleng thei dah ding? Bible na siarmi pawl hi atak in na nunram ah na hmang maw? Na hmang thei asile a nasa ding. Na siar ngah le na theih zat te na nunpi thei khal le a ttha. A zate in laak thluh thei zuam aw. Pathian Thu siar lo kan thinlung le kan nun tihaalnak riamter theitu zianghman an um lo.

Pathian fahniang cun ziangtik caan khal ah atak in a nun ringring a ttul. Pathian fahniang pakhat Pathian umpinak ih thlumnak le rimhmuinak sungah a luh ahcun Pathian ih thuhmi hlawnthil mankhung a co ngah ve ding. Thluasuahnak thutak ih cawm a si dingih a nun cu sunlawinak in a khat ding. Na nun a rocaar pang maw? Pathian sung ahcun hmun rocaar a um lo, thil ttha hlir in a khat. A khuakhannak sungih na pum na pek a si ahcun thluasuah na dong deuhdeuh ding. A nun famkim ceentu kan si ahcun mitthli tlak le ninghan riahsiat a um nawn lo ding. Pathian umpinak sung ahcun duhdawtnak le zaangfahnak in a khat ih nunnak tlamtling neihnak a si. Amah a zumhnget ih a rinsantu pawl cu ziangtik hmanah an tlasam dah lo ding. Pathian in atak in in tonghtham ih kan rinsan thei ringringnak dingah thla ka cam.

Marka bung 2 sungah zohtthim tlak mizeng pa ih zumnak thuanthu kan hmu. Inn hmai ah mipi an tamtuk tikah a phurtu mi pali in “Ziang kan tuah ding?” an ti. Duh taktak ahcun lamzin a um ringring. Zumnak cakzet pawl an hlawhsam ti ka thei dah hrih lo. Thlarau Thianghlim in in thamdai in Pathian huham cahnak thawn in thuam hram seh! Cuti’n a nungmi zumnak kan nei dingih, “Bawipa ka lo zum, ka lo rin” kan ti thei ding.

Umnak a um nawn lo, sangka hmanah a lawng lo (Marka 2:2), sikhalsehla annih cun, “Inn luanglu parah kan kai pei” an ti thei lai. Zumlotu pawl cun, “Ai, cumi cu aat thlak” an ti men ding. Sikhalsehla ringtu cun, “Ziangzat a man khal le kan rualpa damnak ding ahcun,” an ti thei. Inn parah an kai ih Jesuh hnenah ngah ko an feh tlang.

Bawipa, tuni ahhin in cosaang hram awla Jesuh ttaang sungah in thlengter hram aw. Cuih hmun cu ka hrangah duhnungza a si. Pathian hnenah lungawithu ka sim, ka nun hlun, lungput hlun a mawrmi pawl a cemralter ih Pathian in thinlung thar i pek.

Pathian in a famkim lomi kha A duhdawtnak huham in a famkimter thei.

@ Smith Wigglesworth

(Visited 29 times, 1 visits today)

Comments

comments

Comments

%d bloggers like this: