Jerusalem: Zo Ih Ram Le Khua A Si?

Jerusalem: Zo Ih Ram Le Khua A Si?

Steven R Sunthang

Jerusalem timi cu Hebrew ṭongfang kha Mirang awsuah ih kawhmi a si. Jerusalem tiih kawh a si hlanah “Yebus” (Joshua 11:3; 12:10) tiih kawh a rak si ih Joshua le a ralkap pawl ih raldonak ih lakngahmi a si.

Siangpahrang David ih tundin hlanah Yebus cu khawpi a rak si hrih lo (Thuthentu 19:10-11). David in a uk hnu (2 Samuel 5:6-10) ah khawpi ah a run tuah ih Yerushalayim tiah an run ko. Hebrew ṭong asiih – Yerushalayim (Yeru) & (Shalayim) timi ṭongfang pahnih kommi a si. Yeru timi cu Yahweh Yireh (Jehovah Jireh) ih hmanmi Yireh asiih, “Shalayim” timi cu Laimi pawl ih kan theih olbik ding cu “Salem” (Gen 14) a si. Asullam cu Yeru (hmu ding or tumcop aw ding) le Salem (Remdaihnak) a si. A sauzawng cun: Pathian ih tumcop dingmi remdaihnak” tiin sullam a nei. “Yerushalayim” timi hi Abraham ih hmuhtonmi (Genesis 14 & 22) densan ih phuahmi a si.

Palestine miphun pawl hi zo an si?

Tui san ih “Palestine”le sungih Filistin (Philistine) miphun an si lo (AN SI LO). Bible sungih Filistin pawl cu Noah hrin (Gen 10:14), Abraham rak umdahak (Gen21:34),Samson dotu miphun (Thuthentu 16), Goliath (1 Samuel 17) etc kha an siih, Ashkelon, Gaza, Gath, Ekron le Ashdod ram pawl (Joshua 13 rak dintu an si. Himi miphun pawl hi an cakzet ih Egypt ihsin Israel fate pawl Canaan ram pan in Pathian in a rak hruai lai hmanah, an thinlung thleng in Egypt ram kir ah duh pang ding tiin Filistin ram sung pal ṭul lo dingin Pathian in lamzin hla zawngin a rak hruai (Exo. 13:17). Greece Emperor Alexander the Great in hi miphun pawl hi a rak nambet nasa ih cutin, Greek miphun thawn cawkrawimi “Aegean” miphun tiah run kawh an si. Palestine or Filistin miphun thawn pehparaw in AD600 hrawngih run nganmi Muslim Qur’an ah zianghman nganmi a um lo.

Greece Empire kha Roman Empire in a run neh ih, AD 70 ah Jerusalem Temple a run siatsuah. Bawi Jesuh in len Israel pawl ih zum vekin Rome zocah kut sungin a miphun pawl a runsuak fawn lo tikah, Shimon Bar Kokhaba cu Messiah a si ding tiin a dung an thlun ciamco lala ih Rome cozah an run do. AD 132 kum ah Rome cozah in ren lo ngaingai in Israel pawl cu a nuai ciamco ih sal ah tampi a run kai. Cutin, Israel pawl rak umnak ram cu Israel hmin hloter duhnak thawn Greece pawl ih rak nehsawh dahmi “Palaestina” tiah an run ko.

Ottoman Empire 1517-1917 (Turkey) an run dinh tikah, Syria ram thlanglam ram pawl hmuhhmuh cu “Palestine” ti’n an run ko. Leitlun ralpi (voi 1) a cem tikah Ottoman Empire ukmi ram tampi cu Englam ram in a run co ih Syria ram thlanglam hmuahhmuah le Jordan kiangkap zaten “Palestine” tiah an run ko bet vivo. Israel miphun tampi mai’ ram ah um lo in leitlun hmun zakip ah an rak um darh tikah kiangkap ih Arab pawl in pursum leilawnnak hrangah Israel ram an run luah vivo. Israel pawl in 1948 kum ah an ram an run dinsal tikah leitlun thuthang pawl ih Palestinian or Palestinian Jew tiih an rak kawhmi kha midang si lo in Israel pawl hi an rak si.

Culai ahcun tuih Palestinian an timi pawl cu Arab or Muslim Palestinian tiih rak kawh lai an si. Israel ram kha Solomon ih fapa kutsungah Israel le Judah tiin ram hnih ah an run ṭhen-aw ih an komawksal hnu hmanah Judea tiih run kawhmi hmunram tla a um lai. Curuangah thuanthu ah hmin pakhat lawngin rak kawh an si lo. Israel pawl in ram an run dinh hnu cun Palestinian tiih kawh cu an duh nawn lo ih an thuanthu anmahten sim an thok ve thlang. Cuveten, Arab pawl riangri in Palestinian hmin run hmangin Israel ram a do thok. Cutin 1964 kum ah Arab League ih hohanak in “Palestinian Liberation Organisation (PLO)” an run din ih Israel ram um nawn lo rori dingin dothlenh-nak nasa tak in an run thok. 1948 kum ih Israel ram an run din laiah Israel pawl in an ram zaten an la ngah thluh lo. Golan Heights tlangpawng cu Syria kuthnuai ah a um lai. Jerusalem khawpi hrekkhat (tu ih East Jerusalem an run timi), West Bank le Rock of Dome pawl cu Jordon kuthnuai ah le Gaza tivakap pawl cu Egypt kuthnuai ah an rak um lai. Cumi Muslim ram pawl kuthnuai ih um hrihmi Israel ram pawl cu PLO ih “kan ram” tiin Arab ram ih canter an tum. 1967, 1973 raldoawknak ah cumi ram pawl kuthnuai ih Israel leilung pawl cu Israel in a laksal thluh thei.

Laimi mifim-cathiam lakah “Jerusalem cu Palestinian pawl ih ta tla si ve.” titu le “.. a si dah lamlam lo.” titu an um. A hrek veve in nan dik. Bible tlawng Library ih cabu ṭhaṭha le lenglam cabu ṭhaṭha (Academic level) cabu pawl ih “Palestine ram” or “Palestinian” tiih ṭongfang hmanmi pawl kha a parih ka nganmi vekin tu ih Palestine or Palestinian an si kherkher lo tiin kan theih a ṭul. A fiang puppimi cu tu ih Palestinian pawl hi thuanthu sungih Palestinian or Filistin miphun an si lo. Cuvek thotho in Jerusalem khawpi hi tu ih Palestinian kan timi pawl ih dinmi khal a rak si lo ih, an ta khal a rak si dah lo. An ta theinak ding khal a um lo. Muslim pawl ih uknak ram kau dingin an ti ve maimai mi a si.

“Palestinian zate in Muslim an si thluh lo pi.” titu tla nan um men ding. A dik! Palestinian tiawtu hi leitlun ah 4 million hrawng an um ih 1% (thawng 40-50) hrawng cun Christian an ti aw. Asinan, PLO sungtel ah FATAH, HAMAS, Palestinian Islamic Jihad ti pawl Muslim fefe hlir an tel nan Christian ai-awhtu group an tel ti a um dah lo. Israel kan timi ah Orthodox Jew pawl ih cangvaihnak a hrante ih kan thei ṭulmi a um. Biaknak thawn pehparmi cu “Replacement Theology” timi (Bible thawn a kalhawmi theology) a remcan tik len ka ngan leh ding. Lungawi ee.

Cauk ronmi:
Kimmerling, B. 1993. “Palestinian: The Making of a People.” Massachusetts/London: Harvard University Press.

Institute of Scripture Research. 2009. The Scriptures. Northriding: Messianic.

Scharfstein, S. 1997. “Chronicle of Jewish History: From the Patriarchs to the 21st Century.” Hong Kong: KTAV Publishing.

(Visited 338 times, 12 visits today)

Comments

comments

Comments

%d bloggers like this: