Japan Ral Lai-ih Ka Hmuhtonmi

Japan Ral Lai-ih Ka Hmuhtonmi

Pu Tai Pum

1943 kum ah Japan pawl cu Falam an lut. Japan an lut hlanah lo ka rak thlo. Japan a hung kai hnu 1943 kum, April ni 7 ih thokin Japan ralkap ka tuan. Tlauhmun khua ihsin zan ah in fehpi ih Lumbang dawhhna, Japan pawl umnak kan thleng. Cutawk ah thla thum khengte kan um ih suntin ral hawl in kan vak kan tawi theu. Culaiah Japan in Tedim a la hrih lo.

Cuti ih Lumbang dawhhna ah thlathum sung kan um hnu kan bawi pawlin khuan in pek ih ka tlung. Culaiah Cerhmun, Khuangli, Tashon khua pawlah Mirang pawlin bomb an rak thlak. Cuihnu rei lote ah Tlauhmun ah kan feh ih ni nga kan um. Kan um sungah Mirang pawlin Japan pawl an rung kap nan pakhat hman an thi lo. Cuihnu ah Falam ihsin Zathlir ah kan feh ih thla hnih kan um. Cucu June le July thla a si. Zathlir ih kan tlun hnuah Japan bawi, Nihzumah le Kisuku Oki pawlin Mirang kap dingah in fehter ih Lungtar le Zamual karlak lamzin ihsin Mirang pawlin in rak hawl ih, kan kapaw ciamco. Cui tum ah Ramthlo ih Khuh En, Tlauhmun ih U Al Duh le No Kam tla an thi.

Cuti ih rualpi pawlin in thihsan hnu cun lamzin zawh ngam nawn loin tuupi sungah zan khat kan riak. Cuisin Tlangkhan an kan thleng ih Falam ah kan tlung cih. Cuihnu October thla ah Mirang pawlin in kai ih ni tinten Lungler le Vanlaiphai hlehka in kuli in phurhter. Kan kor le bawngbi in lon thluh ih Buridip kor in hruhter, kan taksa hmuah a na thluh.

Mirang in Falam a lak hnuah thla thum sung Kawlram ah kan um. Culaiah fangcang ei in dawn ih, kan rilrawng in kan tap zok rero. Japan in Mirang a kah hlanah lumet (Sammet) khal kan rak thiam lo. Kan samton na in kan rak khawsa theu. Asinan Japan pawl Laitlang ih kum khat an hung thlen thok in lumet in fial ih, kan lu kan met. Cucu Japan in fimnak in pe ti’n ka ruat. Ka hmuhmi le ka tonmi cu hivial in si hrih seh.

Hminsin: Zahau Nunphung Pawlkom Kum (56) Kim Mekazin (2004) ta lakmi a si.

Comments

comments

Comments

%d bloggers like this: