Japan Finance Minister Zu A Ri

By-Pa Sum

Feb 19,, 2009 Leitlun ramlian leh ram ropi  G 7 ram aiawh hruaitu pawl tawmkhawm awknak Italy ram  Rome ih an tuahmi ah Japan Finance Minister, Shoichi Nakagawa cu  zu a rit ruangah a hna ihsin banter asi ding. Japan ram Parliament in an ram Budget a pawm veten a banding thu khal a puangzo.

Hi G 7 tawnkhawm nakih zu a rit ruangah Shoichi Nakagawa hin ngaidam khal a dilih.zu a in tamlo thu leh a taksa a nawnlo ruangih zu malte a inthu khal asim.

Finance Minister rori bangding khawpih  zu a incu  Japan Prime Minister Taro Aso, ih hrangah cun  mualpho thlak leh ningzakza ngaingai asi. 

  Tuikum hi Japan ram Parliament hril awknak dingkum asi betih. an hrangah tlaksiat nakih an hmanphah a phan umzet, Tu khal ah mipi ngaihdan ah an dinhmun hi a sanglo zetih.

 TV ihsi a langdan khal ah Minister hi  a mitmeng leh a tongkam khal a fianglo ti a fiangzetih, It thatzik suarsi in a um tiah an sim, Vawikhat tlacu  Bank of Japan Governor thusuh nak an tuahlaiah a maisan dinghmang tiah a ruatih.

Democratic Party Secretary General Yukio Hatayama, cun an ram Finance Minister umdan cu  mualpho thlak leh ningzak za ngaingai asi tiah a sim. 

Australia Meisa Kang Dinhmun 

Australia ramih meisa kang ruangih mithi cu 200 an kimih. mithi an um bet vivo an zumthu police pawlcun an sim. Meisa kang phalmit tupawl cun  Victoria State ih nisuah naklam ih  Kinlake bialah minung kang ruang 11 an sarbetih. Hi meisa kang ruangah minung umnak In 1,800 a kangsiat ih Minung 7,500 in umnak In neilo in an um. Police pawlin an simnak ah meisa kang hmuntam zetih a suakmi ah hmunhnih cu misual pawlih nawhkang mi a si tiah an sim ih Himi thu ah  Brenden Sokaluk kum 39 micu an kaiih  thubuai ritzet phurhter asiih Court in thimlo a coter asi ah cun kum 25 tiang thawng thlak theih asi. 

Victoria State  Police Deputy Commissioner Kieran Walshe, cun  himi meisa kangih thipawl mihrekkhat pawlcu zo annsi ti theih theilo ding khawpih kangsiat an tamtuk ruangah an hmin leh an sinak thei fiangtheilo mi tamzet an um tiah asim in mipa maw nunau ti theihtheilo mi hman tampi an um tiah asim. 

Michael Phelps In Rit Theih Thil A Fawp 

US ramih tidai leuh thiam leh cak hminthang nikum Beijing Olympic Gold Medal 8 latu Michael Phelps, kum 23 micu. Rit theihthil a fawhlai zuk thehdarh asi ruangah thubuai tuahsak asiih. Asinan South Corolina Sheriff cun a thubuai tuahsak sal lo ding tiah a sim. Micheal Phelps hi  US Swimming thu neitu pawlcun thlathum an rak cawlter zo ih. Micheal Phelps cun tikcu can khirhkhan leh harsa a tawnmi pawlcu ni-in a liampi zik tiah asim ih thil sual a titum nawnlo thu khal a simcih. 

British thuthangca pakhat cun  Micheal phelps, ih rit theihthil a fawhlai zukhi Olympic Gold Medal 8 a lakhnu thlathum ih lakmi asi tiah asim. Micheal Phelps hin rit theihthil a ti leh ti locu a rello ih.   Rechland County Sheriff, leon lott cun Association Press hnenah cun thubuai tuahsak dingih nawrci cu asilo nan  a thilti micu zinzawi vivo a tul asi tiah asim. Micheal Phelps hi US rampi cawisang tu leh mipi ih ngaihsang zetmi si hman sehla  dan dinglai tlunih ummi asi cuanglo ruangah  zinzawi a ttul asi a ti.

 

 

 

 

Comments

comments

Comments

%d bloggers like this: