Israel Ram Thar An Din Daan- Dr. Run Bik

Israel Ram Thar An Din Daan

By- Dr. Run Bik | New Delhi

Kan Baibal sungih a nganvekin Israel mi pawl cu Pathian thu ih an um lo ruangah a hmaisa ah Israel ram(Saklam ram) cu BC7 00 hrawng ah Asiria pawl in an lak ih, cuih hnu BC 500 hrawngah Jerusalem telnak Juda ram cu Babylon pawl in an lak leh.

Himi hnu cun Jesuh Krih suah tiang kum malte sunglai lawng Israel pawl cu mah te uk-awknak an nei ih, a tam sawn cu ram dang kut hnuai lawnglawng ah an um. Kan Bawipa Jesuh Krih ih a rak sim cia vekin Jerusalem cu na siat nasa ding a ti vekin AD 70 ah Juda mi pawl ih thate ih an um lo ruangah Rome emperor lal bik cun a fapa Titus Hovin ralkap thawngsawm tampi Juda ram ah a thlah ih, Jerusalem khal cu a bal thluh ih, mi khal thawng tampi an that. Tamzet in an ram an tlansan.

Himi hnu ah an ram cu Rome hnuai thotho ah an um ih, a tangmi pawl in AD 140 ah an hel leh. Rome cun zangfahnak malte hman nei lo in mipi cu a hrem ciam co, an nung um sun pawl khalin an ram an suah san thluh ti theih a si. AD 330 hrawng ih Rome lal Constantine  cu Christian a can tikah mi tampi cun Rome pawl ih Juda Palestine ram ti ih an kawh mi ah khual va tlawng in Jesuh umnak pawl an va zoh theu.

AD 636  ah Arab Muslim pawl in ram thianghlim cu an lak ih hi ram cu Muslim ram ah an tuah. AD 1200 hnu ah Europe ih crusade tuahtu Christian ralkap pawl in kum 150 lai an uk. Cule Arab a si lo nan Muslim a si mi Seujuk, Maamluk pawl tla in an run uk, a netabik ah Muslim tho tho Ottoman Turk pawl in kum 400 lai an run uk.

AD 636 ihsin kum 1300 sung hrawngah a tam sawn cu Muslim pawl in Israel ram hi an run uk. Kum AD1800 ihsin cun Juda mi pawlin leitlun ram dangdang ihsin “kan ram ah kir saal uhsi!” ti politic an run tuah. Juda mi pawl ih an ram an suahsan thluh hnu kum 1700 sung lai ah Palestine ah Juda mi pawl hi malte tal an tang nawn ke maw aw ti hi tuhlan ah rak theih duh mi bik pakhat a si ih, cumi thu ah veikhat cu ziangtiklai khal ih Palestine ih Juda mi 5000 tal an um ringring thu an ngan.

Hminsin: Himi Israel thuanthu hi pe vivo lai dingmi a si.

Comments

comments

4 Comments

  1. Saithantluanga Tuallawt says:

    Bengvar thlak nasa..hun comment bet a cak um viau nan … tawng tam tuk khal hi at kan hlawh mai mai !!!

    Hi te lawng hi Israel PM khan an Minister pakhat kha ” khi tawk ih thlaler (desert) khi hmuan dum mawi zet ah cantir ka duh ” tin a ti ih an Minister cun ” Ka Pu khi tawk ram khi cu a ram leilung a sia tuk e a ti ih an PM cun Minister si tlak na si lo a ti ih a sinak a ban tir an AN TI.

    Israel pawl hi theih ciau vekin kum 2000 lenglo ram nei lo ih ram um an si ih ram neih hlutzia thei bik an si an ti. Ram leilung hi ar hmai tiat khal nei sela tha ten kan humhim ding tin an ti, AN TI.

  2. Saia,

    Cangan mi pauhpauh comment na rak pe thei zel ih mi thuthei tak cu na si.
    Hivek thuthei thei le khawzuam na rak um hi a lungawi um ka ti.

    Na phurzawngtak cahram CT ah pakhat te rak ngan awla a thazet ding ti ah ka ruat.

  3. Saithantluanga Tuallawt says:

    U Pathuam…

    Comment ih ei hawl ka tum…khek khek khek
    Ka commentnak hi ca hram pakhat vekah ka
    ruat men…..pawi maw? Ka theihmi mal lai mi
    in rak thei ve seh ti duhsannak men men a si.

  4. Ka lo uar tuk. Na nun ram hi ka lo daw tuk. A hmun cu ka rel lo dingih na sermon lai ih na tawngkam tuini tiang ih ka hngilh thei lo mi pakhat cu ziang a si ti le thu phan per ih ram dang thlen ka duh lo. Kan lai mi ram dang ih thleng pawl tla hi Pianthar nak nun nei in ram dang thleng thluh thei hai seh la, kan lai miphun hi kan nun a mawi sin sin dingih kan ram nun khal a thang so thei diang na ti mi kha ka hngilh thei lo. Miphun duhdawt tu tak tak na si zia ka hmuh hin mi zohthimtlak zet na si zia hi ka lo suang zet a si. Kan ram le kan mi phun duhdawt cio ding in zum sin sin uh si. Lung awi.

Comments

%d bloggers like this: