Israel Ram Cozah Tuahtu Ding Fiang Hrih Lo

February 13,2009.
By- Khuang Lian Sum
 
US Satellite Leh Russia Satellite Vansang Ah Taih Aw
 
US leh Russia biakpop awknak Satellite pahnih cu  vansangah an ttaih aw ih. Hiti vek thil thleng hi a vawikhat nak asi.  US Company Satellite Iridium cun  Russia Satellite hlun an
hman nawnlo micu   kandung tlawngkai nihnih ahkhan Siberia tlun Km 780 hrawngih sangah a ttaih tiah NASA cun a sim.  Asinan himi hin International Spece  Station a tibuai loih Thlacem lamih boruak lawng kahsuak an tummi khal  a ti buai cuanglo dingtiah mithiam pawlcun an sim.
 
Hi US leh Russia Satellite ttaih aw ahhin  hnawmbal phunphun a darh nasa ih mithiam pawlin an simnakah hi hnawmbal hi zarh ziatsung hrawng simaw cu a reh lawktheilo ding tiah an simbet.   Russia ram Satellite hi Kg, 950 ih ritmi a siih. 1993 kumih an rakkah suakmi asi.  US Satellite hi Kg, 560 ih rit a siih 1997 kumih an rak kahsuak mi asi. kum 1957 ihsin vansangah Satellite hi  6,000 hrawng kahsuak asizo.
 
Israel Ram Cozah Tuahtu Ding Fiang HrihLo
 
Israel ramih Parliament seat 120 um hril awknak cu Party pakhat lawngin Cozah nak tuahthei ding khawpih MP neithei an umlo ruangah. Party dangdang kawmkhawm aw ih Cozah nak tuahtlang tumin Party hotu pawlcu an buai rero. Relzo vekin Israel ramhi Parliament seat 120 a umih  MP seat 61 neibantu in Cozah nak a tuahthei a si.
 
Tui Israel ram hril awknak ah hin Cozah nak kailai tu  Foreign Minister ttuanlai Tzipi Livni, ih hruaimi Kadima party in seat 28 a hmuih. Prime Minister hlun Benjamin Natanyahu, ih kaihhruai Likud, Party ih seat 27 an hmuve ih. Avigdor LieBerman, ih kaihhruai Yisrael Beitenu, Party ih seat 15 an hmuih.  Defence Minister, Ehud Barak, ih hruaimi Labour, Party ih Seat 13 an hmuih. Shas Party in Seat 11 an hmuih.  United Torah Judaism in seat 5 an hmuve. Ziang Party hmanin Cozah nak tuahthei nak seat 61 ih hrek hman an hmubanlo.
 
Hi an hril awknak result pawlhi an ramih thuthangca langsar bik  Yedioth Ahronoth cun an party hruaitu pawlih zukthawn a tarlangih  Politician pawlin an thlir nakah Prime Minister hlun Benjamin Natanyahu, hin Cozah nak a tuahthei sawn mending tiih zumtu khal an tamzet.Yisrael Beitenu, Party hruaitu Avigdor Lieberman cun Right Wing Cozah dingsehla a duhthu a simzo ih. Asinan Party dang khal an ttuampi thei thotho tiah asim. Yisrael Beitenu Party hruaitu Avigdor Lieberman, hi Mizansun ah Kadima, Party hruaitu  Tzipi Livni in a kawm zoih.  Likud, Party hruaitu Prime Minister hlun Benjamin Natanyahu khalin  Avigdor Lieberman, leh Shas Party hruaitu Ei Yishay, khal a kawmcihzo.
 
Kadima Party hruaitu Tzipi Livni in Cozah nak a tuahthei nak dingah cun a policy duhlo zettu Party fate pawl a ttuanpi thei thluh a ttul ding.    West Bank ih an hmelma Palistinian Authority hruaitu pawlcun Israel PM dingah zohman duhhril mi an nei cuanglo ih Asinan Palistinian pawlhnenih rampek duhlotu Party pawlin seat tampi an ngahcu pawi an tithu an sim.  French President Nicolahs Sarkozy cun  Israel ramah ziang party khal dingsuak sehla rualrem nak a beisei thu a sim.
 
Iraq Ah Bomb Puak
 
Mizanzing ah Iraq khawpi  Bagdad ih Bus Station ah a rual awin Bomb vawithum a puakih minung 16 an thiih midang 40 lenglo in hriamhma an pu. hi Bomb puahnak hmunhi Bagdad khawpi ih nisuah naklam  Bayaa ah asiih Shia muslim miphun pawlih umnak hmun asi.
 
Hi Bomb puahnak hmunhi Iraq ralkap leh US ralkap pawlin zohman fehtheilo dingin an kulh lohli ih Bomb puakhi a cahtuk ruangah lamzin kiangkap ih in pawlkhal a hngawr siatthluh tiah AFP News Agency cun asim. Iraq ramah hin Bomb puakleh Do awknak hi a dai vivo thlangtiih ruah asiih. Asinantui naite ihsin  Bomb puakhi a luarsal ciamco ih minung tampi in an thihphah salbet. Hi Bomb puah rero ttheutu pawlhi Al-Qaida pawl an si zum a siih Iraq ramih  miphun dangdang Shunni, Shia, Kurds, Arabic, pawl karlakih huat awknak tuah an tum vivo ih zum asi.   US Cozah in Iraq ihsin a ralkap hnuhkir salih Afghanistan ih Al- Qaida pawl naszet ih do a tum ruangah Iraq ah hin Al-Qaida pawlin buainak tuah sinsin hi an tum asi tiah Iraq cozah thu puangtu cun asim.

Comments

comments

Comments

%d bloggers like this: