Israel Ralkap Pawlin Palestinian An Kap Bet Sal

Theihcia zo vekin a liamcia ni 4 ihsin Israel leh Gaza ih Palestinian pawlcu an kapaw rero zoih, Cumi hnuah mizan zingah khan Isreal ralkap pawlin raldo nak Vanzam hmangin Gaza ih Palestinian Tapung Hamas pawlcu an kapsalih Hamas minung 2 an thi ih,Civil mi minung 25 in hriamhma an tuar.Israel ralkap pawlin Palestinian pawl an kahbet sal naksanhi mizan zing khawvang hlante ah Palestinian Hamas pawlin Israel pawlih umnak Rocket hmangih voi 2 an kah ruangah Israel mi minung 1 a thiih midang 3 in hriamhma an tuar.Himi hnuah Israel ralkap pawlcu raldo nak vanzam thawn an poksuakih Vanzam ihsin  voi 6 an kap.

Palestinian  Tapung Hamas ihsi phirpeng pawl 2  Islamic Jihad leh Popular Resistance Committee pawlcun  kandung zarh tlawngkai ni 5 ih Israel ramsungih rocket kaplut tu an si thu an simih, hiti vekih  phuba lakton awknak rero ruangih buainak suak mihi tireh tumih Egypt Cozah hotu pawl khalin lamzin an hawl rero tiah Hamas hotu, Ismail Hamiyeh cun a simih, Asinan Hamas pawlcun Israel thawi an karlak buainak tireh dingcun Israel in Vanzam hmangih Palestinian pawl a kah ringring mihi an ban hmaisak a tul tiah an sim.

Himi laiah Israel Defence Minister, Ehud Barak cun  Palestinian pawlthawi an karlak buainak cu cuti menmen ih  tireh theih asilo ih Ni tamzet a duh laiding tiah asim. Israel Prime Minister, Benjamin Natanyahu khalin  Rocket hmangih Israel ram leh mipi kaptucu Israel in kutbawmin a zoh menlo dingih an duhnak hnakih nain Israel cun a kapveding a si a ti.

Tui naite ni 4 sungih Israel leh Palestinian karlak buainak ruangah Israel ralkap kut tuarin Palestinian pawl minung 20 an thizo ih Palestinian pawlih kut tuarin Isreal minung 1 a thiih Palestinian pawlin Israel ram sungah rocket voi 40 lenglo an kaplut  ih mihi sungah Isreal ralkap pawlin  Palestinian  pawlih rocket hi  32 an kahthlak sak.

Somalia Ram Ah Al- Shabab Tapung leh Ethiopia  Ralkap An Kap Aw

Somalia ramih Gedo ram tthen Yurkud khuah Al-Shabab Tapung pawl leh Ethiopia ram ralkap pawlcu naizi 3 sung an kapaw ih Ethiopia ram ralkap 73 an thiih, Al- Shahbab Tapung 130 an thi tiah theih a si. Al- Shahbab Tapung thupuangtu, in a sim nakah Yurkud khua la dingih an siim nakah Ethiopia ralkap 73 an thiih meithla 20 an laksak thu a sim.

Himi laiah Gedo Governor, Abdifatah Mohamed Ibrahim Gesey cun  Al- Shahbab Tapung leh an ralkap pawl an kahawk nakah tapung 130 kahthat an si tiah a simve.

Rel ttheuzo vekin Somalia ramhi kum 1991 ih an President, Mohamed Siad Barre an hlawnthlak ihsin  Al- Shahbab Tapung pawlin an tibuai ringringih Cozah  hngetkhoh khal dingsuak theilo in rethei zetih um an siih, tuah Somalia ram Cozah thu neitu leh khawthlang ram hruaitu pawlih remti nak vekin  African Union Member ram ralkap pawlin  Tapung pawlhi nasazetin an do rero laiih, tui kandung naite khalah  Uganda leh Burundai ram ralkap pawlin  Al- Shahbab Tapung pawlhi an khawpi Moggadishu ihsin an dawiusakih Kenya ralkap pawl khalin an khawpi thlanglam ihsin tapungb pawlhi an kulh ve hai.

(Visited 94 times, 1 visits today)

Comments

comments

Comments

%d bloggers like this: