Israel Le Hamas

January 13, 2009.
by-Pasum
 
Israel leh Hamas
 
Israel  leh Hamas pawl do awknak cun zia umlam a panthei cuang talo. An do awknak hi ni 18 a kim thlangih Palestinian minung 930 an thizo ih. minung 4,200  in hriamhma an tuar ih cumi sungah 277 cu nauhak an si.  Israel cun raldo nak vanzam Jet, leh Helicopter cun missile thawn nasa zetin Gaza cu a kap rero.  Hamas pawlkhalin nasa zetin ttan an rakla ve ih Israel ram thlanglam ah Rocket an kaplut rero ve. Israel cun Gaza hi nasa zetih nawr vivo a tumih a tawptiang a thlenhlan cu nawr vivo a tumthu a puang.
 
UN in Ceasefire tuahdingih thu a pekmi cu Israel cun  eel thla bepbep zoih. Israel Prime Minister Ehud Olmert  office ihsi thusuah mi ah Israel ralkap pawlin Gaza an nawr vivo nakhi UN thupek nak ruangah a cawl cuanglo dingih. Israel cun a ram ti le khua hrangih thilttul a timi cu a tuah vivo ko ding a ti , Himi thu ah zohman in Israel tlunah thu neihnak an neilo ih zohman ih thupek theih khal kan si fawnlo an ti.  Israel cozah thu puangtu Mark Reger khalin Hamas pawlin Rocket hmangih Israel an kah rero laiah kut hmaibawmih rakzoh men dingah zohman in Israel hi an phut ding asilo a ti. Hamas pawlhin tuisun tiangah Israel ram sungah Rocket 700 lenglo an kaplut vezo, ih Israel hi Minung 18 an thi tiah puan asiih himi hi Gaza bialsungah Media pawl an luh theilo ruangah a dik leh diklo theih fiang asilo..
 
Relzo vekin Israel leh Hamas pawlhi Ceasefire tuahdingin UN Security Council member 15 sungah 14 in lungrual zetin an paas ih duhlo lam ih vote tla a umlo  US lawngin himi thu ah a hnamhnawih awklo thu a sim. Hamas hotu pawlkhalin himi UN in ceasefire tuahdingih thu an pass mihi a hna a tlak lemlo thu a sim  an maipawl rawnnak umlo ih thil tuahmi asi ruang ah Ceasefire tuahding cu an thinlung ih a langlemlo thu an simve.
 
Palestinian Authority President Mahmoud Abbas cun  Egypt President Hosni Mubarak thawi Cairo khawpi ih an biakawk hnu ah Egypt tumtah vekin Israel leh Hamas pawlcu Ceasefire tuahdingin an ngen nan. Abbas hi Hamas pawlih huat bikmi ral Fatah hotu asi ruangah Gaza bialah thu neihnak a neilo.  UN Secretary General  Ban Ki-Moon khalin Israel Prime Minister Ehud Olmert cu Phone in a bia ih Gaza buainak a rehthei lo ruangih a thinhar thu khal a sim.  White House thu puangtu Scott Stanzel cun Hamas pawlin Roket hmangih Israel an kahnak an colhsan lo asi ah cun  hi doawknak hi a cem dahlo ding atiah a sim.
 
Israel cun a ralkap Commando pawlcu do awknak ih fehthei dingin a timtuah ter thluhzo ih. Israel ralkap  Southern Command hotu Yoau Galant khalin Commando ralkap pawlcu a zoh fel thluhzo.
 

Comments

comments

Comments

%d bloggers like this: